.
Subramanyam Dogiparthi ……… ఈ పక్కింటి అమ్మాయికి చాలా సుదీర్ఘమైన కధే ఉంది . అరుణ్ చౌదరి అనే బెంగాలీ రచయిత వ్రాసిన కధ పషేర్ బారి ఆధారంగా 1952 లో అదే టైటిలుతో ఒక సినిమా వచ్చింది . సూపర్ హిట్టయింది .
సావిత్రి ఛటర్జీ ఒక్కసారిగా సూపర్ స్టార్ అయింది . ఆ సినిమా ఆధారంగా మన తెలుగులో 1953 లో పక్కింటి అమ్మాయి అనే టైటిలుతో రేలంగి , అంజలీదేవి , ఎ యం రాజాలతో ఒక సినిమా వచ్చింది . బాగా ఆడింది .
Ads
1960లో తమిళంలో అంజలీదేవే రీమేక్ చేసింది . తానే హీరోయినుగా నటించింది . టి ఆర్ రామచంద్రన్ , తంగవేలు ప్రభృతులు నటించారు . 1968 లో హిందీలో పడోసన్ టైటిలుతో సునీల్ దత్ , సైరాబాను , మెహమూదులతో మరో సినిమా వచ్చింది . ఇదీ హిట్టయింది .
సైరాబాను చాలా చాలా అందంగా నటిస్తుందీ సినిమాలో . 2004 లో కన్నడంలో పక్కడమనె హుడుగి అనే టైటిలుతో రంజిత , రాఘవేంద్రలతో ఇంకో సినిమా వచ్చింది . అక్కడా బాగానే ఆడింది .
ఈ తెలుగు పక్కింటి అమ్మాయి 1981 నవంబర్ ఏడవ తారీఖున రిలీజయి బాగానే ఆడింది . హీరో హీరోయిన్లుగా చంద్రమోహన్ , జయసుధ నటించారు . జయసుధకు సంగీతం మాస్టారుగా సంగీత దర్శకుడు చక్రవర్తి నటించారు . ఈ పాత్రను హిందీలో మెహమూద్ నటించారు .
హీరో తొట్టి గేంగులో ప్లేబేక్ పాడే మిత్రుడిగా బాలసుబ్రమణ్యం నటించారు . హిందీలో ఈ పాత్రను ప్రముఖ గాయకుడు కిషోర్ కుమార్ వేసాడు . 1953లో వచ్చిన మన తెలుగు సినిమాలో ఈ పాత్రను ప్రముఖ గాయకుడు ఎ యం రాజా ధరించటం విశేషం .
సినిమా అంతా అల్లరల్లరిగా నడుస్తుంది . జయసుధకు మరో మంచి పాత్ర ఇది . హుషారుగా , చిలిపిగా బాగా నటించింది . చంద్రమోహన్ ఎడమ చేత్తో చేసేసాడు . ఈ రెండు పాత్రల తర్వాత ప్రధాన పాత్రలు చక్రవర్తి , బాలసుబ్రమణ్యాలవే . చక్రవర్తి జయసుధ వైపు , బాలసుబ్రమణ్యం చంద్రమోహన్ వైపు మోహరిస్తారు .
బాలసుబ్రమణ్యమే కాస్త ఓవర్ చేసాడేమో అని అనిపిస్తుంది . అక్కడక్కడా పద్మనాభాన్ని ఇమిటేట్ చేసాడు . పూర్తి నిడివిగా ఇదే ఆయన మొదటి సినిమా . దీనికి ముందు మహమ్మద్ బీన్ తుగ్లక్ సినిమాలో ఒక పాటలో కనిపించారు . ఇతర పాత్రల్లో ప్రభాకరరెడ్డి , హేమసుందర్ , ఝాన్సీ , తదితరులు నటించారు .
ఈ సినిమా బాగా ఆడటానికి ఉపకరించింది చక్రవర్తి సంగీత దర్శకత్వమే . పక్కింటి అమ్మాయి పరువాల పాపాయి పాట ఐకానిక్ సాంగ్ . బాగా హిట్టయింది . ఆ తర్వాత చిలకా పలకవే ఆ కిటికీ తెరవవే , ఇది సంగీత సంగ్రామము పాటలు బాగా హిట్టయ్యాయి .
ఇందూ నా కళ్ళకు విందు అందూ నా చేతికి అందు పాట బాగుండటమే కాదు , చక్రవర్తి నృత్యిస్తాడు కూడా . రాగం రాగం ఇదేమి రాగం కూనిరాగం పాట జయసుధ మీద బాత్ రూం పాటగా చాలా బాగా చిత్రీకరించబడింది .
వేటూరి , ఆరుద్ర , గోపిలు పాటల్ని వ్రాయగా బాలసుబ్రమణ్యం , చక్రవర్తి , సుశీలమ్మలు పాడారు . చాలా సరదాగా సాగే ఈ సినిమా యూట్యూబులో ఉంది . చూసి ఉండకపోతే తప్పక చూడండి . An entertaining , musical , feel good movie . జయసుధ అభిమానులను బాగా అలరిస్తుంది . #తెలుగుసినిమాలసింహావలోకనం #తెలుగుసినిమాలు #సినిమా_కబుర్లు
Share this Article