.
ఎంతటి మనసును హత్తుకునే కథ ఇది! …. ఒక ఏడేళ్ల బాలుడు జేమ్స్ బాండ్ను ఆటోగ్రాఫ్ అడిగాడు. ఆ తర్వాత రోజర్ మూర్ చేసిన పని ఎందుకు కొందరు సెలబ్రిటీలు లెజెండ్స్గా మిగిలిపోతారో నిరూపించింది.
నైస్ ఎయిర్పోర్ట్, 1983… ఏడేళ్ల మార్క్ హేన్స్ తన తాతయ్యతో కలిసి డిపార్చర్ గేట్ వద్ద కూర్చుని ఉన్నాడు. అప్పుడే అతడి కళ్లు ఒకరిపై పడ్డాయి: సాక్షాత్తూ జేమ్స్ బాండ్! అవును, అక్కడే కూర్చుని ఉన్నాడు.. పేపర్ చదువుకుంటూ.
Ads
మార్క్ గుండె వేగంగా కొట్టుకుంది. తన తాతయ్య చొక్కా పట్టుకుని లాగుతూ, “అదిగో జేమ్స్ బాండ్! మనం ఆయన ఆటోగ్రాఫ్ తీసుకుందామా?” అని అడిగాడు.
అసలు జేమ్స్ బాండ్ అంటే ఎవరో, రోజర్ మూర్ అంటే ఎవరో ఆ తాతయ్యకు తెలియదు. కానీ ఆయన మంచి తాతయ్య. మనవడి కోసం నేరుగా రోజర్ మూర్ దగ్గరకు వెళ్లి, “నా మనవడు మీరు ఎవరో ఫేమస్ అని చెబుతున్నాడు, దీనిపై ఒక సంతకం పెడతారా?” అని అడిగాడు.
రోజర్ మూర్ తల పైకెత్తి, చిరునవ్వుతో ఆ అబ్బాయి పేరు అడిగాడు. మార్క్ ప్లేన్ టికెట్ వెనుక భాగంలో శుభాకాంక్షలు తెలుపుతూ సంతకం చేశాడు.
మార్క్ పట్టరాని సంతోషంతో ఆ టికెట్ను ఒక బంగారు ముక్కలా పట్టుకుని తిరిగి తన సీటు దగ్గరకు వచ్చాడు. కానీ సంతకం వైపు చూడగానే..
- అతడి ముఖం వాడిపోయింది.
ఆ చేతిరాత చదవడం కొంచెం కష్టమే అయినా, అది ఖచ్చితంగా “జేమ్స్ బాండ్” అని మాత్రం లేదు. వాళ్ల తాతయ్య కళ్లు చిన్నవి చేసి చూసి, అది “రోజర్ మూర్” అని అర్థం చేసుకున్నాడు.
మార్క్కు రోజర్ మూర్ అంటే ఎవరో తెలియదు.
“ఆయన తప్పు పేరుతో సంతకం చేశాడు తాతయ్యా,” అని మార్క్ బాధగా చెప్పాడు. “ఎవరిదో వేరే పేరు రాశాడు.”
ఆ తాతయ్య— దేవుడు ఆయనను చల్లగా చూడాలి అంటూ— మళ్లీ నేరుగా రోజర్ మూర్ దగ్గరకు వెళ్లి టికెట్ చూపించాడు. “వీడు మీరు తప్పు పేరు రాశారని అంటున్నాడు. మీ పేరు జేమ్స్ బాండ్ అని చెబుతున్నాడు,” అని వివరించాడు.
రోజర్ మూర్ ముఖంలో ఒక వెలుగు. ఏం జరిగిందో ఆయనకు అర్థమైంది. ఆ అబ్బాయిని దగ్గరకు రమ్మని సైగ చేశాడు.
మార్క్ భయపడుతూనే వెళ్లాడు. ఆ నటుడు మార్క్ వైపు వంగి, ఎవరూ చూడట్లేదని అటు ఇటు దొంగచూపులు చూస్తూ, తన ఫేమస్ కనుబొమ్మను పైకెత్తి, చాలా రహస్యంగా ఇలా అన్నాడు: “నేను నా సంతకాన్ని ‘రోజర్ మూర్’ అనే పెట్టాలి. లేదంటే, నేను ఇక్కడ ఉన్నానని బ్లోఫెల్డ్ (విలన్) కనిపెట్టేస్తాడు..!”
జేమ్స్ బాండ్ను చూసిన విషయాన్ని ఎవరికీ చెప్పొద్దని కూడా మార్క్ను కోరాడు. తన రహస్యాన్ని కాపాడినందుకు కృతజ్ఞతలు కూడా తెలిపాడు.
మార్క్ తన సీటుకు తిరిగి వెళ్లాడు, అతడిలో ఒక రకమైన ఆనందం, ఉత్సాహం!
“జేమ్స్ బాండ్ అని సంతకం చేశాడా?” అని తాతయ్య అడిగాడు.
“లేదు తాతయ్యా, నేనే తప్పుగా అర్థం చేసుకున్నాను,” అని మార్క్ ఆ సీక్రెట్ను దాచాడు. అప్పటి వరకు కేవలం అభిమానిగా ఉన్న మార్క్, ఇప్పుడు జేమ్స్ బాండ్తో కలిసి పనిచేస్తున్న ఒక ‘ఏజెంట్’ అయిపోయాడు!
కానీ ఈ కథ ఇక్కడితో అయిపోలేదు.. ఇది ఇంకా అద్భుతంగా మారుతుంది…
అనేక ఏళ్ల తర్వాత… మార్క్ హేన్స్ ఒక స్క్రిప్ట్ రైటర్ అయ్యాడు. UNICEF కి సంబంధించిన ఒక రికార్డింగ్లో ఆయన పనిచేస్తున్నాడు. అక్కడ UNICEF అంబాసిడర్గా రోజర్ మూర్ షూటింగ్లో ఉన్నాడు.
కెమెరాలు సెట్ చేస్తున్న సమయంలో, ఇప్పుడు 30 ఏళ్ల వయసులో ఉన్న మార్క్, రోజర్ మూర్ దగ్గరకు వెళ్లి చిన్నప్పుడు నైస్ ఎయిర్పోర్ట్లో జరిగిన విషయాన్ని గుర్తు చేశాడు.
మూర్ నవ్వుతూ, “నాకు ఆ విషయం గుర్తు లేదు కానీ, నువ్వు జేమ్స్ బాండ్ను కలిసినందుకు నాకు సంతోషంగా ఉంది,” అన్నాడు.
సరే, అదొక మంచి జ్ఞాపకం అనుకుని మార్క్ తన పనిలోకి వెళ్లిపోయాడు.
కానీ ఆ తర్వాత రోజర్ మూర్ చేసిన పని, ఆ మొదటి సారి జరిగిన సంఘటన కేవలం యాదృచ్ఛికం కాదని నిరూపించింది.
షూటింగ్ పూర్తయ్యాక, మూర్ తన కారు వైపు వెళ్తూ మార్క్ పక్క నుంచే వెళ్లాడు. కానీ మార్క్ దగ్గరకు రాగానే ఆగాడు. చుట్టూ అటు ఇటు చూశాడు. మళ్లీ అదే కనుబొమ్మను పైకెత్తాడు. చాలా తక్కువ స్వరంతో ఇలా అన్నాడు:
- “నైస్లో మన భేటీ నాకు బాగా గుర్తుందయ్యా… కానీ లోపల ఆ విషయం ఎందుకు చెప్పలేదంటే, ఆ కెమెరామెన్లలో ఎవరైనా బ్లోఫెల్డ్ మనుషులు ఉండొచ్చు..!”
మార్క్ హేన్స్ ఇలా రాశాడు… “ఏడేళ్ల వయసులో ఎంత సంతోషపడ్డానో, ముప్పై ఏళ్ల వయసులో కూడా అంతే సంతోషపడ్డాను. ఎంత గొప్ప మనిషి! ఎంతటి మహోన్నతమైన వ్యక్తి!”
రోజర్ మూర్ చేసిన పని గురించి ఆలోచించండి. ఒక్కసారి కాదు, రెండుసార్లు.
1983లో, ఆయన కేవలం సరిగ్గా సంతకం చేసి పంపించేయొచ్చు. కానీ ఒక చిన్న పిల్లాడి అయోమయాన్ని ఆయన ఒక అద్భుతమైన మ్యాజిక్లా మార్చేశారు. కేవలం ఆటోగ్రాఫ్ ఇవ్వలేదు— మార్క్కు ఒక ‘సీక్రెట్ మిషన్’ ఇచ్చారు. జీవితాంతం చెప్పుకునే ఒక కథను ఇచ్చాడు.
మళ్లీ 23 ఏళ్ల తర్వాత, మార్క్ చెప్పిన థాంక్స్ తీసుకుని వెళ్లిపోవచ్చు. కానీ ఆయన ఆ మ్యాజిక్ను మళ్లీ సృష్టించారు. అది ఏదో యాదృచ్ఛికంగా చేసిన పని కాదని, మనస్ఫూర్తిగా చేసినదని నిరూపించారు.
రోజర్ మూర్ మే 23, 2017న మరణించినప్పుడు మార్క్ హేన్స్ ఈ కథను ఫేస్బుక్లో రాశాడు. అది క్షణాల్లో వైరల్ అయ్యింది. లోకానికి ఏం అర్థమైందంటే:
మంచితనం చూపడానికి పెద్దగా కష్టపడక్కర్లేదు. కానీ అది ఇచ్చే విలువ అనంతం.
హీరోలు అంటే కేవలం తెరపై చేసే యాక్షన్ సీక్వెన్స్లు మాత్రమే కాదు, ఎవరూ చూడనప్పుడు ఇతరులతో ఎలా ప్రవర్తిస్తారనేదే నిజమైన హీరోతనం.
రోజర్ మూర్ ప్రతిసారీ ఆ మంచితనాన్నే ఎంచుకున్నారు. అందుకే ఆయన కేవలం జేమ్స్ బాండ్ మాత్రమే కాదు.. ఆయనొక గొప్ప మనిషి!
.
(ఇది లక్షలసార్లు సోషల్ మీడియాలో షేర్ చేసుకోబడిన స్టోరీ... దానికి తెలుగు అనువాదం ఇది... ఇందులో ఏముందనేది కాదు, చిన్నప్పుడు మనం పిచ్చిపిచ్చిగా ప్రేమించిన ఓ జేమ్స్ బాండ్ గురించి ఏదో ఒకటి రాసుకోవడం కూడా ఆనందమే)
Share this Article