.
టీ20 మ్యాచ్ను తలపించిన ఫుట్బాల్ ఫైట్.. 10 గోల్స్.. ఇంగ్లండ్కు మూడో స్థానం.. ఎంబాపె మరోసారి మ్యాజిక్!
టీ20 క్రికెట్లో 240 పరుగుల లక్ష్యాన్ని ఛేదిస్తున్నట్టుగా, ప్రతి కొన్ని నిమిషాలకో ట్విస్ట్ ఇస్తూ, చివరి వరకు ఉత్కంఠ రేపిన మ్యాచ్ ఇది. గోల్స్ వరద, వేగవంతమైన దాడులు, అద్భుతమైన కౌంటర్ అటాక్స్, చివరి వరకు తగ్గని పోరాటం… ఫుట్బాల్ అభిమానులకు అసలైన విందుగా నిలిచింది ఇంగ్లండ్-ఫ్రాన్స్ మధ్య జరిగిన మూడో స్థానం పోరు.
Ads
మొదటి అర్ధభాగం పూర్తయ్యేలోపే ఇంగ్లండ్ ఆటగాళ్లు ఫ్రాన్స్ రక్షణను పూర్తిగా ఛేదించారు. ఒకటి కాదు… రెండు కాదు… ఏకంగా 4-0 ఆధిక్యంలోకి వెళ్లిపోయారు. ఆ దశలో ఫ్రాన్స్ ఆట చూసినవారికి “ఇంత దూరం వచ్చిందేలా?” అన్న సందేహం రావడం సహజం. ఇంగ్లండ్ దాడుల వేగానికి ఫ్రాన్స్ డిఫెన్స్ చేతులెత్తేసినట్టే కనిపించింది.
కానీ ఫుట్బాల్లో చివరి విజిల్ పడే వరకు ఏదీ ముగిసిపోదని ఫ్రాన్స్ మరోసారి నిరూపించింది. నాలుగు గోల్స్ వెనుకబడినా నిరాశపడలేదు. దూకుడుగా ఎదురుదాడులు ప్రారంభించింది. వరుస అవకాశాలను గోల్స్గా మలుస్తూ స్కోరును 4-4తో సమం చేసింది. అప్పటికే మ్యాచ్ పూర్తిగా మారిపోయింది. మొదట్లో ఏకపక్షంగా సాగిన పోరు ఒక్కసారిగా థ్రిల్లర్గా మారింది.
అయితే కీలక సమయంలో ఇంగ్లండ్ మళ్లీ తన స్థాయిని చూపించింది. చివరి నిమిషాల్లో మరో రెండు గోల్స్ సాధించి 6-4తో విజయాన్ని ఖాయం చేసుకుంది. దీంతో టోర్నమెంట్లో మూడో స్థానాన్ని ఇంగ్లండ్ దక్కించుకోగా, చివరి వరకు పోరాడిన ఫ్రాన్స్ నాలుగో స్థానంతో సరిపెట్టుకోవాల్సి వచ్చింది.
ఈ మ్యాచ్లో మరో విశేషం ఇంగ్లండ్ స్టార్ బుకాయో సాకా హ్యాట్రిక్. అతని వేగం, ఫినిషింగ్, అవకాశాలను గోల్స్గా మలిచిన తీరు ఇంగ్లండ్ విజయానికి ప్రధాన కారణమైంది. ఫ్రాన్స్ డిఫెండర్లకు అతన్ని అడ్డుకోవడం దాదాపు అసాధ్యంగా మారింది.
అయితే ఓటమిపాలైనా ఫ్రాన్స్ కెప్టెన్ కిలియన్ ఎంబాపె మరోసారి తన స్థాయిని చాటుకున్నాడు. రెండు అద్భుతమైన గోల్స్తో జట్టును తిరిగి పోటీలోకి తీసుకొచ్చాడు. మొత్తం టోర్నమెంట్లో 10 గోల్స్ చేసి గోల్డెన్ బూట్ రేసులో అగ్రస్థానంలో కొనసాగుతున్నాడు. (మెస్సీ 8 గోల్స్)… ప్రతి మ్యాచ్లోనూ అతని వేగం, బంతిపై నియంత్రణ, గోల్ ముందు చూపిస్తున్న ప్రశాంతత ప్రత్యర్థులకు పెద్ద సవాలుగా మారుతోంది.
ప్రపంచ ఫుట్బాల్లో అభిమానుల నోళ్లలో ఎక్కువగా వినిపించే పేరు ఇప్పటికీ లియోనెల్ మెస్సీదే. అది ఆయన సాధించిన అద్భుత విజయాల ఫలితం. కానీ ప్రస్తుత తరం ఫుట్బాల్ను చూస్తే ఎంబాపె ప్రభావం ఏమాత్రం తక్కువ కాదనే విషయం మరోసారి స్పష్టమైంది. తన కెరీర్లో వరల్డ్ కప్లలో సాధించిన గోల్స్ సంఖ్యలో కూడా మెస్సీ రికార్డును అధిగమిస్తూ కొత్త మైలురాయిని చేరుకున్నాడు. అతను కేవలం ఫ్రాన్స్ స్టార్ మాత్రమే కాదు… ప్రపంచ ఫుట్బాల్కు కొత్త ముఖచిత్రంగా ఎదుగుతున్నాడు.
ఒకవైపు సాకా హ్యాట్రిక్, మరోవైపు ఎంబాపె ద్విగోల్ ప్రదర్శన, మధ్యలో నాలుగు గోల్స్ వెనుకబడిన జట్టు అద్భుతంగా తిరిగి పోరాడటం… ఇలా ఒకే మ్యాచ్లో అభిమానులు కోరుకునే ప్రతి అంశం కనిపించింది. అందుకే ఈ పోరును చాలామంది టీ20 క్రికెట్ థ్రిల్లర్తో పోలుస్తున్నారు….
1966 వరల్డ్ కప్ తరువాత ఇంగ్లండ్ మేలిరకం వరల్డ్ కప్ ప్రదర్శన ఇదే!!
Share this Article