Bp Padala …….. Prasen Bellamkonda గారు తన పోస్టులో యండమూరి గారు తనకు పెన్ ఎలా బాకీ ఉన్నారో సరదాగా రాసారు . ఈ ఉదంతం చదివిన తర్వాత యండమూరి గారు తన పెన్ నాకిచ్చిన సందర్భం గుర్తుకు వచ్చింది . 1997 లో అనుకుంటా సాయి గారు ‘రచన’లో ప్రముఖ రచయితల కొత్త కథలు పేరు లేకుండా అచ్చువేసి పాఠకులను ‘ఆబ్జెక్టివ్ ‘గా( పేరు ఉంటే అభిమాన రచయితల పట్ల పక్షపాతంతో రాస్తారని) విమర్శలను రాయమని అడిగేవారు . అందులో భాగంగా ఓ నెల ‘ద్రౌపది వస్త్రాపహరణం’ నేపథ్యంలో (కథ పేరు ‘యుగాలు మారినా “అని గుర్తు ) ఉల్లిగడ్డ వ్యాఖ్యానంతో చాలా గమ్మత్తు కథ ఒకటి ప్రచురించారు .
అప్పటికే యండమూరి సీరియల్స్ తో పాటు ఆయన నవలన్నీ నమిలి మింగేసిన అనుభవంతో శైలిని , రైటర్స్ వర్కుషాపులో ఒకటి రెండు సార్లు ఆయనను కలిసి ఉండటంతో సులభంగానే రచయిత పేరును ఊహించాను . ముఖ్యంగా స్త్రీవాదులపై ఆ కథలో ఉన్న ఆయన ట్రేడ్ మార్క్ సెటైర్లు ఆయన్ని పట్టిచ్చాయి .
Ads
ఎంత ఇష్టమైన రచయిత అయినా సాయి గారి స్పిరిట్ భంగపడకుండా, కాస్త సునిశిత విశ్లేషణ మొహమాటం లేకుండా చేశాను . అయితే ఆశ్చర్యకరంగా 116 రూపాయలు ఇచ్చే ప్రథమ , ద్వితీయ బహుమతులు కాకుండా , ప్రత్యేక బహుమతి అనే కేటగిరీలో ప్రచురించారు . ప్రత్యేక బహుమతిని అందుకోవటానికి రచన ఆఫీసుకి రావాలని సాయి గారి కార్డు పిలుపు . విద్యానగర్ లోని రచన ఆఫీస్ లోకి వెళితే , బుగ్గన త్రివేణి వక్కపొడితో ఒక సిగరెట్ దమ్ము లాగి, నన్ను కాస్త ఆశ్చర్యంగా చూసి ‘కుర్రోడివే ‘ అన్నారు . నా బిడియపు నవ్వే సమాధానం .
టేబుల్ సొరుగులోంచి ఓ వాడిన పెన్ను తీసి నాకు అందించారు ” యండమూరి నీ విశ్లేషణకు చాలా సంతోషించి ఈ పెన్ పంపించారోయ్ ” అంటూ . ఈ పాత పెన్ ప్రత్యేక బహుమతి ఏంటో , ఇంత దూరం రప్పించడం ఏంటో అర్ధం కాక బుర్ర గోక్కున్నాను మనసులో .
Ads
విషయం ఏంటంటే ఏ కథనయితే నేను విమర్శించానో అదే కథను ఈ పెన్ తో రాశారు యండమూరి గారు . ఎన్ని 116 లు ఇస్తే దాని ఎత్తు తూగుతుంది… కుర్రోడిని కదా ఓ వారం రోజుల పాటు పెన్ ని నా బెడ్ పక్కనే పెట్టుకున్నాను ఎక్సయిట్మెంట్ తో … ఇంకా భద్రంగా ఉంది ఆ పెన్ నా దగ్గర , 25 సంవత్సరాల తర్వాత కూడా . థాంక్ యు మాష్టారు అండ్ హ్యాపీ బర్త్ డే మరో సారి…
Share this Article