విజయ్ వెనుక మాస్టర్ బుర్ర…! పళనిస్వామిపై పగ తీర్చుకున్నాడు..!!

.

Mani Bhushan …. విజయ్ వెనుక ఓ చాణక్యుడు! – మంచి చెబుదామని వెళ్లిన చాణక్యుడిని మహా పద్మనందుడు పట్టించుకోడు. అతని కొడుకులు ఘోరంగా అవమానించి గెంటేస్తారు. చంద్రగుప్తుడిని నందులకు ప్రత్యామ్నాయంగా తయారుచేసి… నంద రాజ్యాన్ని నాశనం చేసి, మౌర్య సామ్రాజ్యాన్ని స్థాపించాడు చాణక్యుడు. ఇది చరిత్ర.

– తమిళనాడు ఎన్నికల్లో విజయ్ పార్టీ తమిళగ వెట్రి కళగం (టివికె) విజయం వెనుక కూడా ఇలాంటి చాణక్యుడు ఒకరు ఉన్నారు.
అతని పేరు కుల్లంపాలయం అర్ధనరి సెంగొట్టాయన్ (కె.ఎ.సెంగొట్టాయన్, 80 ఏళ్లు). ఎంజిఆర్ టైములో ఆర్.ఎం.వీరప్పన్ ఎలాగో… జయలలిత కాలంలో సెంగొట్టాయన్ అలాగ! గొప్ప ఆర్గనైజర్. పార్టీ అడ్మినిస్ట్రేషన్ వ్యవహారాల్లో దిట్ట.

– ఎం.జి.రామచంద్రన్​కి సెంగొట్టాయన్ వీర భక్తుడు. 1972లో అన్నా డిఎంకె ఆవిర్భావం నుంచి 2026 అసెంబ్లీ ఎన్నికలకు ఆర్నెల్ల ముందు బయటికి వచ్చేసే వరకు ఆ పార్టీకే అంకితమయ్యారు. అన్నాడిఎంకె టాప్–5లో ఒకరుగా చక్రం తిప్పారు.

– మొత్తంగా 11 సార్లు అసెంబ్లీకి పోటీ చేస్తే… ఒకే ఒక్కసారి ఓటమి పాలయ్యారు. సత్య మంగళం నుంచి ఒకసారి, గోబిచెట్టియపాలయం నుంచి తొమ్మిది సార్లు అంటే పదిసార్లు అసెంబ్లీకి ఎన్నికయ్యారు.

– సెంగొట్టాయన్​తో పాటు అన్నాడిఎంకెలో మొదట ఎం.జి.రామచంద్రన్​కి, తర్వాత జయలలితకు అండగా మరో ఇద్దరు (ఎస్.తిరునావుక్కరసర్, కె.కె.ఎస్.ఎస్.ఆర్.రామచంద్రన్​) దన్నుగా నిలబడినా, సెంగొట్టాయన్ ఒక్కరే తుదికంటా కొనసాగారు.
.
– ఎంజిఆర్ కేబినెట్​లో సెంగొట్టాయన్ ఉన్నారని అంటారు గానీ, ఆ వివరాలేవీ దొరకలేదు.

– ఎంజిఆర్ అనంతరం జయలలిత ఎదుర్కొన్న ప్రతి సంక్షోభంలోనూ సెంగొట్టాయన్ కోటలా అడ్డు నిలిచారు. పార్టీకి కార్యాలయ కార్యదర్శిగా పనిచేశారు. మెంబర్ సెక్రటరీలాంటి పదవి అది. జయ మంత్రివర్గంలో… రెవెన్యూ, వ్యవసాయం, రవాణా వంటి కీలక శాఖలు నిర్వహించారు.
.
‌‌- జయలలిత సంగతి తెలియనిదేముంది. ఆమెకు అనుగ్రహమైనా, ఆగ్రహమైనా కొండంత!

– శశికళ పెత్తనం పెరిగాక సెంగొట్టాయన్​ని దూరం పెట్టారు. కేబినెట్ నుంచి తప్పించేశారు. ఒక దశలో పార్టీ వ్యవహారాల్లోకూడా లేకుండా నెట్టేశారు. తిరునావుక్కరసర్, కె.కె.ఎస్.ఎస్.ఆర్.రామచంద్రన్ ఇతర పార్టీల్లో చేరిపోయినా అన్నాడిఎంకెని వదల్లేదు సెంగొట్టాయన్!

– జయ మరణంతో మరింత గడ్డుకాలం ఎదురైంది. ఎడపాడి పళనిస్వామి సిఎం అయ్యాక సెంగొట్టాయన్కి ప్రాథమిక విద్య, యువజన సర్వీసులు లాంటి నాన్–ఫోకల్ మినిస్ట్రీలు ఇచ్చారు.
.
– 2026 ఎన్నికలనాటికి అన్నాడిఎంకె చీలికలన్నింటినీ ఒకటి చేసి… అఖండ అన్నాడిఎంకెతో బరిలో దిగాలన్నది సెంగొట్టాయన్​ వ్యూహం.
‌
– పళనిస్వామికి నెత్తీనోరు కొట్టుకుని చెప్పారు. ఢిల్లీ వెళ్లి బిజెపి అగ్ర నాయకత్వంతో పలు మంతనాలు కూడా జరిపారు.

– తమిళనాడు దక్షిణ జిల్లాల్లో చాలా ప్రభావవంతమైన తేవర్ కమ్యూనిటీని ఒకటి చేయడానికి ప్రయత్నించారు. పసుంపన్ ముత్తురామలింగ తేవర్ (పి.ఎం.తేవర్) జయంతినాడు పన్నీర్ సెల్వం, శశికళ వర్గాలతో భుజం భుజం రాసుకు తిరిగారు.

– సెంగొట్టాయన్ మాట వినలేదు సరికదా, పార్టీ నుంచి గెంటేశారు పళనిస్వామి.
.
– అన్నాడిఎంకె ఆవిర్భావం నుంచి ఉన్నందున పళనిస్వామి చర్యను ఘోర అవమానంగా భావించారు సెంగొట్టాయన్. అటు నుంచి అటే మరో ఆలోచన లేకుండా సినీ నటుడు విజయ్​ని కలిశారు.

– పశ్చిమ తమిళనాడు జిల్లాల్లో కొంగు వెల్లలార్ గౌండర్ కమ్యూనిటీ చాలా బలమైంది. అదే వర్గానికి చెందినవారు సెంగొట్టాయన్.

– అనుకోని వరంలా విజయ్ టక్కున అందిపుచ్చుకున్నారు, తమిళగ వెట్రి కళగం (టివికె) అత్యున్నత స్థాయి కమిటీకి చీఫ్ కో–ఆర్డినేటర్​గా నియమించారు.

– పార్టీ అంతర్గత వ్యవహారాల దిద్దుబాటులోనూ, ఢిల్లీ స్థాయి పరిచయాల్లోనూ, ప్రభుత్వ పాలనలోనూ సుదీర్ఘ అనుభవంగల సెంగొట్టాయన్… మరో చాణక్యుడిలా తమిళనాట ద్రవిడ సిద్ధాంత ట్యాగ్​తో పనిచేసే పార్టీల్ని మట్టి కరిపించారు.

– పశ్చిమ తమిళనాడు జిల్లాల్లో 60 శాతం స్ట్రయిక్ రేటుతో టివికెని గెలిపించారు.
.
ఒకటి రెండు రోజులు ఆలస్యమైనా… తమిళనాడుకి కాబోయే ముఖ్యమంత్రి టివికె అధినేత విజయ్​నే! అతని మంత్రివర్గంలో ఆర్థిక శాఖ సెంగొట్టాయన్​కే దక్కుతుందని బాగా వినిపిస్తోంది….