.
ఒక పోస్టు… వైరల్… అందులో ముగ్గురు వ్యక్తులు… అపర కుబేరుడు అంబానీ కుటుంబానికి చెందినవారు… అందులో అనంత్ అంబానీ జుట్టు రాలిన తల… రాధికా మర్చంట్ మొహంపై మొటిమలు… నీతా అంబానీ చేతివేళ్ల వంకర్లు… ఆకాశ్ అంబానీ ఒబేసిటీ దేహం అందులో లేదు… ఆ పోస్టు ప్రశ్న ఏమిటంటే..?
‘‘డబ్బుంటే అందం కొనేయవచ్చా..? సౌందర్య ఉత్పత్తుల మార్కెెట్‌కు అంబానీలే ఓ ప్రశ్న… డబ్బు అన్నీ చక్కదిద్దగలదు అనుకుంటే అంబానీకి కుటుంబానికి అదెంత పని..? మరెందుకు సాధ్యం కాలేదు..?’’
Ads
…. నిజానికి వాళ్లను నిందించే, వెక్కిరించే పోస్టు ఏమీ కాదు అది… డబ్బుతోనే ఏదైనా సాధించలేం అని పరోక్షంగా చెప్పడంతోపాటు సౌందర్య ఉత్పత్తుల డొల్లతనాన్ని జనానికి చెప్పే పోస్టు అది… నిజమే కదా… మార్కెట్‌లో అందం సమస్యల వ్యాపారం… లక్షల కోట్ల వ్యాపారం…
మొటిమలు, మచ్చలు, పిగ్మెంటేషన్, జుట్టు రాలడం, తెల్లబడటం, స్కిన్ టోన్, ఫేస్ గ్లో, చుండ్రు, వైట్ హెడ్స్, బ్లాక్ హెడ్స్, ఆనెలు… ఎన్నో సమస్యలు… నివారణ అంటారు, చికిత్స అంటారు… మార్కెట్‌లో అనేక ఉత్పత్తులు… అన్నీ పైపై పూతలే, శాశ్వత నివారణ కాదు, చికిత్స కాదు… మరీ కొన్నింటిలో స్టెరాయిడ్స్ వాడతారు, అవి పరిస్థితిని మరింత క్షీణింపచేస్తాయి… ప్రత్యేకించి స్కిన్ టోన్, వైటెనింగ్, యాంటీ పిగ్మెంటేషన్ క్రీములు…
నిజంగా ఆ మందులు పనిచేస్తే… 8 లక్షల కోట్ల నికర ఆస్తి కలిగిన అంబానీ ఫ్యామిలీకి అవి ఓ లెక్కా..? విలువైన ప్రశ్న… సౌందర్య ఉత్పత్తుల మార్కెట్ అంత విలువైన ప్రశ్న…
అందం… అతి పెద్ద వ్యాపారం!… ప్రపంచవ్యాప్తంగా సౌందర్య సాధనాలు, వ్యక్తిగత సంరక్షణ ఉత్పత్తుల మార్కెట్ లక్షల కోట్ల రూపాయల స్థాయిలో ఉంది… ముఖానికి క్రీములు, మొటిమలకు జెల్స్, చర్మం తెల్లగా మారడానికి ఫెయిర్‌నెస్ ఉత్పత్తులు, పిగ్మెంటేషన్ తగ్గించడానికి సీరమ్స్, జుట్టు రాలకుండా నూనెలు, కొత్త జుట్టు మొలిపిస్తామనే లోషన్లు, చుండ్రుకు షాంపూలు, తెల్లజుట్టును నల్లగా మార్చే హెయిర్ డైలు… ఇలా ప్రతి సమస్యకూ ఓ ఉత్పత్తి అందుబాటులో ఉంది…
ఒక సమస్య కనిపిస్తే చాలు… దానికి పరిష్కారం చూపిస్తామంటూ ప్రకటనలు మొదలవుతాయి… కొద్ది రోజుల్లోనే ఫలితం, కొన్ని వారాల్లోనే మార్పు, నెల రోజుల్లోనే కొత్త రూపం అంటూ ప్రచారం సాగుతుంది… సెలబ్రిటీలతో ప్రకటనలు చేయిస్తారు… ముందు, తర్వాత ఫొటోలు చూపిస్తారు… వినియోగదారుల్లో ఆశలు పెంచుతారు… అందం కోసం ఖర్చు పెట్టడం ఇప్పుడు అవసరంగా, కొందరికి వ్యసనంగా కూడా మారిపోయింది…
అసలు సమస్య ఎక్కడుంది? చర్మం, జుట్టు సమస్యలకు ఒకే కారణం ఉండదు… మొటిమలు రావడానికి హార్మోన్ల మార్పులు, జన్యుపరమైన లక్షణాలు, చర్మంలో నూనె ఉత్పత్తి, రంధ్రాలు మూసుకుపోవడం వంటి అనేక కారణాలుంటాయి… ఒత్తిడి, కొన్ని ఆహారపు అలవాట్లు కూడా కొందరిలో ప్రభావం చూపవచ్చు… జుట్టు రాలడానికి వంశపారంపర్య లక్షణాలు, హార్మోన్లు, పోషకాహార లోపాలు, థైరాయిడ్ వంటి సమస్యలు, వయసు తదితర అంశాలు కారణం కావచ్చు…
కొన్ని ఉత్పత్తులు తాత్కాలికంగా మంచి ఫలితాన్ని ఇవ్వవచ్చు… కొన్ని చర్మాన్ని తేమగా ఉంచుతాయి… కొన్ని జుట్టుకు మెరుపునిస్తాయి… మరికొన్ని నిర్దిష్ట సమస్యలను తగ్గించడంలో సహాయపడతాయి… కానీ అందరికీ ఒకే ఫలితం వస్తుందని చెప్పలేం…
స్టెరాయిడ్ క్రీములు… అందం పేరుతో ప్రమాదం! ఈ మార్కెట్‌లో మరో ప్రమాదకరమైన అంశం స్టెరాయిడ్ల దుర్వినియోగం… ముఖ్యంగా త్వరగా తెల్లగా మారుతుందని, మొటిమలు మాయమవుతాయని, మచ్చలు పోతాయని చెప్పే కొన్ని క్రీముల్లో శక్తిమంతమైన స్టెరాయిడ్లు ఉండే ప్రమాదం ఉంది… వైద్యుల పర్యవేక్షణ లేకుండా వీటిని వాడితే మొదట్లో చర్మం మెరుగుపడినట్లు కనిపించవచ్చు… కానీ దీర్ఘకాలంలో చర్మం పలుచబడటం, రంగు మారడం, రక్తనాళాలు కనిపించడం, మొటిమలు రావడం వంటి దుష్ప్రభావాలు ఎదురుకావచ్చు…
స్టెరాయిడ్లు అన్నీ చెడ్డవని కాదు. కొన్ని చర్మ వ్యాధులకు వైద్యులు అవసరాన్ని బట్టి స్టెరాయిడ్లను సూచిస్తారు… సమస్య వాటిని విచక్షణ లేకుండా, ఎక్కువ కాలం వాడటంలోనే ఉంది… అందుకే క్రీము పేరు, బ్రాండ్, ప్రకటన చూసి కాకుండా అందులోని పదార్థాలు, దాని ఉపయోగం తెలుసుకోవాలి…
డాక్టర్ల చికిత్సలే కాస్త నయం… మొటిమలకు సమర్థంగా పనిచేసే చికిత్సలు ఉన్నాయి… జుట్టు రాలే కొన్ని రకాల సమస్యలకు మందులతో జుట్టు రాలడాన్ని తగ్గించవచ్చు.., తిరిగి కొంత పెరిగేలా చేయవచ్చు… చుండ్రు, పిగ్మెంటేషన్ వంటి సమస్యలకూ నిర్దిష్ట చికిత్సలు ఉన్నాయి…
అయితే ఏ సమస్యకు ఏ చికిత్స పనిచేస్తుందనేది దాని మూలకారణంపై ఆధారపడి ఉంటుంది… ఉదాహరణకు వంశపారంపర్యంగా వచ్చే జుట్టు రాలడాన్ని ఒక నూనెతో ఆపేయడం సాధ్యం కాదు… కొన్ని మందులు వాడినంతకాలమే ఫలితాన్ని కొనసాగించవచ్చు… చికిత్స ఆపితే సమస్య మళ్లీ కనిపించవచ్చు… కొన్ని సమస్యలకు పూర్తిగా నివారణ సాధ్యం కాకపోయినా నియంత్రణ సాధ్యమవుతుంది… ఇదే వైద్య చికిత్సకు, ప్రకటనల్లో చెప్పే అద్భుత ఫలితాలకు మధ్య తేడా…
ఆహారం, జీవనశైలి… అసలు పునాది! మన శరీర ఆరోగ్యం, చర్మం, జుట్టు పరిస్థితి ఒకదానితో మరొకటి సంబంధం కలిగి ఉంటాయి… సమతుల ఆహారం, తగిన ప్రోటీన్లు, విటమిన్లు, ఖనిజాలు, సరైన నిద్ర, వ్యాయామం, ఒత్తిడి నియంత్రణ, తగినంత నీరు తీసుకోవడం వంటి అలవాట్లు కీలకం… పోషకాహార లోపం వల్ల జుట్టు రాలుతుంటే ఖరీదైన హెయిర్ ఆయిల్ దాన్ని సరిచేయలేదు… హార్మోన్ల సమస్య వల్ల మొటిమలు వస్తుంటే ఫేస్ వాష్ ఒక్కటే పరిష్కారం కాదు…
అయితే జీవనశైలి మార్పులే అన్ని సమస్యలకు మందు అనుకోవడం కూడా తప్పే… సరైన ఆహారం తీసుకుంటూ, ఆరోగ్యకరమైన జీవనం సాగిస్తున్నవారికీ జన్యుపరమైన లేదా హార్మోన్ల కారణాలతో చర్మం, జుట్టు సమస్యలు రావచ్చు… అందుకే సమస్యను గుర్తించడం, దాని మూలకారణాన్ని తెలుసుకోవడం ముఖ్యం…
అంబానీల దగ్గర డబ్బుంది… కానీ ప్రకృతికి మినహాయింపు లేదు! వైరల్ పోస్టు వెనుక ఉన్న వ్యంగ్యం ఇక్కడే ఉంది… కోట్ల రూపాయలు ఖర్చు పెట్టగలిగే వాళ్లకు కూడా మొటిమలు రావచ్చు… ప్రపంచంలో అత్యుత్తమ వైద్య నిపుణులను సంప్రదించగలిగే వాళ్లకూ జుట్టు రాలవచ్చు… అత్యంత ఖరీదైన సౌందర్య ఉత్పత్తులు కొనగలిగినంత మాత్రాన వయసు, జన్యువులు, హార్మోన్లు, శరీర సహజ లక్షణాలను మార్చేయడం సాధ్యం కాదు…
అందం అనేది మార్కెట్ నిర్ణయించే కొలమానం కాదు… ముడతలు లేని ముఖం, నల్లటి ఒత్తయిన జుట్టు, మచ్చలు లేని చర్మం, ఫెయిర్ కలర్ మాత్రమే అందానికి నిర్వచనమని భావించేలా ప్రకటనల ప్రపంచం మనల్ని ప్రభావితం చేస్తోంది… వాస్తవానికి వయసుతో వచ్చే మార్పులు, పుట్టుకతో వచ్చే లక్షణాలు సహజం… వాటిని పూర్తిగా చెరిపేయాలనే ప్రయత్నంలో ఆరోగ్యాన్ని పణంగా పెట్టాల్సిన అవసరం లేదు…!!
Share this Article