ఈటీవీ నాన్-ఫిక్షన్ కేటగిరీలో దాని ప్రధాన బలాల్లో ఢీ షో కూడా ఒకటి… ఈ డాన్సింగ్ షోకు పోటీగా వేరే చానెళ్లు ప్రోగ్రామ్స్ తీసుకొచ్చాయి, భారీ ఖర్చు పెట్టాయి కానీ సక్సెస్ కాలేదు… ఐతే ఫిక్షన్ కేటగిరీలో అత్యంత వీక్‌గా ఉండే ఈటీవీ ఈ నాన్ -ఫిక్షన్ (రియాలిటీ షోలు ఎట్సెట్రా) కేటగిరీని కూడా ఈమధ్య బాగా దెబ్బతీసుకుంది… దాంతో చానెళ్ల పోటీలో బాగా వెనుకబడిపోయి, స్టార్ మాతో పోలిస్తే చాలా చాలా దూరంలో కుంటుతోంది… అది వేరే సంగతి…
సరే, దాని రేటింగ్ బలాల్లో ఢీ షో ఒకటి కదా… డాన్స్ పోటీలకు కామెడీ పూత పూసి అలరించేది… ప్రత్యేకించి సుధీర్, రష్మి, ప్రదీప్‌ల కామెడీ బిట్లు బాగా పాపులర్… ప్రియమణి, శేఖర్ మాస్టర్ జడ్జిలుగా కూడా పాపులర్… కానీ ఎప్పుడైతే హైపర్ ఆది వచ్చి, తన పంచ్‌లపై ఈ ప్రోగ్రామ్ నిర్వాహకులు ఆధారపడటం ప్రారంభించారో, ఎప్పుడైతే సుధీర్, రష్మి ఈ ప్రోగ్రామ్ నుంచి వెళ్లిపోయారో అప్పట్నుంచీ షో మీద జనానికి ఆసక్తి పోయింది…
Ads
ఎవరు జడ్జిలుగా వస్తున్నారో, ఏం కామెడీ బిట్లు వేస్తున్నారో కూడా ఎవరికీ అర్థం కాని స్థితి… కాస్తో కూస్తో ఈ షోకు మిగిలిన బలం ప్రదీప్ యాంకరింగ్… తన వ్యక్తిగత వ్యవహారాల మీద ఏం విమర్శలున్నా సరే, హోస్ట్‌గా ప్రదీప్ ప్రస్తుతానికి తెలుగులో నంబర్ వన్… ఆ రేంజ్‌కు మగ యాంకర్లు ఎవరూ చేరుకోలేకపోయారు, కష్టం కూడా… తన స్పాంటేనిటీ బాగుండటమే కాదు… ఎక్కడా అసభ్య, అశ్లీల పదాలు దొర్లకుండా జాగ్రత్తపడతాడు…
అలాంటిది హఠాత్తుగా ఢీ షో నుంచి ప్రదీప్ మాయం… రాబోయే కొత్త సీజన్ (ఓ దాని తరువాత మరొకటి వస్తూనే ఉంటాయి, గ్యాప్ కూడా రానివ్వదు ఈటీవీ మేనేజ్‌మెంట్) ప్రోమోలో గీతామాధురి మొగుడు నందు ప్రత్యక్షమయ్యాడు… ఏదో సూపర్ లుక్ అనిపిస్తున్నా సరే, ఎక్కడి ప్రదీపు, ఎక్కడి నందు… అదేదో స్పోర్ట్స్ ప్రోగ్రాముల్లో నందు పాపులర్ అయ్యాడు గానీ ఎందుకో ఈ ఢీ షో కొత్త ప్రోమో చూస్తే హోస్ట్‌గా పెద్ద ఇంప్రెసివ్ అనిపించలేదు… అసలే రేటింగుల్లో వెనుకబడిపోతున్న ఈ ఢీ షోకు ఇది మరింత దెబ్బ…
మరి ప్రదీప్ ఏమయ్యాడు..? తీసేశారా..? ప్రదీపే కదా ఆ షోకు బలం, తనను తీసివేయడం ఏమిటి..? నో, తీసివేయలేదు… తనే తొలగిపోయాడు… తను అప్పట్లో 30 రోజుల్లో ప్రేమించుకోవడం ఎలా అంటూ ఓ సినిమాలో హీరోగా చేశాడు కదా… ఆ గడ్డం, ఆ లుక్కు, ఆ కథ మన్నూమశానం కలిసి సినిమా ఏట్లో కలిసింది… ఇప్పుడు మరో సినిమాలో హీరోగా చేస్తున్నాడు… హీరోయిన్‌గా అదే ఢీ షో ద్వారా పాపులరైన దీపిక పిల్లి చేస్తోంది… అంతకుముందు ఈటీవీలో క్రియేటివ్ డైరెక్టర్లుగా బాగా పేరుతెచ్చుకున్న నితిన్ భరత్ ఈ సినిమాకు దర్శకులు… ఈ పొట్టి, బక్క పిల్ల ఆమధ్య ఆహో ఓటీటీలో కామెడీ సర్కస్‌ షోలో సుధీర్ కో-హోస్ట్‌గా చేసింది… తరువాత ఎక్కడా కనిపించడం లేదు…
ఆల్‌రెడీ సుడిగాలి సుధీర్ హీరోగా గాలోడు అంటూ ఓ హిట్ కొట్టాడు… గెటప్ సీను కూడా ఏదో సినిమాలో లీడ్ రోల్ పోషించినట్టున్నాడు… నాకేం తక్కువ అనుకుని ప్రదీప్ కూడా సినిమాలపైనే బాగా కాన్సంట్రేట్ చేస్తున్నాడు… సో, డేట్స్ అడ్జెస్ట్ కావడం లేదు… టీవీకి టైమ్ దొరకడం లేదు… దాంతో ఢీ షోకు బైబై చెప్పాడు… షో నిర్వాహకులు సైతం సరేనన్నారు… అదీ సంగతి… కానీ ఒక్కమాట ప్రదీప్… నీ బలం, నీ పునాది టీవీ… సినిమాల కోసం టీవీ షోలను నిర్లక్ష్యం చేయకు, టీవీ షోలు పాడిబర్రెల్లాంటివి..! ఆల్‌రెడీ ముదురు బెండకాయలకు సినిమా అవకాశాలు జస్ట్, లాటరీ…!!
Share this Article