ఇరుముడి, హనుమాన్ అంశ్ – మధ్యలో మరో సెన్సేషనల్ హిట్ !!

.

టాక్సిక్ తుస్సు… ఇరుముడి, హనుమాన్ అంశ్ సెన్సేషన్… మధ్యలో మరో సెన్సేషన్ ఏమిటో తెలుసా..? 200 కోట్లు వసూలు చేసిన బెత్లెహెమ్! ఆగస్టు నెల సినిమా మార్కెట్‌ను ఒకసారి వెనక్కి తిరిగి చూస్తే… పెద్ద సినిమాలు మాత్రమే బాక్సాఫీస్‌ను శాసిస్తాయన్న సూత్రానికి ఈ నెల చాలా చోట్ల గట్టి దెబ్బ తగిలింది…

ఇరుముడి జస్ట్ తెలుగు మార్కెట్… హనుమాన్ అంశ్ జస్ట్ హిందీ మార్కెట్… బెత్లెహెమ్ జస్ట్ మలయాళ మార్కెట్… తెలుగు, హిందీ మార్కెట్ దృష్ట్యా ఇరుముడి, హనుమాన్ అంశ్ వసూళ్లను సర్లే అని చెప్పుకోవచ్చు కానీ కేవలం మలయాళ మార్కెట్ టార్గెట్‌గా బెత్లెహెమ్ ఏకంగా 12 రోజుల్లో 200 కోట్ల వసూళ్లు అంటే మామూలు విషయం కాదు…

టాక్సిస్ 300 కోట్లు య(వారం), ఆవారాపన్-2 210 కోట్లు (19 రోజులు), ఇరుముడి 179 కోట్లు (12 రోజులు), విశ్వనాథ్ అండ్ సన్స్ 200 కోట్లు (19 రోజులు)… వాటికి దీటుగా బెత్లెహెమ్ 205 కోట్లు (12 రోజులు)… ఇవీ ఫిగర్స్… అంకెలే కదా అన్నీ చెప్పేది…

భారీ అంచనాలతో వచ్చిన ‘టాక్సిక్’ ఆశించిన స్థాయిలో ఆడలేకపోయింది. అదే సమయంలో ఎలాంటి భారీ హైప్ లేకుండా వచ్చిన ‘ఇరుముడి’ అనూహ్యమైన విజయాన్ని అందుకుంది. అతి చిన్న బడ్జెట్‌తో వచ్చిన ‘హనుమాన్ అంశ్’ అయితే ఏకంగా స్లీపర్ హిట్‌గా మారింది. కేవలం రూ.2 కోట్ల బడ్జెట్‌తో రూపొందిన ఈ సినిమా 500 శాతానికి పైగా రాబడి సాధించిందనే లెక్కలు కూడా వచ్చాయి.

ఇక ఇప్పుడు ఈ జాబితాలో మరో సినిమా చేరింది. మలయాళ సినిమా ‘బెత్లెహెమ్ కుటుంబ యూనిట్’… నివిన్ పౌలీ, మమితా బైజు జంటగా… ‘ప్రేమలు’ ఫేమ్ గిరీష్ ఏడీ దర్శకత్వంలో వచ్చిన ఈ సినిమా ప్రపంచవ్యాప్తంగా రూ.200 కోట్ల గ్రాస్ మార్క్‌ను దాటింది. విడుదలైన 12వ రోజుకే ఈ ఘనత సాధించడం విశేషం.

ముఖ్యంగా గుర్తుపెట్టుకోవాల్సిన విషయం ఏమిటంటే… ఇది పాన్ ఇండియా యాక్షన్ సినిమా కాదు. వందల కోట్ల బడ్జెట్‌తో తీసిన విజువల్ వండర్ కాదు. భారీ ఫ్రాంచైజీ కాదు. సూపర్ హీరో సినిమా కాదు. బీభత్సమైన బీజీఎం, కాల్పులు, మోతలు, నెత్తురు, పేలుళ్లు కాదు… మురికి బోల్డ్ సీన్లు కూడా కాదు…  ఒక మలయాళ రొమాంటిక్ కామెడీ. అందుకే ఈ రూ.200 కోట్ల వసూళ్లు మరింత ఆసక్తికరం.

అసలు ‘బెత్లెహెమ్ కుటుంబ యూనిట్’ కథేమిటి? పేరు వింటే ఇదేదో పెద్ద కుటుంబ కథ, పది మంది పాత్రలు, కుటుంబ కలహాలు, ఆస్తి తగాదాలు ఉన్న సినిమా అనిపించొచ్చు. కానీ సినిమా అంతకంటే చాలా సింపుల్.

ఒక కుటుంబం… కొన్ని బంధాలు… పాత పరిచయాలు… ప్రేమ… పెళ్లి… వాటి మధ్య పుట్టే గందరగోళం.  అయితే గిరీష్ ఏడీ కథను చెప్పే విధానం వల్ల ఈ సాధారణ అంశాలే సినిమా ప్రత్యేకతగా మారతాయి.  ప్రధానంగా ఆష్లే అనే యువతి చుట్టూ కథ తిరుగుతుంది. ఆమె జీవితంలోకి వచ్చే ప్రేమ, కుటుంబ పరిచయాలు, గతంతో ముడిపడిన సంబంధాలు… వీటి మధ్య సినిమా నడుస్తుంది.

ఇక్కడ దర్శకుడు పెద్ద ట్విస్టుల మీద ఆధారపడడు. మనుషుల మీద ఆధారపడతాడు. వాళ్లు మాట్లాడే మాటల మీద. వాళ్లు చేసే చిన్న చిన్న పనుల మీద. వాళ్ల మధ్య ఉండే అసౌకర్యాల మీద. అదే ఈ సినిమాకు అసలు బలం.

మరి ప్రేక్షకులకు ఏం నచ్చింది? మొదటిది నేచురల్ కామెడీ. కామెడీ కోసం ప్రత్యేకంగా కామెడీ ట్రాక్ పెట్టలేదు. పాత్రలు సహజంగా ప్రవర్తిస్తుంటేనే నవ్వు వస్తుంది. గిరీష్ ఏడీ గత సినిమాల మాదిరిగానే ఇక్కడ కూడా ఇదే ఆయన ప్రధాన బలం.

రెండోది నివిన్ పౌలీ. కొంతకాలంగా సరైన హిట్ కోసం చూస్తున్న నివిన్‌కు ఈ సినిమా మంచి కమ్‌బ్యాక్‌లా మారింది. ఆయన పాత్రలో స్టార్ ఇమేజ్ కంటే మనిషితనం ఎక్కువగా కనిపిస్తుంది. అందుకే ప్రేక్షకులు అతడితో ఈజీగా కనెక్ట్ అవుతున్నారు.

మూడోది మమితా బైజు. ‘ప్రేమలు’ తర్వాత మమితాకు వచ్చిన గుర్తింపును ఈ సినిమా మరోసారి బలపరిచింది. నివిన్– మమితా కెమిస్ట్రీ సినిమాకు ప్రధాన ఆకర్షణల్లో ఒకటిగా మారింది. ప్రేక్షకుల తొలి స్పందనల్లో కూడా ఈ జోడీకి మంచి ప్రశంసలు వచ్చాయి.

నాలుగోది… సినిమాలోని వెచ్చదనం. ఇది మనల్ని భయపెట్టదు. మనల్ని షాక్‌కు గురిచేయదు. దేశాన్ని రక్షించే హీరో లేదు. వందల మందిని ఎడమ చేత్తో కొట్టే ఫైట్లు లేవు.  కానీ సినిమా చూస్తున్నంతసేపు ఒక మంచి మూడ్‌లో ఉంచుతుంది. అందుకే దీనిని చాలామంది రివ్యూయర్లు warm, funny and enjoyable romantic entertainerగా అభివర్ణించారు.

గిరీష్ ఏడీకి ఇది మరో మెట్టు… ‘ప్రేమలు’తో యువత మనసు పట్టుకున్న దర్శకుడు గిరీష్ ఏడీ. అక్కడ కూడా కథ చిన్నదే. పాత్రలు మన చుట్టూ కనిపించేవే. హాస్యం సహజంగా వచ్చేది. ప్రేమ కూడా పెద్ద డైలాగులతో కాకుండా చిన్న చిన్న సందర్భాల్లో కనిపించేది. ‘బెత్లెహెమ్ కుటుంబ యూనిట్’లో అదే శైలిని మరింత పరిణతితో ఉపయోగించినట్టు కనిపిస్తుంది.

అందుకే కొంతమంది విమర్శకులు కూడా ఈ సినిమాను గిరీష్ ఏడీకి ఒక maturing filmmakerగా చూపించే ప్రయత్నంగా చూస్తున్నారు. కుటుంబ సంబంధాలు, భావోద్వేగాలను గతం కంటే కొంత లోతుగా టచ్ చేశాడన్న అభిప్రాయాలు వచ్చాయి.

మలయాళంలో రూ.200 కోట్లు అంటే చిన్న విషయం కాదు! ఇదే ఈ సినిమా విజయాన్ని ప్రత్యేకంగా నిలబెట్టే అంశం. మలయాళ సినిమా పరిశ్రమకు గొప్ప కంటెంట్ ఉంది. గొప్ప దర్శకులు ఉన్నారు. గొప్ప నటులు ఉన్నారు. కానీ మార్కెట్ పరిమాణం మాత్రం తెలుగు, తమిళ, హిందీ పరిశ్రమలతో పోలిస్తే చిన్నదే.

అలాంటి మార్కెట్‌లో ఒక సాధారణ రొమాంటిక్ కామెడీ రూ.200 కోట్ల గ్రాస్ దాటడం అంటే కేవలం సినిమా బాగుందని చెప్పడం కంటే పెద్ద విషయం. అది ప్రేక్షకులు సినిమాను స్వీకరించిన స్థాయిని చెబుతుంది.

ముఖ్యంగా మొదటి వారం తర్వాత సినిమా పడిపోవాల్సింది పోయి రెండో వారంలోనూ బలంగా కొనసాగడం మరింత ఆసక్తికరం. రెండో వారాంతంలోనూ థియేటర్లలో ఆక్యుపెన్సీ బలంగా కొనసాగిందని ట్రేడ్ రిపోర్టులు చెబుతున్నాయి.

అంటే… హైప్ ప్రేక్షకుడిని థియేటర్‌ దాకా తీసుకొచ్చింది కాదు. మౌత్ టాక్ ప్రేక్షకుడిని థియేటర్‌కు తీసుకొచ్చింది. అదే ఈ సినిమా అసలు విజయం. ఆగస్టు చెప్పిన సినిమా పాఠం ఇదే! ‘టాక్సిక్’ వంటి భారీ అంచనాల సినిమా తడబడవచ్చు.

‘ఇరుముడి’ వంటి సినిమా ఊహించని స్థాయిలో విజయం సాధించవచ్చు. ‘హనుమాన్ అంశ్’ లాంటి రూ.2 కోట్ల సినిమా అంచనాలకు మించిన లాభాలు తెచ్చిపెట్టవచ్చు. ఇప్పుడు ‘బెత్లెహెమ్ కుటుంబ యూనిట్’ మరో విషయం చెబుతోంది.

సినిమా ఎంత పెద్దదో కాదు… ప్రేక్షకుడికి ఎంత నచ్చిందన్నదే చివరికి బాక్సాఫీస్‌ను నిర్ణయిస్తుంది. భారీ యాక్షన్ సినిమా అవసరం లేదు. భారీ స్టార్‌కాస్ట్ అవసరం లేదు. భారీ బడ్జెట్ అవసరం లేదు. ఒక మలయాళ సినిమా 12 రోజుల్లో 200 కోట్లు కొట్టగలదు. అందుకే ‘బెత్లెహెమ్ కుటుంబ యూనిట్’ కేవలం మరో హిట్ సినిమా కాదు. ఆగస్టు 2026లో ప్రేక్షకులు ఏం కోరుకుంటున్నారో చెప్పిన మరో చిన్న సినిమా ఇది, కానీ చాలా బలమైన బాక్సాఫీస్ స్టేట్‌మెంట్!

.

• చివరగా… మమతా బైజు… పెద్ద స్టన్నింగ్ బ్యూటీ ఏమీ కాదు… మంచి అవకాశాలు దొరికాయి… ఇంకేం..? వరుసగా 3 సినిమాలు 200 కోట్ల క్లబ్‌లో చేరాయి… లక్కీ… ఈ గోల్డెన్ లెగ్‌కు ఇంకా అవకాశాలు బాగా దొరుకుతాయి… అసలే సెంటిమెంటల్ ఇండస్ట్రీ కదా..!!