.
ఈ జయం మనదే ఆ జయం మనదే కాదు . ఇది కృష్ణది , అది యన్టీఆరుది , 1956 లో వచ్చింది . వెంకటేష్ జయం మనదేరా కూడా ఉంది .
ఈ కృష్ణ జయం మనదే 1986 ఏప్రిల్లో ఉగాది కానుకగా వచ్చింది . 100% వినోదాత్మక చిత్రం . గ్రామీణ నేపధ్యంలో తీయబడిన మరో ఊరికి మొనగాడు సినిమా .
Ads
ఓ చెరుకు పండించే ప్రాంతంలోని గ్రామంలో పిన్నమనేని బోస్ బాబు అనే యువకుడు పట్నంలో చదువుకుని పల్లెటూరి మీద మమకారంతో వ్యవసాయంలో సెటిల్ అవుతాడు.
మరి ఫార్ములా మేరకు హీరో ఉన్నప్పుడు విలన్లు , హీరోయిన్లు ఉండాలి కదా ! ఉన్నారు . ఆ విలన్లు తన తండ్రిని చంపి తల్లిని జైలుకు పంపుతారు . హీరోయిన్ తండ్రిని కూడా చంపుతారు . ఈ వాస్తవాలను తెలుసుకున్న హీరో దుష్టశిక్షణ చేయడంతో శుభం కార్డు పడుతుంది .
రొటీన్ కృష్ణ మార్క్ సినిమా . ఆయన స్టార్డంకు అనుగుణంగా పరుచూరి బ్రదర్స్ నేసిన కధ . మాటలు పదునుగానే ఉంటాయి . ముఖ్యంగా కోర్ట్ సన్నివేశాలలో బాగుంటాయి . అదీ పిన్నమనేని దెబ్బంటే వంటి డైలాగుల్ని కూడా పెట్టారు బ్రదర్స్ . పాపం ఆ జడ్జి గారు కూడా సిబిఐ విచారణకు ఆదేశం ఇస్తారు . అప్పట్లో కాస్త గౌరవం ఉండేది కదా !
చక్రవర్తి సంగీత దర్శకత్వంలో ఆత్రేయ , వేటూరి వారి పాత్రలు శ్రావ్యంగా ఉన్నా బయట అంతగా హిట్ కాలేదు . దర్శకుడు కె బాపయ్య పాటల్ని బాగానే చిత్రీకరించారు . కృష్ణ , శ్రీదేవి డ్యూయెట్లు గోవులాంటి దాన్నిరా , ఏ చీరె కట్టుకోను , రాణివాసాల ఈ రామచిలకా బాగుంటాయి . గ్రామీణ నేపధ్యం అనగానే ఓ బృంద నృత్యం కూడా ఉంటుంది కదా ! ఒకరికి ఒకరు తోడుగా ఉంటే ఓటమి లేదండి అంటూ జయం మనదే ఐకానిక్ సాంగ్ సాగుతుంది .
కృష్ణ నటన ఎనర్జిటిగ్గా , శ్రీదేవి నటన ముద్దుముద్దుగా ఉంటుంది . ఇద్దరూ బాగా నటించారు . వీరిద్దరి తర్వాత అన్నపూర్ణదే తదుపరి తాంబూలం . పవర్ఫుల్ పాత్ర . రావు గోపాలరావు , అల్లు రామలింగయ్య కాంబినేషన్ షరా మామూలే . Made for each other . గిరిబాబు , చలపతిరావు , ఆనందమోహన్ హీరో చేతిలో తన్నులు తింటూనే ఉంటారు .
ప్రేక్షకులు గుర్తుంచుకునే టిపికల్ పాత్ర సత్యనారాయణది . ఇలాంటోళ్ళు పల్లెల్లో ఉంటారు . పనీపాటా లేకుండా దారిన వచ్చేపోయే ప్రతీ వారిని కెలికి , అప్పుడప్పుడు చివాట్లు కూడా భుజిస్తూ ఉంటారు . చెరపకురా చెడేవు పాత్ర కూడా ఇది . గాలి పోగేసి ఆ గాలిని జనం లోకి వదిలే ఈ సోమరిపోతు చివరకు తన స్వంత కూతురికే నష్టం చేయబోతాడు . సత్యనారాయణ బాగా పండించాడు ఆ పాత్రను .
ఇతర పాత్రల్లో రంగనాధ్ , కాంచన , సారధి , జయశీల , ప్రభాకరరెడ్డి , పి యల్ నారాయణ , మాడా , నర్రా , కాకినాడ శ్యామల , డబ్బింగ్ జానకి , ప్రభృతులు నటించారు . It’s an entertainer . చూడబులే . కృష్ణ అభిమానులు , శ్రీదేవి సౌందర్యాభిమానులు తప్పక చూడవచ్చు .
#సినిమా_స్కూల్ #సినిమా_కబుర్లు #తెలుగు_సినిమాల_సింహావలోకనం #తెలుగు_సినిమాలు
Share this Article