ప్రపంచ రాజకీయ చిత్రపటం మారుతున్నది! అమెరికా ఇప్పుడు నథింగ్…!!

ఆధిపత్యం కోసం జరిగే పోరాటంలో నిత్యం ఎవరో ఒకరికి నష్టం తప్పదు కానీ నష్టపోయిన వారికి ఒక్క విజయం దక్కితే మాత్రం అది అప్పటివరకు విజయం సాధిస్తూ వచ్చిన వాళ్లకి పెద్ద నష్టమే కలుగచేస్తుంది! ఇప్పుడు ఆ నష్టం అనుభవించే దేశాల జాబితాలో యూరోపియన్ యూనియన్ తో పాటు అమెరికా కూడా ఉండబోతున్నది.

EU కానీ అమెరికా కానీ తమ తమ దేశాలలో పర్యావరణానికి హాని కలగకుండా చూడడానికి కాను పర్యావరణానికి హాని కలిగించే పరిశ్రమలు తమ దేశాలలో పెట్టవు. కానీ పరిశోధన మాత్రం తమ దేశాలలో చేసి ఆ ఫార్ములా కానీ డిజైన్ ని కానీ ఆసియా దేశాలకి ఇచ్చి అక్కడ తయారు చేయించుకొని తమ దేశాలకి దిగుమతి చేసుకుంటాయి కారు చౌకగా ! ముఖ్యంగా ఫార్మా సంస్థలతో పాటు ఎలక్ట్రానిక్ పరికరాలు తయారుచేసే పరిశ్రమలని భారత్, చైనా, ఇండోనేషియా, మలేషియా, తైవాన్ లాంటి ఆసియా దేశాలకి కాంట్రాక్ట్ పద్ధతిలో ఆర్డర్లు ఇచ్చి, తయారు చేయించుకొని దిగుమతి చేసుకుంటూ వస్తున్నాయి ఇప్పటి వరకు…

ఫార్మా సంస్థల వల్ల కలిగే రసాయన వ్యర్ధాలు వదిలించుకోవడం అంత సులభం కాదు, చాలా ఖర్చుతో కూడిన పని. భూమి లోపలి పొరల్లో ఉండే నీరు కలుషితం అవుతాయి ఫార్మా సంస్థల వ్యర్ధాల వల్ల,,, ఇక ఎలక్ట్రానిక్ ఉత్పత్తి పరిశ్రమలో వెలువడే అతి ముఖ్య రసాయన కలుషితం LEAD [సీసం], మరియు పాదరసం [Mercury] లు ఎక్కువగా ఉంటాయి. అందుకే వీటిని కూడా తైవాన్, చైనా, కొరియా లాంటి దేశాలలో తయారు అయిన వాటిని తమ దేశాలలోకి దిగుమతి చేసుకుంటున్నాయి EU మరియు అమెరికా…

ఆధారపడుతూనే అజమాయిషీ చేయడం !

పెట్రోల్, నాచురల్ గాస్ తో సహా అన్నిటిమీదా ఇతర దేశాలమీద ఆధారపడుతూనే వాటిని అందించే దేశాల మీద అజమాయిషీ చేయడం EU మరియు అమెరికాలకే చెల్లింది. EU మరియు అమెరికాల అజమాయిషీకి కాలం చెల్లబోతున్నది! మొత్తం యూరోపు దేశాల ఎనర్జీ అవసరాలలో 40% రష్యా నుండే వస్తున్నాయి ఇప్పటి వరకు.యూరోపులో అతి పెద్ద ఆర్ధిక వ్యవస్థ ఉన్న జర్మనీ తాజాగా తీవ్ర ఆలోచనలో పడ్డది.

పుతిన్ తమ ఆయిల్ మరియు గాస్ సప్లైస్ కి సంబంధించి చెల్లింపులు రూబుల్ లో లేదా చైనా యువాన్ లలో చేయాలని పట్టుపట్టడం EU దేశాలకి మింగుడుపడని సమస్యగా మారింది. రూబుల్ రూపంలో చెల్లించలేదు కానీ ఇప్పటికిప్పుడు నాచురల్ గాస్ అందించే దేశం లేదు. రష్యా నుండి పైప్ లైన్ ద్వారా, అదీ జర్మనీ నుండి ఇతర EU దేశాలకి గాస్ సప్లై అవుతున్నది ఇప్పటి వరకు.

పోనీ ఇతర దేశాలనుండి ఇప్పటికిప్పుడు గాస్ పైప్ లైన్ వేయాలంటే కనీసం మూడేళ్ళు పడుతుంది. మరి అప్పటి వరకు రష్యా మీద ఆధారపడాలా ? ఒకవేళ ఆధార పడాల్సి వస్తే రష్యా డిమాండ్లకి ఒప్పుకోవాల్సిందే ! ఇదీ ప్రస్తుతం EU దేశాధినేతలని తీవ్రంగా వేధిస్తున్న సమస్య.

సాధారణంగా మూడు లేదా ఆరు నెలలకి గాస్ మరియు క్రూడ్ సప్లై కి గాను అగ్రిమెంట్లు జరుగుతూ ఉంటాయి. జర్మనీ రష్యాతో చేసుకున్న మూడు నెలల అగ్రిమెంట్ గడువు ఏప్రిల్ నెలాఖరుకి అయిపోతుంది మరి తరువాత ? గల్ఫ్ కోఆపరేషన్ కౌన్సిల్ [Gulf Cooperation Council (GCC)] GCC దేశాలని మొదట సంప్రదించారు EU దేశాల నాయకులు. కానీ GCC దేశాలు ముఖ్యంగా సౌదీ అరేబియా, యునైటెడ్ అరబ్ ఎమిరేట్స్ యుద్ధ ప్రాతిపదికన తాము గాస్ సప్లై చేయలేమని తేల్చి చెప్పేసాయి.

వారం క్రితం అమెరికా అధ్యక్షుడు జో బిడెన్ నేరుగా సౌదీ రాజుతో ఫోన్ లో మాట్లాడడానికి ప్రయత్నించగా సౌదీ రాజు నిరాకరించాడు మాట్లాడడానికి… ఇది అమెరికా చరిత్రలో యే అధ్యక్షుడికీ జరగని అవమానం! అయితే సౌదీ రాజు జో బిడెన్ ఫోన్ కాల్ ని తిరస్కరించడానికి కారణం ఉంది. అది యెమెన్ దేశంలో ప్రభుత్వ తిరుగుబాటు గ్రూప్ అయిన హుతీలు నిత్యం రాకెట్ దాడులతో సౌదీ ఆయిల్ రిఫైనరీల మీద దాడులు చేస్తున్నారు. కానీ అమెరికా తమకి మద్దతుగా ఏమీ చెయ్యట్లేదు అని సౌదీ రాజుకి కోపం !

అదీ కాక గత సంవత్సరంలో డోనాల్డ్ ట్రంఫ్ తమ పెట్రియాట్ ఎయిర్ డిఫెన్స్ సిస్టంని సౌదీ నుండి తరలించేసాడు. బిడెన్ వచ్చాక దానిని మళ్ళీ పునరుద్దరించలేదు. బిడెన్ చేసిన మరో తప్పు ఏమిటంటే యెమెన్ దేశంలో తిరుగుబాటు గ్రూపు అయిన హుతీ ని ఉగ్రవాదుల లిస్టు నుండి తొలగించాడు ! ఇది పుండు మీద కారం చల్లినట్లు అయ్యింది…

అందుకే సౌదీ, UAE లు అమెరికాకి దూరంగా జరిగే ఆలోచనలో ఉన్నాయి. అఫ్కోర్స్, సౌదీ వద్ద అమెరికన్ పేట్రియాట్ బాటరీలు ఉన్నాయి కానీ వాటిని సమర్ధవంతంగా వాడుకోలేకపోతున్నది సౌదీ… అందుకే అమెరికా మీద ఆధారపడుతూ వస్తున్నది. ఇక UAE ఐక్యరాజ్య సమితి భద్రతా కౌన్సిల్ లో అమెరికా EU లు కలిసి రష్యా మీద తీర్మానం పెట్టి, దానిమీద UAE మద్దతు కోరింది అమెరికా… కానీ UAE వోటింగ్ కి దూరంగా ఉండాలని నిర్ణయం తీసుకుంది… భారత్ తో పాటు… కానీ చివరికి అమెరికా బతిమిలాడి మరీ మద్దతు వోటింగ్ లో పాల్గొనేలా చేయగలిగింది. ఈ రెండు చర్యలూ గల్ఫ్ దేశాలలో ముఖ్య పాత్ర వహించే సౌదీ, UAE లు క్రమంగా అమెరికా నుండి దూరంగా జరుగుతున్నట్లు స్పష్టం చేస్తున్నాయి.

UAE, సౌదీలు చైనాతో గొడవ పెట్టుకోవడానికి సిద్ధంగా లేవు అమెరికాకి మద్దతుగా… బహుశా సౌదీ రాజు చైనాతో యువాన్ తో వ్యాపారం చేయడానికి ఒప్పుకునే రోజులు దగ్గరలోనే ఉన్నట్లు వార్తలు వస్తున్నాయి. గల్ఫ్ దేశాలు అమెరికా మీద ఆధారపడడం తగ్గించుకునే ఆలోచనలో ఉన్నాయి…ఇక లాభం లేదనుకొని EU తో పాటు అమెరికా, బ్రిటన్ లు కూడా తమ సీనియర్ రిప్రజేంటేటివ్ లని సౌదీ, UAE లకి పంపించాయి క్రూడ్ తో పాటు గాస్ ఉత్పత్తి పెంచి తమకి సరఫరా చేయమని అడగడానికి…

కానీ రెండు దేశాలు స్పష్టంగా చెప్పేసాయి తమకి ఆసియా దేశాలతో ముందస్తు ఒప్పందాలు ఇప్పటికే అమలులో ఉన్నాయని, వాటి కాల గడువు తీరిన తరువాతే ఏదన్నా నిర్ణయం తీసుకుంటాము అని… కానీ ఖతార్ దేశం మాత్రం ఉత్పత్తి పెంచి సరఫరా చేయడానికి ఒప్పుకుంది… కానీ లిక్విడ్ నాచురల్ గాస్ ని నౌకల ద్వారా పంపుతామని చెప్పింది… జర్మనీకి నౌకల ద్వారా వచ్చే LNG ని దిగుమతి చేసుకునే సదుపాయాలు లేవు… అలా అని ఇప్పటికిప్పుడు LNG టెర్మినల్స్ ని నిర్మించి అక్కడి నుండి పైప్ లైన్ వేసి రష్యా నుండి తమ దేశంలోకి వచ్చే పైప్ లైన్ తో అనుసంధానం చేయడానికి చాలా సమయం పడుతుంది.

ఇక సముద్రతీరం లేని లాండ్ లాక్డ్ EU దేశాల సంగతి ఏమిటీ ? ఇదీ EU దేశాలని వేధిస్తున్న సమస్య ! రష్యా నుండి పైప్ లైన్ ద్వారా సరఫరా అయ్యే గ్యాస్ వల్ల ఎలాంటి అడ్డంకులు ఉండవు, పైగా వేగంగా సరఫరా అవుతూ ఉంటుంది, అదే నౌకల ద్వారా సరఫరా అయ్యే LNG కి పరిమితి ఉంటుంది…

మరోవైపు అమెరికా EU లు కలిసి ఇజ్రాయెల్ ని గాస్ సప్లై కోసం సంప్రదించాయి. ఇజ్రాయెల్ కి రెండు చోట్ల సహజ వాయువుతో పాటు క్రూడ్ ఆయిల్ నిక్షేపాలు ఉన్నాయి…. కానీ అవి తమ అవసరాలకి సరిపోయేంతగా ఉన్నాయి… నేచురల్ గాస్ ని పెద్దగా వాడదు ఇజ్రాయెల్… అందుకే జోర్డాన్ ద్వారా ఈజిప్ట్ కి పైప్ లైన్ వేసి సరఫరా చేస్తున్నది ఇజ్రాయెల్… ఇప్పుడు ఈజిప్ట్ నుండి టర్కీ ద్వారా యూరోప్ లోకి పైప్ లైన్ వేసి సరఫరా చేయాలని ప్లాన్ చేస్తున్నారు…కానీ ఇదంతా జరగడానికి మూడేళ్ళు పడుతుంది!

మరి ధర సంగతి ఏమిటి ? రష్యా ఒక క్యూబిక్ మీటర్ గాస్ కి చార్జ్ చేసేది 40 సెంట్లు మాత్రమే… ఇది ప్రపంచంలోనే అతి తక్కువ ధర ! అదే గల్ఫ్ నుండి సరఫరా చేయాలంటే దాదాపుగా 4 డాలర్లు ఖర్చు అవుతుంది ఒక క్యూబిక్ మీటర్ కి… రష్యా కాంట్రాక్ట్ కాల వ్యవధి అయిపోగానే యూరోప్ మొత్తం గాస్, పెట్రోల్ ధరలు ఆకాశాన్ని అంటుతాయి. ఇదివరకటిలాగా నిరంతర సరఫరా కాకపోవచ్చు పైప్ లైన్ వేసేదాకా….

అంటే మరో మూడేళ్ళ దాకా ! రష్యా అమెరికాలతో పాటు యూరోపు దేశాలకి సప్లై చేసే క్రూడ్ ఆయిల్ ధర బారెల్ కి 30 డాలర్లు మాత్రమే! ఇక ఇప్పటి నుండి మార్కెట్ ధర ప్రకారం 100 డాలర్లు చెల్లించి కొనాల్సి ఉంటుంది, లేదా తమ దేశంలోనే దొరికే షెల్ ఆయిల్ ని మళ్ళీ ఉత్పత్తి పెంచాల్సి ఉంటుంది, కానీ ధర మాత్రం 70 డాలర్లు అవుతుంది కేవలం బయటికి తీసి శుద్ధి చేయడానికి !

మరో మూడు నెలల తరువాత ఏ దేశంలో పెట్రోల్ ధర ఎంత ఉందో సూచించే పట్టిక తయారు చేస్తారు అప్పుడు మాట్లాడుకుందాం పెట్రోల్ ధరల గురించి ! ఇప్పటి దాకా అమెరికా కూడా రష్యా నుండే సింహ భాగం క్రూడ్ ని దిగుమతి చేసుకుంటూ వచ్చింది బారెల్ 30 డాలర్ల కి… ఇప్పుడు ఆ స్టాక్ అయిపోయాక అమెరికా కూడా తమ పెట్రోల్ ధరలని పెంచాలి లేకపొతే నష్టాలు తప్పవు!

అమెరికాకి చెందిన ఫ్రీ లాన్స్ జర్నలిస్ట్ గత మూడు నెలల నుండి ఒకటే మాట చెప్తూ వస్తున్నాడు, అది యూరోపు ఆర్ధిక వ్యవస్థ కుప్పకూలడానికి సిద్ధంగా ఉంది అని. బహుశా LNG మీద ఆధారపడ్డ యూరోపు ప్రజలు ఇప్పుడు వాడుకుంటున్న గ్యాస్ ధరకంటే 5 రెట్లు ఎక్కువ చెల్లించి కొనాల్సి వచ్చినప్పుడు రోడ్ల మీదకి వచ్చి నిరసన చేసే రోజులు మరి కొద్ది నెలల్లోనే మనం చూడబోతున్నాము !

ప్రపంచవ్యాప్తంగా రాజకీయ చిత్ర పటం ఎలా మారబోతున్నది ?

తాజాగా అమెరికా ఒక ప్రతిపాదన చేసింది అది రష్యా నుండి క్రూడ్ దిగుమతిని ఆపేస్తే యూరోపు దేశాలకి తాను క్రూడ్ సరఫరా చేస్తాను అంటూ ! వెల్ ! రష్యా నుండి 30 డాలర్లకి కొని భారీ స్థాయిలో ఆ క్రూడ్ ని స్టాక్ చేసి ఇప్పుడు యూరోపుకి బారెల్ కి 70 డాలర్లకి సరఫరా చేయాలని చూస్తున్నది. ఈ విషయం యూరోపు దేశాలకి తెలుసు. బహిరంగ మార్కెట్ లో బారెల్ ధర 100 డాలర్లు పలుకుతున్నది అంటే 30 డాలర్లు తక్కువకే ఇస్తున్నట్లు ఫోజు కొడుతున్నది అమెరికా !

మరి రష్యా మీద భారీ ఆంక్షలు విధించకుండా ఉంటే అతి తక్కువ ధరకే క్రూడ్, గ్యాస్ దొరికేది కదా అనేది కొన్ని దేశాలని వేధిస్తున్న ప్రశ్న ! జర్మనీకి రష్యాతో శత్రుత్వం పెట్టుకోవడం ఇష్టం లేదు. అదే సమయంలో గాస్, పెట్రోల్ ధరలు భగ్గుమంటే మాత్రం తన దోవ తాను చూసుకుంటుంది… ఇదే జరిగితే సమీకరణాలలో మార్పు వస్తుంది. ఒకప్పుడు బద్ధ శత్రువులుగా మెలిగిన రష్యా చైనాలు ఇప్పుడు మిత్రులుగా మారలేదా ?

1969 లో అప్పటి సోవియట్ యూనియన్ చైనాలు తమ అణ్వాయుధాలని సిద్ధం చేసాయి, ఒకరి మీద ఒకరు యుద్ధం చేసాయి కూడా ! కానీ తరువాతి కాలంలో మళ్ళీ మంచి మిత్రులుగా మారాయి ! అటువంటప్పుడు ఇప్పుడు అమెరికాకి మిత్రులుగా ఉన్న దేశాలు శత్రువులుగా మారడానికి ఎంతసేపు పడుతుంది ? ఒక చిన్న తప్పు చాలు !

యూరోపుకి రష్యాని భూతంగా చూపించి ఇన్నాళ్ళూ తమ లక్ష్యాలని నెరవేర్చుకున్న అమెరికా ఇకముందు అలా చేయలేదు ! ఉన్న పైప్ లైన్ ని వాడుకుంటూ అదే తక్కువ ధరలో దొరికే రష్యా గ్యాస్ ని కాదని దానికి 5 రెట్లు ఎక్కువ పెట్టి బయట నుండి కొనాల్సి రావడం మీద ఏదో ఒక రోజు అంతర్మధనం జరిగి తీరుతుంది అదే మార్పులకి కారణం అవుతుంది !

రెండు ప్రపంచ యుద్ధాలు యూరపు కేంద్రంగా మొదలయ్యాయి అన్న సంగతి మరిచిపోయి భారత్ పాకిస్తాన్ లు ఈ భూమి మీద అత్యంత ప్రమాదకరమయిన సరిహద్దు దేశాలు అంటూ విష ప్రచారం చేస్తూ వచ్చిన పాశ్చ్యాత్య దేశాలు ఇప్పుడు మూడో ప్రపంచ యుద్హానికి బీజం అదే యూరోపులో పడుతున్నాయి అని మనం అంటే ఒప్పుకుంటాయా ?