ఈ జీవన తరంగాలలో ఆ దేవుని చదరంగంలో ఎవరికి ఎవరూ సొంతమూ ఎంతవరకీ బంధము , తలకు కొరివి పెట్టేదెవరు ఆపై నీతో వచ్చేదెవరు !!! 1973 లో వచ్చిన ఈ సూపర్ హిట్ సినిమా పేరు చెప్పగానే ఎవరికయినా గుర్తుకొచ్చే పాట ఇదే . 12 కేంద్రాలలో వంద రోజులు అడిన గొప్ప సెంటిమెంటల్ సినిమా . అప్పటికే ఎంతో పాపులర్ అయిన యద్దనపూడి సులోచనారాణి నవలను తెరకు ఎక్కించి , ఓ కమర్షియల్ కళాఖండాన్ని సృష్టించారు రామానాయుడు .
మూడు ఫిలిం ఫేర్ అవార్డులను గెలుచుకుంది . ఉత్తమ చిత్రం , ఉత్తమ దర్శకుడు , ఉత్తమ నటి అవార్డులు . తమిళం లోకి తిరు మాంగళ్యంగా , హిందీలోకి దిల్ ఓర్ దీవార్ గా , కన్నడంలోకి మాంగల్యగా రీమేక్ అయింది . బిర్రయిన స్క్రీన్ ప్లేలను తయారు చేసుకోవటంలో విజయా వారు అగ్రశ్రేణులు . ఆ స్కూల్ విద్యార్ధే రామానాయుడు . ఆయన సినిమాలు సక్సెస్ కావటానికి కారణం అదే . ఈ సినిమా కూడా అంతే .
అన్ని పాత్రలకు సమానమైన ప్రాముఖ్యత ఉంటుంది . చివరకు వాణిశ్రీ తల్లి , మేనమామల పాత్రలతో సహా . ఆ పాత్రలకు తగ్గట్లుగా నటీనటులు అందరూ తమ తమ పాత్రల్లో జీవించే విధంగా దర్శకత్వం . దర్శకుడు తాతినేని రామారావుని , అంత బిర్రయిన స్క్రీన్ ప్లేను అందించిన ఆత్రేయను ఎంతయినా మెచ్చుకోవచ్చు . ముఖ్యంగా ఓ చక్కటి సినిమాను తెలుగు ప్రేక్షకులకు అందించినందుకు . వాణిశ్రీ , శోభన్ బాబు , లక్ష్మి , చంద్రమోహన్ , కృష్ణంరాజు , గుమ్మడి , శాంతకుమారి , శ్రీరంజని , రావి కొండలరావు ప్రభృతులు నటించారు .
Ads
మొదటి స్థానం వాణిశ్రీదే . ఆత్మాభిమానం , సంసార బాధ్యత , తమ్ముడు మీద ప్రేమ , వాడు బాగుపడాలనే ఆరాటం , అన్నింటినీ సమ పాళ్ళల్లో మిళితం చేసి బ్రహ్మాండంగా నటించింది . ఆమె తర్వాత శోభన్ బాబు . ఆమెతో పోటీపడి , కష్టపడి నటించారు . సావిత్రితో నటించటం ఎలా సవాలో , వాణిశ్రీతో నటించటం కూడా అంతే సవాలు . ఆ సవాల్లో శోభన్ బాబు ఈ సినిమాలో సక్సెస్ అయ్యాడనే చెప్పవచ్చు
.
జె వి రాఘవులు సంగీత దర్శకత్వంలో , సి నారాయణరెడ్డి వ్రాసిన పాటలన్నీ గొప్పగా హిట్టయ్యాయి . ఈ అందానికి బంధం వేసుకున్నాడు , పుట్టిన రోజు పండగ అందరికి , ఉడుతా ఉడుతా ఉచ్ ఎక్కడికెళతావు , నందామయా గురుడ నందామయా పాటలు చాలా శ్రావ్యంగా ఉంటాయి .
ఈ సినిమా నాకు బాగా నచ్చటానికి మరో పర్సనల్ కారణం కూడా ఉంది . నాపేరు అనంత రామ సుబ్రమణ్యం . సాధారణంగా సినిమాల్లో పాత్రలకు అనంత్ అనే పేరు పెట్టరు . ఈ సినిమాలో చంద్రమోహన్ పాత్ర పేరు అనంత్ . పైగా ఈ సినిమాలో ఆ పాత్ర కూడా నాకు బాగా ఇష్టం .
కాలేజి రోజుల్లోనే మా నరసరావుపేటలోనే మూడు నాలుగు సార్లు చూసి ఉంటా . టివిలో కూడా . యూట్యూబులో ఉంది . చూడనివారు తప్పక చూడండి . An unmissable , lovely , family oriented sentimental , feel good movie .
ఇప్పుడొస్తున్న నిర్మాతలను , దర్శకులను , స్క్రీన్ ప్లే రైటర్లను కట్టేసి చూపించాలి . ఆనాటి సినిమాలను యాభై అరవై ఏళ్ల తర్వాత కూడా ఎందుకు జనం ఆదరిస్తున్నారో , అవి కళాఖండాలుగా మిగిలిపోతున్నాయో తెలుసుకోవాలంటే ఇలాంటి సినిమాలను చూడాలి . #తెలుగుసినిమాలసింహావలోకనం #తెలుగుసినిమాలు …………. (By డోగిపర్తి సుబ్రహ్మణ్యం)
Share this Article