కళాసేవ అనేది ఓ ట్రాష్… ఇక్కడేదీ ఉచితం కాదు… నేనూ డబ్బిస్తేనే నటిస్తా…

‘నేను డబ్బు కోసం సినిమాలు చేయడం లేదు. తృప్తి కోసం చేస్తున్నాం’ అనేది అబద్ధం. ఎవరూ ఎవరికీ ఇక్కడ ఏదీ ఉచితంగా చేయరు. ఏదైనా ఉచితంగా చేసినా, అందులో ఏదో ఒక లాభం ఆశిస్తారు. సినిమా అనేది పక్కా వ్యాపారం. ఎవరూ ఇక్కడ కళాసేవ చేయడానికి రాలేదు‌. డబ్బు అనేది లేకపోతే ఎవరూ ఎవర్నీ సరిగా గుర్తించరు. గౌరవించరు. మీకొక ఉదాహరణ చెప్తాను.

చాన్నాళ్ల క్రితం నటి గౌతమి, నేను కలిసి ఒక సినిమాలో నటించాం. ఆ సినిమా నిర్మాత గారి భార్య అప్పుడప్పుడూ సెట్‌కి వచ్చేవారు. చాలా సౌమ్యంగా ఉండేవారు. భోజనం చేశారా అని అడిగితే “ఆయన తిన్నాక తింటాను” అనేవారు. ఏది మాట్లాడాలన్నా తన భర్త అనుమతి కోసం చూసేవారు.

కొద్ది రోజులకు ఆ నిర్మాత చనిపోయారు. ఈ విషయం తెలిసి నేనూ, గౌతమి వెంటనే వాళ్ల ఇంటికి వెళ్లాం. అందరూ ఏడుస్తున్నారు. నిర్మాత గారి భార్య మౌనంగా కూర్చుని ఉంది. ఆమెను ఎలా ఓదార్చాలో అర్థం కాలేదు. ఆమె పక్కకి వెళ్లి భుజం మీద చెయ్యి వేసి ఓదార్చాలని చూశాను. వెంటనే ఆమె తన భర్తను గట్టిగా ఒక బూతు తిట్టి, “ఈ పాపిష్టోడు డబ్బంతా ఎక్కడ పెట్టాడో చెప్పకుండానే పోయాడే” అని అరిచింది.