.
. ( దోగిపర్తి సుబ్రహ్మణ్యం ) …….. ఫక్తు జంధ్యాల మార్క్ సినిమా గయ్యాళి గంగమ్మ… కక్షలు , పగలు , చంపటాలు , చంపుకోవటాలు , చాతబడులు వంటి వయలెన్స్ లేకుండా ఫేమిలీ ఓరియెంటెడ్ , వినోదాత్మక సినిమాలను పాపులర్ చేసింది జంధ్యాలే .
ఒకప్పుడు విజయా వాళ్ళు ఇలాంటి వినోదాత్మక సినిమాలు తీసేవారు . 1980 ఆగస్టులో వచ్చిన ఈ గయ్యాళి గంగమ్మ కూడా విజయా వారి గుండమ్మ కధ సినిమా లాంటిదే . రెండింటిలోను టైటిల్ పాత్రలను వేసింది సూరేకాంతమ్మే .
Ads
గుండమ్మ కధలో సవతి కూతుర్ని రాచిరంపాన పెట్టే పాత్ర అయితే ఈ గయ్యాళి గంగమ్మ సినిమాలో ఆమె పాత్ర అహ నా పెళ్ళంట సినిమాలో కోట శ్రీనివాసరావు , ఆడపడుచు సినిమాలో రేలంగి , నిలువుదోపిడి సినిమాలో షావుకారు చుక్కమ్మ పాత్ర లాంటిది .
ఇంట్లో వాళ్ళ కడుపు , తన కడుపు కాల్చుకొని పైసా పైసా కూడబెట్టే పాత్ర . బీదాసాదాకు అప్పులిచ్చి షైలాక్ లాగా రక్తమాంసాలు పిండే పాత్ర . ఈ సినిమా ఆమె చుట్టూ తిరిగేదే .
సత్యానంద్ , జంధ్యాల కలిసి కధను నేయగా , బీరం మస్తాన్ రావు స్క్రీన్ ప్లే , దర్శకత్వం వహించారు . డైలాగుల్ని జంధ్యాల ఒక్కరే వ్రాసారు . గయ్యాళి గంగమ్మకు నోరు లేని మొగుడు , నోరు లేవకపోయినా పెంకిఘటం కొడుకు ఉంటారు .
పట్నం వెళ్ళి ఉద్యోగం చేస్తూ అందమైన అమ్మాయిని మనువాడాలనే కోరికతో మిత్రుడి సహాయంతో పట్నం చేరతాడు హీరో . అక్కడ ఓ అమ్మాయితో ప్రేమలో పడతాడు . ఆ అమ్మాయి అతని మేనత్త కూతురే .
వాళ్ళ కుటుంబాన్ని గతంలో ఆరళ్ళు పెట్టి అతలాకుతలం చేసిన గయ్యాళి గంగమ్మ ఇంటికి తన కూతుర్ని పంపనంటే పంపనని భీష్మించుకుని కూర్చుంటాడు పిల్ల తండ్రి . అందరూ కలిసి గయ్యాళి గంగమ్మకు బుధ్ధి చెప్పి పెళ్ళిళ్ళు చేసుకుంటారు . టూకీగా కధ ఇది .
పెంకి హీరోగా చంద్రమోహన్ , మిత్రుడిగా లక్ష్మీకాంత్ , వారిద్దరికి జోడీలుగా నూతన నటి రజనీ శర్మ , పల్లవిలు నటించారు . రజనీ శర్మ తెలుగులో ఈ సినిమా కాకుండా కృష్ణ హీరోగా నటించిన అమ్మాయి మొగుడు మామకు యముడు సినిమాలో మాత్రమే నటించినట్లు గుర్తు . ఇతర పాత్రల్లో నాగభూషణం , గుమ్మడి , మాడా , పి ఆర్ వరలక్ష్మి , జయమాలిని , కె వి చలం , పి యల్ నారాయణ ప్రభృతులు నటించారు .
ఈ సినిమా బాగుండటానికి మరో కారణం చక్రవర్తి సంగీతం . పాటల్ని వేటూరితో పాటు సాహితి వ్రాసారు . బహుశా సాహితి రచయితగా ఈ సినిమాతోనే అరంగేట్రం చేసారు . చంద్రమోహన్ రజనీ శర్మ డ్యూయెట్లు , జయమాలినితో క్లబ్ డాన్స్ , సినిమా ఆఖర్లో సాములోరి మారువేషంలో చంద్రమోహన్ సర్వం గోయిందా పాటలు అన్నీ బాగా చిత్రీకరించబడ్డాయి . హుషారుగా ఉంటాయి కూడా .
రాధా నా రాధ , వాంగో సామి వాంగో , నా కొంప ముంచింది వాన డ్యూయెట్లు చాలా హుషారుగా ఉంటాయి . జయమాలిని , చంద్రమోహన్ క్లబ్ డాన్స్ కూడా చాలా హుషారుగా ఉంటుంది . కావలసినన్ని ద్వంద్వార్ధ పలుకులు ఉంటాయి . బహుశా వేటూరి వారే వ్రాసి ఉంటారు .
మా తరంలో వాళ్ళు ఈ సినిమాను ఎంత మంది చూసారో నాకు తెలియదు . చూసి ఉండకపోతే మాత్రం తప్పకుండా చూడండి . 100% వినోదం గ్యారెంటీడ్ . యూట్యూబులో సినిమా , పాటల వీడియోలు అన్నీ చక్కగా ఉన్నాయి .
గయ్యాళి పాత్రలకు పెట్టింది పేరు సూరేకాంతమ్మ . పబ్లిసిటీ పోస్టర్లలో కూడా పది తలలతో ఆమె ఫోటోనే వేసారంటే ఆమె పాత్ర సినిమాలో ఎంత ప్రధానమయిందో అర్థం అవుతుంది . మరో గుండమ్మ , మరో చుక్కమ్మ కధే . A complete feel good family entertainer . #తెలుగుసినిమాలసింహావలోకనం #తెలుగుసినిమాలు
వికీపీడియాలో ఈ సినిమా వివరాలు చూస్తుంటే కాస్త నవ్వొచ్చింది… లక్ష్మీకాంత్ బదులు రజినీకాంత్, రజినీ శర్మ బదులు శశికళ/రజని వివరాల లింకులు…
Share this Article