.
నెట్ఫ్లిక్స్లో ఇప్పడు ఒక విభిన్నమైన సినిమా చర్చనీయాంశమవుతోంది… అదే ‘అక్యూజ్డ్’ (Accused)… సాధారణంగా మనం చూసే క్రైమ్ థ్రిల్లర్లకు భిన్నంగా, ఒక కొత్త వాతావరణం, మనకు అంతగా పరిచయం లేని ఒక జంట జీవితం చుట్టూ ఈ కథ తిరుగుతుంది…
ఈ కథ లండన్ నగరంలో సాగుతుంది… ఇద్దరు మహిళలు (కొంకణా సేన్ శర్మ, ప్రతిభ రంటా) ఒక జంటగా (Same Gender couple) కాపురం చేస్తుంటారు… వారు ఒక బిడ్డను దత్తత తీసుకోవాలని, ఒక పరిపూర్ణమైన కుటుంబాన్ని నిర్మించుకోవాలని కలలు కంటారు… అంతా బాగుంది అనుకుంటున్న సమయంలో.. కొంకణా సేన్ శర్మ పనిచేసే చోట ఆమెపై ‘లైంగిక వేధింపుల’ ఆరోపణలు వస్తాయి… అది కూడా కొందరు మహిళలే ఆమెపై ఈ ఆరోపణలు చేయడం గమనార్హం…
Ads
ఒక వైపు బయట కోర్టు కేసులు, ఆరోపణలు… మరోవైపు ఆ ఇంట్లోని ఇద్దరు మహిళల మధ్య మొదలయ్యే అనుమానాలు, అపార్ధాలు… ఈ నేపథ్యంలో సాగే ఉద్వేగభరితమైన డ్రామానే ఈ సినిమా…
-
కొత్తదనం…: ‘మీటూ’ (Me Too) కాన్సెప్ట్ను ఒకే జెండర్ జంట నేపథ్యంలో చూపించడం చాలా కొత్తగా ఉంది… లైంగిక వేధింపులు అంటే కేవలం మగవారు ఆడవారిపై చేసేవే కాదు, అధికారం చేతిలో ఉన్న ఎవరైనా చేయొచ్చనే కోణాన్ని ఇక్కడ స్పృశించారు…
-
నటన…: కొంకణా సేన్ శర్మ నటన గురించి ప్రత్యేకంగా చెప్పక్కర్లేదు… ఆమె ఎప్పటిలాగే అద్భుతంగా చేసింది… ప్రతిభ రంటా కూడా ఆమెకు ధీటుగా నిలిచింది… వీరిద్దరి మధ్య ఉండే కెమిస్ట్రీ, గొడవలు, ఆవేదన చాలా సహజంగా అనిపిస్తాయి…
-
దర్శకత్వం..: అనురాగ్ కశ్యప్ సోదరి అనుభూతి కశ్యప్ ఈ చిత్రాన్ని హ్యాండిల్ చేశారు… అన్న లాగే ఈమె కూడా భిన్నమైన దారిలో నడుస్తూ, క్లిష్టమైన మానవ సంబంధాలను తెరపైకి తెచ్చారు…
అయితే … సినిమా ప్రారంభంలో ఎంచుకున్న సామాజిక అంశం (Same gender issues & Me Too) చాలా బలంగా, భిన్నంగా ఉంది… కానీ, కథ ముందుకు సాగే కొద్దీ దర్శకురాలు ఆ లోతును వదిలేసి, సినిమాను ఒక ‘థ్రిల్లర్’ జానర్లోకి మార్చే ప్రయత్నం చేశారు… దీనివల్ల అసలు చెప్పదలచుకున్న పాయింట్ కొంత పక్కదారి పట్టినట్లు అనిపిస్తుంది… పురుషాధిక్యతను, దత్తత సమస్యలను ఇంకాస్త బలంగా చూపించి ఉంటే బాగుండేది…
ఈ సినిమా నెట్ఫ్లిక్స్లో తెలుగు డబ్బింగ్లో కూడా అందుబాటులో ఉంది… డబ్బింగ్ బాగున్నా.. హిందీ భాష అర్థమయ్యే వారు ఒరిజినల్ వెర్షన్ చూడటమే ఉత్తమం… ఎందుకంటే ఆ పాత్రల మూల స్వభావం, ఎమోషన్స్ హిందీలోనే ఇంకాస్త బాగా పండుతాయి… రొటీన్ సినిమాలకు భిన్నంగా, ఒక ‘డిఫరెంట్’ థ్రిల్లర్ చూడాలనుకునే వారికి ఇది మంచి ఛాయిస్…
చివరి మాట..: ‘మీటూ’ ఆరోపణలు, స్వలింగ సంపర్క జంటల మధ్య ఉండే సున్నితమైన భావోద్వేగాలు, లండన్ నేపథ్యంలో సాగే క్రైమ్ థ్రిల్లర్… ఈ మూడింటి కలయికే ‘అక్యూజ్డ్’… కొన్నిచోట్ల కథ దారి తప్పినా, నటీనటుల ప్రతిభ కోసం, కొత్తదనం కోసం ఒకసారి తప్పక చూడొచ్చునేమో…
Share this Article