ఈ పాటలో దొరతనం వేరు… ప్రణయభావంతో దొరసాని వగలు…

1. సాహిత్యం: పగలైతే దొరవేరా రాతిరి నా రాజువురా…..ఇక్కడ దొర అంటే ఇంజనీర్… చాలా పల్లెటూర్లలో ఆఫీసర్స్ ను దొర అంటూంటారు. ఇంకొక అర్ధం ఇక్కడ సూర్యుడు అని కూడా అనుకోవచ్చు. రాజు అంటే చంద్రుడు అనే అర్ధం కూడా ఉంది. అంటే పగలు నువ్వు బయట అందరికీ దొరవే కావచ్చు కానీ రాత్రి నాకు రాజువి అంటే చంద్రునివి అని అర్ధం. అందుకే అతను పక్కన ఉంటే ప్రతి రాత్రి పున్నమి అని అంటున్నది నాయిక.

పగలైతే నాలో నీ సొగసంతా దాగేరా

రేయైతే వెన్నెలగ బయలంత నిండేరా…… చంద్రుడు పగలంతా సూర్యుని కిరణాలు తీసుకుని రాత్రికి వెన్నెలను ఇస్తుంది. పగలు భర్త సొగసు అనే కిరణాలను దాచుకుని రాత్రికి వెన్నెలను భర్త మీద కురిపిస్తుంది.

నే కొలిచే దొరవైనా నను వలచే నా రాజువే

కలకాల మీలాగే నిలిచే నీదాననే…..నేను నిన్ను దొర అని కొలుస్తున్నాను కానీ నువ్వు నన్ను వలచే చంద్రునివే. మనం కలకాలం అంటే సూర్య చంద్రులు ఉన్నంత వరకూ నేను నీ దాన్నే అని నాయిక అంటున్నది.

2. సంగీతం: పల్లవిని యమన్ రాగంలో స్వరపరిచారు రాజేశ్వరరావు గారు. యమునా తీరంలో రాధాకృష్ణులు తిరుగాడిన ఫీల్ వస్తుంది. మొదటి చరణాన్ని కాపి రాగంలో, రెండవ చరణాన్ని అభేరి రాగంలో స్వరపరిచారు రసాలూరు వారు.

3. నటన: వాణిశ్రీ, శోభన్ బాబులు అప్పుడప్పుడే పైకి వస్తున్నారు. నటనకు పెద్దగా అవకాశం లేని సన్నివేశ ప్రాధాన్య గీతం ఇది.

********

చిత్రం : బంగారు పంజరం (1969)

సంగీతం : ఎస్. రాజేశ్వరరావు

సాహిత్యం : దేవులపల్లి

పగలైతే దొరవేరా

రాతిరి నా రాజువురా

రాతిరి నా రాజువురా…

పక్కనా నువ్వుంటే

ప్రతిరాత్రి పున్నమి రా

పక్కనా నువ్వుంటే

ప్రతిరాత్రి పున్నమి రా

పగలైతే దొరవేరా

రాతిరి నా రాజువురా

రాతిరి నా రాజువురా…