.
కాళేశ్వరం ప్రాజెక్టు ఓ డిజాస్టర్… ఓ బ్లండర్… ఇది రాజకీయ విమర్శ కాదు, ప్రిస్టేజియస్ ప్రాజెక్టుల్ని జాతికి అందించిన ఓ నిపుణుడు తేల్చేసిన చేదు నిజం… బీఆర్ఎస్ బ్లఫింగ్ ఆపి, ఇకనైనా నిజాన్ని నిజాయితీగా అంగీకరించి… జాతికి క్షమాపణ చెబితే మేలు… కటువుగా ఉన్నా సరే, ఇదే నిజం…
మేడిగడ్డకు పోతాం, కన్నెపల్లికి పోతాం, బాంబులతో పేల్చారు, రిపేర్లు చేతకావడం లేదు, నీళ్లు ఎత్తిపోయడం లేదు… ఇలాంటి శుష్క విమర్శల్ని కట్టిపెడితే మరింత మేలు… అసలు డిజాస్టర్ అని తేల్చేసిన ఆయన ఎవరు అంటారా..? తను పేరు కల్నల్ పరీక్షిత్ మెహ్రా… ఓసారి తన గురించి తెలుసుకుంటే, తన వ్యాఖ్యల విలువ ఏమిటో అర్థమవుతుంది…
Ads
ఒకవైపు నల్లమల అటవీ అంతర్భాగంలో కిలోమీటర్ల కొద్దీ నిలిచిపోయిన సొరంగం… ఇంకోవైపు ప్రాణహిత పరివాహక ప్రాంతంలో కృంగిపోయిన కాళేశ్వరం బ్యారేజీ పిల్లర్లు! తెలంగాణ సాగునీటి రంగం తీవ్ర సంక్షోభంలో కూరుకుపోయిన ఆ కీలక సమయంలో, వాస్తవాలను దాచకుండా శాస్త్రీయ పరిష్కారాలు వెతికే దిశగా రాష్ట్ర ప్రభుత్వం ఒక సంచలనాత్మక అడుగు వేసింది…
సాంకేతిక లోపాలు, నాసిరకం నిర్మాణాలు, అసంపూర్తి పనులతో నిలిచిపోయిన ఈ మెగా ప్రాజెక్టులను మళ్లీ ఊపిరి పోసి పునరుద్ధరించేందుకు రంగంలోకి దిగిన ఆ నిపుణుడే—కల్నల్ పరిక్షిత్ మెహ్రా…
హిమాలయాల నుంచి తెలంగాణ గుండె చప్పుడు వరకు: ఒక నిపుణుడి ప్రయాణం… కల్నల్ పరిక్షిత్ మెహ్రా కేవలం మిలటరీ అధికారి మాత్రమే కాదు. ఇండియన్ ఆర్మీ Corps of Engineers విభాగానికి చెందిన ఆయన, అత్యంత క్లిష్టమైన భౌగోళిక పరిస్థితులలో రికార్డు స్థాయి ప్రాజెక్టులను పూర్తి చేసిన రాక్-మెకానిక్స్, టన్నెలింగ్ ఇంజినీరింగ్ నిపుణుడు…
-
హిమాలయాలలో నమూనాలు…: మంచు కొండల్లో అత్యంత ప్రమాదకరమైన పరిస్థితుల్లో నిర్మించిన అటల్ టన్నెల్ పనుల్లో ఆయన పాత్ర కీలకం…
-
మరణం అంచుల నుంచి రక్షణ..: ఉత్తరాఖండ్‌లోని సిల్క్యారా టన్నెల్‌లో శిథిలాల కింద చిక్కుకున్న 41 మంది కార్మికులను ప్రాణాలతో బయటకు తీసిన చారిత్రాత్మక రెస్క్యూ ఆపరేషన్‌కు ఆయనే నేతృత్వం వహించాడు…
-
అంతర్జాతీయ అనుభవం…: నేపాల్‌లోని ప్రమాదకర జలవిద్యుత్ టన్నెల్ అత్యవసర ఆపరేషన్లలో భారత బృందానికి సారథ్యం వహించి తన సామర్థ్యాన్ని అంతర్జాతీయ స్థాయిలో నిరూపించుకున్నాడు…
ఇప్పుడు, అదే నిరూపితమైన నైపుణ్యంతో తెలంగాణ సమగ్ర నీటి పారుదల ప్రాజెక్టుల పునరుద్ధరణ బాధ్యతను ఆయన భుజాన వేసుకున్నాడు…
కాళేశ్వరం విపత్తు: నిరాకరణ వర్సెస్ నిశ్చిత నిజాలు …. గత ప్రభుత్వ హయాంలో వేల కోట్ల ప్రజాధనంతో నిర్మించిన కాళేశ్వరం ప్రాజెక్టు, అవకతవకలు, అశాస్త్రీయ ప్రణాళికల వల్ల స్వల్పకాలంలోనే ప్రమాదంలో పడింది… నేషనల్ డ్యామ్ సేఫ్టీ అథారిటీ (NDSA) నివేదికలు స్పష్టం చేసినట్లుగానే— మేడిగడ్డ, అన్నారం, సుందిళ్ల బ్యారేజీల పిల్లర్లు కృంగిపోవడం, పునాదులు దెబ్బతినడం, కాంక్రీట్ నిర్మాణాల్లో స్పష్టమైన నెర్రలు (బిటలు) కనిపించడం బాధ్యతారాహిత్యానికి అద్దం పట్టింది… ఈ స్థితిలో నీటిని నిల్వ చేయడం లక్షలాది మంది ప్రజల ప్రాణాలతో జూదం ఆడటమే…
మాజీ పాలకులు తమ తప్పులను కప్పిపుచ్చుకోవడానికి అసత్య ప్రచారాలు చేస్తున్న వేళ, రేవంత్ రెడ్డి నేతృత్వంలోని కాంగ్రెస్ ప్రభుత్వం రాజకీయ ప్రయోజనాల కంటే ప్రజల భద్రత, శాస్త్రీయ దృక్పథానికే ప్రథమ ప్రాధాన్యతనిచ్చింది…
-
సమన్వయ కమిటీ సారథిగా…: కాళేశ్వరం బ్యారేజీల రిపేర్లు, డిజైన్ల సవరణ మరియు పునరుద్ధరణ ప్రక్రియను వేగవంతం చేసేందుకు ఏర్పాటు చేసిన స్టీరింగ్/ సమన్వయ కమిటీకి కల్నల్ మెహ్రాను అధిపతిగా నియమించారు…
-
అంతర్-ఏజెన్సీల సమన్వయం…: సెంట్రల్ వాటర్ కమిషన్ (CWC), NDSA, సాంకేతిక బృందాలు, అంతర్జాతీయ డిజైనర్లను ఒకే వేదికపైకి తెస్తూ, 2027 వర్షాకాలం నాటికి బ్యారేజీలను పూర్తి సురక్షితంగా అందుబాటులోకి తీసుకురావడానికి ఆయన శ్రమిస్తున్నాడు ఇప్పుడు…
ఎస్ఎల్బీసీ (SLBC) టన్నెల్: నిలిచిన కలకు పునరుజ్జీవం … అటు కాళేశ్వరంతో పాటు, దశాబ్దాలుగా నల్గొండ ప్రజల తాగు, సాగునీటి కలగా మిగిలిపోయిన శ్రీశైలం లెఫ్ట్ బ్యాంక్ కెనాల్ (SLBC) భూగర్భ టన్నెల్ పనుల్లో ఎదురైన తీవ్ర సాంకేతిక అడ్డంకులను తొలగించడంలోనూ కల్నల్ మెహ్రా కీలక పాత్ర పోషిస్తున్నాడు…
-
టన్నెల్ లోపల సంభవించిన ప్రమాదకర పరిస్థితులు, కుప్పకూలిన రాతి పొరలను తొలగించే రెస్క్యూ – క్లియరెన్స్ ఆపరేషన్లను ఆయన స్వయంగా పర్యవేక్షించాడు…
-
భూగర్భంలో అత్యంత క్లిష్టమైన రాతి పొరలను తొలగించడానికి కొత్త ఇంజినీరింగ్ విధానాలను రూపొందిస్తూ, పనులు సురక్షితంగా ముగిసేలా మార్గదర్శకత్వం వహిస్తున్నాడు…
ఒక సైనికుడి క్రమశిక్షణ, ఒక ఇంజినీరు నిపుణత కలగలిసిన కల్నల్ పరిక్షిత్ మెహ్రా పాత్ర ప్రస్తుతం తెలంగాణ సాగునీటి రంగంలో అత్యంత ప్రాధాన్యత సంతరించుకుంది…
Share this Article