కన్నాంబ , సావిత్రి , వాణిశ్రీల తర్వాత ఎలాంటి పాత్రలనయినా , ముఖ్యంగా విషాద పాత్రలను , అవలీలగా వేయగల స్థాయికి జయసుధను తీసుకొనివెళ్ళిన సినిమా 1976 లో వచ్చిన ఈ జ్యోతి సినిమా . పండంటి కాపురం సినిమాతో అరంగేట్రం చేసిన జయసుధ లక్ష్మణరేఖ సినిమాలో రెబల్ రోల్ , సోగ్గాడు సినిమాలో చలాకీ రోల్ వేసి ఈ జ్యోతి సినిమాలో అల్లరి పిల్లగా , ఆ తర్వాత ఓ ముసలివాడి భార్యగా బరువైన పాత్రలో నటించి శభాష్ అనిపించుకుంది .
ఆ తర్వాత అభినందించాల్సింది దర్శకేంద్రుడు రాఘవేంద్రుడినే . బొడ్ల మీద ఫలపుష్పాలు వేయటమే కాదు ; తక్కువ బడ్జెటుతో , బ్లాక్ & వైటులో బరువైన సినిమాలను , అన్నమయ్య , రామదాసు వంటి భక్తిరస సినిమాలను కూడా తీయగల దర్శకుడిగా పేరు తెచ్చుకున్నారు . తండి కె యస్ ప్రకాశరావుకు తగ్గ తనయుడిగా పేరు గడించారు .
ఆ తర్వాత నిర్మాత క్రాంతికుమార్ . శారద , ఊర్వశి వంటి మంచి సినిమాలను నిర్మించి ఓ ఇమేజిని సాధించుకున్నారు . మూడవ సినిమాగా ఈ జ్యోతి . కుటుంబమంతా కలిసి చూడగల సినిమాలను నిర్మించారు , దర్శకత్వం వహించారు .
Ads
ప్రముఖ రచయిత్రి సి ఆనందారామం వ్రాసిన మమతల కోవెల అనే నవల ఆధారంగా ఈ జ్యోతి సినిమా తీయబడింది . టైటిల్ మమతల కోవెల అని కాకుండా జ్యోతి అని పెట్టుకోవటంలోనే ఈ సినిమా టైటిల్ కేచీ అయింది , పాపులర్ అయింది .
ఈ సినిమా ద్వారా ఒక సంభాషణల రచయితకు కూడా మలుపు వచ్చింది . అది సత్యానంద్ . ఈ సినిమాతోనే బ్రేక్ వచ్చిందని చెప్పుకోవచ్చు . ఎన్నో సినిమాలకు మాటలు వ్రాశారు. ఇలా ఎంతో మందికి మలుపును ఇచ్చింది ఈ జ్యోతి సినిమా .
చక్రవర్తి సంగీత దర్శకత్వంలో సినిమాలో ఉన్న నాలుగు పాటలూ హిట్టయ్యాయి . సిరిమల్లె పువ్వల్లె నవ్వు , నీకూ నాకూ పెళ్ళంట , ఏడుకొండలపైన ఏల వెలిశావు , ఫస్ట్ టైం ఇది నీకు పాటలన్నీ హిట్టయ్యాయి . అన్ని పాటల్నీ ఆత్రేయే వ్రాసారు . (ప్రత్యేకించి సిరిమల్లె పువ్వల్లె నవ్వు పాట హైలైట్… రాగయుక్తంగా నవ్వుతూ జానకి ఈ పాటకు కొత్త స్వరపరిమళాన్ని అద్దింది… పాటలో అధికంగా జానకి నవ్వులు, ఆలాపన మాత్రమే ఉంటాయి… ఎస్పీ బాలు సరేసరి…)
మురళీమోహన్ , గుమ్మడి , సత్యనారాయణ , శుభ , కృష్ణకుమారి , ఫటాఫట్ జయలక్ష్మి , ఛాయాదేవి , గిరిబాబు , రావు గోపాలరావు ప్రభృతులు నటించారు . శంకరాభరణం శంకరశాస్త్రి గారు ఓ చిన్న పాత్రలో తళుక్కుమన్నారు . జయసుధ తర్వాత చెప్పుకోవలసింది గుమ్మడి , సత్యనారాయణ , రావు గోపాలరావులే . ముగ్గురూ అద్భుతంగా నటించారు . జయసుధకు ఉత్తమ నటిగా ఫిలిం ఫేర్ అవార్డు వచ్చింది . గుమ్మడికి ప్రత్యేక అవార్డు కూడా ఫిలిం ఫేర్ నుండి వచ్చింది .
నాకెంతో ఇష్టమైన సినిమా ఈ జ్యోతి . యూట్యూబులో ఉంది . తప్పక చూడవలసిన సినిమా . ముఖ్యంగా జయసుధ అభిమానులు మిస్ కాకండి . చిన్న వయసులో ఇంత బరువైన పాత్ర వేసి మెప్పించటం గొప్ప విషయమే . దేవదాసు సినిమాలో ముసలి వాడిని పెళ్లి చేసుకున్న పార్వతి పాత్రలో నటించి మెప్పించిన సావిత్రి కూడా అప్పుడు చిన్న వయసుదే . అందుకే నా అభిప్రాయం కన్నాంబ , సావిత్రి , వాణిశ్రీల తర్వాత జయసుధే అని .
#తెలుగుసినిమాలసింహావలోకనం #తెలుగుసినిమాలు (దోగిపర్తి సుబ్రహ్మణ్యం )
Share this Article