.
Subramanyam Dogiparthi…. 1980 లో మహిళలకు నచ్చిన చిత్రం . వారు మెచ్చిన 1+2 సినిమా . తమిళంలో హిట్టయిన Ninaive Oru Sangeetham అనే సినిమాకు రీమేక్ 1988 ఫిబ్రవరిలో వచ్చిన ఈ దొంగపెళ్ళి సినిమా . తమిళంలో విజయకాంత్ , రాధ నటించారు …
ఆనం గోపాలకృష్ణారెడ్డి నిర్మాతగా రవిరాజా పినిశెట్టి దర్శకత్వంలో వచ్చిన ఈ దొంగపెళ్ళి సినిమా కధ ఏంటంటే… ఓ గ్రామంలో శోభనాద్రిలాంటి సోగ్గాడు ఉంటాడు . అతనికి ఓ మంచి అక్క , ఓ బేవార్స్ బావ , ఓ అందమైన మేనకోడలు ఉంటారు . మేనకోడలు మేనమామ మీద మనసు పారేసుకుంటూ ఉంటుంది .
Ads
ధనాలున పట్టణం నుంచి టీకాలు వేయటానికి ఓ డాక్టరమ్మ వస్తుంది . ఆమెకు మన సోగ్గాడికి ముందు ఘర్షణలు అయినా సరే, తర్వాత ప్రేమ చిగురించి, పెళ్లి చేసుకోవటానికి సిధ్ధపడతారు . మేనకోడలు మోసం చేసి తాళి కట్టించుకుంటుంది . మేనమామకు కోపం వచ్చి దూరంగా ఉంటాడు .
డాక్టరమ్మ సోగ్గాడికి నచ్చచెప్పి పెళ్ళయిన జంటను దగ్గరకు చేరుస్తుంది . కానీ ఆమెకు బ్రైన్ ట్యూమర్ కావటంతో ఆమె పాత్ర ముగియవలసి వస్తుంది . చనిపోతూ డాక్టరమ్మను సోగ్గాడిని కలిపి నిష్క్రమిస్తుంది . ఇలాంటి సోగ్గాడి పాత్రలు శోభన్ బాబుకు కొట్టిన పిండేగా . బాగా నటించారు .
మేనకోడలుగా విజయశాంతి , డాక్టరమ్మగా సుమలత చాలా అందంగా , చాలా బాగా , పోటాపోటీగా నటించారు . అక్కాబావలుగా అన్నపూర్ణ , గొల్లపూడి మారుతీరావు బాగా నటించారు . ఇతర ముఖ్య పాత్రల్లో గిరిబాబు , సుత్తి వేలు , ఆలీ , వై విజయ , నర్రా , ఈశ్వరరావు , ప్రభృతులు నటించారు … (వై విజయ ఉండాల్సిందే కదా ప్రతి సినిమాలో అప్పట్లో…)
చక్రవర్తి సంగీత దర్శకత్వంలో పాటలు థియేటర్లో బాగుంటాయి . వేటూరి , సి నారాయణరెడ్డిలు వ్రాసిన పాటల్ని బాలసుబ్రమణ్యం , సుశీలమ్మ , జానకమ్మ , చిత్ర శ్రావ్యంగా పాడారు . శోభన్ బాబు , సుమలత మీద చిత్రీకరించబడిన మనసెవరో అడిగారు పాటను బాలసుబ్రమణ్యం , జానకమ్మ చాలా శ్రావ్యంగా పాడారు .
ప్రేమ కన్ను కుట్టి పోయిందమ్మా , వెన్నెల్లో పక్కనుంటే చందమామ , చిన్నట్టు పెద్దట్టు డ్యూయెట్లు శోభన్ బాబు , విజయశాంతి మీద హుషారుగా ఉంటాయి . వెన్నెల్లో పక్కనుంటే చందమామ చివర్లో విషాద గీతంగా కూడా వస్తుంది . రవిరాజా పినిశెట్టి పాటలను బాగా చిత్రీకరించారు .
సినిమాలో అన్నపూర్ణ పాత్ర , ఆమె నటన రెండూ గొప్పగా ఉంటాయి . బేవార్స్ మొగుడికి విధవగా దుస్తులు మార్చుకుని వచ్చే సీనులో గొప్పగా నటించింది . సత్యానంద్ డైలాగులను బాగా వ్రాసారు . సినిమా యూట్యూబులో ఉంది . పూర్తి సంసారపక్ష సెంటిమెంటల్ 1+2 సినిమా . ఇంతకుముందు చూడనట్లయితే చూడవచ్చు . చూడబులే .
నేను పరిచయం చేస్తున్న 1168 వ సినిమా . #తెలుగు_సినిమాల_సింహావలోకనం #సినిమా_కబుర్లు #తెలుగుసినిమాలు #సినిమా_స్కూల్ ….
Share this Article