.
Subramanyam Dogiparthi ……. నా ప్రియురాలు మీకు భార్య కాగలదు ; మీకు భార్య అయ్యాక నాకు మరలా ప్రియురాలు కాలేదు . ఇది మన సంస్కృతి అనే సందేశాన్ని ఈ సినిమా ద్వారా బాపు అందించారు .
మనకున్న గొప్ప దర్శకులలో బాపు , విశ్వనాథ్ ముఖ్యులు . ఈ రాధా కల్యాణంలో బాపు సందేశం విశ్వనాథ్ సప్తపది సినిమా ద్వారా అందించిన సందేశానికి పూర్తిగా భిన్నం . రాధా కల్యాణం సాంప్రదాయ భావానికి పట్టం కడితే సప్తపది విప్లవ భావానికి అభిషేకం చేసింది .
Ads
Of course . రాధా కల్యాణం బాపు స్వంత కధ కాదు . తమిళంలో సక్సెస్ అయిన భాగ్యరాజా సినిమా అంద 7 నాట్కల్ కు రీమేక్ . సప్తపది విశ్వనాథ్ మానస పుత్రిక . ఆయన భావజాల ప్రతీక .
ఈ భావజాల చర్చ ఎలా ఉన్నా 1981 డిసెంబర్లో వచ్చిన ఈ రాధా కల్యాణం బాపు- రమణ- కె వి మహదేవన్-బాబా ఆజ్మీల మేజిక్ . ఈ సినిమాలో గొప్ప అందగత్తె కాని రాధికను ఓ భిన్న అందంలో అద్భుతంగా చూపిన ఆజ్మీ ప్రముఖ హిందీ నటి షబానా ఆజ్మీ తమ్ముడు .
ఈ సినిమాలో ఆమె అల్లరి అంతాఇంతాగా ఉండదు . వయసులో ఉండే కుర్రాళ్ళకు హుషారు కల్పిస్తే , ముసలోళ్ళకు వయసులో చేసిన చిలిపి పనులు గుర్తుకొస్తాయి .
పాల్ఘాట్ మాధవన్ పాత్రలో చంద్రమోహన్ గొప్పగా నటించారు . తర్వాత శరత్ బాబు . అలాంటి సాఫ్ట్ పాత్రలకు పెట్టింది పేరు . ఇతర ప్రధాన పాత్రల్లో పుష్పలత , కాంతారావు , రాధాకుమారి , రాళ్ళపల్లి , టి రాజేశ్వరి , యం బి కె వి ప్రసాదరావు , రావి కొండలరావు , మాస్టర్ రాజా షరీఫ్ ప్రభృతులు నటించారు . ఈ పిల్లోడు చంద్రమోహన్ అసిస్టెంటుగా బాగా నటించాడు .
కె వి మహదేవన్ సంగీత దర్శకత్వంలో పాటలు శ్రావ్యంగా ఉంటాయి . కొన్నింటిని ఇప్పటికీ ప్రేక్షకులు మరచిపోలేదు . ఒక్క పాట మినహాయించి అన్ని పాటలను సి నారాయణరెడ్డే వ్రాసారు . కలనైనా క్షణమైనా మాయనిదే మన ప్రేమ పాట చాలా శ్రావ్యంగా ఉంటుంది . చాలా అందంగా చిత్రీకరించారు కూడా . జ్యోతిర్మయి వ్రాసిన చేతికి గాజుల్లా కళ్ళకు కాటుకలా పాట కూడా చాలా బాగుంటుంది .
పాలఘాట్ మాధవన్ పాటంటే ధనాధన్ ఛాన్స్ దొరికితే కానా మహదేవన్ చిటికేయవే చినదానా పాట చంద్రమోహన్ , రాధికల మీద చాలా అందంగా చిత్రీకరించారు . మంచి సాహిత్యం . రాళ్ళపల్లి , టి రాజేశ్వరిల మీద పాటలో రాజేశ్వరి అదరగొడుతుంది . ఏం మొగుడో ఏం మొగుడో వద్దంటే వినడేమి ముద్దుల మొగుడు జానపద శైలిలో బాగుంటుంది .
తమిళ సినిమాకు రీమేక్ అయిన ఈ సినిమా అయిదు కేంద్రాలలో వంద రోజులు ఆడింది . శత దినోత్సవ సంబరాలను విజయవాడ అలంకార్లో నిర్వహించారు . కృష్ణ , కమల్ హసన్లు అతిధులు . 1983 లో హిందీలోకి వో సాత్ దిన్ టైటిలుతో రీమేక్ అయింది . అనిల్ కపూర్ , పద్మిని కొల్హాపురి నటించారు .
1989లో కన్నడంలోకి లవ్ మాది నోడ టైటిలుతో రీమేక్ అయింది . కాశీనాధ్ , శ్రీలత నటించారు . ఒరిజినల్ తమిళంలో భాగ్యరాజా , అంబిక నటించారు . అందరి హీరోయిన్లలో రాధికే నంబర్ వన్ .
బాపు మార్క్ క్లాసిక్ . సినిమా , పాటలు యూట్యూబులో ఉన్నాయి . ఇంతకుముందు చూసి ఉండకపోతే తప్పక చూడతగ్గ సినిమాయే . రాధిక అభిమానులయితే మళ్ళా చూడొచ్చు . #తెలుగుసినిమాలసింహావలోకనం #సినిమా_కబుర్లు #తెలుగుసినిమాలు
Share this Article