బ్రెజిల్‌లో ఈ ఆవు ధర 36 కోట్లు !! ఆ జాతికి పూర్వీకులు మన పశువులే !!

.

ఒక వార్త… అబ్బురపరిచేదే… బ్రెజిల్‌లో Viatina-19 అనే ఓ ఆవు… అది నెలోర్ జాతికి చెందింది… ఆ ఆవు విలువ 36 కోట్లు… మీరు చదివింది నిజమే… దానిలో మూడో వంతుకు 7 మిలియన్ బ్రెజిలియన్ రియాల్స్‌కు అమ్మారు, అంటే ఆ ఆవు మొత్తం విలువ మన రూపాయల్లో 36 కోట్లు… కానీ ఎందుకలా..?

ఈ ప్రశ్నకు సమాధానం చెప్పుకునేముందు… అది మన ఒంగోలు, నెల్లూరుల నుంచి వెళ్లిన బ్రీడ్ నుంచి డెవలప్ చేయబడిన జాతి అని చెప్పుకుందాం… బ్రెజిలియన్లు ఇక్కడి నుంచి తీసుకుపోయి విస్తారమైన పశుసంపదను డెవలప్ చేసుకున్నారు… కానీ మనం..? సర్లెండి, చెప్పుకుంటే…???

ఇంకాస్త వివరంగా చెప్పుకుందాం… ఇది భారతదేశం నుంచి బ్రెజిల్‌కు వెళ్లిన ఆవు కాదు. ఇది మన ఒంగోలు జాతి మూలాలున్న బ్రెజిలియన్ నెలోర్ జాతిలో, అక్కడ దశాబ్దాలుగా జరిగిన selective breeding, genetic selection ద్వారా తయారైన ఒక అత్యుత్తమ సంతతి… అసలు కథ అక్కడే ఉంది.

ఒంగోలు ఎద్దులు బ్రెజిల్‌కు ఎందుకు వెళ్లాయి? మన ఆంధ్రప్రదేశ్‌కు చెందిన ఒంగోలు పశువులు బలమైన శరీరం, వేడి వాతావరణాన్ని తట్టుకునే సామర్థ్యం, వ్యాధులు– పరాన్నజీవులను తట్టుకునే శక్తి వంటి లక్షణాలతో చాలా కాలంగా ప్రసిద్ధి.

19వ శతాబ్దంలోనే భారతీయ జీబూ పశువులు బ్రెజిల్‌కు చేరాయి. కానీ తర్వాతి దశలో భారతదేశం నుంచి ఎంపిక చేసిన అత్యుత్తమ ఎద్దులను బ్రెజిల్‌కు తీసుకెళ్లడం అక్కడి పశు జన్యు అభివృద్ధిలో కీలకంగా మారింది.

అందులో Karvadi అనే ఒంగోలు ఎద్దు పేరు ప్రత్యేకంగా చెప్పుకోవాలి. 1963లో బ్రెజిల్‌కు చేరిన Karvadi, అక్కడి నెలోర్ breedingలో అత్యంత ప్రభావం చూపిన sireగా మారింది. అతని semenను ఇప్పటికీ జన్యు సంపదగా సంరక్షిస్తున్నారు…

అంటే… భారతదేశం నుంచి వెళ్లిన అత్యుత్తమ పశువుల జన్యువులను ఎంపిక చేసుకుంటూ, తరతరాల breeding ద్వారా బ్రెజిల్ తనకు కావాల్సిన అత్యుత్తమ నెలోర్‌ జాతిని అభివృద్ధి చేసుకుంది.

ఒంగోలు… నెలోర్‌గా ఎలా మారింది? ఇక్కడ పేరులోనే ఒక చరిత్ర ఉంది. బ్రెజిల్‌లో ఈ భారతీయ మూలాలున్న జీబూ పశువులకు Nelore అనే పేరు వచ్చింది. ఈ పేరు మన నెల్లూరు ప్రాంతంతో ముడిపడి ఉంది. వాస్తవానికి ఒంగోలు ప్రాంతం అప్పటి పరిపాలనా వ్యవస్థలో నెల్లూరు జిల్లాతో సంబంధం కలిగి ఉండటంతో ‘Nelore’ అనే పేరు ప్రాచుర్యంలోకి వచ్చింది.

కానీ బ్రెజిల్‌లో అభివృద్ధి చెందిన నెలోర్‌ను మన దగ్గరున్న ఒంగోలుతో అచ్చం ఒకటే అని చెప్పడం కూడా సరైంది కాదు. మూలం మాత్రమే భారతీయం. కానీ అక్కడి రైతులు, breeders దశాబ్దాల పాటు ఒక లక్ష్యంతో breeding చేశారు.

ఎక్కువ మాంసం.
వేగంగా బరువు పెరగడం.
బలమైన కండరాలు.
వేడి వాతావరణాన్ని తట్టుకోవడం.
పరాన్నజీవుల నిరోధకత.
మంచి ఫర్టిలిటీ
తమ లక్షణాలను సంతానానికి బలంగా అందించే జన్యు సామర్థ్యం.

ఇలా నెలోర్ జాతి బ్రెజిల్‌ ప్రధాన beef cattle breedగా మారిపోయింది. బ్రెజిల్‌లోని cattle populationలో జీబూ జాతుల ఆధిపత్యం ఉండగా, నెలోర్ వాటిలో ప్రధానమైనది.

పాల కోసం కాదు… మాంసం కోసం! ఇక్కడ మరో అపోహను కూడా తొలగించుకోవాలి. మన దగ్గర ఒంగోలు పశువులకు పాలు, వ్యవసాయ అవసరాలు, పశుసంపద అనే బహుళ ప్రయోజనాల చరిత్ర ఉంది. కానీ బ్రెజిల్‌లో నెలోర్‌ను ప్రధానంగా beef breedగా అభివృద్ధి చేశారు. Viatina-19 విలువకు పాల ఉత్పత్తి  మాత్రమే ప్రధాన కారణం కాదు.

అక్కడ అసలు ఆట geneticsది. మరి ఒక ఆవుకు రూ.36 కోట్లు ఎందుకు? ఇది చాలా ముఖ్యమైన విషయం. Viatina-19 ను రూ.36 కోట్లకు మాంసం కోసం ఎవరూ కొనలేదు. దాని శరీర బరువు దాదాపు 1,100 కిలోలు. సాధారణ నెలోర్ ఆవుతో పోలిస్తే దాదాపు రెండింతల బరువు. వేగంగా కండరాలు పెరగడం, fertility, మంచి physical structureతో పాటు— అత్యంత ముఖ్యంగా— తన మంచి లక్షణాలను సంతానానికి కూడా అందించే సామర్థ్యం దాని విలువను పెంచింది.

అంటే దాని శరీరంలో ఉన్న జన్యువులే అసలు ఆస్తి. ఒక అత్యుత్తమ ఆవు నుంచి ఒక దూడ పుడుతుంది. కానీ ఆధునిక పశు జన్యు సాంకేతికతతో కథ మారిపోయింది. ఆవు నుంచి oocytes తీసుకోవచ్చు. IVF ద్వారా embryos తయారు చేయవచ్చు. వాటిని surrogate cowsలో implant చేయవచ్చు.

అంటే… ఒక అత్యుత్తమ ఆవు జన్యువులను వందలాది, వేలాది తదుపరి జంతువుల్లోకి తీసుకెళ్లే అవకాశం ఉంటుంది. అందుకే elite cattle breedingలో ఆవు ధర కంటే దాని genetic potential చాలా విలువైనది. Viatina-19 విషయంలో breeders దాని egg cells కోసం కూడా భారీ మొత్తాలు చెల్లించారు.

ఇదే బ్రెజిల్ విజయ రహస్యం . ఇక్కడే బ్రెజిల్ మనకంటే ఎంత ముందుకు వెళ్లిందో కనిపిస్తుంది. మన దగ్గర ఒక మంచి ఒంగోలు ఎద్దు ఉంటే— “చాలా మంచి ఎద్దు” అంటాం. బ్రెజిల్‌లో అయితే దాన్ని genetic assetగా చూస్తారు. దాని pedigree నమోదు చేస్తారు. దాని సంతానాన్ని పరిశీలిస్తారు. ఏ లక్షణాలు తరతరాలకు వెళ్తున్నాయో కొలుస్తారు. మంచి జంతువులను మళ్లీ breedingలోకి తీసుకుంటారు.

IVF, embryo transfer వంటి సాంకేతికతలను ఉపయోగిస్తారు. అత్యుత్తమ జంతువుల semen, embryosను భద్రపరుస్తారు. ఇలా ఒక మంచి ఎద్దు లేదా ఆవు ఒక పశువు నుంచి ఒక genetic brand గా మారుతుంది. Karvadi ఎద్దు ఇందుకు అద్భుతమైన ఉదాహరణ. భారతదేశం నుంచి వెళ్లిన ఆ ఒక్క గొప్ప sire బ్రెజిలియన్ నెలోర్ జన్యు చరిత్రలో వేలాది పశువులకు పూర్వీకుడిగా మారింది.

అయితే రూ.36 కోట్ల కథకు మరో ట్విస్ట్ ఉంది!

Viatina-19 పేరు ప్రపంచవ్యాప్తంగా మారుమోగుతున్నప్పటికీ, ప్రస్తుతం అది ప్రపంచంలోనే అత్యంత ఖరీదైన ఆవు కాదు. 2024 నవంబర్ 22న బ్రెజిల్‌లోనే Carina FIV do Kado అనే మరో Nelore ఆవు 25 శాతం వాటా రూ.6.015 మిలియన్ రియల్స్‌కు అమ్ముడవడంతో, మొత్తం విలువ 24.06 మిలియన్ బ్రెజిలియన్ రియల్స్, అంటే అప్పటి మారకపు విలువలో సుమారు 4.1 మిలియన్ డాలర్లుగా నమోదైంది. Guinness World Records ప్రకారం అదే రికార్డు.

అంటే బ్రెజిల్‌లో కథ ఒక్క Viatina-19తో ఆగలేదు. జన్యువులకు విలువ పెరుగుతూనే ఉంది. మనకు ఇందులో ఉన్న అసలు కథ ఏమిటి? ఇది కేవలం “రూ.36 కోట్ల ఆవు” కథ కాదు. ఇది అంతకంటే పెద్ద కథ.  మన దగ్గర ఒకప్పుడు సాధారణంగా కనిపించిన ఒంగోలు జన్యువుల్లోనే, బ్రెజిల్ కోట్ల రూపాయల విలువైన genetic wealthను చూసింది.

నిజానికి జన్యు సంపదను ఎలా ఆర్థిక సంపదగా మార్చుకోవాలో చెప్పే అద్భుతమైన పాఠం. అందుకే ఆ రూ.36 కోట్ల ఆవును చూసి ఆశ్చర్యపోవడం కంటే… “మన దగ్గర ఉన్న ఇలాంటి జన్యు సంపద విలువ మనకు ఎంత తెలుసు?” అని అడగడం మరింత ఆసక్తికరం…