ముచ్చట

Muchata.com Telugu Latest News, Political News

కంగనా వ్యవహారంలో శివసేన సర్కారుకు బాంబే హైకోర్టు చురకలు…

by

సంజయ్ రౌత్ తెలుసు కదా… మహారాష్ట్ర ఉద్దవ్ ఠాక్రే కుటుంబానికి అత్యంత సన్నిహితుడు, వ్యూహకర్త, శివసేన అధికార పత్రిక సామ్నా ఎగ్జిక్యూటివ్ ఎడిటర్, ఎంపీ… మహావికాస్ అఘాడీ ప్రభుత్వం ఏర్పాటు దిశలో తను ఎంత కీలకమో… ఆ ప్రభుత్వానికీ సినీనటి కంగనా రనౌత్‌కూ నడుమ అగాధాన్ని పెంచింది కూడా తనే… ఇష్టారాజ్యంగా కామెంట్స్ చేశాడు… చివరకు ముంబై హైకోర్టు కూడా తనను తప్పుపట్టింది… ఒక పార్లమెంటేరియన్‌కు ఇలాంటివి తగవు అని చెప్పింది తాజా ఆర్డర్‌లో… అంతేకాదు, తను వాడిన ‘హరాంఖోర్’ పదంపైన వివరణను కూడా తోసిపుచ్చింది…

ఆమెపై కోపంగా ఉన్న మహారాష్ట్ర ప్రభుత్వం తన ఆఫీసును కూల్చేసిన సంగతి తెలుసు కదా… దీనిపై కంగనా కోర్టుకెక్కింది… సహజమే కదా… ఆ విచారణ సందర్భంగా ఈ కూల్చివేతలు ఉద్దేశపూర్వకం అని కూడా కోర్టు అభిప్రాయపడింది… ఈ సందర్భంగానే సంజయ్ రౌత్ వ్యాఖ్యలపై కూడా కామెంట్స్ పాస్ చేసింది కోర్టు…

సంజయ్ రౌత్ చాలా అగ్రెసివ్ కామెంట్స్ చేశాడు నిజంగానే… సామ్నా పత్రికలో ‘లేపేశారు’ అనే అర్థమొచ్చేలా ఉఖాడ్ దియా అనే హెడింగు పెట్టి కంగనా ఆఫీసు కూల్చివేత ఫోటోలు వేసి, ఫస్ట్ పేజీలో మంచి పనే జరిగింది అనే తరహాలో వార్తలు రాశారు… అలాగే హరామ్‌ఖోర్ అని ఆమెను నిందించాడు న్యూస్ నేషన్ అనే చానెల్‌కు ఇచ్చిన ఇంటర్వ్యూలో… అంతేకాదు, తన స్వస్థలానికి వెళ్లిన కంగనా తిరిగి ముంబైకి రానవసరం లేదు అనీ బెదిరింపు భాషలో మాట్లాడాడు… ఇవన్నీ శివసేన అధికార ప్రతినిధి మాట్లాడినట్టుగానే లెక్క…

సామ్నా సంపాదకీయంలో చేసిన వ్యాఖ్యలు కూడా ఏదో ప్రతీకారభావనను ధ్వనింపజేస్తున్నాయని కోర్టు అభిప్రాయపడింది… ప్రభుత్వ చర్యలు తమపై అసంతృప్తిగా ఉన్న గొంతులను మూసేయించేలా ఉన్నాయన్నది… మొత్తానికి మేమేమైనా మాట్లాడతాం, ఏమైనా చేస్తాం అనే ధోరణిని కోర్టు తప్పుపట్టింది… ఇంకా దీనిపై సంజయ్ రౌత్ ఏమీ స్పందించినట్టు లేడు…

ఉద్యోగులూ హోల్డాన్… జెర ఠైరో… తొందరపడితే బుక్కయిపోతారు…

by


ఉద్యోగులు రాజకీయ ప్రచారం చేయవచ్చా…!?

ఉద్యోగ, ఉపాధ్యాయుల్లో కొందరు ఇటీవల కాలంలో అవగాహనా రాహిత్యంతోనో లేక అత్యుత్సాహంతోనో రాజకీయ పార్టీలకు బహిరంగంగా మద్ధతు ప్రకటనలు చేస్తూ… మితి మీరి వ్యవహరిస్తున్నట్టు అనిపిస్తోంది. తాము ప్రభుత్వ ఉద్యోగులమని… నిబంధనల ప్రకారమే వ్యవహరించాలన్న సోయే వారిలో లేకుండా పోయింది. ప్రస్తుతం జరుగుతున్న జీహెచ్ఎంసీ ఎన్నికల్లో బాహాటంగా రాజకీయ పార్టీలకు మద్ధతు పలుకుతూ లేదా విమర్శిస్తూ పేస్ బుక్, వాట్సాప్, ట్విట్టర్ వంటి సామాజిక మాధ్యమాల్లో పోస్టులు పెడుతున్నారు.

మనకేం అవుతుంది? మనం మద్ధతు ఇచ్చేది అధికారంలో ఉన్న వారికే కదా అని భావిస్తూ కొందరు అడ్డగోలు పోస్టులు పెడుతున్నారు. ఇంకొందరు అధికారంలో లేని వారికి సైతం వంతపాడుతూ వస్తున్నారు. రెండూ తప్పే! ప్రభుత్వ ఉద్యోగ, ఉపాధ్యాయులు రాజకీయ ప్రకటనలు చేయడం, ఎన్నికల్లో ప్రచారం చేయడం, మద్ధతు ప్రకటించడం సీసీఏ రూల్స్-1991 ప్రకారం క్రమశిక్షణ ఉల్లంఘనే అవుతుంది.

ఈ రోజు అధికారంలో ఉన్న పార్టే శాశ్వతంగా అధికారంలో ఉండదు కదా! ఇప్పుడు ప్రతిపక్షంలో ఉన్న రాజకీయ పక్షం భవిష్యత్తులో అధికారంలోకి రావొచ్చు. బళ్ళు ఓడలు కావచ్చు, ఓడలు బళ్ళు కావచ్చు. అధికారంలో లేని పార్టీకి మద్ధతు ఇస్తే వెంటనే వేటు పడుతుంది. అధికారంలో ఉన్న రాజకీయ పార్టీకి మద్ధతు ఇచ్చే వారు తమ పబ్బం గడుపుకోవడానికి….. సొంత పనులు చక్కబెట్టుకోవడానికి తాత్కాలికంగా పనికి వస్తుందేమో కానీ, ఎప్పుడో ఒకప్పుడు వారికి ఇబ్బందులు తప్పవ్! ఇది గ్యారంటీ. రాసి పెట్టుకోండి! ఎందుకంటే అన్ని రోజులు ఒక్క తీరుగా ఉండవ్ కదా! తాము ఇప్పుడు భుజాలకెత్తుకొని ప్రచారం చేస్తున్న రాజకీయ పార్టీ తమకు ఇబ్బంది కలిగినప్పుడు పట్టించుకుటుందన్న పూచీ కూడా లేదు. ఈ విషయాన్ని ఉద్యోగులు గుర్తు పెట్టుకుంటే వారికే మంచిది.

గతంలో ఉమ్మడి ఆంధ్రప్రదేశ్ లో జరిగిన ఒక దురదృష్టకరమైన సంఘటనను ఉద్యోగ, ఉపాధ్యాయులు గుర్తుకు తెచ్చుకుంటే మంచిది. సరిగ్గా ముప్పై ఐదేళ్ల క్రితం…. అప్పుడు రాష్ట్రంలో అధికారంలో ఉన్న ప్రభుత్వం ఉద్యోగ, ఉపాధ్యాయుల రిటైర్మెంట్ వయస్సుని 58 నుంచి 55 ఏళ్లకు తగ్గించింది. రాత్రికి రాత్రే ఉత్తర్వులు జారీ చేసింది. ఈ విపత్తుని ఏమాత్రం ఊహించని పలువురు ఉద్యోగులు గుండె ఆగి చనిపోయారు. వయస్సు తగ్గింపుతో ఉద్యోగులు చనిపోవడాన్ని చూసి తట్టుకోలేక కడుపుమండిన ఒక ఉద్యోగ నాయకుడు ఆవేశంలో ప్రభుత్వాన్ని ఒక్క మాట అన్నాడు. ఆ మాటను సీరియస్ గా తీసుకున్న ప్రభుత్వ పెద్దలు సదరు ఉద్యోగనేతపై కత్తి కట్టి వేటు వేశారు. ఆ వేటు సస్పెన్షన్ కాదు, రిమూవల్ ఫ్రొం సర్వీస్ కూడా కాదు. సర్వీస్ నుంచి ఏకంగా డిస్మిస్ చేసింది. నాలుగేళ్ల తర్వాత…. 1989లో రాష్ట్రంలో కాంగ్రెస్ పార్టీ అధికారంలోకి వచ్చిన తర్వాత సదరు ఉద్యోగ నేతను తిరిగి ఉద్యోగంలోకి తీసుకున్నారనుకోండి. అది వేరే విషయం.

ఉద్యోగ, ఉపాధ్యాయ, పెన్షనర్లకు సమస్యలున్నది నిజం. ఈ ప్రభుత్వం ఆ సమస్యల్ని పట్టించుకోవడం లేదన్నదీ వాస్తవమే! 18 సమస్యలను పరిష్కారం చేస్తానని స్వయంగా సీఎం రెండున్నర ఏళ్ళ క్రితం విలేఖరుల సమావేశంలో ఇచ్చిన హామీలే నేటి వరకూ అమలుకు నోచుకోలేదు. సీఎం సచివాలయానికి రారు. ఉద్యోగ, ఉపాధ్యాయ ప్రతినిధులకు ప్రగతిభవన్‌లోకి ఎంట్రీ లేదు. భవిష్యత్తులో సీఎం అవుతారని ప్రచారంలో ఉన్న మంత్రి కేటీ రామారావు గారైనా జోక్యం చేసుకొని పరిస్థితి చక్కదిద్దుతారని ఉద్యోగ, ఉపాధ్యాయ, పెన్షనర్లు పెట్టుకున్న ఆశలు కూడా అడియాసలయ్యాయ్.

దాంతో రాష్ట్రంలోని ఉద్యోగ, ఉపాధ్యాయ, పెన్షనర్లలో ఈ ప్రభుత్వంపై… ప్రభుత్వ పెద్దలు తమ పట్ల వ్యవహరిస్తున్న తీరుపై ఆవేదన, అసంతృప్తి, ఆగ్రహం ఉందన్నది నూటికి నూరు శాతం నిజం. అయితే, కోపాన్ని ప్రదర్శించడం కోసం సామాజిక మాధ్యమాల్లో పాలక పార్టీకి వ్యతిరేకంగా పోస్టులు పెట్టడం తగదు. దానికి రూల్స్ ఒప్పుకోవు. వాటిని ప్రభుత్వం, అధికారులు సీరియస్ గా తీసుకుంటే రాజకీయ ప్రచారం చేసిన ఉద్యోగ, ఉపాధ్యాయులకు తీవ్ర ఇబ్బందులు ఎదురవ్వడం ఖాయం.

రాజకీయ పోస్టింగులు, మద్ధతు ప్రచారం, లేఖలపై ఫిర్యాదులు వెళ్లి విచారణ జరిగితే సదరు ఉద్యోగ, ఉపాధ్యాయులపై సస్పెన్షన్ సహా తీవ్ర చర్యలు తీసుకునే ప్రమాదముంది. దాంతో సర్వీస్ పరమైన సమస్యలూ ఉత్పన్నమవుతాయి. అందుకే రాజకీయ ప్రచారం వంటి దుస్సాహసానికి ఉద్యోగ, ఉపాధ్యాయులెవరూ పాల్పడకూడదు.

కింకర్తవ్యం….!?

కలిసి వచ్చే సంఘాలను కలుపుకొని ఏళ్ళ తరబడి సమస్యలను పెండింగులో పెట్టి ఉద్యోగ, ఉపాధ్యాయ, పెన్షనర్ల పట్ల రాష్ట్ర ప్రభుత్వం వ్యవహరిస్తున్న నిర్లక్ష్య వైఖరికి నిరసనగా దశల వారీగా ఉద్యమాలు నిర్మించడమే ఏకైక మార్గం. ప్రస్తుత పరిస్థితుల్లో ఉద్యమాలే సమస్యల పరిష్కారానికి ఏకైక మార్గం. దీనికి రాష్ట్రంలోని అన్ని రాజకీయ పక్షాలు, ప్రజల మద్ధతు సైతం కోరాలి. కూడగట్టాలి. ఒంటెద్దు పోకడలతో పోతున్న ప్రభుత్వానికి ఉద్యోగ, ఉపాధ్యాయ, పెన్షనర్లు తమ నిరసనను ఆ విధంగానే తెలియజేయాల్సి ఉంది. అంతే కానీ, రాజకీయ ప్రచారానికి దిగి ఇబ్బందులు కొని తెచ్చుకోవద్దు!

– మానేటి ప్రతాపరెడ్డి!

యశస్వి-రీతూ…! ప్రేమ ఎంత మధురం… వయోభేదమా..? జానేదేవ్…!!

by

……. జీతెలుగులోనే ఓ సీరియల్ వస్తుంది… ప్రేమ ఎంత మధురం… ఇదే టీవీ, జీ మరాఠీలో వచ్చిన తులా పహ్‌తేరే, తరువాత జీకన్నడలోకి రీమేక్ అయిన జోతే జోతేయాలి సీరియల్‌కు ఇది తెలుగు రీమేక్… హీరో వెంకట శ్రీరాం ఓ నడివయస్సు వ్యాపారి… హీరోయిన్ వర్ష డిగ్రీ చదివే ఓ యంగ్ ‘కోల్గేట్’ మోడల్ వంటి దరహాసిని… ఇద్దరి నడుమ బోలెడంత వయోభేదం, కానీ ప్రేమ… అదీ కథ… సీన్ కట్ చేయండి… దీనికి పూర్తి భిన్నమైన స్టోరీ చదువుదాం… అంటే ముదురు హీరోయిన్, లేత హీరో…

అదే చానెల్‌లో సరిగమ అని ఓ మ్యూజిక్ ప్రోగ్రామ్ వస్తుంటుంది… అందులో కొండేపూడి యశస్వి అనే సింగర్ టాప్‌లో ఉన్నాడు… అదరగొడుతున్నాడు… భవిష్యత్తు రాక్ స్టార్ అంటూ సదరు చానెల్ హై పిచ్‌లో కీర్తిస్తోంది… కోటి, శైలజ, చంద్రబోస్… కొందరు సింగర్ మెంటార్లు… ప్లస్ అదనంగా ప్రదీప్ కామెడీ యాంకరింగు… పెద్ద క్లిక్కేమీ కాలేదు… ఇక్కడ మరోసారి సీన్ కట్ చేయండి…

ఏదో ప్రోగ్రామ్‌లో యశస్వి పాడుతున్నాడు… పాట అయిపోయేలోపు ఓ యువతి గబగబా పరుగెత్తుకొచ్చి అలుముకున్నది… ఐ లవ్యూ అన్నది… అనుమతిస్తే అక్కడికక్కడే ప్రపోజ్ చేసి, పెళ్లి చేసుకుంటాను అనేసింది… షో అతిథులు, ప్రేక్షకుల్లో సైలెన్స్… ఆమె పేరు రీతూ చౌదరి… ఏదో ఓ అనామక సినిమాలో కూడా నటించిన, టీవీ నటి… ఇంకో ప్రోగ్రాం వెళ్దాం పదండి… అది జీతెలుగు కుటుంబం అవార్డులు…

ఈ అవార్డుల కార్యక్రమం పూర్తిగా జీతెలుగు ఇంటి ప్రోగ్రాం, వాళ్లలో వాళ్లు మెచ్చుకుని, దండలు వేసుకుని, ట్రోఫీలు ఇచ్చుకుని, వాళ్లకువాళ్లే చప్పట్లు కొట్టుకునే ఓ షో… అందులో ఈ పిల్లగాడు పాటపాడుతున్నాడు… ఈ రీతూ తన వెనుకే నిలబడి భంగిమలు పెడుతోంది, ఆడుతోంది… బెలూన్లు వదులుతోంది… వీడు నావాడే అనే ఫీల్ ప్రదర్శిస్తోంది… పాట కాగానే ‘నా యశ్శూ’కి ఓ సర్‌ప్రయిజ్ అంటూ… నేనే తీసుకొచ్చాను అంటూ… వెళ్లి ఆ పిల్లాడి తండ్రి, తల్లి, చెల్లిని వేదిక మీదకు లాక్కొచ్చింది…

సరే, అక్కడ ఓ ఉద్వేగ ప్రదర్శన… ఆ పేరెంట్స్ ఇద్దరూ గాయకులే… సోదరి సంకీర్తన కూడా గాయనే… వాళ్లకు ఓ సంగీతం ట్రూప్… ఈ పిల్లాడు కూడా అయిదేళ్ల వయస్సు నుంచే పాటలు నేర్చుకుంటూ, కీబోర్డు సాధన చేస్తూ… ఎంబీబీఎస్ చదువుతూ కూడా… బోలెడన్ని మ్యూజిక్ కాంపిటీషన్లలో పాల్గొనేవాడు, సొంతంగా ఓ యూట్యూబ్ చానెల్… ఊరు కాకినాడ… మంచి గళం, నిజంగానే మంచి భవిష్యత్తు కూడా ఉంది తనకు… ఆల్‌రెడీ శర్వానంద్, సమంత నటించిన జాను సినిమాలో ఓ హిట్ సాంగ్ కూడా పాడాడు… కానీ తనకన్నా తొమ్మిదీపదేళ్ల వయస్సెక్కువ ఉన్న ఈ రీతూ చౌదరితో ప్రేమ ఎంత మధురం..?

ప్రేమ గుడ్డిది… దానికి వయస్సుతో పనేముంది..? ఈ పిల్లాడికన్నా ఈ పిల్ల దాదాపు పదేళ్ల వయస్సెక్కువ… కులంతో పనేముంది..? ప్రాంతంతో పనేముంది..? కొండేపూడి అనే ఇంటిపేరు విశ్వబ్రాహ్మణుల్లో ఎక్కువ… తనది కాకినాడ… ఆమెది చిత్తూరు… రూట్స్ ఫ్రం విజయవాడ… ఆమధ్య సుమ, ప్రదీప్ యాంకరింగు చేసిన పెళ్లిచూపులు అనే ఓ అట్టర్ ఫ్లాప్ షో యాదికి ఉందా..? అందులో ప్రదీప్ కోసం ప్రయత్నించే కంటెస్టెంట్లలో ఈ రీతూ కూడా ఉందండోయ్…

మరో ట్విస్టు ఉంది…? పాత ప్రేమలతో కూడా పనేముంది అనుకోవాలా..? ఎందుకంటే, యశస్వికి ఆల్‌రెడీ శ్రీఝాన్సీ అనే ఓ లవర్ ఉన్నట్టు వెబ్ సమాచారం… ఐతేనేం… రీతూ ప్రేమకు అది అడ్డంకి కాదు… ఈ పిల్లాడు తన సొంతం అన్నట్టుగానే కమ్ముకుంటోంది ఆమె తనను… ఈ ప్రేమ ఎంత మధురం అనే టైటిల్ ఉన్నది చూశారా… అది చాలా పవర్ ఫుల్ బాసూ… అన్నట్టు జీతెలుగు కుటుంబం అవార్డుల సందర్భంగా ఆమె ఏమన్నదో తెలుసా..? ‘నా యశ్శూ… తనకు ఓ కుటుంబం ఉంది, ఈ జీకుటుంబం కూడా ఆశీర్వదిస్తే మాకూ ఓ కుటుంబం వస్తుంది…’’ అంటే..? తనను పెళ్లి చేసుకుంటావా పిల్లా..?! ఏం యశ్శూ… నీకూ వోకేనా..?!

నకల్ మార్‌నే కో భీ అకల్ చాహియే… బీజేపీకి టీఆర్ఎస్ అనవసర చురకలు…

by

नकल मारने को भी अकल चाहिए।

నకల్ మార్‌నే కో భీ అకల్ చాహియే… హిందీలో పాపులర్ సామెత… అంటే కాపీ కొట్టడానికి కూడా కాస్త తెలివి ఉండాలి… లేదా కాపీ కొట్టడం కూడా ఓ కళ… ఈ మాటను నిన్న టీఆర్ఎస్ సోషల్ శ్రేణులు బాగా పాపులర్ చేశాయి… ఎందుకంటే, బీజేపీ విడుదల చేసిన గ్రేటర్ మేనిఫెస్టోలో  కొన్ని అంశాలు… ఒక లేడీ టాయిలెట్, ఒక డంపింగ్ యార్డు, ఒక వుమెన్ పోలీస్ స్టేషన్, ఓ హౌసింగు కాలనీ ఫోటోలు ఆల్‌రెడీ టీఆర్ఎస్ ప్రభుత్వం నిర్మించి, అమలు చేసి చూపించిన కార్యక్రమాల ఫోటోలే వాడుకుని, మళ్లీ మేనిఫెస్టోలో అవే కొత్త వాగ్దానాలు ఏమిటోయ్, మరీ ఎటకారం కాకపోతేనూ… అని బీజేపీ టీంను వెక్కిరించే ఆ ట్వీటును కేటీయార్ కూడా రీట్వీట్ చేశాడు…

ఎహె, ఊరుకొండి, వాటిని సింబాలిక్‌గా వాడుకుంటే తప్పేమిటి..? అవి హైదరాబాద్ ఫోటోలే… వాటిని విస్తృతంగా అమలు చేస్తామని చెబితే తప్పేమిటి..? అయినా నకల్ కొట్టడం మాకు పెద్దగా తెలియదులే, మీరు అందులో నిష్ణాతులు కదా… అని బీజేపీ టీం ఉల్టా వెక్కిరించింది… దీన్ని కాసేపు వదిలేద్దాం… ఆ ఫోటోలు వాడుకోవడం తప్పేమీ కాదు కాబట్టి… అయితే అంతకుమించి కాస్త దూరం వెళ్దాం…

ఎల్ఆర్ఎస్ రద్దు… అదెలా బీజేపీ చేయగలదు..? బల్దియా మేయర్ పీఠాన్ని గెలుచుకున్నా సరే, రాష్ట్ర ప్రభుత్వ నిర్ణయాత్మక పరిధిలోని ఒక అంశంలో ఒక మున్సిపల్ కార్పొరేషన్ ఎలా నిర్ణయం తీసుకోగలదు..? సంకల్పం మంచిదే, ఎల్ఆర్ఎస్ మీద జనంలో విపరీతమైన వ్యతిరేకత ఉన్నమాట నిజమే… కానీ అది బల్దియా పరిధిలోనిదే కాదు కదా… బల్దియా బడ్జెట్ ఎక్కువ కావచ్చుగాక, కానీ అదీ ఓ స్థానిక సంస్థ మాత్రమే… సరే, ఎల్ఆర్ఎస్ అంశాన్ని డిబేట్ చేయడమే బీజేపీ ఉద్దేశం అనుకుందాం…

మొన్నటికిమొన్న కరోనా ఫ్రీ వేక్సిన్ అనే హామీ కూడా డిబేటబులే… గ్రేటర్ పరిధిలో గెలిస్తే, ఆ పరిధిలోని ప్రజలకు మాత్రమే కరోనా వేక్సిన్ ఫ్రీగా వేస్తారా..? మరి మిగతా తెలంగాణ ప్రజల మాటేమిటి..? వాళ్లకు అక్కర్లేదా..? ఈ భారం ఎవరు భరించాలి..? మొన్నటికిమొన్న బీహార్ ఎన్నికల్లో ఈ వాగ్దానం చేస్తే బోలెడంత చర్చ జరిగింది… ఐనా మళ్లీ ఇప్పుడు, అదీ ఓ స్థానిక సంస్థ ఎన్నికల్లో…!!! ఎవరు బాబూ, మీకు సలహాలు ఇస్తున్నది…?!

ఇలాంటి పరిధేతర హామీలను వదిలేస్తే… రెండుమూడు అంశాలు మాత్రం బీజేపీ మేనిఫెస్టోలో ఇంట్రస్టింగు… మెట్రో, సిటీ బస్సుల్లో మహిళలకు ఫ్రీ… అదెలా సాధ్యం అనవద్దు… ఆ భారాన్ని భరించడానికి జీహెచ్ఎంసీ సిద్ధపడితే సాధ్యమే… ఇప్పుడు ఐదు రూపాయల భోజనం భారాన్ని భరించడం లేదా ఏం..?

నిజానికి అనేక అంశాల్లో బీజేపీ విడుదల చేసిన గ్రేటర్ ఎన్నికల మేనిఫెస్టో ఆచరణ సాధ్యమా, కాదా అనే కోణంలో కాదు చూడాల్సింది… అది ఓ ఎత్తుగడ…. కొన్ని అంశాలను ప్రజల్లో బాగా చర్చకు పెట్టడమే ఆ మేనిఫెస్టో ఉద్దేశం… మామూలుగా అయితే పార్టీల మేనిఫెస్టోలను ఎవరూ పట్టించుకోరు, చదవరు, అవి వోట్లను ప్రభావితం చేసేది తక్కువ… ఎందుకంటే, పార్టీల మేనిఫెస్టోలకు క్రెడిబులిటీ ఏమీ ఉండదు… అంతెందుకు..? పాత మేనిఫెస్టోలను ఇదే టీఆర్ఎస్ తమ సైట్ల నుంచి తొలగించేసింది… కానీ బీజేపీ మేనిఫెస్టోకు వెక్కిరింపుతో కూడిన ప్రాధాన్యం ఇచ్చి, కేటీయార్ అనుకోకుండా దాన్ని చర్చనీయాంశం చేస్తున్నాడు… డియర్ సర్, బీజేపీ ట్రాపులోకి పయనించకండి… ఇప్పటికే మతం, రోహింగ్యాలు అని బీజేపీ విసిరిన ట్రాపుల్లో పడిపోయారు కూడా… !!

మొహం కూడా చూపించుకోలేని రచయిత… మీకర్థమైంది నిజం కాదు…

by

ముందుగా వాట్సప్ గ్రూపుల్లో కనిపించిన ఈ సమాచారం చదవండి, తరువాత చెప్పుకుందాం…

తెలుగులో ఇంతదాకా ఫొటో ప్రచురణకి విముఖులైన ఏకైక రచయిత మల్లాది వెంకట కృష్ణమూర్తి.

గత ఏభై యేళ్ళుగా వదలకుండా దాదాపు రోజూ రాసే ఏకైక తెలుగు రచయిత మల్లాది వెంకట కృష్ణమూర్తి.

రచనల మీద జీవిస్తున్న ఏకైక నవలా రచయిత మల్లాది వెంకట కృష్ణమూర్తి.

పిల్లల పేర్ల పుస్తకాల్లో అత్యధికంగా అమ్ముడైన పుస్తకం మల్లాది వెంకట కృష్ణమూర్తి పిల్లల పేర్ల పుస్తకం. 2020కి 2 లక్షలకి పైగా అమ్ముడయ్యాయి.

తెలుగు నవల ఆధారంగా వచ్చిన తొలి హిందీ చిత్రం కుఁవారి బహు. దీనికి మల్లాది రేపటి కొడుకు నవల ఆధారం.

తొలి ప్రైవేట్ ఛానల్ జెమినీ టి.వి.లో సీరియల్ గా వచ్చిన తొలి నవల మేఘమాల. దీనికి మల్లాది మేఘమాల నవల ఆధారం.

మల్లాది వెంకట కృష్ణమూర్తి కథలు రోజుకి ఒకటి చొప్పున చదువుతుంటే లేదా యూ ట్యూబ్ లో వింటూంటే, నేటిదాకా ప్రచురింపబడ్డ కథలన్నీ పూర్తవడానికి పదేళ్ళకి పైనే పడుతుంది. ఈలోగా నిత్యం వాటికి మరికొన్ని కథలు కలుస్తుంటాయి.

50 ఏళ్ళు
600 నెలలు
18,263 రోజులు
4,38,312 గంటలు
2,62,98,720 నిమిషాలు
1,57,79,23,200 క్షణాలు.
సాగిన రచనా వ్యాసంగంలో…
109 పత్రికల్లో
106 నవలలు
3500కి పైగా కథలు
1,200కి పైగా వ్యాసాలు
70 శీర్షికలు
22 సినిమాలు
9 టి.వి.సీరియళ్ళు
4 సంపాదకత్వాలు
యింకా ఎన్నో, మరెన్నో.
మల్లాది వెంకట కృష్ణమూర్తి ఇవన్నీ మనకి చెపితే, మనల్ని జడ్జి సీటులో కూర్చోపెట్టి అతను చేసిన పనులన్నీ సరైనవేనని చెప్పుకున్నట్లు కాదు. తన గొప్పదనం గుర్తించమని కాదు.
తెలుగువాడి గొప్పదనం తెలుగువాడు గుర్తించడు కాబట్టి తెలియజేసుకోవటం. మనలో ఎంతమందికి ఈ విషయాలు తెలుసు?

(ఈ సమాచారమంతా మల్లాది తాజా పుస్తకం “నవల వెనక కథ”లోనిది)

నిజమే… రాయడం ఓ వ్యసనం… ఏదైనా రాయకపోతే తను బతకలేడు… రాస్తూనే ఉండాలి… ఉంటాడు… ఉన్నాడు… గొప్ప గొప్ప రచనలా..? జస్ట్, పాపులర్, కమర్షియల్ రచనలా..? అనేది పక్కన పెడితే… తెలుగులో మల్లాది స్థాయిలో అక్షరసేద్యం చేసిన మరో రైతు కనిపించడు మనకు… రచయిత మొహం, వయస్సు, ప్రాంతం, మతం, కులం, పార్టీ తన రాతల గురించి పాఠకులపై ఏ అభిప్రాయాన్ని కల్పించకూడదు… అదీ ఆయన నమ్మకం… అందుకే ఆయన ఫోటోనే కాదు, తన వ్యక్తిగత వివరాలను సైతం ఇప్పటివరకూ ప్రచురించనివ్వలేదు… తెరపై అసలు కనిపించడు… ఇంటర్వ్యూలు ఇవ్వడు… సోషల్ మీడియాకెక్కి ధర్మోపన్యాసాలు ఇవ్వడు…

అది పెద్ద విశేషం కాకపోవచ్చు, కానీ ఇంత పాపులర్ రైటర్ అయి ఉండీ, ఇన్నేళ్లుగా బయటి ప్రపంచానికి మొహం చూపించకుండా, సక్సెస్‌ఫుల్‌గా ఉండగలగడం పెద్ద విశేషమే… ఒక కథ రాస్తేనే దాని గురించి పది పత్రికల్లో విశ్లేషణలు రాయించుకుని, కథ వెనుక కథ తెలుసా అంటూ ఇంటర్వ్యూలు కూడా ఇచ్చే రోజులివి… పైగా తెలుగువాడు ఎప్పుడూ కీర్తికాంత ప్రియుడు… మల్లాది తన రచనల గురించీ పెద్దగా చెప్పుకోడు, తన గురించి అసలే చెప్పుకోడు… ప్చ్, బొత్తిగా తెలుగుదనం లేదేమిటి మాస్టారూ..?

పడవల్లాంటి కార్లు, పిచ్చి ప్రేమలు, ఉంగరాల జుత్తు హీరోలు, కావ్యనాయికల వంటి హీరోయిన్లు, అపార్థాలు, ఆభిజాత్యాల పైత్యం నుంచి తెలుగు నవలలను బయటికి లాగి… అన్నిరకాల సబ్జెక్టులనూ తీసుకుని, తమదైన శైలిలో, రకరకాల రచన ప్రయోగాలతో పాఠకుల్ని ఉర్రూతలూగించిన ఒక తరం రచయితల్లో బహుశా యండమూరి, మల్లాది అగ్రగణ్యులు కావచ్చు…

క్రైం, సస్పెన్స్, థ్రిల్లర్, హిప్నాటిజం, చేతబడి, సైన్స్, పరిశోధనలు, అంతరిక్షం, రొమాన్స్, టెలిపతి, టైం ట్రావెల్, ఫిలాసఫీ, ఎమోషన్స్… వాట్ నాట్… వాళ్లు టచ్ చేయని అంశాలేమున్నయ్..? అవి చదివే కదా లక్షల మంది పాఠకులు ఆయా సబ్జెక్టులతో పరిచయం పెంచుకున్నది…

యండమూరి నవలలకు సంబంధించి కాపీ అనే ఆరోపణలు చాలా ఉన్నయ్… కానీ మల్లాది రచనలపై ఆ ముద్ర కూడా లేదు… అవిశ్రాంత అక్షరపథికుడికి అభినందనలు… మీ చేయి రాస్తూనే ఉండాలి… ఉంటుంది… మీరు తప్పించుకోలేరు… ఒక తెలుగువాడి గొప్పదనం గురించి ఇంకా ఎక్కువ రాయడం కూడా తెలుగుదనం కాదంటారేమో… అందుకని ఇక సెలవు…

కరోనా వ్యాప్తికీ నైతిక ప్రవర్తనకూ లంకె… ఒక ఇంట్రస్టింగ్ స్టడీ…

by

కొందరెందుకు కరోనా జాగ్రత్తలు పాటించరంటే!
———————-

ప్రపంచం ముందు ఇప్పుడున్న అతి పెద్ద సమస్య కరోనా. భారత్ తోపాటు అయిదారు దేశాల్లో కరోనాకు వ్యాక్సిన్ ప్రయోగశాలల్లో ఇంకా పరీక్షల దశలోనే ఉంది. పోలియో టీకాలా వంద శాతం పనిచేసేవి మాత్రం ఇంకా తయారయినట్లు లేదు. మరో నాలుగయిదు నెలల్లో కనీసం డెబ్బయ్ అయిదు శాతమయినా పనిచేసే కరోనా వ్యాక్సిన్ రావచ్చు. 135 కోట్ల జనాభా ఉన్న మన దేశంలో అందరికీ టీకా వేయడం కూడా పెద్ద యజ్ఞమే. మాటల్లో చెప్పినంత సులభం కాదు. ప్రస్తుతానికి కరోనా రాకుండా జాగ్రత్త పడడమేతప్ప మందుల్లేవు. జలుబు, గొంతు నొప్పి, జ్వరం… ఇలా విడి విడిగా జబ్బులకు వాడే మందులే వాడుతున్నారు. మాస్కు పెట్టుకోవడం, భౌతిక దూరం పాటించడం, చేతులు పదే పదే శుభ్రం చేసుకోవడం, అత్యవసరమయితే తప్ప జన సమూహాలున్నచోట్లకు వెళ్లకుండా ఉండడంలాంటి జాగ్రత్తలే ఉత్తమం. ప్రపంచ ఆరోగ్య సంస్థ మొదలు మన పంచాయతీ దాకా అందరూ ఈ జాగ్రత్తలే చెబుతున్నారు. ఈ జాగ్రత్తల గురించే ప్రభుత్వాలు విస్తృతంగా ప్రచారం చేస్తున్నాయి. అయినా కొందరు జాగ్రత్తలు పాటించడం లేదు.

ఎదుటి మనిషి గుర్తు పట్టడానికి మాస్కు తీసి మొహం చూపించేవారు కొందరు. మాట్లాడేప్పుడు విధిగా మాస్కు ఉండాలి. అలాంటిది మాట్లాడేప్పుడే మాస్కు తీసి పారేసేవారు మరి కొందరు. ఫొటోల కోసం మాస్కు తీసేసేవారు కొందరు. బహిరంగ ప్రదేశాల్లో ఉమ్మేసేవారు కొందరు. కరోనా లక్షణాలున్నా పరీక్షలకు వెళ్లనివారు కొందరు. పరీక్షలో పాజిటివ్ అని తేలినా ఐసొలేషన్ లో ఉండనివారు కొందరు. మానవ మనుగడకే ఇంత ప్రమాదకరంగా ఉన్నా కరోనా ఆంక్షలను కొందరు ఎందుకు పట్టించుకోవడం లేదన్న విషయంపై సామాజిక, మానసిక శాస్త్రవేత్తలు ప్రపంచవ్యాప్తంగా లోతయిన అధ్యయనం చేస్తున్నారు. ఆర్టిఫిషియల్ ఇంటిలిజెన్స్- కృత్రిమ మేధ సాయం కూడా తీసుకుని కొన్ని కారణాలను కనుక్కోగలిగారు.

నైతిక ప్రవర్తన ప్రధాన విషయంగా ఈ అధ్యయనంలో తేలింది. కరోనాతో సంబంధం లేకుండా ట్రాఫిక్ రూల్స్ పాటించడం, క్యూల్లో పద్ధతిగా నిలుచోవడంలాంటి మామూలు విషయాలను క్రమం తప్పకుండా పాటించేవారు కరోనా జాగ్రత్తలను కూడా ఇంకొకరు చెప్పాల్సిన అవసరం లేకుండా తమంతట తామే బాధ్యతగా పాటిస్తున్నారు. విచ్చలవిడిగా, లెక్కలేనితనంతో ఎలాపడితే అలా ఉండేవారే కరోనా జాగ్రత్తలు పాటించడం లేదు.
1. Violating social norms
2. Ethical lapse
… అని రెండు ప్రధాన కారణాలను ఈ అధ్యయనం గుర్తించింది. సామాజిక కట్టుబాట్లను తుంగలో తొక్కేవారు, విలువలు పాటించనివారే కరోనా జాగ్రత్తలను కూడా పట్టించుకోవడం లేదు. వంద దేశాల్లో మూడున్నర లక్షల మందిని ఈ అధ్యయనానికి ఎంచుకున్నారు. ఆశ్చర్యంగా ఇందులో ఆధ్యాత్మికత ఉన్నవారు, కొన్ని స్థానిక ఆచారాలను గౌరవించేవారు కరోనా జాగ్రత్తలను తప్పనిసరిగా పాటిస్తున్నట్లు తేలింది. అయితే ఈ అధ్యయనం జాగ్రత్తలు పాటించనివారి గురించే కాబట్టి పాటించేవారి గురించి మరీ లోతుగా వెళ్లలేదు.

“ఆచార ప్రభవో ధర్మః ధర్మస్య ప్రభురచ్యుతః”

అని విష్ణు సహస్రనామం చివర ఒక గొప్ప మాట ఉంది. ఆచారంలో నుండే ధర్మం పుడుతుంది. ధర్మాన్ని పాటిస్తేనే దైవం అండ దొరుకుతుంది- అని దీని అర్థం. కరోనా జాగ్రత్తలు పాటించడానికి కూడా ఇదే సూత్రం అన్వయమవుతుంది. కరోనా జాగ్రత్తలు పాటించడం ఆచారం కావాలి. అప్పుడది ధర్మంగా మారుతుంది. ఆ ధర్మంమీద మనం నిలబడితే అప్పుడు వైరస్ వ్యాపించకుండా మనకు ఆరోగ్యం అండ దొరుకుతుంది. ఆచరించేది ఆచారం. చెప్పేవి గాలి మాటలు. మాటలకు కరోనా లొంగదు. ఆచరణలో జాగ్రత్తలు పాటిస్తే మన దగ్గరికి రాకుండా దూరముంటుంది. మనం ఎటున్నామో మనకు మనమే తెలుసుకోవచ్చు. ఎటు ఉండాలో కూడా గ్రహించగలిగితే మనకు, జగతికి శ్రీరామరక్ష. లేకుంటే పెద్ద శిక్ష.

  • పమిడికాల్వ మధుసూదన్

ఈ బిగ్‌బాస్ సీజన్ మొత్తమ్మీద తొలిసారి రక్తికట్టిన ఎపిసోడ్..!!

by

…… అప్పట్లో వెంకటేష్ హీరోగా వచ్చిన ‘నువ్వు నాకు నచ్చావ్’ సినిమా గుర్తుందా..? అందులో బ్రహ్మానందం పాత్ర… గొప్ప ధైర్యవంతుడుగా తనకుతాను మహా బిల్డప్ ఇచ్చుకుంటాడు… కోతలు కోటలు దాటుతాయి… ఓ పిల్ల, తను ఒక రోలర్ కాస్టర్ ఎక్కుతారు… బ్రహ్మీ అందరినీ వెక్కిరిస్తూ ఉంటాడు… ఇదో లెక్కా..? పెద్దపెద్దవే చూశాను అని చెబుతుంటాడు… తీరా అది స్టార్టయి వేగం పుంజుకున్నాక మనవాడి ధైర్యసాహసాలు నిలువునా జారిపోతయ్… కళ్లు మూసుకుని, ఆపండ్రోయ్, మీకు దండం పెడతాను కాపాడండ్రోయ్… అని కేకలు వేస్తుంటాడు… ఆ చిన్నపిల్లకు ఉన్నపాటి ధైర్యం కూడా ఉండదు…

సేమ్… బిగ్‌బాస్‌లో ఈరోజు ఎపిసోడ్ అలాగే దద్దరిల్లిపోయింది… నిజం చెప్పాలంటే ఈ సీజన్ మొత్తానికి హైలైట్ అయ్యేలా రక్తికట్టించిన ఎపిసోడ్… విషయం ఏమిటంటే..? హౌస్‌లో రెండు తోపులున్నాయి తెలుసు కదా… అఖిల్, సొహెయిల్… ఒకరినొకరు విడిచిపెట్టి ఉండరు… మాట్లాడితే మహా పేకుతా ఉంటారు… ఈ ఎపిసోడ్‌లో టాస్క్ ఏమిటంటే ఒక్కొక్కరు లేదా ఇద్దరేసి కన్ఫెషన్ రూంలోకి వెళ్లాలి… అంతా చీకటి… కింద గంపలు, చెత్తా, గడ్డీగాదం, సౌండ్, లైట్ ఎఫెక్టులు… మధ్యమధ్య దెయ్యం డీజే లెవల్ అరుపులు…

అందులోకి వెళ్లి, ఎక్కడో దాచిపెట్టబడిన ఓ స్పూన్ పట్టుకురావాలి… అదీ టాస్క్… అరియానా మహా పిరికిది కాబట్టి, అవినాష్‌తో కలిసి వెళ్లి, భయపడుతూ, వణుకుతూ ఎలాగోలా స్పూన్ దొరికించుకుని బతుకుజీవుడా అని వాపస్ వచ్చేస్తారు… ఆ కాసేపు అరియానా భయం, కేకలు చూసి సొహెయిల్, అఖిల్ విపరీతంగా వెక్కిరిస్తారు… ఎగతాళి చేస్తూ డాన్సులు చేస్తారు సొహెయిల్, హారిక… మోనాల్ మాత్రం ఒక్కతే వెళ్లి, ధైర్యంగా స్పూన్ వెతికి తెచ్చుకుంటుంది… తరువాత సొహెయిల్, అఖిల్ వెళ్లాల్సి వచ్చింది…

ఇదీ అసలు కథ… కథ వేరే ఉంటది, మాతోనే తమాషాలా, రా, నీ తాటతీస్తం అంటూ కేకలు పెడుతూ లోపలకు వెళ్తారు… తీరా అక్కడి సౌండ్ ఎఫెక్టులు, అరుపులు వింటూ, ఆ చీకట్లో చుచ్చు పోసుకున్నంత పనవుతుంది… వణికిపోతారు… ఒకరికొకరు ధైర్యం చెప్పుకుంటారు… ఈ భయం గట్రా నిజమో, అబద్ధమో, నాటకమో గానీ… బాగా రక్తికట్టింది… అచ్చం ఆ వెంకటేష్ సినిమాలో బ్రహ్మానందం తరహాలోనే ఆపండ్రోయ్ అని వణికిపోతారు…

కానీ బయటికి వచ్చి మళ్లీ ఏవో గొప్పలు పేకాలి కదా… మొహాల మీద లేని గాంభీర్యం, ధైర్యం తెచ్చుకుని, బయటికి వచ్చి… బిగ్‌బాస్ కెమెరా ముందు మళ్లీ బోరుమంటారు… బాబ్బాబు, అసలే తోపులం అని చెప్పుకుంటిమి, పొరపాటున కూడా ఈ వీడియోలు ప్రసారం చేయకు ప్లీజ్ అని బతిమిలాడతారు… ఓ అరగంటసేపు సాగిన ఈ ఎపిసోడ్ ఆసక్తికరంగా సాగింది… మొదటిసారి బిగ్‌బాస్ టీం కాస్త ఒళ్లు దగ్గరపెట్టుకుని పనిచేసినట్టు అనిపించింది… ప్రేక్షకులకు కూడా నచ్చింది… నిన్న గార్డెన్ ఏరియా గ్రేవ్ యార్డ్ సెట్ సరిగ్గా యూజ్ చేసుకోలేక పోయినా ఈరోజు కన్ఫెషన్స్ రూం సెట్ బాగా వాడుకున్నారు… అయితే ఈ ఎపిసోడ్ అయిపోయిందా..? ఇంకా హారిక, అభిజిత్ ఉన్నారు… అరియానాను హారిక కూడా వెక్కిరించింది బాగానే… ఇక అభిజిత్ ఎలా టాకిల్ చేస్తాడనేది ఇంట్రస్టింగే… వెల్‌డన్ బిగ్‌బాస్…

భాష గొట్టుగా ఉన్నచో ప్రమాణం తప్పును… అల్కటి భాష అన్నింటా మేలు…

by

భాష అనే నేను…!
———————
న్యుజిలాండ్ లో కొత్తగా ఎన్నికయిన భారత సంతతి ఎంపి మొదట న్యూజిలాండ్ స్థానిక భాష మౌరిలో ప్రమాణం చేసి, తరువాత సంస్కృతంలో కూడా ప్రమాణం చేశాడు. గుజరాత్ లో జరిగిన స్పీకర్ల సదస్సులో చట్టసభల్లో ప్రజాప్రతినిథుల భాష హుందాగా ఉండాలని భారత రాష్ట్రపతి సూచించారు. ఈ రెండు వార్తలకు ఎలాంటి సంబంధం లేదు- భాష అన్న ఒక్క విషయంలో తప్ప.

ఎప్పుడో స్వాతంత్య్రం వచ్చినప్పుడు మనం రాసిపెట్టుకున్న పదవీ స్వీకార ప్రమాణ వాక్కు చాలా గంభీరంగా, భాషాపరంగా పలకలేనంత సంక్లిష్టంగా, సంస్కృత సమాస పదబంధురంగా, అనేక ద్విత్వాక్షరాలతో ఉంది.

“….. అనే నేను శాసనం ద్వారా నిర్మితమైన భారత రాజ్యాంగం పట్ల నిజమైన విశ్వాసం, విధేయత చూపుతానని; భారతదేశ సార్వభౌమాధికారాన్ని, సమగ్రతను కాపాడతానని; నా కర్తవ్యాలను శ్రద్ధతో, అంతఃకరణ శుద్ధితో నిర్వహిస్తానని; భయం కానీ, పక్షపాతం కానీ, రాగద్వేషాలు కానీ లేకుండా రాజ్యాంగాన్ని, శాసనాలు అనుసరించి ప్రజలందరికీ న్యాయం చేకూరుస్తానని దైవసాక్షిగా ప్రమాణం చేస్తున్నాను”

దేశ సార్వభౌమాధికారాన్ని అన్న మాటదగ్గర చాలా మంది భౌ.. బౌమ.. అంటూ ఒకటికి రెండుసార్లు తడబడుతున్నారు. సమగ్రతను కాపాడ్డం దగ్గర కూడా ఉచ్చారణలో సమగ్రత, స్పష్టత లోపిస్తోంది. ఇక అంతఃకరణ శుద్ధిలో విసర్గ పలకడానికి చుక్కలు కనపడుతున్నాయి. మొత్తమ్మీద ప్రమాణ వాక్కు వాగ్దోషాలతో ఆదిలోనే హంసపాదుగా తయారవుతోంది. ఎవరెవరు భౌమ భౌమ అన్నారో? ఎవరెవరెవరు శ ష స తేడా తెలియక పలికారో? అంతఃకరణంలో విసర్గ అశ్వథామ హతః కుంజరః అయ్యిందో? ఎవరెవరు ప్రమాణవాక్కు చూసి చదవడంలో నిలువెల్లా వణికిపోయారో? సామాజిక మాధ్యమాల నిండా లెక్కలేనన్ని రుజువులున్నాయి. ఆ వివరాలు ఇక్కడ అనవసరం.

వందేళ్ల కిందటి పరిస్థితులు, భాషాభిమానం, ఉచ్చారణ పద్ధతులు ఇప్పుడు ఉండాలనుకోవడం తప్పు. జనం ఓట్లేసి గెలిపించేది చట్టసభల్లో తమ సమస్యలను వినిపించమనే కానీ- సార్వభౌమ, అంతః కరణ ఏవం గుణ విశేషణ విశిష్టాయాం… అన్న సంక్లిష్ట భార పదబంధుర సమాసాలను ఎలా చదువుతారో చూద్దామని కాదు. రాజ్యాంగ విధివిధానాల ప్రకారం ప్రమాణస్వీకారం చేసి తీరాలే కానీ- ప్రమాణ వాక్కులో ఉచ్చారణ దోషాలు ఉంటే ఆ ప్రమాణం చెల్లదు అని రాజ్యాంగంలో ఎక్కడా లేదు. ఉండాలని కోరుకోకూడదు.

ముప్పయ్, నలభై ఏళ్లుగా అంతా ఇంగ్లీషు మీడియం చదువులు. తెలుగు మాట్లాడగలమే కానీ- చక్కగా రాయడం, చదవడం అంటే నిజంగా అగ్ని పరీక్షే. ప్రమాణ వాక్కుకు ముందు అభ్యాసం, పరీక్షలు ఉండవు. అలా పరీక్షలు పెడితే మళ్లీ అందులో నారాయణ- చైతన్య కోచింగ్ తీసుకున్నవారు మాత్రమే పాస్ అవుతారు కాబట్టి- అది రాజ్యాంగ స్ఫూర్తికే విరుద్ధం అవుతుంది. ఈ సమస్యకు పరిష్కారం లేకపోలేదు. భాషా శాస్త్రవేత్తలు, పండితులు కూర్చుని ఒత్తులు, కఠిన పదాలు, పదబంధాలు లేకుండా ప్రమాణ వాక్కును సులభతరం, సరళతరం చేయాలి.

“మంత్రహీనం
క్రియాహీనం
భక్తిహీనం
గణాధిప యత్పూజితం మయాదేవ!”

అని పూజ అంతా అయ్యాక డిస్ క్లైమర్ విధిగా చెప్పి అక్షింతలు నీళ్లు విధిగా వదలాలి. ఇది ఆచారం. పూజావిధి. అంటే నేను చెప్పిన మంత్రాల్లో ఏదయినా తప్పుగా పలికి ఉంటే మన్నించమని వేడుకోలు.

“యదక్షర పద భ్రష్టం మాత్రాహీనంతు యద్భవేత్
తత్సర్వం క్షమ్యతాం దేవి శ్రీమాతానమో స్తుతే”

అక్షరం, పదం, చివరికి అరసున్న, విసర్గ తప్పు చెప్పినా మన్నించు అని మరో మంత్ర సమాప్తి వాక్యం.

ప్రజాస్వామ్య దేవాలయానికి మూల స్తంభమయిన చట్ట సభల్లోకి ప్రవేశించే, లేదా చేపట్టబోయే పదవికి ముందు చేసే ప్రమాణవాక్కులో తప్పులు దొర్లితే ఇంకెన్ని క్షమాపణలు చెప్పుకోవాలి? తప్పుల్లేకుండా చదవనయినా చదవాలి. లేదా ప్రమాణ వాక్కును చాలా సరళమయినా చేయాలి. ఎంత సరళం చేసినా తెలుగు చదవలేని జాతి పుట్టి పెరిగి ఉంది కాబట్టి పెద్దగా ఈ విషయం చర్చకు నిలబడదు. ఎర్లీ మార్నింగ్ టెనో క్లాక్కే నిద్ర లేచారా? అన్న అద్భుతమయిన తెలుగు వ్యక్తీకరణ తెలుగులో రాస్తే- ఇప్పుడు చదవడం కష్టం.

తెలుగు సినిమా పాటలను ఇంగ్లీషు లిపిలో రాసినట్లు- yarly marning teno klakke nidra lechara? అని రాస్తేనే ఠక్కున చదవగలం. ఇది ఫ్యాషన్. ట్రెండ్. కొంతకాలానికి తెలుగు భాష గోచీ గుడ్డతో మిగిలి, లిపి మాత్రం అంతరించిపోవచ్చు. దానికి శక్తివంచన లేకుండా మనం చేస్తున్న లిపి ధ్వంస రచన వృథాపోదు.

అన్నట్లు- న్యూజిలాండ్ ఎంపి సంస్కృతంలో ప్రమాణం చేయడం మనలో స్ఫూర్తి నింపి భారతదేశంలో కూడా చట్టసభల్లో సంస్కృతంలో ప్రజాప్రతినిథులు ప్రమాణం చేస్తున్నట్లు ఒకసారి ఊహించుకోండి. అప్పుడు ఈ భౌమ భౌల తడబాట్లు ఎంత గొప్పవో, ఎంత వీనుల విందయినవో బోధపడుతుంది.

చట్టసభల్లో ప్రజాప్రతినిథుల భాష హుందాతనం గురించి రాష్ట్రపతే సెలవిచ్చారు కాబట్టి మనం ఆశగా, హుందాగా ఎదురు చూద్దాం.

  • పమిడికాల్వ మధుసూదన్

వెలుగు Vs నమస్తే… తెలంగాణ తెరపై మీడియా సంస్థల డిష్యూం డిష్యూం…

by

…… మనం చెప్పుకున్నదే కదా… తెలుగునాట మీడియా వార్ ఎలా నడుస్తున్నదో… ఏపీలో యెల్లో వర్సెస్ నాన్-యెల్లో మీడియా… తెలంగాణలో పింక్ వర్సెస్ ఆరెంజ్ మీడియా… క్లారిటీ కావాలా..?

యెల్లో మీడియా అంటే ఆంధ్రజ్యోతి, ఈనాడు, టీవీ5 ఎట్సెట్రా… నాన్ యెల్లో మీడియా అంటే సాక్షి… జగన్ విసిరే యాడ్స్‌తో రాజీపడి అవసరార్థం భజన చేసే ఆంధ్రప్రభ, ప్రజాశక్తి ఎట్సెట్రా ఎప్పటికప్పుడు రంగులు మార్చే కేటగిరీ… ఈమధ్య పోలవరంపై యెల్లో మీడియా రాతల బట్టలు విప్పిన సాక్షి ఈరోజు మరింతగా విరుచుకుపడింది… ఏకంగా రామోజీరావు పేరు రాస్తూ, రంగులు పూస్తూ, ఉద్దేశాలు ఆపాదిస్తూ… ఇదీ ఆ వార్తాకథనం…

…. సరే, సాక్షి చేయాల్సి పనే ఇది… తత్వం ఇన్నేళ్లకు బోధపడింది దానికి… ఏపీ మీడియా కులసమరాలు, రంగులపోరాటాలు వదిలేస్తే… కాస్త తెలంగాణకు వద్దాం… ఇన్నాళ్లూ ఇక్కడ పింక్ మీడియాదే పెత్తనం… భయమో, భక్తో జీహుజూర్ అనాల్సిందే మీడియా అయినా… ఇంకెవరైనా… కానీ ఎప్పుడైతే బీజేపీ దూకుడు మోడ్‌లోకి వచ్చేసిందో ఇక ఏ మీడియా హౌజు ఎటువైపో తేల్చుకోవాల్సిన తరుణం వచ్చేసింది…

మాట్లాడితే యెల్లో మీడియాను మించిన నీతులు చెప్పే మీడియా కూడా… అవసరార్థం కాషాయం నిండా పులుముకుని, జజ్జనకరి అంటోంది… ఆంధ్రజ్యోతి, ఈనాడులను మించిన పోకడలతో ఆర్నబ్ గోస్వామి తాతను అని నిరూపించుకుంటోంది వెలుగు, వీ6… తప్పుపట్టడానికి ఏమీ లేదు… అలా చేయకపోతేనే తప్పు ఇప్పటి ట్రెండ్స్‌లో…

అసలే గ్రేటర్ ఎన్నికల వేడి… ఇక తప్పేదేముంది..? తప్పొప్పుల మీమాంస ఎక్కడిది..? ఓ కాషాయపు కొరడా పట్టుకుని పోతరాజులా కొట్టేసుకోవడమే… అదే సాగుతోంది… సరే, విషయానికొస్తే… నమస్తే తెలంగాణలో నిన్న ఓ వార్త వచ్చింది… అది ప్యూర్ కేసీయార్ సొంత పత్రిక కాబట్టి దానికి స్వామివారి భజన తప్ప ఇంకేమీ పట్టదు, ఆ దారి నుంచి మళ్లదు, మళ్లితే అది తనకు మాలిన ధర్మం అవుతుంది… ఇదీ ఆ వార్త…

దీని సారాంశం ఏమిటంటే…? బండి సంజయ్ సెలుపుతున్న మతం ఇష్యూ ఉంది కదా… ఒకవేళ బీజేపీ గనుక గెలిస్తే హైదరాబాద్‌లో శాంతిభద్రతల సమస్యలు వస్తాయా అనేది ప్రశ్న… దీనిపై వీ6 ట్విట్టర్, యూట్యూబుల్లో ఓ పోల్ నిర్వహించింది… అయితే ఎక్కువ మంది కేసీయార్‌కు అనుకూలంగా స్పందించడంతో వీ6 అర్థంతరంగా పోల్ ముగించేసింది, తోకముడిచింది అనేది నమస్తే తెలంగాణ కథనం…

నిజంగానే వీ6 ట్విట్టర్‌లో ఆ పోల్ అర్థంతరంగా ముగించింది అనేది నిజం… కానీ దీన్ని ఎక్స్‌పోజ్ చేయడంతో వెలుగు, వీ6 మీడియా హౌజుకు కోపం తన్నుకొచ్చింది… ఎహె, మీ కారణంగానే మేం ట్విట్టర్ పోల్ క్లోజ్ చేయాల్సి వచ్చింది, మీరే మానిప్యులేట్ చేయడానికి ట్రై చేశారు, ఐనాసరే, మేం యూట్యూబులో కంటిన్యూ చేశాం, 60 వేల మంది వోట్లు వేశారు, 72 శాతం మంది టీఆర్ఎస్‌కు వ్యతిరేకంగా వోట్లు వేస్తే, 28 శాతం మందే టీఆర్ఎస్ వాదను సై అన్నారు… ఐనా సరే, ఈ నమస్తే వాడికి బుద్ధిలేదు, సిగ్గులేదు… పోల్‌ను మానిప్యులేట్ చేయడానికి ప్రయత్నించడమే గాకుండా అన్నీ అబద్ధాలతో కూడిన వార్త రాసుకున్నారు….. అంటూ తన వెలుగు దినపత్రికలో ఓ ఫస్ట్ పేజీ వార్త కుమ్మేసింది…

టీఆర్ఎస్ సోషల్ మీడియా టీం ఎలా తప్పులో కాలేసిందో సవివరంగా ఆ వార్తలో రాసుకొచ్చింది… నమస్తే రాసింది తప్పేమీ కాదు, వీ6 ఆ ట్విట్టర్ పోల్ ఆపేసింది అనే రాసింది… నమస్తే టీం కారణంగానే ఆపేశాం అని వెలుగు కూడా అంగీకరిస్తూనే ఉంది… ఈ సీన్ ఇక్కడ కట్ చేద్దాం…

మనం చెప్పుకునేది మీడియా అనేది పార్టీలపరంగా ఎలా చీలిపోయింది అనేదే… తెలుగు మీడియా ఏదీ రంగుల ప్రభావానికి మినహాయింపు కాదు.,. అన్ని పత్రికలు, అన్ని టీవీలూ అదే బాట… ఎవరూ శుద్ధపూస కాదు… కాకపోతే బయటికి నీతులు చెబుతాయి… గ్రేటర్ ప్రజలు కేసీయార్ పట్ల వ్యతిరేకంగా ఉన్నారా లేదా అనేది కాదు ఇక్కడ ఇష్యూ… మీడియా వెన్నుపూసలు విరిగిపోయి, అవి నేల మీద పాకుతున్న చప్పుడు,.. సో, నీతులు చెప్పకండి… నిజాలు దరిద్రంగా ఉన్నయ్…!!

ఆ చప్పుడేందీ, ఆ స్పీడేందీ … అసలు ఈ బండి ఎక్కడిదిరా బాబోయ్…

by

ఇది మరీ పాత మోడల్ అంబాసిడర్ బండి లెక్క సాలిడ్‌గా ఉంది… కాదు, కాదు, పాత బుల్లెట్ బండి ఇది, ఆ చప్పుడే డిఫరెంట్ కొడ్తంది…. ఇదెక్కడి బండిరా బాబోయ్, ఊహించని డ్యాష్‌లిస్తోంది…….. ఓ డివిజన్‌కు కార్పొరేటర్ అభ్యర్థిగా పోటీలో ఉన్న ఓ నాయకుడు తెలంగాణ బీజేపీ అధ్యక్షుడు బండి సంజయ్ గురించి చేసిన సరదా కామెంట్ ఇది… తన ఇంటి పేరు బండి కదా… నిజంగానే బండి సంజయ్ ఈ గ్రేటర్ ఎన్నికల్లో ఓ డిబేటబుల్ కేరక్టర్ అయ్యాడు… ఎందుకంటే..?

వరదసాయం ఆపాలని బీజేపీ లేఖ రాసినట్టుగా టీఆర్ఎస్ ప్రచారం చేయగానే… దా, నిరూపించు, లేదంటే ఈ అమ్మవారి మీద ప్రమాణం చేయి కేసీయార్ అంటూ గబగబా వెళ్లి చార్మినార్ భాగ్యలక్ష్మి గుడి దగ్గర బైఠాయించాడు… అరెస్టు చేస్తరా, చేయండి, మీ సీఎం సారు కమస్కం మక్కా మసీదు కోసమైనా రావచ్చుగా అని వెక్కిరించాడు పోలీసులను… ఏదో కొత్త సెగ పుట్టించాలి అనుకున్నాడు… అది చల్లబడ్డదో లేదో మరొకటి అందుకున్నడు…

రోహింగ్యాలు, పాకిస్థానీలు బొచ్చెడు మంది పాతబస్తీలో ఉన్నరు, సర్జికల్ స్ట్రయిక్స్ చేసి తరిమేస్తాం… అని వ్యాఖ్యలు చేసి ఇంకోవైపు అగ్గిపెట్టిండు… దాన్ని ఆర్పడానికి టీఆర్ఎస్, మజ్లిస్ నానా తిప్పలూ పడుతుండగానే… ఈసారి మజ్లిస్ వాళ్లే మరో చాన్స్ ఇచ్చాడు బండికి… ఈ పీవీ ఘాట్ క్యాహై, ఎన్టీయార్ ఘాట్ క్యాహై, కూల్చేయాలి అని మజ్లిస్ అక్బర్ అన్నడు… దాన్ని పట్టేసుకున్నాడు బండి…

ఛలో, కూల్చేస్తారా రండి, నేను అక్కడే కూర్చుంటాను, ఎవరొస్తారో రండి, అవి కూల్చేస్తే మేం రెండు గంటల్లో దారుస్సలాం కూల్చలేమా…? అని ఈరోజు ఆ సమాధుల దగ్గర ఓ ప్రోగ్రామ్ అనౌన్స్ చేసేశాడు… ఉద్రిక్తతలు పెరగొద్దని మళ్లీ అరెస్టు అంటారు, కేసులు అంటారు… అవి జరగాలనే కదా మరి బండి చేసే చప్పుడు…

ఈ బీజేపోళ్లు కావాలని ఎక్కడైనా మతకలహాలు క్రియేట్ చేసే, సిటీలోనూ అశాంతి రేపే ప్రమాదముంది, ఈమేరకు మనకు సమాచారం ఉంది, మీరందరూ జాగ్రత్త, ఎవరినీ వదలొద్దు అని సీఎం పోలీసు అధికారులతో మీటింగు పెట్టి చెప్పాడని వార్తలొచ్చాయి… అవును, భయపడుతున్నాడు, శాంతిభద్రతల సాకుతో ఎన్నికల వాయిదాకు ట్రై చేస్తున్నాడు… అప్పుడే ఓటమి భయం పట్టుకుందా అని కౌంటర్ వేశాడు బండి… ఏ చాన్స్‌నూ వదలడం లేదు సంజయ్…

నిజానికి ఈసారి కేసీయార్ గ్రేటర్ ఎన్నికల తెర మీదకు రావొద్దనే అనుకున్నాడు… మొత్తం కేటీయార్ మీద వదిలేయాలనీ అనుకున్నాడు… కానీ తప్పడం లేదు… అసలు దుబ్బాక సెగ తాకింది కాస్త… ఇక మేనిఫెస్టో రిలీజ్ పేరిట రానే వచ్చాడు… చాలా విషయాలు మీడియాకు చెప్పాడు… ఎన్నికల ఎత్తుగడల్లో తనే సీరియస్‌గా తలమునకలు కావల్సి వస్తోంది,.. ఒక మీటింగ్ lb stadium లో పెడతారని ఒక వార్త… అనివార్యం…

ఇదెక్కడి బండిరా బాబోయ్, రోజుకొకటి సెలుపుతున్నడు, కెలుకుతున్నడు, మంటపెడుతున్నడు అనుకుంటున్నారో లేదో… ఇప్పుడు యూపీ సీఎం యోగిని, బీజేపీ పెద్ద బాస్ జేపీ నడ్డా, అమిత్ షాలనే కాదు, వీలయితే ప్రధాని మోడీనే ప్రచారబరిలోకి రప్పిస్తున్నట్టుగా ప్రచారం ప్రారంభించింది బీజేపీ… వాళ్లు వస్తారా లేదా, ఏ తేదీల్లో ఎవరొస్తారు, ఎవరు రారు అనేది వేరే విషయం… కానీ ఈ ఎన్నికల్ని తామెంత సీరియస్‌గా తీసుకున్నామో నగర ప్రజానీకానికి, తెలంగాణ జనానికీ ఓ మెసేజ్ ఇచ్చే ప్రయత్నం…

గ్రేటర్ ఎన్నికల్లో ఎవరికేం ఫలితాలు వస్తాయనేది వదిలేయండి కాసేపు… ఇంతకుముందులాగా లేదు సీన్… అనేకచోట్ల మజ్లిస్, టీఆర్ఎస్ నాయకులకు జనం నుంచి నిరసనల వేడి తాకుతోంది… దీనికితోడు అక్కడక్కడా కొందరు నాయకులు ప్లస్ స్వామి గౌడ్ బీజేపీలో చేరడం టీఆర్ఎస్‌కు ఎంతో కొంత మైనస్… విజయశాంతి చేరిక ఇంపాక్ట్ ఏమీ ఉండకపోవచ్చు గానీ… ఈ ఎన్నికలను మజ్లిస్-టీఆర్ఎస్ వర్సెస్ బీజేపీ పోటీగా మార్చేయగలిగింది బీజేపీ… కాంగ్రెస్ కథ దెబ్బ తిన్నది… అన్నింటికీ మించి తెలంగాణ కాషాయరథాన్ని బండి సంజయ్ నడిపించగలడా అనే సందేహాలకు తనే స్వయంగా సమాధానం ఇస్తున్నాడు… ఈ బండి ఇంజన్‌కు చప్పుడు ఎక్కువ… స్పీడ్, పికప్ కూడా ఎక్కువే…!!

అబ్బే, అసలు సత్తా ఫలితాల్లో కదా తేలేది అంటారా..? గతంలో వచ్చిన 99 సీట్లకు ఒక్కటి తగ్గినా టీఆర్ఎస్‌కే నామర్దా… 44 సీట్లకు ఏం తగ్గినా మజ్లిస్‌కు నామోషీ… కానీ తమ పాత నాలుగు సీట్లకన్నా ఎన్ని ఎక్కువొచ్చినా బీజేపీ కాలర్ ఎగరేసినట్టే… అదీ గుర్తుంచుకోవాల్సిన అంశం ఈ ఎన్నికల్లో…!