.
పరీక్షల లీకేజీలకు ఏఐతో చెక్‌ పెట్టొచ్చుగా! అరగంట ముందు ప్రశ్నపత్రం.. ప్రతి విద్యార్థికీ ఓ సెట్‌!!
పేపర్ లీకైంది.. పరీక్ష రద్దయింది! మళ్లీ పరీక్ష.. మళ్లీ వివాదం! విద్యార్థుల ఆందోళనలు.. ప్రతిపక్షాల నిరసనలు.. సీజేపీ వంటి విచ్ఛిన్న శక్తుల ఎంట్రీలు… విద్యాశాఖ మంత్రుల రాజీనామా డిమాండ్లు! దేశంలో పోటీ పరీక్షల నిర్వహణలో తరచూ కనిపిస్తున్న ఈ గందరగోళానికి కృత్రిమ మేధ (ఏఐ)తో చెక్‌ పెట్టలేమా?
Ads
ఇన్ఫోసిస్‌ సహ వ్యవస్థాపకుడు, ఆధార్‌ వ్యవస్థ మాజీ ఛైర్మన్‌ నందన్ నీలేకని చేసిన ప్రతిపాదన ఈ ప్రశ్నను ముందుకు తెస్తోంది. అయితే, ఏఐ సాయంతో పరీక్షల రోజే ప్రశ్నపత్రాలు రూపొందించే ఆలోచనను ఇంకాస్త ముందుకు తీసుకెళ్తే.. ఒకే పరీక్షా కేంద్రంలో, ఒకే హాలులో పరీక్ష రాసే విద్యార్థులకు కూడా వేర్వేరు ప్రశ్నపత్రాలు ఇవ్వొచ్చు కదా!
ఒకే హాలు.. వేర్వేరు ప్రశ్నపత్రాలు! ప్రస్తుతం ఒక పరీక్షకు ఒకే ప్రశ్నపత్రం రూపొందించి, దాన్ని ముద్రించి, రహస్యంగా పరీక్షా కేంద్రాలకు తరలించే క్రమంలో అనేక దశలు ఉంటాయి. ఈ ప్రయాణంలో ఎక్కడైనా లీకేజీకి అవకాశం ఏర్పడితే వేలాది, లక్షలాది మంది విద్యార్థుల భవిష్యత్తు ప్రశ్నార్థకంగా మారుతుంది. పరీక్ష రద్దు చేస్తే విద్యార్థులకు మళ్లీ ప్రిపరేషన్‌ భారం. నిర్వహణ సంస్థలకు అదనపు ఖర్చు. ప్రభుత్వానికి అప్రతిష్ఠ. బాధ్యులపై చర్యలు తీసుకోవాలన్న డిమాండ్లు. చివరకు వ్యవస్థపై నమ్మకమే సన్నగిల్లుతుంది.
ఈ సమస్యకు ఓ ప్రత్యామ్నాయం ఆలోచించాలి. పరీక్షకు నెల రోజుల ముందో, వారం రోజుల ముందో ఒకే ప్రశ్నపత్రాన్ని సిద్ధం చేసి భద్రపరచాల్సిన అవసరమే లేకుండా చేస్తే? పరీక్ష ప్రారంభానికి అరగంట ముందు భారీ ప్రశ్నల డేటాబ్యాంక్‌ నుంచి ప్రశ్నలను ఎంపిక చేసి, కంప్యూటర్‌ సాయంతో ప్రశ్నపత్రాలను రూపొందిస్తే? ఒకే హాలులో కూర్చున్న ఇద్దరు విద్యార్థులకు కూడా ఒకే ప్రశ్నపత్రం ఉండాల్సిన అవసరం లేకుండా చేస్తే?
అంటే, పక్కపక్కనే కూర్చున్న విద్యార్థుల ప్రశ్నపత్రాలు వేర్వేరుగా ఉంటాయి. ఒకరి ప్రశ్న మరొకరికి సరిపోలదు. పక్కవాడి పేపర్ చూసి సమాధానం రాయడం కష్టమవుతుంది. పరీక్షకు ముందే ఒక నిర్దిష్ట ప్రశ్నపత్రాన్ని సంపాదించి విక్రయించే అక్రమ వ్యాపారానికీ అవకాశం తగ్గుతుంది. ఎందుకంటే అసలు ప్రశ్నపత్రం ఏదో పరీక్ష ప్రారంభానికి కొద్దిసేపటి ముందు వరకు ఎవరికీ తెలియదు.
కావల్సిందల్లా భారీ ప్రశ్నల బ్యాంక్‌! ఇదంతా సాధ్యం కావాలంటే ముందుగా చేయాల్సిన పని ఒకటుంది. ప్రతి పరీక్షకు సంబంధించిన సిలబస్‌ ఆధారంగా భారీ ప్రశ్నల డేటాబ్యాంక్‌ను రూపొందించాలి. అందులో సులభమైనవి, మధ్యస్థ స్థాయి ప్రశ్నలు, కఠినమైన ప్రశ్నలు.. ఇలా మూడు రకాల ప్రశ్నలు ఉండాలి. ప్రతి అంశం నుంచి తగిన సంఖ్యలో ప్రశ్నలు, ప్రతి ప్రశ్నకు సరైన సమాధానం, దాని స్థాయి, సిలబస్‌లో దాని ప్రాధాన్యం వంటి వివరాలను నమోదు చేయాలి.
ఆ తర్వాత ఏఐ లేదా నిర్ణీత కంప్యూటర్‌ అల్గారిథమ్‌ సాయంతో ప్రశ్నపత్రాలను రూపొందించవచ్చు. అయితే, యాదృచ్ఛికంగా ప్రశ్నలను తీసుకోవడం మాత్రమే సరిపోదు. ప్రతి విద్యార్థికీ ఇచ్చే ప్రశ్నపత్రంలో సిలబస్‌ కవరేజీ, ప్రశ్నల సంఖ్య, మార్కుల విభజన, కఠినత స్థాయి ఒకేలా ఉండేలా వ్యవస్థను రూపొందించాలి.
ఉదాహరణకు, ఒక ప్రశ్నపత్రంలో 20 సులభమైన ప్రశ్నలు, 20 మధ్యస్థ స్థాయి ప్రశ్నలు, 10 కఠినమైన ప్రశ్నలు ఉన్నాయనుకుందాం. అదే నిష్పత్తి, అదే మార్కుల విభజనతో మరో విద్యార్థికి మరో సెట్‌ ఇవ్వాలి. ప్రశ్నలు వేరైనా పరీక్ష స్థాయి మాత్రం ఒకేలా ఉండాలి. అవసరమైతే ప్రశ్నల మధ్య సమానత్వాన్ని నిపుణులతో ముందుగానే పరీక్షించాలి.
ఇలా రూపొందించిన ప్రశ్నపత్రాలను పరీక్ష ప్రారంభానికి అరగంట ముందు పరీక్షా కేంద్రంలోని కంప్యూటర్లకు పంపించి, నిర్ణీత సమయంలో విద్యార్థులకు అందించవచ్చు. కంప్యూటర్‌ ఆధారిత పరీక్షలైతే ఈ ప్రక్రియను మరింత సులభంగా నిర్వహించే అవకాశం ఉంటుంది. పేపర్ ఆధారిత పరీక్షలైతే స్థానికంగా సురక్షితంగా ముద్రించే ఏర్పాట్లు అవసరమవుతాయి.
అప్పుడు లీకేజీ జరిగే అవకాశమే లేదా? పరీక్ష ప్రారంభానికి ముందే ప్రశ్నపత్రం బయటకు వెళ్లే అవకాశాన్ని ఈ విధానం గణనీయంగా తగ్గించగలదు. అయితే, పూర్తిగా లీకేజీలకు తావుండదని ఇప్పుడే చెప్పలేం. ప్రశ్నల డేటాబ్యాంక్‌ భద్రత, కంప్యూటర్‌ వ్యవస్థల్లోకి చొరబడే ప్రమాదం, పరీక్షా కేంద్రాల్లోని సిబ్బంది పాత్ర, ప్రశ్నపత్రాల ముందస్తు యాక్సెస్‌ వంటి అంశాలపై కట్టుదిట్టమైన నియంత్రణలు ఉండాలి.
అలాగే, ఒక విద్యార్థికి వచ్చిన ప్రశ్నలను పరీక్ష ముగిసిన తర్వాత మరొకరికి ఇవ్వకుండా ప్రశ్నల పునరావృతిని నియంత్రించడం, ప్రశ్నలను సురక్షితంగా పంపిణీ చేయడం, ప్రతి సెట్‌ ఎలా రూపొందిందో ఆడిట్‌ చేయగలిగే రికార్డులు నిర్వహించడం కూడా అవసరం. ఏఐ రూపొందించిన ప్రశ్నల్లో తప్పులు ఉంటే వాటిని గుర్తించే నిపుణుల వ్యవస్థ ఉండాలి.
ముఖ్యంగా, ప్రతి విద్యార్థికి వేర్వేరు ప్రశ్నపత్రాలు ఇచ్చినంత మాత్రాన అందరికీ సమాన న్యాయం జరిగినట్లు కాదు. ఒక విద్యార్థికి తేలికైన ప్రశ్నలు, మరొకరికి కఠినమైన ప్రశ్నలు వస్తే కొత్త వివాదం మొదలవుతుంది. అందుకే ప్రశ్నల ఎంపికలో సమానత్వం, పరీక్షల విశ్వసనీయత అత్యంత కీలకం.
అన్నింటికన్నా బెటర్… ఒకేసారి విద్యార్థులందరికీ పరీక్షలు కాదు… కంప్యూటర్లున్న పరీక్ష కేంద్రాల్లో వేర్వేరు తేదీలు, వేర్వేరు సమయాల్లో విద్యార్థులకు పూర్తిగా కంప్యూటర్లపైనే జవాబులు ‘రాయాల్సిన’ పద్ధతిని ప్రవేశపెడితే… నేరుగా ఆ కంప్యూటర్‌కే క్వశ్చన్ పేపర్ పంపించొచ్చు…
ఇక పరీక్షల రద్దులు, రాజీనామాల డిమాండ్లకు చెక్‌ పడుతుందా? పరీక్షల నిర్వహణలో సాంకేతికతను సమర్థంగా ఉపయోగిస్తే ప్రభుత్వాలపై ఒత్తిడి తగ్గడమే కాకుండా విద్యార్థుల సమయం, శ్రమ కూడా ఆదా అవుతాయి. పేపర్ లీకేజీ ఆరోపణలు వచ్చిన ప్రతిసారీ పరీక్ష రద్దు చేయాలా, మళ్లీ నిర్వహించాలా అనే సంక్షోభం నుంచి బయటపడే అవకాశం ఉంటుంది. అయితే, ప్రశ్నపత్రాల లీకేజీ ఒక్కటే పరీక్షల అక్రమాలకు కారణం కాదు. పరీక్షా కేంద్రాల్లో మాల్‌ప్రాక్టీస్‌, నకిలీ అభ్యర్థులు, సైబర్‌ దాడులు, మూల్యాంకన లోపాలు వంటి ఇతర సమస్యలనూ పరిష్కరించాల్సిందే.
నందన్ నీలేకని ప్రతిపాదనను ఈ దిశగా ఒక ఆరంభంగా చూడొచ్చు. ఏఐతో పరీక్షల రోజే ప్రశ్నపత్రాలు రూపొందించడం ఆలోచన మాత్రమే కాదు.. దాన్ని సమర్థంగా అమలు చేయగలిగితే పరీక్షల నిర్వహణలో పెద్ద మార్పునకు దారితీయవచ్చు.
విద్యార్థులు నెలల తరబడి కష్టపడి చదివేది తమ ప్రతిభను నిరూపించుకోవడానికి. కానీ ఎవరో చేసిన తప్పులకు పరీక్ష రద్దయి, మళ్లీ పరీక్ష రాయాల్సి రావడం మాత్రం అన్యాయం. ప్రశ్నపత్రం ముందే బయటకు రాకుండా చూడటం ఒక మార్గమైతే, పరీక్ష ప్రారంభానికి కొద్దిసేపటి ముందే ప్రతి విద్యార్థికీ సమాన ప్రమాణాలతో వేర్వేరు ప్రశ్నపత్రాలు ఇవ్వడం మరో మార్గం.
పరీక్షకు ముందే ప్రశ్నపత్రాన్ని కాపాడటం కంటే.. లీక్‌ చేయడానికి వీలులేని విధంగా పరీక్షా వ్యవస్థను రూపొందించడం మంచిది కాదా? ఎటొచ్చీ కేసీయార్ స్వర్ణయుగంలో తెలంగాణలో ఇంటర్ విద్యార్థుల ప్రాణాలతో చెలగాటమాడిన గ్లోబరీనా, తరువాత కోఎంప్ట్ ఎడ్యుటెక్‌గా పేరు మార్చుకుని సీబీఎస్ఈ పరీక్షల మూల్యాంకనంలోనూ విద్యార్థుల ఉసురుపోసుకున్న సంస్థలకు దూరం ఉంచాలి… అదీ ముందు జాగ్రత్త..!!
Share this Article