.
ఖమేనీ ఉనికిని అంత కచ్చితంగా ఇజ్రాయిల్, అమెరికా కనిపెట్టాయి..? ఈ కథనానికి ఇది తరువాయి భాగం… ఇరాన్ అణుకార్యక్రమంపై ఆల్రెడీ స్టక్స్ నెట్ అనే సైబర్ దాడి గురించి చెప్పుకున్నాం కదా… మరో రెండు ఆపరేషన్లు జరిగిన తీరు ఇదుగో…
రిమోట్ కంట్రోల్ మృత్యువు: ఒక ‘రోబోటిక్ గన్’ ఇరాన్ టాప్ శాస్త్రవేత్తను ఎలా వేటాడింది?
Ads
తేదీ…: నవంబర్ 27, 2020, స్థలం…: అబ్సార్డ్ (Absard), ఇరాన్.
అది ఒక సాధారణ శుక్రవారం మధ్యాహ్నం… ఇరాన్ అణు కార్యక్రమాలకు వెన్నెముక వంటి శాస్త్రవేత్త మొహ్సేన్ ఫక్రిజాదే తన భార్యతో కలిసి బుల్లెట్ ప్రూఫ్ కారులో ప్రయాణిస్తున్నారు… ఆయన చుట్టూ మూడు సెక్యూరిటీ కార్లు రక్షణగా ఉన్నాయి… కానీ, ఆ రక్షణ వలయాన్ని ఛేదించడానికి శత్రువు ఎంచుకున్న మార్గం ఊహాతీతం…
ఆయుధం…: ఒక ‘స్మార్ట్’ కిల్లర్ మెషీన్ ఈ దాడిలో పాల్గొన్నది ఏ మనిషో లేదా స్నైపరో కాదు… అది ఒక AI (ఆర్టిఫిషియల్ ఇంటెలిజెన్స్) ఆధారిత రిమోట్ కంట్రోల్డ్ మెషిన్ గన్… సుమారు ఒక టన్ను బరువున్న ఈ అత్యాధునిక పరికరాన్ని ముక్కలు ముక్కలుగా ఇరాన్లోకి స్మగ్లింగ్ చేసి, అక్కడ మళ్లీ అసెంబుల్ చేశారు… ఒక పాత నీలం రంగు నిస్సాన్ పికప్ ట్రక్కులో ఈ రోబోటిక్ గన్ను అమర్చి, దానికి చుట్టూ ఇసుక బస్తాలు, టార్పాలిన్ కప్పి ఉంచారు…
ఆపరేషన్ జరిగిన తీరు (Step-by-Step): ఫక్రిజాదే కారు ఒక నిర్ణీత పాయింట్కు చేరుకోగానే, ట్రక్కులో ఉన్న కెమెరాలు ఆయన ముఖాన్ని గుర్తుపట్టాయి… ఈ సమాచారం శాటిలైట్ ద్వారా 1,000 మైళ్ల దూరంలో ఉన్న ఒక రహస్య కంట్రోల్ రూమ్కు చేరింది…
ఇజ్రాయెల్లోని ఒక బేస్లో కూర్చున్న ఆపరేటర్, కంప్యూటర్ స్క్రీన్ చూస్తూ ట్రిగ్గర్ నొక్కాడు.. ఇక్కడ విశేషం ఏమిటంటే.., శాటిలైట్ సిగ్నల్ రావడానికి పట్టే కొద్దిపాటి సమయాన్ని (Time Lag) కూడా లెక్కించి, AI సాఫ్ట్వేర్ బుల్లెట్ వెళ్లే మార్గాన్ని సెట్ చేసింది…
సర్జికల్ ప్రిసిషన్…: గన్ నుండి వరుసగా బుల్లెట్లు దూసుకువచ్చాయి… ఆశ్చర్యకరమైన విషయం ఏంటంటే, పక్కనే కూర్చున్న ఆయన భార్యకు ఒక్క గాయం కూడా కాలేదు… కేవలం అంగుళాల తేడాతో ఫక్రిజాదేను మాత్రమే టార్గెట్ చేస్తూ బుల్లెట్లు వెళ్లాయి… సాక్ష్యం లేకుండా పని పూర్తయిన వెంటనే, ఆ నిస్సాన్ ట్రక్కులో అమర్చిన బాంబు పేలిపోయింది… ఆపరేషన్ చేసిన ఆనవాళ్లు ఏవీ దొరకకూడదనేది ప్లాన్…
ఈ ఆపరేషన్ ఎందుకు ప్రత్యేకం? క్షేత్రస్థాయిలో ఒక్క ఏజెంట్ కూడా లేకుండానే ఈ ఆపరేషన్ విజయవంతంగా ముగిసింది… కారు వేగం, గాలి దిశ, శాటిలైట్ డిలే.. వీటన్నింటినీ AI స్వయంగా సరిచేసుకుని షూట్ చేసింది… ఎక్కడో వేల మైళ్ల దూరంలో ఉండి కూడా, తమ దేశం నడిబొడ్డున ఉన్న అత్యంత రక్షణ కలిగిన వ్యక్తిని చంపగలరనే భయాన్ని ఇరాన్ ప్రభుత్వంలో నింపింది…
స్టక్స్నెట్ డిజిటల్ ప్రపంచంలో విధ్వంసం సృష్టించగా, ఈ రోబోటిక్ గన్ భౌతిక ప్రపంచంలో టెక్నాలజీ పరిధిని చాటిచెప్పింది… మరో ఆపరేషన్ ఏమిటంటే..?
ఆపరేషన్ అటామిక్ ఆర్కైవ్: ఇరాన్ అడ్డా నుంచి సగం టన్ను రహస్యాల అపహరణ!
వేదిక…: టెహ్రాన్, ఇరాన్ (ఒక పారిశ్రామిక వాడలోని పాత గిడ్డంగి)., మిషన్..: ఇరాన్ అణు బాంబు తయారీకి సంబంధించిన అసలు పత్రాలను (Blue prints) దొంగిలించడం…
ఇరాన్ తన అణు రహస్యాలన్నింటినీ ఎవరికీ అనుమానం రాకుండా టెహ్రాన్ నగరంలోని ఒక మారుమూల ‘షోరాబాద్’ అనే పారిశ్రామిక ప్రాంతంలో ఉన్న పాత గోడౌన్లో దాచిపెట్టింది… అక్కడ ఎటువంటి గార్డులు ఉండరు, ఎందుకంటే ఎవరికీ అది అణు రహస్యాల కేంద్రమని తెలియదు… కానీ మొసాద్ గూఢచారులకు ఆ విషయం తెలిసింది…
ఆపరేషన్ సాగిన తీరు- సుదీర్ఘ నిఘా…: దాదాపు ఏడాది కాలం పాటు మొసాద్ ఏజెంట్లు ఆ గిడ్డంగిని గమనించారు…. అక్కడ అలారమ్ సిస్టమ్స్ ఎలా ఉన్నాయి, ఏ సమయంలో ఎవరూ ఉండరు అనేవి క్షుణ్ణంగా అధ్యయనం చేశారు…
-
6 గంటల సమయం…: జనవరి 31, 2018 రాత్రి సరిగ్గా 10:30 గంటలకు 20 మందికి పైగా ఏజెంట్లు ఆ గిడ్డంగిలోకి ప్రవేశించారు… తెల్లవారుజామున 5 గంటలకు ఇరాన్ గార్డులు డ్యూటీకి వస్తారు… అంటే వారి చేతిలో ఉన్నది కేవలం 6 గంటల 29 నిమిషాలు మాత్రమే…
-
బ్లో టార్చ్లతో యుద్ధం…: ఆ గిడ్డంగిలో భారీ ఐరన్ సేఫ్లు (Safes) ఉన్నాయి… వాటిలో కొన్ని వందల ఫైళ్లు, వేల కొద్దీ సీడీలు ఉన్నాయి… ఏజెంట్లు వెంట తెచ్చుకున్న శక్తివంతమైన బ్లో టార్చ్లతో 3,600 డిగ్రీల సెల్సియస్ వేడిని ఉపయోగించి ఆ ఇనుప లాకర్లను కోసేశారు…
-
అర టన్ను బరువు…: వారు మొత్తం 55,000 పేజీల డాక్యుమెంట్లు, 183 సీడీలను స్వాధీనం చేసుకున్నారు… వీటి బరువు దాదాపు అర టన్ను (500 కేజీలు)… వీటిని ట్రక్కుల్లో నింపుకుని సరిహద్దు వైపు మెరుపు వేగంతో దూసుకెళ్లారు…
ఆ తర్వాత ఏం జరిగింది? ఉదయం 7 గంటలకు ఇరాన్ అధికారులు విషయం గుర్తించి దేశవ్యాప్తంగా వేల మంది సైనికులతో గాలింపు మొదలుపెట్టారు… కానీ అప్పటికే మొసాద్ ఏజెంట్లు వేరే మార్గాల ద్వారా ఇరాన్ సరిహద్దు దాటి సురక్షిత ప్రాంతానికి చేరుకున్నారు…
కొన్ని వారాల తర్వాత, ఇజ్రాయెల్ ప్రధాని బెంజమిన్ నెతన్యాహు టీవీ లైవ్ ప్రోగ్రామ్లో ఆ ఫైళ్లను, సీడీలను ప్రపంచానికి చూపించాడు… “ఇరాన్ అబద్ధం చెబుతోంది, వారు అణు బాంబు తయారు చేసే ప్లాన్లోనే ఉన్నారు” అని నిరూపించాడు…
ఈ ఆపరేషన్ ఎందుకు నమ్మశక్యం కాదు? శత్రు దేశ రాజధానిలోకి వెళ్లి, ఏకంగా సగం టన్ను బరువున్న సామాగ్రిని ఎత్తుకు రావడం అనేది ఇంటెలిజెన్స్ చరిత్రలో అద్భుతం… ఈ పత్రాల వల్లే ప్రపంచ దేశాలకు ఇరాన్ అణు కార్యక్రమంపై క్లారిటీ వచ్చింది… తరువాయి కథనం మూడో భాగంలో...
Share this Article