తోడబుట్టినోళ్లనూ నమ్మేట్టు లేదు! అక్క అంబికపై నటి రాధ క్రిమినల్ కేసు!

.

దక్షిణాది సినీ పరిశ్రమలో 1980వ దశకంలో స్టార్ హీరోయిన్లుగా వెలుగొందిన ప్రముఖ సోదరీమణులు అంబిక, రాధల కుటుంబంలో తీవ్ర వివాదం చెలరేగింది. నటి రాధ తన అక్క, నటి అంబిక, అలాగే సోదరుడు మల్లికార్జున్‌పై చెన్నై పోలీసులను ఆశ్రయించి సంచలన ఫిర్యాదు చేసింది.

రూ. 46 కోట్ల విలువైన చెక్కులను దొంగిలించి, వాటిని దుర్వినియోగం చేశారంటూ ఆమె చెన్నై సిటీ పోలీస్ కమిషనర్ కార్యాలయంలో ఫిర్యాదు చేయడం సినీ వర్గాల్లో కలకలం రేపింది. ఈ కేసుకు సంబంధించిన పూర్తి వివరాలు ఇలా ఉన్నాయి:

• వ్యాపార లావాదేవీలు – చెక్కుల వాడకం…: రాధ తన వ్యాపార అవసరాల నిమిత్తం ఐడీబీఐ బ్యాంకులో ‘ఏఆర్‌ఎస్ గార్డెన్ స్టూడియో’ (ARS Garden Studio) పేరిట కరెంట్ ఖాతాను నిర్వహించేవారు. అయితే, జనవరి 2025లో ఈ వ్యాపారం పేరును ‘ఆర్ఆర్ గార్డెన్స్’ (RR Gardens) గా మార్చడంతో పాటు కొత్త చెక్‌బుక్‌ను తీసుకున్నారు. దీనితో పాత చెక్‌బుక్‌ వాడకాన్ని నిలిపివేశారు.

• ఖాతా నుంచి డబ్బులు డ్రా చేసే యత్నం…: తాను ప్రయాణాల్లో ఉన్న సమయంలో సిబ్బంది జీతాలు, కరెంట్ బిల్లులు, పన్నులు తదితర అత్యవసర ఖర్చుల కోసం తన ఇంట్లో కొన్ని సంతకం చేసిన ఖాళీ చెక్కులను ఉంచానని రాధ చెబుతోంది. అయితే, ఆ పాత చెక్‌బుక్‌ నుంచి 5 చెక్కులు వాడి, దొంగతనంగా అంబిక పేరిట సుమారు రూ. 46 కోట్లు డ్రా చేసుకునేందుకు ప్రయత్నించారనేది ఆమె ఆరోపణ.

• బ్యాంక్ అలర్ట్‌తో వెలుగులోకి…: సెప్టెంబర్ 17న బ్యాంకు నుంచి వచ్చిన ఒక మెసేజ్ ద్వారా తన పాత చెక్కులు దుర్వినియోగం అవుతున్న విషయం రాధ దృష్టికి వచ్చింది. వెంటనే అప్రమత్తమైన ఆమె, సంబంధిత చెక్కులపై ‘స్టాప్ పేమెంట్’ (Stop Payment) అని బ్యాంకును కోరారు. తనకు తెలియకుండా, తన అనుమతి లేకుండా ఆ చెక్కులను ఎవరు బయటకు తీశారు, వాటిపై మొత్తాలను ఎవరు నింపారనే దానిపై సమగ్ర విచారణ జరపాలని ఆమె పోలీసులను కోరింది.

• సోదరుడి ప్రమేయం & ఆస్తి వివాదాలు…: ఈ మొత్తం వ్యవహారంలో తన సోదరుడు మల్లికార్జున్ కుంఛన్ నాయర్ పాత్ర కూడా ఉందని, అంబిక, మల్లికార్జున్ ఇద్దరూ కలిసి ఈ మోసానికి పాల్పడ్డారని రాధ తన ఫిర్యాదులో ఆరోపించింది. అంతేకాకుండా, కుటుంబ ఆస్తులకు సంబంధించిన విలువైన పత్రాలు, ఆభరణాలు, ఇతర రికార్డులు ఉన్న ఇంటిలోకి తనను వెళ్లకుండా అడ్డుకుంటున్నారని, తన గదిలోని వస్తువులను కూడా చూసేందుకు అనుమతించడం లేదని ఆమె తన ఫిర్యాదులో ప్రస్తావించింది…

ఒకనాటి ప్రముఖ అగ్రనాయకిలు, సొంత అక్కాచెల్లెళ్లు ఇలా ఆర్థిక లావాదేవీలు, చెక్ మోసం కేసుల నేపథ్యంలో పోలీసులను ఆశ్రయించడం కోలీవుడ్‌తో పాటు తెలుగు సినీ పరిశ్రమలోనూ తీవ్ర చర్చనీయాంశమైంది. ఈ ఘటనపై పోలీసులు దర్యాప్తునకు సిద్ధమవుతున్నారు…. ఎవరినీ నమ్మేట్టు లేదు, తోడబుట్టినవాళ్లనైతే అసలే నమ్మేట్టు లేదు..!!