ఆసక్తికరమైన ఆట – ఆటగాడు కూడా రెడీ – సిద్ధంగా లేని పిచ్…

.

దుల్కర్‌ ‘ఐ యామ్ గేమ్’కు గేమ్ మొదలవకముందే గండాలు! సినిమా ఓకే… కానీ DCP ఇవ్వలేని అసమర్థత శాపమైందా? తెలుగులో ‘ఇరుముడి’.. మలయాళంలో ‘బెత్లెహెమ్’ పోటీ!

సినిమా బాగుందా? బాగోలేదా? ఈ ప్రశ్నకు సమాధానం చెప్పకముందే ‘ఐ యామ్ గేమ్’కు మరో ప్రశ్న ఎదురైంది… అసలు సినిమా సమయానికి థియేటర్‌లో ఎందుకు కనిపించలేదు?

దుల్కర్ సల్మాన్ లాంటి స్టార్ సినిమా. పైగా భారీ అంచనాలతో విడుదల. రిలీజ్ డేట్‌ను ముందే ప్రకటించారు. ప్రమోషన్లు జరిగాయి. అడ్వాన్స్ బుకింగ్స్ మొదలయ్యాయి. అన్నీ సిద్ధమే అనుకున్నారు. కానీ రిలీజ్ రోజు ఉదయం కొన్ని ప్రాంతాల్లో ప్రేక్షకుడు థియేటర్‌కు వెళ్తే…

సినిమా లేదు! కారణం? DCP సమయానికి థియేటర్‌కు చేరలేదు. సినిమా తీయడం ఒక కళ అయితే… దాన్ని థియేటర్‌కు సకాలంలో, సాంకేతికంగా సరిగ్గా అందించడం కూడా సినిమా వ్యాపారంలో భాగమే. అక్కడే ‘ఐ యామ్ గేమ్’ టీమ్ నుంచి పెద్ద తప్పిదం జరిగిందనే విమర్శలు వస్తున్నాయి.

ఒక సినిమా కథలో హీరోకు విలన్ ఎదురవుతాడు. ఇక్కడ మాత్రం రిలీజ్ రోజునే సినిమాకు DCP అనే విలన్ ఎదురైంది!

మార్నింగ్ షో పోయింది… తొలి స్పందన పోయింది! ఇప్పటి కాలంలో సినిమాకు మొదటి రోజు మొదటి షో ఎంత కీలకమో ప్రత్యేకంగా చెప్పాల్సిన అవసరం లేదు. మార్నింగ్ షోలు అంటే కేవలం కొన్ని వందల టికెట్ల ఆదాయం కాదు. అవి సోషల్ మీడియా టాక్‌కు ప్రారంభం.

రివ్యూలకు ప్రారంభం. ఫ్యాన్స్ రెస్పాన్స్‌కు ప్రారంభం. మధ్యాహ్నం షోలకు వచ్చే ప్రేక్షకుడికి సినిమా మీద ఆసక్తి పెంచేది కూడా ఆ మార్నింగ్ షోనే. అలాంటి సమయంలో కంటెంట్‌ను థియేటర్లకు సమయానికి అందించలేక షోలు రద్దు కావడం చిన్న సాంకేతిక సమస్య కాదు. అది రిలీజ్ మేనేజ్‌మెంట్ వైఫల్యం.

ముఖ్యంగా ఇతర సినిమాలు అదే రోజు ప్రేక్షకుడిని లాక్కెళ్లడానికి సిద్ధంగా ఉన్నప్పుడు ఇది మరింత ప్రమాదకరం.

తెలుగులో ‘ఇరుముడి’… ఎదురుగా ఉండగా! తెలుగు మార్కెట్‌లో పరిస్థితి మరింత ఆసక్తికరం. ఇక్కడ ‘ఐ యామ్ గేమ్’కు ఇప్పటికే ‘ఇరుముడి’ వంటి సినిమా నుంచి గట్టి పోటీ ఉంది. ‘ఇరుముడి’ ఇప్పటికే ప్రేక్షకుల దృష్టిని, థియేటర్లను, షో టైమింగ్స్‌ను ఆక్రమించుకున్న సమయంలో కొత్తగా వచ్చిన సినిమా తన తొలి రోజే ప్రతి షోను సద్వినియోగం చేసుకోవాలి.

కానీ ఇక్కడ ఏమైంది? షో పెట్టాల్సిన సమయంలో DCP లేదు! అంటే పోటీ సినిమాకు థియేటర్‌ను వదిలేసి, ప్రేక్షకుడికి ‘తర్వాత రండి’ అని చెప్పినట్టే. సినిమా బాగుందా లేదా అన్నది తర్వాతి విషయం. ముందుగా ప్రేక్షకుడికి సినిమా కనిపించాలి కదా!

మలయాళంలో పరిస్థితి మరీ సింపుల్ కాదు! ఇక దుల్కర్ సల్మాన్ సొంత మలయాళ మార్కెట్‌లో అయినా పరిస్థితి అనుకూలంగా ఉందనుకుంటే అదీ పూర్తిగా నిజం కాదు. అక్కడ ఇప్పటికే ‘బెత్లెహెమ్ కుటుంబ యూనిట్’ మంచి ఊపులో ఉంది. మలయాళంలో ఇటీవల వచ్చిన అతిపెద్ద విజయాల్లో ఒకటిగా నిలిచిన ఆ సినిమా ఇంకా ప్రేక్షకులను థియేటర్లకు తీసుకొస్తోంది.

అందుకే ‘ఐ యామ్ గేమ్’కు కొత్త స్క్రీన్లు, షో టైమింగ్స్ విషయంలో పోటీ తప్పలేదు. అంటే దుల్కర్ సినిమా వచ్చిందని పాత హిట్ సినిమాను థియేటర్లు ఒక్కసారిగా పక్కకు నెట్టేయలేదు. ‘బెత్లెహెమ్’ తన స్థానం కాపాడుకుంది… ‘ఐ యామ్ గేమ్’ తన స్థానం కోసం పోరాడాల్సి వచ్చింది. ఇదే కేరళ బాక్సాఫీస్‌లో అసలు గేమ్. ఇంతకీ సినిమా ఎలా ఉంది..? మరో కథనంలో చెప్పుకుందాం…

ఆటగాడు వచ్చాడు, ఆసక్తికరమైన ఆట… కానీ ఆటకు గ్రౌండే సకాలంలో ప్రిపేర్ చేయలేదు…