భేష్ బన్నీ… కథ, పాత్ర, వేషం ఎంతగా మూలాల్లోకి వెళ్తే… అంతగా లైఫ్ కనిపిస్తుంది…

 రిషబ్ శెట్టి చెప్పినట్టుగా…. మోర్ రీజనల్, మోర్ యూనివర్సల్ అనే కోణంలో పరిశీలిస్తే… ఈ వేషం ఏమిటి..? ఒక్కసారి ChandraSekhar Reddy Thimmapuram ఫేస్‌బుక్ పోస్టులో వివరాలు పరిశీలించాలి… ‘‘బయటి జనాలంతా ఈ లుక్ చూసి షాక్ అయి ఉంటే.. మా చిత్తూరోళ్లందరూ భలే మురిసిపోయి ఉంటారు. ఎందుకంటే బన్నీ లుక్ మా చిత్తూరు కల్చర్‌తో ముడిపడ్డది కాబట్టి. బన్నీ ఏదో హిజ్రా వేషం వేశాడని వేరే వాళ్లు అనుకుని ఉంటారు కానీ.. వాస్తవానికి ఇది చిత్తూరు జిల్లాలో జరిగే ప్రధాన పండుగల్లో ఒకటైన గంగ జాతరతో ముడిపడ్డ వేషం.

గంగ జాతరపుడు మగాళ్లు ఇలా ఆడవాళ్లలా చీరలు కట్టుకుని.. లిప్ స్టిక్, నెయిల్ పాలిష్ లాంటివి వేసుకుని సింగారించుకోవడం ఇక్కడి సంప్రదాయం. ఇలా అలంకరించుకుని గంగమ్మ గుడి చుట్టూ ఉట్టి మోసి, చివర్లో దిష్టి తీసి పగలగొడతారు. పిల్లలు ఇంకా రకరకాల వేషాలు కూడా వేస్తారు. ఈ సంప్రదాయం వెనుక పెద్ద కథ ఉంది.

వందల ఏళ్ల కిందట తిరుపతి, చుట్టు పక్కల పల్లెటూళ్లను పాలెగాళ్లు పరిపాలించే వాళ్లు. ఆడపిల్లల్ని వేధిస్తూ.. వాళ్ల మాన ప్రాణాలను దోచుకునే ఈ పాలెగాళ్ల నుంచి కాపాడ్డానికి గ్రామ దేవత అయిన గంగమ్మ పుడితే.. ఒక వయసు వచ్చాక ఆమె మీద కూడా కూడా వాళ్లు కన్నేస్తారు. గంగమ్మ వాళ్లను సంహరించడం మొదలుపెట్టే సమయానికి అందరూ అడవుల్లోకి పారిపోతారు. వాళ్లను బయటికి రప్పించడం కోసం మగాళ్లు గంగమ్మలాగా వేషం వేసి ఏడు రోజుల పాటు జాతర చేస్తారు.

వాళ్లను చూసి గంగమ్మే అనుకుని పాలెగాళ్ల గుంపంతా బయటికి వచ్చాక గంగమ్మ ఉగ్రరూపం దాల్చి వాళ్లను సంహరిస్తుంది. ఇదీ ఈ ప్రాంతంలో ప్రచారంలో ఉన్న కథ. ఈ సంప్రదాయాన్ని ఇప్పటికీ కొనసాగిస్తూ గంగమ్మ వేషం వేస్తామని మగాళ్లు మొక్కుకోవడం.. ఏప్రిల్, మే నెలల్లో జరిగే జాతరలో మొక్కులు తీర్చుకోవడం ఈ ప్రాంతంలో ఆనవాయితీ. తిరుపతి మాత్రమే కాదు మా జిల్లాలో మరి కొన్ని ప్రాంతాల్లో కూడా ఈ సంప్రదాయం ఉంది. (చిత్తూరులో అయితే దవడల్లో, ఒంటి మీద శూలాలు పొడుచుకుని ఊరేగింపుగా వెళ్ళే సంప్రదాయం కూడా ఉంది. ఇది తమిళనాడు నుంచి వచ్చిన కల్చర్)