.
Subramanyam Dogiparthi….
·
ముగ్గురు ఉన్నారని 1+2 సినిమా అనుకునేరు ! కాదు . మంచి ఎమోషనల్ , కుటుంబ సినిమా . వంద రోజులు ఆడింది . కధ , స్క్రీన్ ప్లే , దర్శకత్వం , సంగీత దర్శకత్వం అన్నీ చాలా బాగుంటాయి .
ప్రధాన పాత్రలను బాగా మోల్డ్ చేసారు రచయిత . ప్రేక్షకులు మరచిపోలేని పాత్ర సత్యనారాయణ నటించిన రాజా వారి పాత్ర . ఆ పాత్ర చేత పలికించే మాటలు , వాటిల్లోని జీవితసారం నాకు బాగా నచ్చాయి .
Ads
ఆ తర్వాత మెచ్చుకోవలసింది శ్రీదేవి , శోభన్ బాబు , జయసుధల పాత్రలు , వారి నటన . సర్దుకుపోయే , బాధ్యతాయుత భార్యగా శ్రీదేవి బాగా నటించింది . ఆమెకు ముందు శోభన్ బాబు భార్యగా నటించిన జయసుధ శృతిమించిన స్వాతంత్య్రం , బాధ్యతారాహిత్యం , చేతులు కాలాక ఆకులు పట్టుకునే స్త్రీగా ఆమె బాగా నటించారు . ఇలాంటి పాత్రలు ఆమెకు కొట్టిన పిండే .
ఇంక శోభన్ బాబు . ఈ సినిమాలో బతికిపోయాడు . ఇద్దరి మధ్య నలిగిపోయే పాత్ర కాదు . ముందు పెళ్ళి చేసుకున్న జయసుధ విడాకులు ఇచ్చాక శ్రీదేవిని పెళ్లి చేసుకుంటాడు . విడాకులు ఇచ్చి విడిపోయిన జయసుధ సంపద కోసం ఓ ధనవంతుడైన వయసుడిగిన వాడిని పెళ్లి చేసుకుంటుంది . కాబట్టి హీరో గారికి ఆ గోల లేదు .
సినిమాలో చాలా భాగాన్ని ఊటీలో షూట్ చేసారు . అందమైన లొకేషన్లలో డ్యూయెట్లు బాగుంటాయి . బాగా హిట్టయిన పాట ఓ బాటసారీ ఇది జీవిత రహదారి . అలాగే హిట్టయిన మరో పాట అయ్యప్పస్వామి మీద భజన పాట . శబరి గిరీశా అయ్యప్ప శరణం శరణం అయ్యప్పా .
శ్రీదేవి , జయసుధ , మాస్టర్ సుందర్ల నృత్య గీతం చిత్రీకరణ చాలా చక్కగా ఉంటుంది . తప్పక చూడవలసిందే . అల్లరి కృష్ణుడు అందరి కృష్ణుడు ఎవ్వరివాడమ్మా అంటూ దేవకి , యశోద , చిన్ని కృష్ణుడుల మధ్య పాట . వేటూరి వారు బాగా వ్రాయగా సుశీలమ్మ , శైలజలు పాడారు .
మిగిలిన పాటలు కూడా శ్రావ్యంగా , అందంగా చిత్రీకరించబడ్డాయి . గుండెలో సవ్వడి ఏమిటో అలజడి , నీరెండ దీపాలు నీ కళ్ళల్లో ఆ నీడను చూసాను , మురిపాల మా బాబు ముద్దివ్వమన్నాడు పాటలు బాగుంటాయి . చక్రవర్తి సంగీత దర్శకులు . తాతినేని రామారావు సినిమాకు దర్శకులు .
ఇతర ప్రధాన పాత్రల్లో రంగనాధ్ , కాంతారావు , హేమసుందర్ , రమాప్రభ , అల్లు రామలింగయ్య , కృష్ణవేణి , రోహిణి , మిక్కిలినేని ప్రభృతులు నటించారు . రమాప్రభ పాత్ర , ఆమె నటన కూడా బాగుంటాయి .
ఇల్లాలు టైటిల్ అచ్చొచ్చే టైటిలే . ఇల్లాలు అనే టైటిలుతో 1940 , 1965 లలో కూడా సినిమాలు వచ్చాయి . ఇల్లు ఇల్లాలు , ఇంటికి దీపం ఇల్లాలే వంటి సినిమాలూ చాలా ఉన్నాయి . ఈ 1981 సినిమా యూట్యూబులో ఉంది . Feel good , beautiful and neat movie . ఇంతకుముందు చూసి ఉండకపోతే తప్పక చూడతగ్గ మంచి సినిమా . #తెలుగుసినిమాలసింహావలోకనం #తెలుగుసినిమాలు
Share this Article