అందరూ మోనాల్ ఔట్ కావాలనే కోరుకుంటారు… వోట్లు తక్కువగానే పడతాయి… కానీ బిగ్‌బాస్ ఒప్పుకోడు… ఇన్నిరోజులుగా ఆమెకు ప్రేక్షకుల నుంచి పెద్దగా మద్దతు దొరక్కపోయినా సరే, బిగ్‌బాస్ తనను కాపాడుతూనే ఉన్నాడు… ఎవరెంత గింజుకున్నా తనను బయటికి పంపించడు… తనకు బదులు ఎవరెవరినో బలి తీసుకుంటాడు… ఇది అందరికీ తెలిసిందే కదా… మరి బిగ్‌బాస్ టీంతో ఆమె ముందుగా కుదుర్చుకున్న ఒప్పందం మహిమ కావచ్చు బహుశా…

కానీ ఆమె వ్యవహార ధోరణిలో మార్పు కనిపిస్తోంది… అఖిల్‌తో ప్రేమాయణానికి కత్తెర పడింది… ఆమె విపరీతమైన నిర్వేదంలో పడిపోయింది… ఇక బిగ్‌బాస్‌కు ఆమె అవసరం తీరిపోయినట్టుంది… అందుకే ఇక ఔట్ చేస్తాడు, చేయకతప్పలేదు అనుకున్నాం కదా… ఆమెకు వచ్చే వోట్లు, ఆమె పట్ల సోషల్ మీడియాలో నెటిజన్ల స్పందనను బట్టి అందరూ ఇదే అంచనా వేశారు… కాదు, ఆమె సూట్ కేసు సర్దుకున్నది అని కూడా సమాచారం…

కానీ అది తప్పు… తూచ్… ‘ముచ్చట’ కూడా అదే మాయలో పడి, ఆమె ఔట్ అయిపోయినట్టుగా రాసింది… కానీ నిజం ఏమిటంటే… ఈసారి కూడా బిగ్‌బాస్ మోనాల్‌ను కాపాడాడు… నిజానికి హారిక తన భుజాల మీద మోసి, ఓ స్థంభంలా నిలబడి, ఆమెను కెప్టెన్‌గా గెలిపించి, అఖిల్‌ తనను అకారణంగా నిందిస్తున్న సందర్భంలో, ఆమెను ఛీత్కరిస్తున్న తరుణంలో కూడా ఆమె ఓ విరాగిలా, మెచ్యూర్డ్‌గా కనిపించింది.., పోయేముందు మంచి మార్కులు కొట్టేస్తుంది సుమా అని అందరూ అనుకున్నారు…

అయితే మోనాల్ కథ ముగియలేదు… గతంలోలాగే ఆమెకు బదులుగా ఎవరెవరినో బలి తీసుకున్నట్టుగానే… ఈసారి లాస్యపై వేటు పడింది… నిజానికి లాస్య వీక్ కంటెస్టెంటు ఏమీ కాదు… ఎక్కువగా వంటింట్లో కనిపించినా సరే, ఫిజికల్ టాస్కుల్లో పెద్దగా రాణించకపోయినా సరే… ఆమె మీద ప్రేక్షకుల్లో పెద్దగా వ్యతిరేకత ఏమీ కనిపించలేదు… పైగా నోయెల్ మార్కు అభిజిత్ గ్రూపులో ప్రధాన సభ్యురాలు… ఆమె అయిదుగురు ఫైనలిస్టుల్లో ఉంటుందని కూడా అనుకున్నారు అందరూ….

అందరూ అనుకున్నట్టు చేస్తే తనను బిగ్‌బాస్ అని ఎందుకంటారు..? పంపించేశాడు… ఇదీ ట్విస్టు… లాస్యకు షాక్… నోయెల్ గ్రూపుకి షాక్… ఈసారి మోనాల్ పని అయిపోయిందని అనుకున్నవాళ్లకు షాక్… బహుశా ఈ షో చివరి రోజుల్లో అభిజిత్ వర్సెస్ అఖిల్ వర్సెస్ అవినాష్ గ్రూపుల నడుమ బలమైన స్పర్థ కోరుకున్నాడేమో బిగ్‌బాస్… ఇప్పుడిక అభిజిత్, హారిక… అఖిల్, సొహెయిల్… అవినాష్, అరియానా… గ్రూపుల నడుమ అటూఇటూ మోనాల్… ఇదీ ఈక్వేషన్…

ఇక్కడ ఓ చిన్న విషయం చెప్పుకోవాలి… అసలు మోనాల్‌కు బిగ్‌బాస్ ఎందుకింత మద్దతుగా నిలుస్తున్నాడు… తనతో కుదిరిన ఒప్పందమేనా..? లేక తను ఉంటేనే గేమ్‌లో ఇంట్రస్టు చచ్చిపోకుండా ఉంటుందని అనుకున్నాడా..? మరి లాస్య ఏం పాపం చేసింది..? ప్రేక్షకుల తీర్పు మేరకే అని ఒట్టు పెట్టుకున్న నాగార్జునను కూడా బిగ్‌బాస్ టీం చీట్ చేసిందా..? అసలు ఈ మొత్తం గేమే చీటింగా..? ఏది నిజం..?!

ఫైరింజన్ సైరన్‌కన్నా ఎక్కువ డెసిబుల్స్‌తో మోగే గొంతు… మీరు ఏ పేరుతోనైనా పిలుచుకొండి… శ్రీముఖి పేరును బాబా భాస్కర్ భాషలో స్త్రీముఖి అనీ, చంద్రబోస్, కోటి, శైలజ భాషలో చెప్పాలంటే చంద్రముఖి, బహుముఖి… ఆ సైరన్ ఈమధ్యే, అంటే మూడునాలుగు రోజుల క్రితం… జీ తెలుగు టీవీలో వచ్చే ‘సరిగమ సింగింగ్ ఐకన్’ ప్రోగ్రాములో చక్కెర చిన్నోడా అంటూ మెలోడియస్‌గా, శ్రావ్యంగా పాడుతుంటే ఫ్లోర్ అదిరిపోయింది… తను ట్రెయిన్డ్, ప్రొఫెషనల్ సింగర్ గాకపోయినా పాడటంలో మాధుర్యాన్ని కురిపించింది… మెంటార్లందరినీ ఒక్కచోటకు పిలిచి సూపర్ మచ్చీ అనే ఓ మాస్ సాంగ్ కూడా సింగింది… కానీ…?

ఈ బైరూపికి… సారీ, ఈ బహుముఖికి అదే టీవీ నుంచి చేదు అనుభవం తప్పేట్టు లేదేమో… కాస్త వివరంగా చెప్పుకోవాలంటే… తను చాలా సీనియర్… మంచి ఎనర్జీ లెవల్స్ ఉంటయ్… స్పాంటేనిటీ కూడా ఉంది… షో ఏదైనా సరే, యాంకరింగు అలవోకగా నీళ్లు తాగినంత వీజీగా కొట్టేయగలదు… కాకపోతే ఒబేసిటీతో దూకుడు తగ్గినట్టుంది… తరువాత బిగ్‌బాస్ షో… లక్కీగా ఫైనలిస్టు… నిజానికి విజేత కావల్సింది… కానీ డబ్బు దాదాపు విజేతతో సమానంగా పొందినట్టుంది… ఇక కాస్త రిలాక్సయి ఇదుగో జీ టీవీలో అదిరింది షోలో చేరింది… అయితే..?

ఈ అదిరింది షో ఒక ఫ్లాప్ షో… ఒక్క చమ్మక్ చంద్ర స్కిట్లు తప్ప అందులో రక్తికట్టే స్కిట్లే ఉండటం లేదు… పైగా అదేదో నాగబాబు సొంత టీవీ అయినట్టు స్కిట్లలో తన భజన, బిస్కెట్లు సరేసరి… రేటింగ్స్ ఢమాల్… పెద్ద మనిమంతుడు పనిముట్టును తప్పుపట్టినట్టు యాంకర్ సమీర వైఫల్యంగా ముద్రవేసి, అగ్రిమెంట్లను పక్కనపెట్టేసి, చెప్పాపెట్టకుండా ఆమెను తీసిపారేశారు… ఫాఫం, స్కిట్లలో దమ్ములేకపోతే యాంకర్ ఏం చేయగలదు… ఎంతసేపు పళ్లికిలించి నవ్వగలదు..?

మల్లెమాల సంస్థ అయితే అగ్రిమెంట్ దాటి ఏ ఆర్టిస్టు బయటికి పోయినా పది లక్షలు ఉల్టా కట్టాలి… అదే మల్లెమాల పీకిపారేస్తే ఎవరూ నోరిప్పడానికి లేదు… మరి ఈ జీటీవీలో ఎలా ఉందో తెలియదు గానీ… సమీరను అర్ధంతరంగానే పీకేశారు… భానుశ్రీ, రవి, నవదీపులూ అర్థంతరంగానే నిష్క్రమించారు… ఏముంది..? నాగబాబు వద్దు అంటే ఇక వద్దు… ఫ్లోర్‌లోకి ఎంట్రీ కూడా ఉండదు… డబ్బులిచ్చేవాడు ఏది చెబితే అదే అగ్రిమెంట్… ఇదో కొత్తయుగం వెట్టిచాకిరీ…

సమీరను వెళ్లగొట్టి భానుశ్రీని, రవిని తీసుకొచ్చినా సరే… సరుకు సేమ్… ప్యాకేజీ సేమ్… వాళ్లయినా ఏం అమ్మగలరు..? అగెయిన్ ఫ్లాప్… ఈసారి ఆ ఇద్దరినే కాదు, జడ్జి నవదీప్‌ను కూడా తీసిపారేశారు… జడ్జిగా జానీ మాస్టర్ వచ్చాడు… యాంకర్‌గా శ్రీముఖి… తోడుగా డాన్సర్ పండు… (జూనియర్ సుడిగాలి సుధీర్)… బొమ్మ అదిరింది అని పేరు మార్చారు… కానీ అదే సరుకు కదా… పైగా ఇంకా ప్రతివారం నాసిరకంగా మారుతోంది… ఎలాగంటే..?

మొదట టీం లీడర్ హరి, పొట్టి రియాజ్‌తో సీఎం జగన్‌ను వెక్కిరించే ఓ ఇమిటేషన్ ప్రోగ్రాం చేశారు… నాగబాబు ఇలాంటివి ఎంజాయ్ చేస్తాడు కదా… ఆ షో చూసిన జగన్ ఫ్యాన్స్ ఆ ఆర్టిస్టులకు చుక్కలు చూపించారు… నాగబాబు ఎంత కెలికే ప్రయత్నం చేసినా సరే, సదరు ఆర్టిస్టులు గౌరవంగా తమను క్షమించాలని అప్పీల్ చేసుకున్నారు… తరువాత కూడా నాగబాబు ఇదే రియాజ్, సద్దాం ద్వారా ఇంకా కెలకాలని ట్రై చేశాడు… ఆ వివాదం తరువాత ఈ షో నాణ్యత, రేంజ్, టేస్ట్ అన్నీ దెబ్బతిన్నయ్… దాని ఫలితం ఏమిటో తెలుసా..?

టీఆర్పీల్లో దారుణమైన పతనం… మొన్నటి 8వ తేదీ, ఆదివారం రాత్రి షోకు వచ్చిన రేటింగ్స్ కేవలం 2.26… మీరు చదివింది నిజమే… హైదరాబాద్ మార్క్ కేటగిరీలో జస్ట్, 2.26 రేటింగ్స్ మాత్రమే… అది చాలా చాలా దిగువ స్థాయి రేటింగ్స్… ఆరోజు రఘు మాస్టర్, సింగర్ ప్రణవి కూడా ఆ షోకు వచ్చినట్టున్నారు… ఐనాసరే, షో సాధించిన ఫలితం అదీ… ఇప్పుడు అందరిలో ఆసక్తి ఏమిటంటే..? రేటింగ్స్ ఢమాల్ అన్నప్పుడల్లా యాంకర్లకు మూడుతుంది కదా… సమీర, భానుశ్రీ బాటలో శ్రీముఖిపైనా వేటుపడుతుందా..? ఒకవేళ వేటుపడితే… ఆమెకు ఇప్పటికిప్పుడు ఆల్టర్నేట్ చాన్సెస్ కూడా ఏమీలేవు…!!

యాంకర్ సుమ… చాలా సీనియర్… పలు షోలలో కొత్త యాంకర్లు, కొత్త ఆర్టిస్టులు మా చిన్నప్పటి నుంచీ మీ యాంకరింగు చూస్తున్నాం అని తన వయస్సును గుర్తుచేస్తూ సరదాగా ఆటపట్టిస్తుంటారు కూడా… చివరకు మొన్న నాగార్జున కూడా…! సరే, అవన్నీ అభిమానంతోనే… సుమకు టీవీ తెర మీద బాగా పాపులారిటీ ఉంది… పలు షోలు చేస్తుంది, సినిమా వాళ్లతో విస్తృత సంబంధాలు… మస్తు సంపాదన… కొడుకును హీరోను చేస్తోంది… అన్నీ వోకే… కానీ తన పాపులారిటీకి కూడా ఓ పరిమితి ఉంటుంది… ఒక లెవల్ దాటాక అందరితోపాటు ఆమె… అంతే… ఆమె ఓ యాంకర్ మాత్రమే…

అయితే బిగ్‌బాస్ టీం సుమ పాపులారిటీని అతిగా ఊహించుకుంది… ఒక వీకెండ్ షోకు పట్టుకొస్తే చాలు, రేటింగ్స్ క్యుములోనింబస్ మేఘాల్లాగా వర్షిస్తాయని ఆశపడింది… అనగా కుంభవృష్టి అనుకుంది… కానీ కుంభమే పగిలిపోయింది… అంటే రేటింగ్స్ చూసి టీం మొహాలు మాడిపోయాయి… ఎందుకో తెలుసా..? అదుగో సుమ, ఇదుగో వైల్డ్ కార్డ్ ఎంట్రీ, కమాన్ దున్నేస్తున్నాం అన్నట్టుగా ప్రోమోల మీద ప్రోమోలు కట్ చేసి వదిలారుగా జనం మీదకు… అది అట్టర్ ఫ్లాప్… ఎలాగంటే..?

8 నవంబరు 2020… ఆదివారం… సుమ వైల్డ్ కార్డ్ ఎంట్రీ అంటూ ప్రోమోల హడావుడి నడుమ, ఓ సూట్ కేసు పట్టుకుని వచ్చింది … తనకు తోచిన పంచులు నాలుగు వేసింది… అబ్బే, నో కార్డ్, నో ఎంట్రీ, తూచ్ అని వెళ్లిపోయింది… ఆ షోకు వచ్చిన రేటింగ్స్ జస్ట్, 6.95 (HYD)… అసలు బిగ్‌బాస్ వీకెండ్ షోకు, సుమలు వచ్చినా రాకపోయినా, కేవలం నాగార్జున ఉన్నా సరే, అంతే రేటింగ్ ఉంటుంది… మరి సుమ పేరిట ఆడిన డ్రామాతో వచ్చిన అదనపు రేటింగ్ ఎంత..? ఏమీ లేదు… హళ్లికిహళ్లి… సున్నాకుసున్నా… నిజానికి సమంతతోపాటు అరగంట అంతకుముందు వీకెండ్ షోలో పాల్గొన్న హైపర్ ఆది ఆ కాసేపూ బాగా రక్తికట్టించాడు… సమంతకు మంచి సపోర్ట్ ఇచ్చాడు…

7 నవంబరు 2020… శనివారం… రేటింగ్స్ 6.65… ఆదివారంకన్నా కాస్త తక్కువ… సహజమే… అంటే ఆదివారం షో మీద సుమ ప్రభావం ఏమీ లేదని తేలిపోయిందిగా… ఇదుగో ఇదీ బిగ్‌బాస్ టీంకు ఆశనిపాతం… అసలు ఇదేకాదు… కొద్దివారాలుగా పతనం అవుతున్నట్టుగానే ఈ వారం కూడా బిగ్‌బాస్ రేటింగుల పతనం కనిపించింది… ఇక ఈ షోను లేపడం ఎవరి తరమూ కాదు అని ఇప్పుడు మరింత క్లారిటీ వచ్చినట్టుంది అందరికీ… రేటింగ్స్ వివరాలు కావాలా..?

11.11.2020… బుధవారం… 4.82

12.11.2020… గురువారం… 4.76

13.11.2020… శుక్రవారం… 4.52

9.11.2010… సోమవారం… 4.17

10.11.2020… మంగళవారం… 3.76

ఫాఫం సుమ అని జాలిపడకండి ప్లీజ్… యథా హౌస్‌మేట్లూ తథా గెస్టులూ అంటారు కదా… లోపల వాళ్లూ అలాగే ఉన్నారు… వచ్చీపోయే గెస్టులూ అలాగే ఉన్నారు… సరిపోయింది… ఈ సీజన్‌కు ఇది చాలు… సార్, మీరేమంటారు నాగార్జున గారూ…?

…. అఖిల్, అవినాష్ తప్ప అందరూ ఈసారి నామినేషన్లలో ఉన్నారు కదా… వాళ్లలో వీక్ కంటెస్టెంటు మోనాల్… అనేకసార్లు అదుగో ఔట్, ఇదుగో ఔట్ అనుకుంటూనే ఉన్నా సరే… ఎప్పటికప్పుడు ఆమె కాపాడబడుతూనే ఉన్నది… అభిజిత్ భాషలో చెప్పాలంటే .. ఖుదా మెహర్బాన్ తో గధా పహిల్వాన్… దేవుడు కరుణిస్తే అంతే… బిగ్‌బాస్ దేవుడు కూడా కావచ్చు… సరే, ఏదోలా ఆమె హౌసులో కంటిన్యూ అవుతూనే ఉంది…

కొన్నాళ్లు అఖిల్‌తో… ఇంకొన్నాళ్లు అభిజిత్‌తో… మరికొన్నాళ్లు ఇద్దరితో… ప్రేమ నటిస్తూనే ఉంది… ఆమె కథానాయకి… అనగా హీరోయిన్… నటన ఆమెకు కొత్త కాదు… బిగ్‌బాస్ రాసిస్తాడు, ఆమె నటించి చూపిస్తుంది… అంతే… ప్రేమ లేదు, దోమ లేదు… నిజానికి మోనాల్ బాగా ఎమోటివ్… ప్రత్యేకించి దుఖాన్ని ఆపుకోలేదు… అది మాత్రం నటన కాదు… కడుపులో నుంచి తన్నుకొచ్చే దుఖమే…

అయితే ఆ శోకాలే ప్రేక్షకులకు నచ్చవు… ఒక ఎమోషనల్ సీన్‌లో కన్నీళ్లు పెడితే తప్పులేదు, కానీ ప్రతి దానికీ… ఆనందమొచ్చినా, బాధ కలిగినా అవే కన్నీళ్లు… పదే పదే… పైగా ఈ ప్రేమ నాటకాలు… ఫిజికల్ టాస్కుల్లో పెద్దగా ఇంట్రస్టు చూపించకపోవడం… కాస్త అసభ్యంగా ఉండే డ్రెస్సు… అన్నీ కలిసి మోనాల్ మీద ప్రేక్షకుల్లో పెద్ద ప్రేమ పుట్టలేదు… పైగా పలుసార్లు ఆమె వోట్ల జాబితాలో దిగువన ఉండిపోయింది… ఐనా సరే, ఆమె కంటిన్యూ అవుతూనే ఉంది…

కాలం గడిచేకొద్దీ… అభిజిత్ ఆమెతో విడిపోయాడు, హారికతో జతకట్టాడు… అవినాష్ అరియానాతో సల్లాపాలు మొదలుపెట్టాడు… అఖిల్‌తోనూ మోనాల్ బంధం ఉండీలేనట్టుగా మారింది… ఈమధ్య ఆమెలో కొంత వ్యవహారశైలిలో కొంత మెచ్యూరిటీ కనిపిస్తోంది… ఇక వెళ్లాల్సిన సమయం వచ్చినట్టు అర్థమైనట్టుంది… తనను చూడటానికి సోదరి వస్తే కూడా… అఖిల్ వ్యవహారం సొసైటీలో చెడుగా ప్రొజెక్ట్ అవుతోందా అని అడిగింది… నటనకు ఫుల్ స్టాప్ పెట్టేయాల్సిన టైం వచ్చినట్టుంది…

ఆమె స్ట్రాంగ్… తనకు నచ్చని కోడిగుడ్డును కనీసం తాకలేదు తను… ఎవరు తీసుకొచ్చినా తగలనివ్వలేదు… ఫిజికల్‌గా ఎంత స్ట్రాంగో ప్రేక్షకులందరూ ఈరోజు చూశారు… నిజంగా రియల్ మోనాల్‌ కనిపించింది… ఒకవైపు తోపు అని చెప్పుకునే సొహెయిల్ మధ్యలోనే అఖిల్‌ను కిందపడేశాడు… కూలబడిపోయాడు… ఇంకోవైపు అవినాష్ అభిజిత్‌ను ముందుగానే దింపేశాడు… కానీ మోనాల్ మాత్రం హారికను అలాగే స్థిరంగా, కదలకుండా, ఏమాత్రం తొణకకుండా… ఓ స్థంభంలా నిలబడి… హారికను గెలిపించింది…

అఖిల్‌కు ఎక్కడో కాలింది… ఆవేశాన్ని అణుచుకోలేక బెడ్ దగ్గర ఏదేదో ప్రతాపం చూపించాడు… మధ్యలో మోనాల్ వస్తే, నన్ను కాసేపు వదిలెయ్ అన్నాడు రగిలిపోతూ… అవును మరి… ఆమె తప్పేం ఉంది..? తను అఖిల్‌ను ఎత్తుకుని ఉండాల్సిందా..? అదేనా అఖిల్ కోరుకున్నది..? లేక అఖిల్‌ను గెలిపించడానికి హారికను ఆమె కిందపడేయాల్సి ఉండేదా..? ఆ అఖిల్ భావనల్లోనే చిన్నతనం ఉంది… తరువాత అభిజిత్‌తో మాట్లాడుతూ మోనాల్ వైరాగ్యం కనబర్చింది… అఖిల్‌తో కట్… సోవాట్..?

ఆమె ప్రస్తుతం మొహంలో ఏ ఫీలింగ్సూ లేకుండా తేటగా కనిపిస్తోంది… హారిక, లాస్య, అభిజిత్, తను కలిసి ఒక్కచోట జోకులు వేసుకుంటుంటే… ఆమె మాత్రం అటూఇటూ నిర్లిప్తంగా చూస్తూ కనిపించింది… అవును, పాత మోనాల్ ఇప్పుడు లేదు… ఎటొచ్చీ… హౌస్ నుంచి వెళ్లిపోయేముందు ఆమె ప్రేక్షకుల నుంచి మంచి మార్కులు పొందుతున్నదా..? అదే నిజమైతే మాత్రం పిటీ…!!

తాజా వార్త  :: అఖిల్‌తో కట్టయ్యాక… బిగ్ బాస్ స్క్రిప్టు పూర్తయ్యాక ఇక మోనాల్‌తో పనేం ఉంది..? ఇన్నాళ్లూ కాపాడుతూ వచ్చాడు కదా… చిటారు కొమ్మలు ఎక్కించాడు కదా… ఇప్పుడు వదిలేశాడు… ఆమె ఔటయిపోయింది ఆటలో… ఎలిమినేట్ అయిపోయింది… ముందే అనుకున్నాం కదా… ఆ సూచనలు కనిపిస్తూనే ఉన్నాయని… చివరకు అదే జరిగింది… 

తాజా అప్ డేట్   :: బిగ్ బాస్ ట్విస్టు ఇచ్చాడు… పాత్రికేయలోకాన్ని ఆమె ఔటయ్యిందనే మాయలో పడేసి, చివరకు లాస్యను ఔట్ చేశాడు… అది మరో కథనంలో చెప్పుకుందాం…