నాకు అక్కడ వోటు లేదు… ఉంటే ఈ ’’విజిల్ బ్లోయర్’’కే వేసేవాడిని..!

శిరీష పాపులర్ అవడం పాలకుల స్వయంకృతం. వైఫల్యాల్ని ఒప్పుకోలేకపోయినా కనీసం విమర్శని సహించలేనితనం ఆమె మీద సామాజిక శాంతికి సంబంధించిన కేసులు పెట్టిస్తే ఆమెతో ఐడెంటిఫై ఐన యువత, ఆమె పట్ల సహానుభూతితో ఆలోచించే వారికి ఆమె నామినేషన్ వేయడం గొప్ప ఉత్సాహాన్నిచ్చింది. అది వారిలోని ప్రజాస్వామిక స్ఫూర్తీ బైటకి తీసి ఆమె గెలుపు కోసం యుద్ధోత్సాహంతో పని చేసేలా పురికొల్పింది. ఆమె ద్వారా మొత్తం రెండు తెలుగు రాష్ట్రాల యువత ప్రభుత్వాల మీద ఉద్యమ స్ఫూర్తితో పోరాటం చేస్తున్నట్లుంది. ఆమె చేస్తున్న విమర్శలు పార్టీల పరంగా రాజకీయమైనవి కాకుండా ప్రజల, ముఖ్యంగా యువత నిరాశా నిస్పృహలకి ఒక వాయిస్ ఇవ్వడం అనేది గమనించాల్సిన విషయం.

ఎన్నో వందల కార్లు రెండు తెలుగు రాష్ట్రాలకు చెందిన ఆమాన్యులైన వోటర్లు తమ స్వంత డబ్బులతో వాటిలో ఆయిల్ కొట్టించి ఆమె ప్రచారానికి అందుబాటులో పెట్టడమే కాదు వారు ఆ కార్లలోనే నిద్రిస్తున్నారు. వారు ఏ సదుపాయాలు కోరుకోవడం లేదు. ఇదో అద్భుతమే. ఇంతా చేసి వోట్లేయాల్సింది స్థానికులే కానీ ఇతర నియోజకవర్గాల, పక్క జిల్లాల, అటు పక్క రాష్ట్రాల ప్రజలు కాదు కదా అని ఎవరైనా పెదవి విరచొచ్చు. విరుచుకోనివ్వండి. కానీ ఇంత మద్దతు సామాన్యుల నుండి వస్తున్నదంటే అది ఇతర ప్రాంతాలకు రేపెప్పుడైనా పాకొచ్చు. పోరాటానికి గమ్యం చైతన్య విస్తరణే కానీ గెలుపోటములు కావు. బిందువు బిందువు సింధువుని తయారు చేసినట్లు ఏ పోరాటమైనా రగిల్చే చైతన్యం వృధా పోదు.

అనుభవం, సామర్ధ్యం అంటే ఏమిటి? కాంట్రాక్టుల్లో వందల కోట్లు నిదులు నొక్కేయడమా? అవినీతితో స్వంత ఖజానాలు నింపుకోడమా? ఎన్నికల ముందు ఓటుకి ఇంత అని డబ్బులు పంచి, సారా బాటిల్స్ జనం జేబుల్లో కుక్కడమా? ఆమె సామర్ధ్యం, అనుభవం గురించి ప్రశ్నలు వేసేవారు తమకి తాము వేసుకోవాల్సిన ప్రశ్నలివి.

ఆమెకి ఎన్ని వోట్లొచ్చినా, విజేతగా ప్రకటించబడినా లేకున్నా ఆమె ఇప్పటికే నైతికంగా విజయం సాధించినట్లే. ఐతే ఆమె నిజంగానే గెలవగలిగితే ఆ గెలుపు ఎంతోమంది నిజాయితీపరులైన యువతకి స్ఫూర్తి కాగలదనే అనుకుంటున్నా.

ప్రధాన పార్టీలు ఎన్నికల ముందు డబ్బు, సారా పంచడాన్ని ఆమె తరపున అహర్నిశలు పని చేస్తున్న వారు చెక్ చేయగలిగితే, వోటర్లు ప్రలోభాలకు గురి కాకుండా చూడగలిగితే ఆమెకి విజయం దక్కొచ్చు. అంతే కాదు రేపు గెలిస్తే “నియోజకవర్గ అభివృద్ధి, ప్రయోజనాల నిమిత్తం” అనే పేరుతో ఏ ప్రధాన పార్టీలూ శిరీషని ప్రలోభ పెట్టకుండా కూడా ఆపొచ్చు. నాకు కొల్లాపూర్ నియోజకవర్గంలో ఓటు లేదు. వుంటే శిరీషకే వేసేవాడిని. ఇక్కడి నుండే విజిల్ మోగిస్తున్నా….