తప్పో ఒప్పో… మాస్టారిని ఆరాధించటం… చివర్లో ప్రేక్షకుల చేత కంట తడి…

.
Subramanyam Dogiparthi …. కొన్ని సినిమాలు ఎన్నిసార్లు చూసినా ఇంకా ఇంకా చూడబుధ్ధి వేస్తాయి . అంతే కాదు . ప్రతిసారీ ఆ సినిమాతో మమైకం అయిపోతాం . అలాంటి సినిమాలలో ఒకటి ఈ సుందరకాండ సినిమా . సినిమా అంతా రోజా పాత్రలో నటించిన అపర్ణే . ఆ అల్లరి , తప్పో ఒప్పో మాస్టారిని ఆరాధించటం , చివర్లో ప్రేక్షకుల చేత కంట తడి పెట్టించటం .

ఆ పాత్రను సృష్టించిన తమిళ దర్శకుడు భాగ్యరాజాని ముందుగా అభినందించాలి . ఆ పాత్రను తమిళంలో సింధుజ ఎలా నటించిందో నాకు తెలియదు . కానీ , మన తెలుగులో అపర్ణని కాకుండా మరొకరిని ఊహించుకోలేం కూడా . ఆమెకు ఇదే మొదటి సినిమా . దర్శకేంద్రుడు గొప్పగా ఐడెంటీఫై చేసారు .

సినిమాకు షీరో ఆమే . అలా అని వెంకటేష్ , మీనాల నటనను తక్కువ చేయలేం . బాధ్యత కల మాస్టారుగా , మనసు కల ఒక మనిషిగా వెంకటేష్ గొప్పగా నటించాడు . అమాయక భార్యగా మీనా అద్భుతంగా నటించింది . అలా ఈ సినిమాకు ఓ షీరో , ఓ హీరో , ఓ హీరోయిన్ ఉన్నారు .

తమిళంలో హిట్టయిన సుందరకాండం అనే సినిమాకు రీమేక్ మన సుందరకాండ . తమిళంలో భాగ్యరాజా , భానుప్రియ , సింధుజ నటించారు . హిందీలోకి అందాజ్ టైటిలుతో రీమేక్ అయింది . అనిల్ కపూర్ , జూహి చావ్లా , ఖరిష్మా కపూర్ లీడ్ రోల్సులో నటించారు . కన్నడంలోకి సుందరకాండ అనే టైటిలుతోనే రీమేక్ అయింది . అందులో శివ రాజ్ కుమార్ , సుజిత , రోజా నటించారు .

బహుశా ఈ సినిమా చూడనివారు ఎవరూ ఉండరు . చాలా తరచుగా టివిలో ఏదో ఒక చానల్లో వస్తూనే ఉంటుంది . తాను చదువుకున్న జూనియర్ కాలేజీకే తెలుగు మాస్టారిగా వచ్చిన వెంకటేశ్వర్లుని అన్నింటిలో టాపర్ అయిన రోజా ప్రేమించేస్తుంది . ఆరాధించేస్తుంది . చివరకు వాళ్ళ చేతుల్లోనే ప్రాణాలు వదులుతుంది .

ఈ సినిమా ఓ మ్యూజికల్ వండర్ . అద్భుతమైన సంగీతాన్ని అందించారు కీరవాణి . ముఖ్యంగా ఐకానిక్ సాంగ్ ఆకాశాన సూర్యుడుండడు సందె వేళకే . ఈ పాటకు వేటూరి వారికి నంది అవార్డు కూడా వచ్చింది . ఈ పాటలో ఎంత వేదాంతం ఉందో అంతే సుందరంగా , ఆర్ద్రతతో చిత్రీకరించారు రాఘవేంద్రరావు . Hats off to all of them .

సుందరాకాండకు సందడే సందడి కాలేజీలో అందరూ కలిసి పాడే పాట చాలా హుషారుగా సాగుతుంది . అలాగే మరో పాట ఉలికి పడకు కుకుకుకు పెదవి కలిపేందుకు వెంకటేష్ , అపర్ణ మీద బాగుంటుంది . ఇంకా ఇంకా ఇంకా ఇంకా ఇవ్వాలేదో అచ్చాగా అంటూ సాగే డ్యూయెట్ వెంకటేష్ , మీనా మీద రాఘవేంద్రరావు స్టైల్లో ఉంటుంది . అలాంటిదే మరో పాట కోకిలమ్మ కొత్త పాట పాడింది కూనలమ్మ కూచిపూడి ఆడింది . శ్రావ్యమైన పాటల్ని అందించిన బాలసుబ్రమణ్యం , చిత్రను ప్రత్యేకంగా అభినందించాలి . ప్రభుదేవా , తార డాన్సుల్ని బాగా కంపోజ్ చేసారు .

ఇతర ప్రధాన పాత్రల్లో ముఖ్యమైనది బ్రహ్మానందం పాత్ర . వెంకటేష్ క్లాస్ మేట్ అతనికే విద్యార్ధి కావటం . ఇతర ప్రధాన పాత్రల్లో గొల్లపూడి మారుతీరావు , కోట శ్రీనివాసరావు , హేమా చౌదరి , నిర్మలమ్మ , తదితరులు నటించారు . నిర్మాత కె వి వి సత్యనారాయణ . సినిమా యూట్యూబులో ఉంది . ఇంతకుముందు చూసినా మళ్ళా చూడొచ్చు . It’s a romantic musical splendour .