డియర్ స్టార్సూ… ఈ సొసైటీ మీకు కట్టబెట్టిన కోట్లు సరిపోవడం లేదా..?!

.

నిన్న ఓ తెలుగు దినపత్రిక చూస్తుంటే మొదటి రెండు పేజీల్లో తాటికాయంత అక్షరాలతో విలాసం చేరుకుంటుంది ఒక సరికొత్త స్థాయికి అంటూ ఒక రియల్ ఎస్టేట్ సంస్థ యాడ్ లో హీరో వెంకటేశ్ కనిపించారు… ఈ యాడ్ చూడగానే ఎందుకో ఇప్పటి దాకా ఇలా హీరోలు ప్రమోట్ చేసిన వెంచర్లలో ఫ్లాట్లు, లేదా ప్లాట్లు కొని మోసపోయి ఏడుస్తున్న జనాల కన్నీళ్లు గుర్తొచ్చాయి…

ఇక్కడ ప్లాట్ కొనండి… భవిష్యత్తులో కోటీశ్వరులైపోతారు.. ఈ అపార్ట్ మెంట్లో ఫ్లాట్ కొనండి… ఇది నమ్మకానికి అమ్మవంటిది అంటూ సినీ హీరోలు, హీరోయిన్లు, సీరియల్ యాక్టర్లు ప్రమోట్ చేస్తుంటే ఆ యాడ్ చూసి జనం అప్పులు చేసి కొనేస్తున్నారు.. ప్రి లాంచింగ్ ఆఫర్స్ పేరుతో ఆయా రియల్ ఎస్టేట్ సంస్థలు ఇంకా పునాది కూడా తవ్వకుండానే.. ఈ హీరోలతో ప్రమోషన్స్ చేయించి జనాల నుంచి డబ్బులు వసూలు చేసి నిలువునా ముంచేస్తున్నాయి…

తెలుగు సినిమా హీరోలు, సీరియల్ నటులు, యాంకర్లు… వీళ్లందరూ తెరపై కనిపిస్తే జనం గుండెలు చెమ్మగిల్లిపోతాయి. హీరో చూపు, డైలాగ్ డెలివరీ, యాంకర్ యొక్క చమక్కులు— ఇవన్నీ ప్రేక్షకులను కట్టిపడేస్తాయి…

కానీ, ఈ తారలు తెర వెనక ఆడే ఆటలు కొన్ని సార్లు సామాన్యుల జేబులు ఖాళీ చేస్తాయి. రియల్ ఎస్టేట్ సంస్థలకు బ్రాండ్ అంబాసిడర్లుగా మారి, “డ్రీమ్ హోమ్ కొనండి, ఫ్యూచర్ సెట్ చేయండి” అంటూ జనాన్ని ఊరిస్తారు. కానీ, ఆ ఊరింపుల వెనక ఉన్న నిజం తెలిస్తే, కొనుగోలుదారుల కళ్లు చెమ్మగిల్లుతాయి…

మహేష్ బాబు, జగపతి బాబు, వెంకటేష్, నాగార్జున, చిరంజీవి, యాంకర్ సుమ… ఈ పేర్లు చెప్పగానే జనం చెవులు కొరుక్కుంటారు. ఈ స్టార్లు రియల్ ఎస్టేట్ కంపెనీలతో చేతులు కలిపి, “ప్రి-లాంచ్ ఆఫర్, ఇప్పుడే బుక్ చేయండి” అంటూ ప్రచారం చేస్తే, సామాన్యుడు ఎలా నమ్మకుండా ఉంటాడు?

మహేష్ బాబు సాయి సూర్య డెవలపర్స్‌, ఆర్కే వెనుజియా సంస్థలకు బ్రాండ్ అంబాసిడర్ గా పని చేశారు, జగపతి బాబు సాహితీ ఇన్ ఫ్రా సంస్థను ప్రమోట్ చేశారు, వెంకటేష్ కాసాగ్రాండ్‌కు సపోర్ట్ చేస్తే, సుమ రాఖీ అవెన్యూస్‌కు జై కొడితే— జనం ఆ సంస్థలు స్వర్గంలాంటి ఇళ్లు ఇస్తాయని నమ్మేస్తారు. కానీ, ఫలితం? బ్యాంక్ బ్యాలెన్స్ ఖాళీ, కలల ఇల్లు గాల్లో కట్టు!

సాయి సూర్య డెవలపర్స్ కేసులో మహేష్ బాబు మనీ లాండరింగ్ ఆరోపణల్లో చిక్కుకున్నారు. ఈడీ విచారణకు నోటీసులు కూడా జారీ అయ్యాయి. సాయిసూర్య డెవలపర్స్ కోసం మహేశ్ బాబు తన భార్య, పిల్లలతో సహా యాడ్ లో నటించారు.. ఆయన్ని చూసి జనం ఇష్టమొచ్చినట్టుగా ఆ సంస్థలో ఫ్లాట్లు కొనుగోలు చేశారు…

తీరా చూస్తే ఆ సంస్థ ఇంకా జనానికి ప్లాట్లు హ్యాండోవర్ చేయకముందే దివాళా తీసింది.. అంతకుముందు మహేశ్ బాబు మంగళగిరి టోల్ ప్లాజా దగ్గర వేసిన భారీ వెంచర్ ఆర్కే వెనుజియాకు ప్రమోషన్ చేశారు.. మహేశ్ బాబును చూసి చాలా మంది అందులో ఫ్లాట్లకు డబ్బులు కట్టారు.. తీరా చూస్తే అది మూతపడిపోయి జనాల నెత్తిన శఠగోపం పెట్టేసింది…

దీంతో అందులో డబ్బులు కట్టినవాళ్లంతా లబోదిబోమంటున్నారు… సాహితీ సంస్థ, ఆర్కే వెనుజియా, రాఖీ అవెన్యూస్— ఈ కంపెనీలన్నీ కొనుగోలుదారులను మోసం చేసిన ఆరోపణలు ఎదుర్కొంటున్నాయి. ప్రి-లాంచ్ ఆఫర్లలో డబ్బులు కట్టినవారు, ఇప్పుడు కోర్టు చెప్పే న్యాయం కోసం ఎదురు చూస్తున్నారు.

సాహితీ సంస్థకు అన్నీ తానై బ్రాండ్ అంబాసిడర్ గా ప్రమోట్ చేశారు.. జగపతి బాబును చూసి అందులో కూడా చాలామంది డబ్బులు కట్టారు.. తీరా చూస్తే ఆ సంస్థ యజమాని లక్ష్మీనారాయణ బిచాణా ఎత్తేసి పారిపోయారు.. చివరికి అతన్ని పోలీసులు అరెస్ట్ చేశారు కూడా..

అలాగే రాఖీ అవెన్యూస్ సంస్థకు యాంకర్ సుమ ప్రమోట్ చేశారు.. ఆ మధ్య రాజమండ్రిలో రాఖీ అవెన్యూస్ బాధితులంతా సుమ ఫొటోలు పట్టుకుని తమకు న్యాయం చేయమంటూ రోడ్డెక్కి ఆందోళనలు చేశారు.

ఇక్కడ హాస్యాస్పదం ఏంటంటే, ఈ స్టార్లు తమ బ్యాంక్ ఖాతాల్లో కోట్లు వేసుకుని, ప్రమోషన్ చేసిన కంపెనీలు మోసం చేసినా “మాకేం తెలుసు?” అని చేతులు దులుపుకుంటారు. మహేష్ బాబు సాయి సూర్య డెవలపర్స్ నుంచి 5.9 కోట్లు తీసుకున్నట్లు ఈడీ గుర్తించింది…

జగపతి బాబు సాహితీ సంస్థకు మొఖం ఇచ్చి ఎంత తీసుకున్నారో ఎవరికి తెలుసు? వెంకటేష్, సుమ వంటి వాళ్లు కూడా డబ్బు తీసుకుని, జనాన్ని ముంచిన కంపెనీలతో తమకు సంబంధం లేదని సినిమా డైలాగ్‌లా చెప్పేస్తారు. ఇది ఏమిటి స్వామీ, డబ్బు వీళ్ల జేబులో, బాధ జనం మెడలో?

ఒక సినిమా హీరో రియల్ ఎస్టేట్ యాడ్‌లో కనిపిస్తే, అది ఒక స్క్రిప్ట్‌డ్ డ్రామానే. “మీ కలల ఇల్లు ఇక్కడే” అంటూ మహేష్ బాబు స్మైల్ ఇస్తే, జనం ఆ స్మైల్‌కు ఫ్లాట్ అవుతారు. జగపతి బాబు “ఇన్వెస్ట్ చేయండి, ఫ్యూచర్ సెట్” అంటూ గంభీరంగా చెప్పితే, జనం ఆ గంభీరతను బ్యాంక్ బ్యాలెన్స్‌తో కొలుస్తారు.

వెంకటేష్ “ఫ్యామిలీ హ్యాపీనెస్ ఇక్కడే” అంటూ ఫ్యామిలీ మ్యాన్ లుక్‌లో కనిపిస్తే, జనం ఆ హ్యాపీనెస్ కోసం డబ్బులు కట్టేస్తారు. సుమ యాంకర్‌లా చమక్కుమని మాట్లాడితే, జనం ఆ చమక్కులకు చప్పట్లు కొట్టి, ప్లాట్లు బుక్ చేస్తారు. కానీ, సినిమా అయిపోయాక హీరో ఫీజు తీసుకుని ఇంటికి వెళ్తాడు, కానీ కొనుగోలుదారుడు కోర్టు చుట్టూ తిరుగుతాడు. ఇదేనా స్టార్ పవర్?

ఈ స్టార్లు ఒక్కసారి ఆలోచించాలి. మీ పేరు, మీ ఇమేజ్‌తో జనం జీవిత సంపాదనను పణంగా పెడతారు. మీరు ప్రమోట్ చేసే కంపెనీలు నిజంగా నమ్మదగినవా? లేక, మీ బ్యాంక్ బ్యాలెన్స్ పెంచే డీల్‌లా? సాహితీ, సాయి సూర్య,  రాఖీ అవెన్యూస్— ఈ కంపెనీలు జనాన్ని ముంచాయి.

మీరు డబ్బు తీసుకుని నోరు మూసుకున్నారు. కానీ, జనం మాత్రం కోర్టుల్లో, పోలీస్ స్టేషన్లలో తిరుగుతున్నారు. ఒక్కసారి ఆ కొనుగోలుదారుల కళ్లలోకి చూడండి, మీకు సినిమా స్క్రిప్ట్‌ల కంటే నిజమైన బాధ కనిపిస్తుంది.
సినిమా తెరపై హీరోలుగా, యాంకర్లుగా మీరు జనాన్ని అలరించండి. కానీ, రియల్ ఎస్టేట్ రంగంలో జనం జేబులపై దాడి చేయడం మానండి…

మీ పేరుతో కొనుగోలు చేసినవాళ్లు ఇప్పుడు కన్నీళ్లు పెట్టుకుంటున్నారు. మీరు డబ్బు తీసుకుని సేఫ్‌గా ఉండొచ్చు, కానీ జనం నమ్మకం మీపైనే ఉంది. ఆ నమ్మకాన్ని మోసం చేయడం కంటే, నిజాయితీగా ఉండండి. లేకపోతే, రేపు జనం మీ సినిమాలను కూడా “మోసం” అని బాయ్‌కాట్ చేస్తే, ఆ ట్విస్ట్‌కు ఎవరు బాధ్యులు? స్టార్లు స్టార్‌గానే ఉండండి, జనం జోలికి రాకండి!

ఈ సొసైటీ మీకు ఇచ్చింది చాల్లేదా..? ఇంకా ఇంకా ఇలా జనాన్ని దోపిడీ చేసేవాళ్లకు మద్దతుగా నిలవాలా డబ్బు కోసం..? (బెట్టింగ్ యాప్స్ కథ వేరు, అది మరీ దరిద్రం..) ఇక్కడ ఆ నలుగురు హీరోల గురించి మాత్రమే రాశారు.. ఇంకా చాలామంది ప్రమోట్ చేశారు కదా వారిగురించి ఎందుకు రాయలేదని మీరు నన్ను అడగవచ్చు.. ఈ ఆర్టికల్ రాసే సమయానికి ఇవి మాత్రమే నాకు గుర్తున్నాయి…

మిగిలిన నటులు ఎవరెవరు ఏఏ సంస్థలకు ఇలా బ్రాండ్ అంబాసిడర్లుగా చేసారో.. ఆయా సంస్థలు మూతబడితే జనాలు నష్టపోయి ఉంటే ఆ డీటైల్స్ కూడా త్వరలో చెప్పుకుందాం…… అశోక్ వేములపల్లి

(హీరోల అభిమానులు దయచేసి నన్ను తిట్టిపోసి, నాకు పిండప్రదానాలు చేయకండి.. నేను హీరోలను తిట్టడం లేదు. కేవలం మోసపోతున్న జనాల తరఫున అడుగుతున్నాను అంతే.. ఇలాంటివి ప్రమోట్ చేసేముందు ఆ సంస్థ బ్యాక్ గ్రౌండ్ చెక్ చేశాకే యాడ్ చేయమని రిక్వెస్ట్ చేస్తున్నాను.. ఇలా హీరోల ప్రమోషన్ చూసి ఫ్లాట్ లేదా ప్లాట్ కొని మోసపోయిన వారు ఈ ఆర్టికల్ చదివేవారిలో కూడా కొంతమంది ఉండొచ్చు…)