పులి బొమ్మను వేయాలని మొదలుపెడితే అది పిల్లి బొమ్మ అయి కూర్చుందని ఓ పాత సామెత ఉంది . వి బి రాజేంద్రప్రసాద్ మనుషులంతా ఒకటే సినిమాలాగా తీద్దామని అనుకున్నారో లేక మూగమనసులు సినిమాలాగా తీద్దామని అనుకున్నారో తెలియదు . అది మాత్రం బంగారు బొమ్మలు సినిమా అయి కూర్చుంది . ANR సెకండ్ ఇన్నింగ్సులో వచ్చిన ఈ సినిమాలో కూడా ఆలుమగలు సినిమాలోలాగానే చాలా ఎనర్జిటిక్ గా డాన్స్ చేసారు . బహుశా దసరా బుల్లోడి హేంగోవర్ ఉండి ఉండవచ్చు .
By the way , మూగమనసులు సినిమాలోలాగానే ఈ సినిమాలో కూడా అక్కినేని , మంజుల పాత్రల పేర్లు రాధ , గోపిలే . మూగమనసులు సినిమాలాగానే పునర్జన్మ కాన్సెప్ట్ ఆధారంగా తీయబడింది .
ఈ సినిమా అక్కినేని లెవెల్లో హిట్ కాలేదు . కిందాపైనా పడి వంద రోజులు ఆడింది . కె వి మహదేవన్ సంగీతం , ఆత్రేయ పాటలు సినిమాను ఈరోజుకీ గుర్తు ఉండేలా చేసాయి . ముఖ్యంగా నువ్వాదరిని నేనీదరిని కృష్ణమ్మ కలిపింది ఇద్దరినీ పాట చాలా శ్రావ్యంగా ఉండటమే కాకుండా బాగా హిట్టయింది .
Ads
ప్రత్యేకంగా చెప్పుకోతగ్గ మరో పాట అయ్యయ్యో బంగరు బాబూ పాట . ఆ పాటలో అక్కినేని , మంజుల నృత్యాలు చాలా బాగుంటాయి . మంజుల అదరగొట్టేసింది . బుట్టబొమ్మ . మిగిలిన పాటలు ఇది పొగరుబోతు పోట్ల గిత్తరా , నేను నేనుగా , ఆ సుబ్బయ్య సూరయ్య ఐ లవ్ యూ పాటలు కూడా థియేటర్లో శ్రావ్యంగానే ఉంటాయి .
రావు గోపాలరావు- ఆయన ఇద్దరు పెళ్ళాలు సూర్యకాంతం , ఛాయాదేవిల గోల గోలగోలగా ఉంటుంది . పంచాయతీ బోర్డు మెంబర్ని , ఇద్దరు పెళ్ళాల మొగుడ్ని అనే డైలాగ్ బాగా పాపులర్ అయింది ఆరోజుల్లో . వి బి రాజేంద్రప్రసాద్ గారి దసరాబుల్లోడు హేంగోవర్లో నాగేశ్వరరావుని వాణిశ్రీ , చంద్రకళల్లాగా సూర్యకాంతం , ఛాయాదేవిలు కూడా స్నానం చేయిస్తారు . పాపం ! సూర్యకాంతం !!
సత్యనారాయణ , జగ్గయ్య , కె వి చలం , రాజబాబు , ధూళిపాళ , అంజలీదేవి , ఝాన్సీ ప్రభృతులు నటించారు . అంత ప్రాముఖ్యత లేని ఓ నౌకరు పాత్రలో ధూళిపాళ ఎలా నటించాడని ఆశ్చర్యం వేస్తుంది . జగపతి పిక్చర్స్ బేనరుపై వచ్చిన ఈ సినిమా ANR లెవెల్లో ఆడలేదనే చెప్పవచ్చు .
సినిమా యూట్యూబులో ఉంది . అక్కినేని , మంజుల అభిమానులు చూడవచ్చు . పాటల వీడియోలు కూడా ఉన్నాయి . ఈ సినిమాలో నాగేశ్వరరావు బుల్ ఫైట్ ఆరోజుల్లో ఆయన అభిమానులకు బాగా హుషారును ఇచ్చింది . #తెలుగుసినిమాలసింహావలోకనం #తెలుగుసినిమాలు (దోగిపర్తి సుబ్రహ్మణ్యం)
Share this Article