గుంజన్ సక్సేనా..! స్ట్రెయిట్‌గా, నీట్‌గా… ఏమాత్రం దారితప్పని ఓ బయోపిక్..!

నాలుగేళ్లయింది ఈ సినిమా వచ్చి..! సినిమా పేరు గుంజన్ సక్సేనా, ది కార్గిల్ గరల్… నెట్‌ఫ్లిక్స్‌లో సినిమాల సెర్చింగులో కనిపిస్తే దాని వెంట పరుగు తీసింది దృష్టి… ఈమధ్య హృతిక్ రోషన్ సినిమా ఒకటి ఫైటర్, మన వరుణ్ తేజ సినిమా ఆపరేషన్ వాలెంటైన్ మరొకటి ఎయిర్ ఫోర్స్ వార్ మీద వచ్చాయి… అంతేకాదు, కంగనా రనౌత్ సినిమా కూడా ఒకటి వచ్చినట్టు గుర్తు (తేజస్..?)…

వీటన్నింటికన్నా ముందే వచ్చింది ఈ గుంజన్ సక్సేనా… కరణ్ జోహార్ నిర్మాత, శ్రీదేవి బిడ్డ జాన్వీకపూర్ ప్రధాన కథానాయిక అనేసరికి కాస్త ఇంట్రస్టింగు… ఎవరీ గుంజన్ సక్సేనా..? కార్గిల్ వార్‌లో పాల్గొన్న తొలి మహిళా పైలట్… ఆమె బయోపిక్ ఇది… సినిమా ఆరంభం నుంచీ చివరి దాకా ఆసక్తికరంగానే చిత్రీకరించాడు దర్శకుడు శరణ్ శర్మ… ఆయనకు ఇది తొలి సినిమా అట…

నిజానికి సినిమా చూస్తున్నంతసేపూ జాన్వీకపూర్ నటన గమనిస్తున్నంతసేపూ ఒక ఆలోచన… రెండుమూడు తెలుగు చిత్రాలు చేయబోతోంది… కొన్ని హిందీ చిత్రాలు కూడా చేసింది… ఇలాంటి మంచి బయోపిక్ పాత్రను చేసిన ఆమెతో తెలుగులో పిచ్చి స్టెప్పులకు పరిమితం చేస్తారు కదాని జాలేసింది… ఆమెకు శ్రీదేవి బిడ్డగా పేరుంది, బోలెడంత డబ్బుంది, తండ్రి బోనీకపూర్‌కు ఏం తక్కువ..? దిక్కుమాలిన దేభ్యం పాత్రలు ఎందుకు చేయాలి..? ఈ గుంజన్ సక్సేనా పాత్రలో బాగానే చేసింది… మొహంలో ఫీలింగ్స్ బాగున్నాయి…

సినిమా కథ విషయానికొస్తే… రెండు వివాదాలున్నయ్… కార్గిల్ వార్‌లోకి అడుగుపెట్టిన తొలి మహిళ గుంజన్ సక్సేనా మాత్రమే కాదనీ, ఇద్దరమూ చాపర్లు నడిపించామని సక్సేనా కోర్స్‌మేట్ శ్రీవిద్య రాజన్ ఆరోపించింది… రిటైర్డ్ వింగ్ కమాండర్ నమ్రిత చాంది కూడా అదే చెప్పింది… దానికి గుంజన్ సక్సేనా కూడా ఏదో క్లారిటీ ఇచ్చింది… సినిమా కోసం కొంత క్రియేటివ్ లిబర్టీ తీసుకున్నారనీ చెప్పింది… అయితే రిక్రూట్‌మెంట్స్, శిక్షణ ఏర్పాట్లు, వసతులు, మహిళలపై వివక్షలకు సంబంధించి ఎయిర్ ఫోర్స్‌ను ఈ సినిమా కొంత కించపరిచినట్టుగా ఉందని ఎయిర్ ఫోర్స్ సెన్సార్ బోర్డుకు లేఖ కూడా రాసింది…

సరే, ఇవన్నీ ఎలా ఉన్నా… ఈ సినిమా కథ మాత్రం బాగుంది… అయితే గుంజన్ సక్సేనా ఫైటర్ విమానం పైలట్ కాదు… హెలికాప్టర్ పైలట్… ఆ ఛాపర్ వింగ్ సేవలు, సాహసాలు కూడా తక్కువేమీ కాదు.,.. గుంజన్ సక్సేనా కార్గిల్ యుద్ధంలో కీలక ప్రాంతాల్లోకి తన చీతా హెలికాప్టర్ మీద వెళ్లి శత్రు స్థావరాలను గుర్తించడం, సైనికులకు ఆహారం, ఆయుధాలను సరఫరా చేయడమే కాక ఎందరో క్షతగాత్రులను యుద్దభూమి నుండి సురక్షిత ప్రాంతాలకు తరలించి రక్షించింది… తన సేవలను గుర్తించి భారత ప్రభుత్వం శౌర్య చక్ర బిరుదుతో కూడా సత్కరించింది…

రియల్ అండ్ రీల్ గుంజన్ సక్సేనా

అలా మొదలైన తన కలని గుంజన్ ఎలా సాకారం చేస్కుంది, అప్పటివరకూ పూర్తిగా మగవాళ్ళే ఆధిపత్యం వహిస్తున్న ఆ రంగంలో మొదటి సారి కాలు మోపి, మహిళల కోసం మార్గం ఎలా సుగమం చేసింది. ఆ ప్రోసెస్ లో ఏఏ అడ్డంకులు ఎదుర్కొంది, ఎలాంటి సపోర్ట్ అందుకుంది, రక్షణ/సేఫ్టీ పేరుతో అడుగడుగుకు వెనక్కి లాగుతున్న తన అన్నని ఎలా ఎదుర్కొంది, ఈ విజయం సాధించడానికి కొండంత అండగా తన తండ్రి తనతో ఎలా నిలబడ్డాడు అనేది సినిమా కథ…

పంకజ్ త్రిపాఠి పాత్ర మనకి గుర్తుండి పోతుంది… తండ్రిగా తను ప్రోత్సహించే పద్దతి ఎక్కడా డ్రమటైజ్ చేయకుండా సహజంగా చాలా బావుంది… ఆ తండ్రీ కూతుళ్ళ బంధం చూసినపుడు ఖచ్చితంగా మన ఇంటి అమ్మాయిలను మనం ఎంత వరకూ ఎలా ప్రోత్సహిస్తున్నాం అనే విషయం ప్రశ్నించుకుంటాం. అలాగే ప్రతి అమ్మాయి అలాంటి నాన్న కావాలని కోరుకుంటుంది. ఆల్రెడీ ఉండి ఉంటే ధీమాగా మరోసారి హత్తుకుని గువ్వపిట్టలా తన చేతులలో ఒదిగిపోతుంది…