అప్పుడంటే నడిచింది... ఇప్పుడైతే బాబా మీద ఆ సీన్లు దుమారం రేపేవేమో...

Subramanyam Dogiparthi…. పని రాక్షసుడు NTR 200 వ సినిమా 1970 లో వచ్చిన ఈ సూపర్ హిట్ సినిమా కోడలు దిద్దిన కాపురం . స్టోరీ లైన్ ఆయనే డెవలప్ చేసుకుని , స్క్రీన్ ప్లే వ్రాసుకుని దర్శకత్వాన్ని డి యోగానందుకి అప్పచెప్పారు . 175 రోజులు ఆడింది . ఒకవైపు జనం మెచ్చారు . మరోవైపు విమర్శల దాడులనూ ఎదుర్కొన్నారు . పుట్టపర్తి సాయిబాబా వేషధారణలో ఓ నకిలీ బాబా పాత్ర , మూఢభక్తితో అతని చేత మోసగించబడటం వంటి సీన్ల వలన విమర్శలు వచ్చాయి . ఆరోజుల్లో కాబట్టి విమర్శలతో వదిలేసారు . ఇప్పుడయితే బాయ్ కాట్ పిలుపిచ్చి , మరో పాతిక రోజులు ఆడించేవారు .

ఆయన ఆస్థాన సంగీత దర్శకుడు టి వి రాజు ఆధ్వర్యంలో కొన్ని పాటలు బాగా హిట్టయ్యాయి . ముఖ్యంగా సావిత్రి పాడే *నీ ధర్మం నీ సంఘం నీ న్యాయం మరువద్దు జాతిని నిలిపి … మహనీయులను మరువద్దు* పాట ఇప్పటికీ విద్యాసంస్థల ఫంక్షన్సులో వినిపిస్తూ ఉంటుంది . సి నారాయణరెడ్డి వ్రాసారు ఈ పాటను . మరో పాట నకిలీ బాబా సత్యనారాయణ పాడే పాట . ఓం సచ్చిదానంద నీ సర్వం గోవిందా బాగా పాపులర్ . రేలంగి , కె వి చలం మీద వంటవారి పాట . వంటింటి ప్రభువులం పాకశాస్త్ర యోధులం కూడా .

వాంప్ పాత్ర అయినా విజయలలిత పాట చూడవే చూడు చూడవే ఓయమ్మ చాలా శ్రావ్యంగా ఉంటుంది . క్లాసికల్ నృత్యం కూడా చాలా బాగుంటుంది . బహుశా 1980s వరకు వాంపుల చేత కూడా ఇంటిల్లిపాదీ కలిసి చూడగల చక్కటి నృత్యాలను పెట్టేవారు . ఇప్పుడు టిల్లు లాంటి సినిమాల పోస్టర్లు కూడా చూడలేకపోతున్నాం . ఇది మరో గోల అనుకోండి . మిగిలిన పాటలన్నీ హిట్టయినా అవన్నీ కాస్త రొటీనువే .

సినిమాలో వాణిశ్రీ హీరో పక్కన హీరోయిన్ అయినా , అసలు కధానాయిక సావిత్రే . ఆవిడ , మరిది దిద్దిన జమీందారు గారి సంసారం అన్న మాట . జమీందారుగా నాగభూషణం , నకిలీ స్వాముల్ని సైతం నమ్మే మూఢభక్తురాలిగా సూరేకాంతం , దారి తప్పిన జమీందారు పెద్దకొడుకుగా జగ్గయ్య , ఆయన స్టెప్నీగా విజయలలిత , నకిలీ బాబాగా సత్యనారాయణ , బేవార్స్ ఇంటల్లుడుగా పద్మనాభం , అతని భార్యగా సంధ్యారాణి నటించారు . ఇతర పాత్రల్లో రేలంగి , కె వి చలం , రమణమూర్తి , రాజబాబు , నాగయ్య , త్యాగరాజు ప్రభృతులు నటించారు .

NTR కు ఉత్తమ నటుడిగా , సినిమాకు వెండి నంది పురస్కారాలు లభించాయి . ఉమ్మడి కుటుంబం వంటి గొప్ప సినిమా కాకపోయినా జనానికి బాగా ఎక్కింది . తా వలచింది రంభ ; తా మునిగింది గంగ లాగా జనం మెచ్చిందే హిట్ , సూపర్ హిట్ . ఇప్పుడు మనం ఓట్లు వేస్తున్నట్లే . ఓట్లొచ్చినోడు మహా నాయకుడు , రానోడు అసెంబ్లీకి కూడా రాడు . ఇదే సంగతి . ఇదే సంగతి .

మా నరసరావుపేటలో వెంకటేశ్వర పిక్చర్ పేలసులో చూసా . ఎందుకనో యూట్యూబులో కనిపించలేదు . కొన్ని పాటల వీడియోలు మాత్రం ఉన్నాయి . ఎప్పుడయినా టి విలో వస్తే చూడటమే . #తెలుగుసినిమాలసింహావలోకనం #telugureels #తెలుగుసినిమాలు #telugumovies #telugucinema

Share this Article

Ads