రోహిణి సింధూరి..! చీట్… నో క్లీన్ చిట్…! శుద్ధపూస ఏమీ కాదట..!!

.

రోహిణి సింధూరికి హైకోర్టులో భారీ షాక్: రూ.7.5 కోట్ల ఎకో-బ్యాగుల స్కామ్ పై విచారణకు గ్రీన్ సిగ్నల్! కర్ణాటక కేడర్ ఐఏఎస్ అధికారిణి రోహిణి సింధూరిపై కొనసాగుతున్న అవినీతి ఆరోపణల వ్యవహారంలో కర్ణాటక హైకోర్టు సంచలన తీర్పును వెలువరించింది. 2021లో మైసూర్ జిల్లా కలెక్టర్‌గా పనిచేసిన సమయంలో జరిగిన ‘ఎకో-ఫ్రెండ్లీ బ్యాగుల’ కొనుగోలు కుంభకోణానికి సంబంధించి, ఆమెపై క్రిమినల్ విచారణ చేపట్టడానికి హైకోర్టు మార్గం సుగమం చేసింది.

ఈ మేరకు దర్యాప్తు సంస్థలకు ప్రాసిక్యూషన్ అనుమతిని వెంటనే మంజూరు చేయాలని కర్ణాటక ప్రభుత్వానికి ఆదేశాలు జారీ చేసింది.

ఏమిటీ రూ. 7.5 కోట్ల స్కామ్? 2021లో కోవిడ్-19 సమయంలో మైసూర్ జిల్లాలో వ్యర్థాల నిర్వహణ (Waste Management) కోసం రోహిణి సింధూరి ఆధ్వర్యంలో ప్రభుత్వం ఎకో-ఫ్రెండ్లీ బ్యాగులను కొనుగోలు చేసింది. అయితే, ఈ కొనుగోలులో భారీ అక్రమాలు జరిగాయని ఆరోపణలు వచ్చాయి. మార్కెట్‌లో వీటి ధర సుమారు ₹13 ఉండగా, రోహిణి సింధూరి వీటిని ఏకంగా ₹52 చొప్పున కొనుగోలు చేసిందని, దీనివల్ల ప్రభుత్వ ఖజానాకు దాదాపు ₹7.5 కోట్ల నష్టం వాటిల్లిందని ఫిర్యాదులు నమోదయ్యాయి.

కోర్టు మందలింపు.. కీలక వ్యాఖ్యలు … ఈ కేసులో ప్రభుత్వం వ్యవహరిస్తున్న తీరుపై హైకోర్టు అసహనం వ్యక్తం చేసింది. అవినీతి నిరోధక చట్టం (Prevention of Corruption Act) సెక్షన్ 17A కింద విచారణకు అవసరమైన అనుమతి ఇవ్వకుండా ప్రభుత్వం తాత్సారం చేయడాన్ని కోర్టు తీవ్రంగా తప్పుబట్టింది. కోర్టు తన వ్యాఖ్యల్లో ఇలా స్పష్టం చేసింది:

“శాఖాపరమైన విచారణలో (Departmental Inquiry) క్లీన్ చిట్ వచ్చినంత మాత్రాన క్రిమినల్ విచారణ ఆగిపోదు. అవినీతి కేసుల్లో వాస్తవాలను వెలికితీయాలంటే పూర్తిస్థాయి క్రిమినల్ దర్యాప్తు అవసరం.”

కేవలం పరిపాలనాపరమైన క్లీన్ చిట్ పేరుతో క్రిమినల్ కేసులను పక్కన పెట్టడం సరికాదని కోర్టు స్పష్టం చేసింది.

ఇకపై ఏం జరగనుంది? … హైకోర్టు ఆదేశాలతో, రోహిణి సింధూరిపై అవినీతి ఆరోపణలకు సంబంధించి అధికారికంగా క్రిమినల్ దర్యాప్తు ప్రారంభం కానుంది. ప్రభుత్వానికి కోర్టు గట్టిగా మొట్టికాయలు వేయడంతో, ఇప్పుడు ప్రాసిక్యూషన్‌కు ప్రభుత్వం అనుమతి ఇవ్వక తప్పని పరిస్థితి నెలకొంది. దీనివల్ల రోహిణి సింధూరి విచారణను ఎదుర్కోవాల్సిన అనివార్యత ఏర్పడింది.

వివాదాలకు కేరాఫ్ అడ్రస్‌గా… రోహిణి సింధూరి గత కొంతకాలంగా వరుస వివాదాలతో వార్తల్లో నిలుస్తున్నది… ఐపీఎస్ అధికారిణి డి.రూపతో జరిగిన బహిరంగ యుద్ధం, వ్యక్తిగత ప్రవర్తనపై వచ్చిన ఆరోపణలు, రాజకీయ నాయకులతో సంబంధాలు, ఘర్షణలు… ఇలా ఆమెపై అనేక విమర్శలు ఉన్నాయి. పెద్ద వివాదస్పద అధికారిణి… ఇప్పుడు కోర్టు జోక్యంతో ఈ కేసు చట్టపరమైన మలుపు తీసుకోవడం కర్ణాటక బ్యూరోక్రసీలో పెద్ద చర్చకు దారితీసింది. ఈ పరిణామం ఆమె కెరీర్‌పై ఎలాంటి ప్రభావం చూపుతుందో వేచి చూడాలి…