పాకిస్థాన్ దివాలా… ఐఎంఎఫ్ అప్పు రాదు… పీవోకే స్వాధీనానికి ఇదే తరుణం…

మరీ ముఖ్యంగా డొనాల్డ్ ట్రంప్ అధ్యక్ష పదవి నుండి దిగిపోగానే అప్పటి వరకు సాఫీగా సాగిపోతున్న మన దేశ స్నేహ సంబంధాలు ఒక్కసారిగా కుదుపుకి లోనయినా వెంటనే సర్దుకున్నాయి. వామపక్ష భావాలు మెండుగా కలిగివున్న వారిని జో బిడెన్ తన చుట్టూ చేర్చుకున్నాక కొంత అసౌకర్యంగానే మన దేశంతో సంబంధాలు కొనసాగినా చైనాతో వైరం వల్ల మనతో సఖ్యతగా ఉండక తప్పని పరిస్థితి ఆమెరికాది !

ఇక 2022 ఫిబ్రవరి నెలలో పుతిన్ ఉక్రెయిన్ మీద స్పెషల్ ఆపరేషన్ పేరుతో యుద్ధాన్ని మొదలుపెట్టడం వలన మళ్ళీ సున్నితమయిన స్థితిలోకి వెళ్ళిపోయాయి మన దేశ సంబంధాలు అటు యూరోపుతో పాటు ఇటు అమెరికాతో కూడా! ఎలాగయినా మన దేశంతో రష్యా ఉక్రెయిన్ ఆక్రమణ మీద ఒక ప్రకటన చేయించాలి అని చూసిన అమెరికా మరియు యూరోపు దేశాలకి ఆశాభంగం కలిగింది.

అఫ్కోర్స్ జై శంకర్ వాగ్ధాటి ముందు యూరోపియన్, అమెరికన్, ఆస్ట్రేలియన్ జర్నలిస్టులకి మారు మాట్లాడే అవకాశం లేకుండా పోయింది. కొన్నిసార్లు అయితే విదేశీ జర్నలిస్టులు జై శంకర్ ని అడిగిన ప్రశ్నలకి, ఆయన నుండి వచ్చిన సమాధానాలతో టాపిక్ డైవర్ట్ చేసుకోవాల్సి వచ్చింది. సాధారణంగా విలేఖరులు వేసే ప్రశ్నలకి సమాధానం చెప్పలేక రాజకీయ నాయకులు టాపిక్ మళ్లించే ప్రయత్నం చేస్తారు కానీ అదే జై శంకర్ విషయంలో రివర్స్ అయిన సందర్భాలు చాలానే ఉన్నాయి.

గత కొంత కాలంగా దక్షిణాసియాలో చైనాకి వ్యతిరేకంగా పనిచేయగలిగిన దేశాల కోసం అమెరికా వెతుకుతున్నది. అయితే పాకిస్థాన్ ఆ లిస్టులో ఉన్నా ఇప్పటికే CPEC విషయంలో పీకలలోతు అప్పులలో మునిగిపోయి ఉన్న పాకిస్థాన్ చైనాని కాదని తమ వైపు మొగ్గు చూపుతుంది అన్న ఆశ లేదు. కానీ IMF నుండి అప్పు తీసుకోవడానికి పాకిస్థాన్ చేస్తున్న ప్రయత్నాలని తనకి అనుకూలంగా మార్చుకోవాలని చూసింది అమెరికా. అందుకే IMF చేత ఋణం మంజూరు చేయిస్తామనే హామీ ఇచ్చి కొన్ని కఠినమయిన షరతులని విధింపచేసింది అమెరికా. దానిలో భాగంగానె పెట్రోల్, డీజిల్, విద్యుత్ లాంటి ప్రాధమిక అవసరాల మీద భారీగా పన్నులు విధిస్తేనే అప్పు విషయంలో మాట్లాడడానికి అంగీరిస్తాం అని IMF చేత చెప్పించింది అమెరికా. పాకిస్థాన్ ఆ పని చేసి సంవత్సరం అవుతున్నా IMF తో ఒప్పందం ఖరారు కాలేదు ఇప్పటివరకు. ఇక శ్రీలంక కంటే ఘోరంగా దెబ్బ తిన్న పాకిస్థాన్ ఆర్ధిక వ్యవస్థని చూసి చైనా మెల్లగా పక్కకి తప్పుకుంది అప్పు విషయంలో! అమెరికా పని సులువుగా అయిపోతుంది అనుకుంటున్న తరుణంలో జై శంకర్ చాణక్యం వల్ల పాకిస్థాన్ మళ్ళీ చైనా ఉచ్చులో పడి అమెరికా నుండి దూరం జరిగింది!

రెండు రోజుల క్రితం గోవాలో జరిగిన షాంఘై కొఆపరేషన్ ఆర్గనైజేషన్ [Shanghai Co operation Organization – SCO] లో వేదిక మీదనే EAM జైశంకర్ ‘ఆక్రమిత కాశ్మీర్ ని ఎప్పుడు ఖాళీ చేస్తున్నారు ‘ అంటూ సూటిగా పాక్ విదేశాంగ మంత్రి బిలావల్ భుట్టోని నిలదీయడం సంగతి తెలిసిందే !

అయితే పాకిస్థాన్ చేరుకున్న తరువాత బిలావల్ భుట్టో గోవాలో జరిగిన విషయం మీద తన సహచరులతో ఆవేదన వెళ్ళగక్కుకున్నాడు! 6th May న చైనా విదేశాంగ మంత్రి Qin Gang [కిన్ గాంగ్ ] హుటాహుటిన ఇస్లామాబాద్ చేరుకున్నాడు ఎలాంటి ఆహ్వానం లేకుండానే ! పాక్ ప్రధాని షెహబాజ్ షరీఫ్ మరియు బిలావల్ భుట్టో కలిసి చర్చలు చేశాక ఒక సంయుక్త ప్రకటన విడుదల చేశారు. ‘’ కాశ్మీర్ సమస్య ఐక్యరాజ్య సమితి తీర్మానం మరియు ద్వైపాక్షిక చర్చల ద్వారానే పరిష్కారం కావాల్సి ఉంటుంది ‘’ ఇదీ ఆ ప్రకటన సారాంశం!

జై శంకర్ వ్యూహం ఫలించింది ! కలుగులో ఉన్న పందికొక్కు బయటికి వచ్చింది పొగ పెట్టగానే ! జై శంకర్ కాశ్మీర్ విషయంలో చేసిన వ్యాఖ్య వెనుక రెండు ఉద్దేశ్యాలు ఉన్నాయి.

1. POK స్వాధీనానికి ఒకవేళ భారత్ ప్రయత్నిస్తే పాకిస్థాన్ కి సపోర్ట్ గా చైనా వస్తుందా లేదా అనే సందేహాన్ని నివృత్తి చేసుకోవడానికి.

2. IMF బెయిల్ అవుట్ ప్యాకేజీ కి బ్రేకులు వేయాలంటే పాకిస్థాన్ మళ్ళీ చైనాకి దగ్గర అవ్వాలి. ఆ పని మొన్నటితో అయిపోయింది.

3. తన వైపు మళ్ళీ మొగ్గు చూపితే IMF చేత అప్పు ఇప్పించడమే కాకుండా పాక్ సైన్యానికి మళ్ళీ అధునాతన ఆయుధాలు ఇవ్వడానికి అమెరికా సిద్ధంగా ఉంది ! ఇది తెలిసే SCO వేదిక మీద జై శంకర్ ఘాటుగా మాట్లాడారు.

4. పాకిస్థాన్ అడక్కుండానే చైనా హుటాహుటిన పాకిస్థాన్ కి అండగా నిలిచింది కానీ అది పరోక్షంగా పాకిస్థాన్ కే నష్టం కలుగచేసినట్లయింది !

5. ఇప్పుడు పాకిస్థాన్ కి IMF అప్పు ఇవ్వదు, ఇంకో దేశాన్ని ఇవ్వనివ్వదు. అలా అని చైనా $7 బిలియన్ డాలర్లు అప్పుగా ఇస్తుందా అంటే అదీ ఉండదు!

6. తమ నిబంధనలని పూర్తిగా అమలుచేయనందున పాకిస్థాన్ కి ఇవ్వజూపిన బెయిల్ అవుట్ పాకేజీని నిలిపేస్తున్నట్లుగా ఐఎంఎఫ్ ప్రకటించింది !

7. IMF ఇవ్వజూపిన ప్యాకేజీని ఆశగా చూపించి ఉక్రెయిన్ కి రెండు రవాణా నౌకల నిండా యుద్ధ టాంకుల విడిభాగాలతో పాటు వాటిలో వాడే షెల్స్ ని కూడా సప్లై చేసింది పాకిస్థాన్ ! అమెరికా ప్రోద్బలం వల్లనే పాకిస్థాన్ ఈ పని చేసింది.

8. ఉక్రెయిన్ కి ఆయుధాల సరఫరా మీద ఆగ్రహించిన పుతిన్ తాను గతంలో ఇస్తానన్న గోధుమల సరఫరాని మధ్యలోనె ఆపేశాడు పాకిస్థాన్ కి !

ఒకసారి మహా భారతంలోని విరాట పర్వంలోని ఒక ఘట్టాన్ని గుర్తు చేసుకుంటే .. పాండవులు విరాట రాజ్యంలో ఉన్నారా లేదా అని తెలుసుకోవడానికి దుర్యోధనడు ఒక మల్ల యుద్ధ యోధుడిని అక్కడికి పంపిస్తాడు. ఆ మల్ల యుద్ధ యోధుడిని పోటీలో ఓడించడం ఒక్క భీముడి వల్లనే సాధ్యం అవుతుంది అని తెలుసు. కానీ వలలుడు అనే పేరుతో విరటుని కొలువులో వంటవాడుగా ఉంటున్న భీముడు తప్పని సరి పరిస్థితుల్లో ఆ మల్ల యుద్ధ వీరుడిని చంపేస్తాడు. పోటీకి వెళ్ళిన మల్ల యోధుడు ఎంతకీ తిరిగి రాలేదు మరియు అతనితో పంపించిన గూఢచారులు కూడా వెనక్కి రాకపోవడంతో దుర్యోధనుడు పాండవుల అజ్ఞాతవాసం విరాటరాజ్యంలో చేస్తున్నారు అని ఉత్తర గోగ్రహణానికి పాల్పడతాడు కానీ అప్పటికే పాండవుల అజ్ఞాత వాస సమయం ముగిసిపోవడం జరిగింది.

G20 దేశాల సమావేశాలు ముగిసిన తరువాత శీతాకాలం రాకుండానే భారత్ POK ని స్వాధీనం చేసుకోవచ్చు అనే ఊహాగానాలు ఉన్నాయి చాలా కాలం నుండి. ఎందుకంటే ఇటీవలే పాక్ మాజీ ఆర్మీ చీఫ్ బాజ్వా బహిరంగంగానే పాక్ సైన్యం గురుంచి ఒక తీవ్ర వ్యాఖ్య చేశాడు : పాక్ సైన్యం ప్రస్తుత పరిస్థితుల్లో భారత్ తో తలపడలేదు. కనీసం 3 గంటలకి సరిపడా యుద్ధ టాంకులకి డీజిల్ సరఫరా చేయలేని స్థితి లో ఉంది పాక్ సైన్యం . ఈ వ్యాఖ్య బాజ్వా చేసినా చేయకపోయినా అప్పటికే ఇంటెలిజెన్స్ సమాచారం భారత్ దగ్గర ఉంది కాబట్టే POK స్వాధీనానికి ఇదే మంచి సమయం అని అనుకోని ఉండవచ్చు !

జై శంకర్ వ్యాఖ్య వల్ల పాకిస్థాన్ రెండు విధాలా చెడ్డది ! మరో వైపు POK ని స్వాధీనం చేసుకోవాలి అంటే టూ ఫ్రంట్ వార్ తప్పని సరి అని తెలిసిపోయింది! POK స్వాధీనం ఎప్పుడు అనేదే పెద్ద ప్రశ్న !