అందరికీ జ్యోస్యాలు చెప్పే పంతులుకు… తన జాతకమే తెలియనట్టుగా…

బివి మోహన్ రెడ్డి కర్నూల్ లో ఇంజనీర్ గా ఉద్యోగం చేస్తున్నా ప్రముఖ రాజకీయ నాయకులకు సన్నిహితులు . జలగం వెంగళరావు , మర్రి చెన్నారెడ్డి సీఎంలుగా ఉన్నప్పుడు సన్నిహితులు . 1978 లో మర్రి చెన్నారెడ్డి ముఖ్యమంత్రిగా ఉన్నప్పుడు కర్నూల్ జిల్లా రాజకీయాల్లో శేషాద్రి అనే జర్నలిస్ట్  ప్రముఖులు . వారి ఇంట్లోనే రాజకీయ నాయకులు సమావేశం అయి చర్చించుకునేవారు . మర్రి చెన్నారెడ్డి శాసన మండలి సభ్యులను ఖరారు చేశారు . సంతోషమ్మ అనే మహిళను మండలి సభ్యురాలిగా నియమించారు .

అప్పుడు సమితి ప్రెసిడెంట్ గా, తరువాత కోట్ల హయాంలో మండలి సభ్యులుగా పనిచేసిన యస్ . రఘురామిరెడ్డి బివి మోహన్ రెడ్డితో సరదాగా మాట్లాడుతూ మీ మిత్రుడు మర్రి చెన్నారెడ్డి సీఎంగా ఉన్నారు , సంతోషమ్మను కూడా మండలి సభ్యురాలిని చేశారు , మరి నువ్వెప్పుడూ mlc అవుతున్నావు అంటే , మండలి ద్వారా నాకేం కర్మ .. నేరుగా పోటీ చేస్తా , మంత్రిని అవుతాను అని 78లో చెప్పారు , 83లో నిజంగానే పోటీ చేశారు , మంత్రి అయ్యారు .

1978లో మోహన్ రెడ్డి ఆ మాట చెప్పినప్పుడు అందరూ తేలిగ్గా తీసుకున్నారు . ఐదేళ్ల తరువాత నిజం అయ్యాక అయన చెప్పే జ్యోతిష్యం మీద , ముహూర్తాల మీద గురి కుదిరింది . . . బివి మోహన్ రెడ్డి కర్నూల్ జిల్లాలో ఇంజనీర్ గా పని చేస్తున్నప్పుడు చెప్పిన జ్యోస్యం నీకు ఎలా తెలుసు అని సందేహం కదా ?

మోహన్ రెడ్డి ఇంజనీర్ గా కర్నూల్ జిల్లాలో ఉద్యోగం చేస్తున్నప్పుడు హిందూ రిపోర్టర్ గా అక్కడ దాసు కేశవరావు ఉండేవారు . తరువాత హైదరాబాద్ లో హిందూ బ్యూరో చీఫ్ గా టీడీపీ బీట్ కూడా చూసేవారు . తరువాత రెసిడెంట్ ఎడిటర్ అయ్యారు . మాటల సందర్భంలో మోహన్ రెడ్డి జోస్యం గురించి చెప్పారు . మోహన్ రెడ్డి కూడా నేను చెప్పిన జ్యోస్యం నిజమైంది కావాలంటే కేశవరావును అడగండి అనే వారు .

ఎన్టీఆర్ కు దైవం మీద నమ్మకం ఉండేది కాదు, కానీ మోహన్ రెడ్డి జ్యోతిష్యం మీద మాత్రం అపారమైన నమ్మకం ఉండేది . ఇద్దరి మధ్య బంధం ఎలా ఏర్పడిందో కానీ ఎన్టీఆర్ సినిమా హీరోగా ఉన్నప్పటి నుంచే మోహన్ రెడ్డి జ్యోస్యం మీద మంచి గురి . ఏ కార్యం అయినా మోహన్ రెడ్డి ముహూర్తం పెట్టాల్సిందే …

******

1995 ఆగస్టులో ఎన్టీఆర్ ను దించేసిన తరువాత కూడా దాదాపు 30 మంది శాసన సభ్యులు ఎన్టీఆర్ శిబిరంలోనే ఉండేవారు . వారిలో బివి మోహన్ రెడ్డి ఒకరు . మీడియా పెద్దగా ప్రచారం కల్పించేది కాదు కానీ ఈ 30 మంది రోజూ ఏదో ఒక నిరసన కార్యక్రమం చేపట్టేవారు . ఓ రోజు అసెంబ్లీ గేటు ముందు బైఠాయించి నిరసన కార్యక్రమం . మీడియా ముందు జ్యోస్యం చెబుతున్నాను అని మోహన్ రెడ్డి ప్రకటన . అంతా గుమిగూడిన తరువాత ఎన్టీఆర్ మళ్ళీ ముఖ్యమంత్రి అవుతారు . నేను చెబుతున్నాను , నిజం అయి తీరుతుంది అన్నారు . బాబు వద్ద ఉన్న శాసనసభ్యులు అందరూ వచ్చేస్తారు , మళ్ళీ ఎన్టీఆర్ సీఎం అవుతారు అని చెప్పారు .

ఎన్టీఆర్ మళ్ళీ సీఎం అయ్యే మాట దేవుడెరుగు ఎన్టీయారే చనిపోయారు . శాసనసభ్యులు అందరూ ఎన్టీఆర్ వద్దకు వచ్చేస్తారు అని జ్యోస్యం చెప్పిన మోహన్ రెడ్డి ఎన్టీఆర్ మరణించాక మిగిలిన వారితో కలిసి తానే బాబు శిబిరంలో చేరిపోయారు . మరోసారి మీడియా బలవంతం వల్ల 2004 ఎన్నికల ఫలితాలపై ఎన్టీఆర్ భవన్ లో జోస్యం చెప్పారు . టీడీపీకి అప్పుడు రెండువందల పైగానే సీట్లు వస్తాయని ఏదో అంకె చెప్పారు . టీడీపీ గెలుస్తుంది అని … కానీ ఆ ఎన్నికల్లో టీడీపీ ఓడిపోయింది, టీడీపీ చరిత్రలోనే తక్కువ సీట్లు సాధించింది . అంతకు ముందు ఓడిపోయిన చరిత్ర ఉన్నా ఉమ్మడి రాష్ట్రంలో 2004లోనే టీడీపీకి తక్కువ సీట్ల రికార్డ్ .

****

2004 ఎన్నికలకు రోజులు దగ్గర పడ్డాయి . అసెంబ్లీలో హడావుడి . లాబీలో వెళుతుంటే మోహన్ రెడ్డి ఛాంబర్ . చీఫ్ రిపోర్టర్ చారి నేనూ కలిసి వెళుతున్నాం . మోహన్ రెడ్డి కనిపించగానే… చారి బాబాయ్, ఈ సారి ఎన్నికలు ఎలా ఉంటాయి అని మోహన్ రెడ్డిని అడిగారు . బ్రహ్మాండంగా గెలుస్తాం అని మోహన్ రెడ్డి ధీమాగా చెప్పారు . చీఫ్ రిపోర్టర్ మాట్లాడుతున్నప్పుడు మధ్యలో నేను మాట్లాడటం ఎందుకులే అని వింటూ ఉండిపోయా .

కొద్దిసేపు మాట్లాడి ఇద్దరం వెళుతుంటే .. మోహన్ రెడ్డి చేయి పట్టి ఛాంబర్ లోకి లాగాడు . ఎన్నికలు ఎలా ఉంటాయని అనుకుంటున్నావు అని మోహన్ రెడ్డి నన్ను అడిగాడు… ఒకింత సంతోషం వేసింది . ఇంతకు ముందు అతనే జోస్యం చెప్పేవాడు, ఇప్పుడు తనే నన్ను అడుగుతున్నారు అనుకొని , బహుశా ఎవరు ఏమనుకున్నా పరవాలేదు అనుకుని… నేను నిర్మొహమాటంగా చెబుతాను అనే ఉద్దేశంతో అడుగుతున్నారేమోలే అనుకుని… 1999 లోనే తృటిలో గెలిచారు , ఈసారి ఓడిపోతారు అని చెప్పాను . మోహన్‌రెడ్డికే జ్యోస్యం చెప్పాను…

ఎన్టీఆర్ అంటే ఓ నమ్మకం ఉండేది .. నేను బాబు వర్గంలో చేరినప్పటి నుంచి మంత్రి పదవి ఇచ్చారు , ఇప్పటికీ మంత్రినే కానీ టికెట్ ఇస్తారా ? ఇవ్వరా ? అనే అనుమానం ఉంది అంటూ ఎన్టీఆర్ కు బాబుకు తేడా చెప్పుకొచ్చారు . 1978లోనే అంత ధీమాగా చెప్పిన మోహన్ రెడ్డి 2004 నాటికి తనకు టికెట్ వస్తుందో రాదో తనకే తెలియని స్థితికి వచ్చారు . అంతా కాల మహిమ అనిపించింది …- – బుద్దా మురళి