చైనా ఊబిలోకి మరింతగా..! శ్రీలంక మీద కొత్తతరహా సామ్రాజ్యవాదం పడగ..!!

IMF, ADB [Asia Development Bank], జపాన్, చైనా, భారత్ లతో కలిపి శ్రీలంక కట్టాల్సిన మొత్తం అప్పు 58 బిలియన్ డాలర్లు. ఈ మొత్తంలో ఎక్కువ అప్పు జపాన్ కి కట్టాల్సి ఉంది. చైనాకి ఇవ్వాల్సిన బాకీ కింద ఇప్పటికే హంబన్ తోట రేవుని తాకట్టు పెట్టుకుంది 99 సంవత్సరాలకి. భారత్ 5 బిలియన్ డాలర్ల క్రెడిట్ లైన్ ఇచ్చింది, అంటే నేరుగా డాలర్లు కాకుండా భారత్ నుండి చమురు, గాస్, బియ్యం లాంటి నిత్యావసరాలని అప్పు కింద తీసుకోవచ్చు.

శ్రీలంక ప్రజల ఆగ్రహానికి తలవంచి రాజపక్ష కుటుంబం రాజకీయాల నుండి తప్పుకుంటుంది అనుకునే వాళ్ళకి ఆ కుటుంబం కాంగ్రెస్ మార్క్ రాజకీయం చూపించింది శ్రీ లంక ప్రజలకి… మహింద రాజపక్ష ప్రధాని పదవికి రాజీనామా చేయకముందు అధ్యక్ష భవనం ముందు ఆందోళన చేస్తున్న ప్రజలకి వ్యతిరేకంగా రాజపక్ష కుటుంబ అభిమానులను వెయ్యి మంది దాకా అక్కడికి తరలించి తమకి అనుకూలంగా నినాదాలు చేయించింది రాజపక్ష కుటుంబం… కానీ ఆందోళన చేస్తున్న ప్రజలు వెనక్కి తగ్గలేదు… దాంతో మహింద రాజపక్ష రాజీనామా చేశాడు. ఈసారి తన పార్టీలో కేవలం తానొక్కడే చట్ట సభ్యుడుగా ఉన్న రణీల్ విక్రమసింఘేని ప్రధాని పీఠంలో కూర్చోబెట్టాడు గోటబయ రాజకపక్ష ! ఇక్కడ మనం గమనించాల్సింది ఏమిటంటే చాలా చక్కగా ప్రజలని మోసగించాడు గోటబయ. తమ వంశ పాలనకి ఎలాంటి ఢోకా లేకుండా తాను అధ్యక్ష్య పదవిలో కొనసాగుతున్నాడు.

ఇంతకీ రణీల్ విక్రమ సింఘే ప్రధానిగా ఏమి చేయగలుగుతాడు ?

73 ఏళ్ల వయసు గల రణీల్ విక్రమ సింఘేకి 45 ఏళ్ల రాజకీయ అనుభవం ఉంది [మీకు ఎవరన్నా గుర్తుకు వస్తే అది నా తప్పుకాదు ] కానీ రాజకీయ జీవిత రికార్డ్ అంత గొప్పగా ఏమీ లేదు. రాజపక్ష కుటుంబ పాలనకి మద్దతుగా ఉంటాడు తప్పితే చేయగలిగింది ఏమీ ఉండదు. అసలు గోటబయ రాజపక్ష రణీల్ విక్రమసింఘే ని ప్రధాని పదవిలో కూర్చోబెట్టడానికి కారణం ఉంది. 2015-2019 కాలంలో విక్రమసింఘే ప్రధానిగా ఉన్న సమయంలో రాజపక్ష కుటుంబం మీద వచ్చిన అవినీతి, తప్పుడు పనుల మీద విచారణ జరగకుండా అడ్డుకున్నాడు. 4 సార్లు శ్రీలంక ప్రధాని పీఠంలో కూర్చున్నా రెండు సార్లు బలవంతంగా ప్రధాని పదవి నుండి బర్తరఫ్ కి గురయిన చరిత్ర ఉంది. 2004 లో చంద్రికా కుమారతుంగ అధ్యక్షురాలిగా ఉన్న సమయంలో విక్రమసింఘే మొదటిసారిగా ప్రధాని పదవి నుండి బలవంతంగా తొలగించింది. మళ్ళీ 2018 లో మైత్రీ పాల సిరిసేన అధ్యక్షుడుగా ఉన్న సమయంలో బలవంతంగా తొలగించబడ్డాడు ప్రధాని పదవి నుండి… రాజపక్ష కుటుంబ పాలనకి మద్దతుదారుడు విక్రమసింఘే !

ఇంతకీ చైనా పాచిక పారుతుందా ?

భేషుగ్గా పారి తీరుతుంది. ఎలా అంటే : IMF-ఐఎంఎఫ్: శ్రీలంకకి ఉన్న మొదటి ఆప్షన్ అంతర్జాతీయ ద్రవ్య నిధి సంస్థ. ఇప్పటికే ఒక అధికార బృందం అమెరికాలోని IMF ఆఫీసులో తిష్టవేసింది బెయిల్ అవుట్ పాకేజీ కోసం… కానీ IMF బెయిల్ అవుట్ పాకేజీ ఇస్తుందా ? ముందు అడిగే ప్రశ్న ఏమిటంటే, ఎలా తీరుస్తారు అని…!  టూరిజం ఇప్పట్లో పుంజుకునే అవకాశం లేదు, ఎందుకంటే ఐఎంఎఫ్ దగ్గర ఉన్న డాటా ప్రకారం శ్రీలంకకి వచ్చే యాత్రికులలో సింహాభాగం ఉక్రెయిన్, రష్యా, చైనా ల నుండే ! రష్యా, ఉక్రెయిన్ ల నుండి ఇప్పట్లో యాత్రీకులు వచ్చే అవకాశమే లేదు… ఇక చైనా కోవిడ్ తో పోరాడుతున్నది కాబట్టి అవకాశం లేదు… ఇక యూరపు నుండి యాత్రీకులు అసలు రారు ఇప్పట్లో… ఈస్టర్ చర్చిలో బాంబు పేలుడు తరువాత యూరపు నుండి క్రైస్తవ యాత్రీకులు రావట్లేదు శ్రీ లంకకి… శ్రీలంకకి డాలర్ల రూపంలో వచ్చే ఆదాయం ఎక్కువగా టూరిజం వల్లనే. ఇక తేయాకు, ఇతర వస్తువుల ఎగుమతి వచ్చే ఆదాయం తనకే సరిపోతుంది కాబట్టి వడ్డీ కూడా కట్టలేదు. ఐఎంఎఫ్ దగ్గరకి అప్పు కోసం వెళ్ళే ఏ దేశానికి అయినా ఐఎంఎఫ్ పెట్టే షరతు పన్నులు పెంచమని… శ్రీలంక విషయంలో ఐఎంఎఫ్ పెట్టే షరతు ఇప్పుడు ఉన్న పన్నుల మీద మరో 100% పెంచమని అడుగుతుంది… కానీ అది సాధ్యం కానీ పని. మళ్ళీ ప్రజలు రోడ్ల మీదకి వస్తారు.

ఇక రాజపక్ష కుటుంబానికి స్విస్ బాంకుల్లో ఉన్న 18 బిలియన్ డాలర్ల అకౌంట్ గురించి ఐఎంఎఫ్ అధికారులు ప్రశ్నించినట్లు తెలుస్తున్నది. మేము బెయిల్ అవుట్ పాకేజీ ఇస్తే వాటిలో మళ్ళీ రాజపక్ష కుటుంబం స్విస్ బాంకులకి తరలించదు అన్న గ్యారంటీ ఉందా అంటూ ప్రశ్నించినట్లు తెలుస్తున్నది. ఐఎంఎఫ్ నుండి బెయిల్ అవుట్ పాకేజీ వస్తుంది అన్న ఆశ లేదు. పైగా ఇప్పటికే ఉన్న విదేశాల అప్పు తీరిస్తేనే కానీ ఐఎంఎఫ్ అప్పు ఇవ్వదు. ఇంతకీ ఈ రాజపక్ష కుటుంబం స్విస్ బాంకుల్లో డబ్బు జమ చేసిన కాలం ఏంటో తెలుసా ? 2004-2014 ల మధ్య కాలంలో అన్నమాట… ఇక ఆసియా అభివృద్ధి బాంక్ కూడా ఇదే విధంగా స్పందిస్తుంది కాబట్టి అంతర్జాతీయ ఆర్ధిక సంస్థలు అప్పు ఇవ్వలేవు శ్రీ లంకకి. ఇదంతా తెలుసు కాబట్టే వ్యూహాత్మకంగా చైనా పావులు కదుపుతున్నది.

భారత్ మాటేమిటి ?

ఇప్పటికే శ్రీలంకలోని మాజీ మంత్రులు కొందరు భారతదేశాన్ని హెచ్చరించారు కూడా. భారత్ ఎట్టి పరిస్థితులలోనూ శ్రీలంకకి అప్పు ఇవ్వవద్దు అంటూ . దేనికి ? లోపల లోపల ఏం జరుగుతున్నది అన్నది వాళ్ళకి తెలుసు కాబట్టి… రాజపక్ష కుటుంబం శ్రీలంక రాజకీయాలలో ఉన్నంత కాలం వాళ్ళు దోచుకుంటూనే ఉంటారు, స్విస్ బాంకుల్లో నల్ల ధనం పోగు చేస్తూనే ఉంటారు కాబట్టి భారత్ అప్పు ఇచ్చినా లాభం ఉండదు కాబట్టి. అదృష్టవశాత్తూ మన విదేశాంగ విధానం మునుపెన్నడూ లేనంత బలంగా ఉంది. అందుకే నేరుగా డబ్బు రూపంలో ఇవ్వకుండా క్రెడిట్ లైన్ రూపంలో ఇస్తున్నది భారత్.

చైనా ప్రాపగాండా !

వారం క్రితం భారత విదేశాంగ శాఖ మంత్రి జై శంకర్ ట్విట్టర్ లో పోస్ట్ చేసినట్లు ఒక నకిలీ ట్వీట్ సోషల్ మీడియాలో చక్కర్లు కొట్టింది. ఆ ట్వీట్ సారాంశం ఏమిటంటే… భారత్ శ్రీలంకని తనలో కలిపేసుకుంటుంది అనీ, శ్రీ లంక అప్పులు అన్నీ భారత్ తీర్చేస్తుంది అనీ, భారత సైన్యం శ్రీలంకలోకి ప్రవేశించి శ్రీలంకని స్వాధీనం చేసుకొని పరిపాలన చేస్తుంది అనేది ఆ ట్వీట్ సారాంశం. ఇది నేరుగా శ్రీ లంక ప్రజల్లో భారత్ పట్ల ద్వేష భావం పెంచడానికే అన్నది నిజం. ముందుగా శ్రీలంక ప్రజలలో ద్వేష భావనలు రెచ్చగొట్టి, ఆపై భారత్ కంటే చైనానే మేలు అనే భావన కలిగించి అప్పుడు బేరానికి దిగవచ్చు.

ఈ పాచిక పారుతుందా ?

అసలు స్వాతంత్ర్యం వచ్చినప్పటి నుండి శ్రీలంక భారత్ పట్ల ఎప్పుడూ స్నేహభావంతో లేదు. 1971 బంగ్లాదేశ్ విమోచన సమయంలో పాకిస్థాన్ యుద్ధ విమానాలు శ్రీ లంకలో దిగి, అక్కడ ఇంధనం నింపుకొని, తిరిగి బాంగ్లాదేశ్ మీద దాడికి వెళ్లేవి. అప్పట్లో భారత్ అభ్యంతరం చెప్పినా శ్రీలంక అధ్యక్షురాలు సిరిమావో బండారు నాయకే లెక్క చేయలేదు. LTTE ని తుదముట్టించడం వెనుక పాకిస్థాన్ నుండి వచ్చిన హెవీ వేపన్స్ ప్రధాన కారణం. అప్పట్లో మానవ హక్కుల సంస్థలు హెచ్చరిస్తున్నా అమాయకులని కాల్చి చంపించాడు ఇదే రాజపక్ష. పాకిస్థాన్, చైనాలు బాగా సహకరించాయి రాజపక్ష కి. కాబట్టి రాజపక్షతో పాటు శ్రీలంకలోని భౌద్ధ సమాజం భారత్ కి బద్ధ వ్యతిరేకులు. ఇప్పుడు 58 బిలియన్ డాలర్లు చైనా ఇవ్వాలంటే బహుశా కొలంబో పోర్ట్ తో పాటు వెయ్యి చదరపు కిలోమీటర్ల వైశాల్యం కల భూమిని కూడా తాకట్టు పెట్టాల్సి ఉంటుంది శ్రీలంక… అప్పుడే చైనా అప్పు ఇస్తుంది. ఇది భారత్ కి చాలా ప్రమాదకరం. ..ఏదన్నా అద్భుతం జరిగితే తప్పితే (బ్రిటన్ కూడా ఒక ఆట అడుతున్నట్లు సమాచారం…) చైనా నుండి శ్రీ లంకని తప్పించడం అసాధ్యం…