ఇలానే ఖర్చు చేస్తే 932 సంవత్సరాల్లో అంబానీ సంపద కరిగిపోతుంది అని ఒక మీడియా సంస్థ లెక్క తేల్చింది . ( వాళ్ళ మీడియా సంస్థ ఈ నెల జీతం ఇస్తుందా ? లేదా ? ఇలానే సాగితే ఎన్ని నెలల్లో మీడియా మూతపడుతుంది అనే లెక్క కూడా వాళ్లే వేస్తే, తేలిస్తే బాగుండు )
బాబూ అప్పారావు, అలా ఖర్చు చేసినా ఏమీ కాదు … ఇంకా పెరుగుతుంది … ఎందుకంటే నీలా వారిది ఆదాయానికి మించిన ఖర్చు కాదు … ఖర్చు కన్నా వేల రేట్లు ఎక్కువ ఆదాయం ఉంటుంది …
చాలా ఏళ్ళ క్రితం ఓ కుర్రాడు వాడి అజ్ఞానాన్ని నాతో పంచుకున్నాడు . అంబానీల ఆస్తి ఎంతో పత్రికల్లో చూసి ఏనాటికైనా అంత సంపాదించాలి అని టార్గెట్ పెట్టుకున్నాడు … కొంత కాలం అయ్యాక తెలిసిందట … నేను అంబానీ అంత సంపాదించే అంత వరకు అంబానీ అలానే ఉండడు కదా ? అతని సంపాదన ఇంకా పెరుగుతుంది కదా ? అని నవ్వుకున్నాడట …
Ads
కాబట్టి 932 సంవత్సరాల తరువాత అంబానీ సంపద కరిగిపోతుంది అనే బాధ వదిలేసి ఈ నెల జీతం వస్తుందా ? రాదా ? అనే దానిపై దృష్టి పెట్టడం జర్నలిస్టులకు మంచిది …
సినిమాల్లో హీరోల్లా రిక్షా తొక్కి , మూటలు మోసి సంపాదించరు .. ఒక దశ దాటిన తరువాత డబ్బే డబ్బును సంపాదిస్తుంది … అంబానీ చేపట్టిన వ్యాపారాలు అన్నీ దూసుకు వెళ్తున్నాయి … వాళ్ల కంపెనీలు గాడి తప్పకుండా కాపాడుకుంటే చాలు… అంబానీ డబ్బులు పెట్టిన రంగాలు ఎవర్ గ్రీన్ రెవిన్యూ ఓరియంటెడ్… ఏళ్లు గడిచేకొద్దీ వాళ్ల ఆస్తుల విలువ పెరుగుతుంది, అదీ ఆదాయమే… సో, 932 ఏళ్లు అనేది ఓ పిచ్చి లెక్క… శుష్క వాదన…
మన సామాజిక వర్గమా ? కాదా ? అని చూడరు .. ఏ పనికి ఎవరు సరైన వారు అని చూస్తారు వాళ్లు .. ఎంత జీతమైనా ఇస్తారు … సరైన వ్యవస్థను ఏర్పాటు చేస్తారు … సరైన బృందాన్ని ఎంపిక చేసుకోవడమే అసలైన విజయం .. అనిల్ అంబానీ ఫెయిల్ అయింది అక్కడే . ముఖేష్ అంబానీ ముందు చూపు పనికి వచ్చింది అక్కడే … చూస్తున్నంత వరకు అంబానీల కుటుంబ సంబంధాలు చాలా బలంగా ఉన్నాయి .. ఆ బంధాలు విజయ తీరాలను చేరుస్తాయి .
ముంబైలో ఉన్న మైసూర్ కేఫ్ లోన తను చదువుకునే రోజుల నుంచీ తినడం అలవాటు అని ముఖేష్ అంబానీ ఓ ఇంటర్వ్యూలో చెప్పారు .. పెళ్ళికి ఆ మైసూర్ కేఫ్ యజమానిని పిలిచారు … పిలవడమే కాదు, కొత్త దంపతులు ఆ పెద్దాయనకు పాదాభివందనం చేశారు .. ఫేస్ బుక్ లో ఎవరేమన్నా, ఏం విశ్లేషణలు చేసినా … అది చూశాక అంబానీ కుటుంబ బంధం చాలా బలంగా ఉంది, ఉంటుంది, వాళ్లు కొన్ని ఎమోషన్స్ వదిలేసుకోలేకపోవడమే వారి ఉన్నతికి కారణం అనిపించింది …… ( By బుద్ధా మురళి )
Share this Article