జియో పాలిటిక్స్… క్యూబాలో నిత్యనరకం… 18 నెలల్లో 6 బ్లాక్ అవుట్స్…

.

Pardha Saradhi Upadrasta ….. క్యూబాలో ఘోర విద్యుత్ సంక్షోభం – దేశమంతా చీకటిలో, మానవతా సమస్యగా మారుతున్న పరిస్థితి… కోటి మందికి నిత్యనరకం…

ప్రపంచం మొత్తం ఇరాన్ యుద్ధంలో పడి క్యూబా మీద దృష్టి పెట్టలేదు. శనివారం సాయంత్రం క్యూబా ఎనర్జీ మంత్రిత్వ శాఖ ప్రకటించిన ప్రకారం దేశవ్యాప్తంగా మరోసారి భారీ విద్యుత్ బ్లాక్ అవుట్ జరిగింది. దీంతో మొత్తం ద్వీప దేశమైన క్యూబాలోని 15 ప్రావిన్సులన్నీ విద్యుత్ లేకుండా పోయాయి. సుమారు కోటికి పైగా ప్రజలు పూర్తిగా చీకటిలో జీవించాల్సిన పరిస్థితి ఏర్పడింది.

 ఎందుకు జరిగింది ఈ బ్లాక్ అవుట్?
క్యూబాలో విద్యుత్ ఉత్పత్తి ప్రధానంగా థర్మల్ పవర్ ప్లాంట్లు, ఆయిల్ ఆధారిత విద్యుత్ కేంద్రాలపై ఆధారపడి ఉంటుంది. కానీ ప్రస్తుతం దేశం తీవ్రమైన ఇంధన కొరత ఎదుర్కొంటోంది.
ప్రభుత్వ వివరణ ప్రకారం… గత 3 నెలలుగా పెద్ద ఎత్తున ఆయిల్ సరఫరా లేదు.
దేశానికి అవసరమైన ఇంధనంలో కేవలం 40% మాత్రమే అందుబాటులో ఉంది.
పాతబడిన పవర్ ప్లాంట్లు తరచూ పనిచేయకపోవడం సమస్యను మరింత పెంచింది.
ఈ కారణాల వల్ల విద్యుత్ గ్రిడ్ ఒక్కసారిగా కుప్పకూలి దేశమంతా చీకటిలో మునిగిపోయింది.

ఆసుపత్రులపై తీవ్ర ప్రభావం
విద్యుత్ లేకపోవడం వల్ల అత్యంత ప్రమాదకర పరిస్థితి ఆసుపత్రుల్లో ఏర్పడింది.
జనరేటర్లకు కూడా డీజిల్ కొరత.
శస్త్రచికిత్సలు వాయిదా.
ఫ్రిజ్ లేక మందులు పాడవడం.
డయాలిసిస్, వెంటిలేటర్, NICU పేషెంట్లు ప్రమాదంలో పడటం.
వైద్య వ్యవస్థ తీవ్ర ఒత్తిడిలో ఉంది.

అంతర్జాతీయ రాజకీయాల ప్రభావం
క్యూబా సమస్యలో అంతర్జాతీయ రాజకీయాలు కూడా కీలక పాత్ర పోషిస్తున్నాయి.
అమెరికా ఆంక్షల కారణంగా క్యూబాకు ఆయిల్ సరఫరా పరిమితమైంది.
రష్యా పంపిన 7.3 లక్షల బారెల్స్ ఆయిల్ ట్యాంకర్ క్యూబాకు చేరకుండా అడ్డుకున్నట్టు సమాచారం.
మరో Sea Horse అనే డీజిల్ ట్యాంకర్ కూడా గమ్యస్థానానికి చేరలేదు.
దీంతో క్యూబాలో ఇంధన సంక్షోభం మరింత తీవ్రంగా మారింది..

 వరుసగా పడిపోతున్న విద్యుత్ వ్యవస్థ
ఇది ఒక్కసారి జరిగిన ఘటన కాదు. గత 18 నెలల్లో ఇది 6వసారి దేశవ్యాప్తంగా బ్లాక్ అవుట్. మార్చి నెలలోనే ఇది మూడోసారి భారీ విద్యుత్ వైఫల్యం. దీంతో దేశ ఆర్థిక వ్యవస్థ, ఆరోగ్య వ్యవస్థ, ప్రజల రోజువారీ జీవితం తీవ్రంగా ప్రభావితమవుతోంది.

ఐక్యరాజ్యసమితి హెచ్చరిక
ఐక్యరాజ్యసమితి ఇప్పటికే హెచ్చరించింది.
“క్యూబా త్వరలో మానవతా సంక్షోభాన్ని ఎదుర్కొనే అవకాశం ఉంది…”
ఆహారం నిల్వ చేయడం కష్టమవుతోంది, ఔషధ సరఫరా దెబ్బతింటోంది, విద్యుత్ లేక పరిశ్రమలు కూడా నిలిచిపోతున్నాయి.

 ఇది ప్రపంచానికి చెప్పే పాఠం
ఈ ఘటన ఒక ముఖ్యమైన విషయం గుర్తు చేస్తోంది.
ఎనర్జీ సెక్యూరిటీ లేకపోతే ఒక దేశం పూర్తిగా స్థంభించిపోతుంది.. విద్యుత్ వ్యవస్థ కూలిపోతే ఆరోగ్యం, ఆర్థిక వ్యవస్థ, భద్రత అన్నీ ప్రమాదంలో పడతాయి. — ఉపద్రష్ట పార్ధసారధి

#Cuba #CubaBlackout #EnergyCrisis #HumanitarianCrisis #GlobalPolitics #PowerCrisis #PardhaTalks