.
Mohammed Rafee …. నిన్న రెబల్ స్టార్ కృష్ణంరాజు వర్ధంతి… దర్శకుడు శివ నాగేశ్వరరావు నాతో కృష్ణంరాజు గురించి చెప్పిన ఒక విషయాన్ని మీతో పంచుకుంటున్న!
కోనసీమలో షూటింగ్! అప్పట్లో ఇప్పటిలా ఫెన్సింగ్ అంటూ ఏమీ లేదు. కేవలం పురికొస తాడుతో ఆ షూటింగ్ ఏరియా లోపలకు జనం రాకుండా కడతారు. ఎవరైనా చూడటానికి వచ్చినా తాడు దాటి లోపలకు రాకూడదు. షూటింగ్ కు ఇబ్బంది!
షూటింగ్ లో ఒక అభిమాని తాడు దాటుకుని లోపలకు వచ్చి కృష్ణంరాజుకు షేక్ హ్యాండ్ ఇచ్చాడట! కృష్ణంరాజు సరదాగా “నేనెవరో తెలుసా” అని అడిగారట! “మీరు తెలియని వాళ్ళు ఎవరుంటారు?” అని “మీరు శోభన్ బాబు, నాకెందుకు తెలియదు” అన్నాడట ఆ అభిమాని. “సరే వెళ్ళు” అని పంపించారట భుజం తట్టి!
Ads
పక్కనే వున్న దర్శకుడు ఆశ్చర్యపోయి “అదేంటి, అతనికి చీవాట్లు పెట్టకుండా పంపించారు?” అనడిగారట! అతను “మిమ్మల్ని శోభన్ బాబు అంటే మీకేం బాధ అనిపించలేదా?” అని మళ్ళీ అడిగాడట!
కృష్ణంరాజు నవ్వి “నేనెందుకు బాధపడాలి! ఆ విషయం తెలిస్తే శోభన్ బాబు బాధపడాలి! నన్ను చూసి శోభన్ బాబు అనుకున్నాడంటే అసలు ఒరిజినల్ శోభన్ బాబును గుర్తు పట్టలేదని ఆయన బాధపడాలి” అనగానే ఇద్దరూ నవ్వుకున్నారట! ఆనాటి రోజుల్లో ఇంతటి పాజిటివ్ థింకింగ్! అదే ఇంకో స్టార్ ను ఇదే మాట అంటే ఆ అభిమానిని కొట్టిస్తారు! అలా మారిపోయాయి రోజులు! కృష్ణంరాజు పాజిటివ్ యాటిట్యూడ్ నాకు బాగా నచ్చుతుంది!
“నాయాల్ది కత్తి అందుకో జానకీ” ఇది కృష్ణంరాజు పాపులర్ డైలాగ్! కృష్ణంరాజును నేను చాలాసార్లు కలిశాను. ఇంటర్వ్యూలు చేశాను. ఎంతసేపు వున్నా ఆ నవ్వు మాత్రం చెదిరేది కాదు! భోజనం చేయకుండా వెళ్లనివ్వరు! ఆయన గంభీరంగా ఉండటంతో చాలా మంది మాట్లాడటానికి భయపడేవారు! కానీ, ఆయనతో మాటలు కలిస్తే అయనంత జోవియల్ ఇంకెవ్వరూ ఉండరు! అంత మంచి స్వభావం గల వ్యక్తిత్వం కృష్ణంరాజుది!
సహజంగా రవీంద్రభారతికి స్టార్స్ వస్తున్నప్పుడు కాస్త హల్ చల్ ఉంటుంది! బౌన్సర్స్ జనాన్ని నెట్టే హడావిడి ఉంటుంది! ఆ స్టార్ కూడా పదే పదే వాచీ చూసుకుంటూ చాలా బిజీగా వున్నా, త్వరగా వెళ్ళాలి అనే టైపులో బిల్డ్ అప్ ఇస్తుంటారు!
ఒక్క కృష్ణంరాజు మాత్రం సింపుల్ గా వచ్చేస్తారు! నవ్వుతూ అందరినీ అభినందించి వెళ్లేవారు! తన అభిప్రాయాన్ని సూటిగా చెప్పేవారు! రాజకీయాల్లోనూ తన ప్రత్యేకతను చాటుకున్నారు! సినిమా రంగంలోనూ శాశ్వత ముద్ర వేసుకున్నారు. ఆత్మీయ మిత్రులు కృష్ణంరాజుకు శ్రద్దాంజలి…. – డా. మహ్మద్ రఫీ
Share this Article