జయసుధ హీరోయిన్ గా నటించిన మొదటి సినిమా 1975 సెప్టెంబరులో వచ్చిన ఈ లక్ష్మణరేఖ సినిమా . పండంటి కాపురం సినిమాతో అరంగేట్రం చేసిన తర్వాత ఒకటి రెండు సినిమాలు విలన్ గానో , అప్రధాన పాత్రల్లోనో నటించింది . షీరోగా నటించి , గుర్తింపు తెచ్చుకున్న సినిమా ఇదే . భవిష్యత్తులో కేరెక్టర్ ఆర్టిస్టుగా పేరు తెచ్చుకోగలదు అనే సంకేతం ఈ సినిమాలోనే ఇస్తుంది . గ్లామర్ , విషాద పాత్రల్లో కన్నాంబ , సావిత్రి , వాణిశ్రీల తర్వాత స్థానం జయసుధదే అని నేనెప్పుడూ భావిస్తూ ఉంటాను .
సందేశాత్మక సినిమా . ఓ జడ్జి గారమ్మాయి , తండ్రి మాటలను పెడచెవిన పెట్టి , పెళ్ళి పీటల మీద నుంచి ప్రియుడితో లేచిపోతుంది . ఆ దొంగ ప్రియుడు వేశ్యాగృహానికి అమ్మివేస్తాడు . ఆ దొంగ ప్రియుడిని చంపేసి , జైలుకు వెళ్ళిపోవటంతో సినిమా ముగుస్తుంది . జయసుధ గ్లామరస్ గా , మోసపోయిన యువతిగా , కోర్టు సీనులో చాలా బాగా నటించింది . ఈ సినిమా టైంకు పెద్ద అనుభవం కూడా లేకపోయినా , పెద్ద నటిగా తన నటనను ప్రదర్శించింది .
జయసుధ , చంద్రమోహన్ , మురళీమోహన్ , సుమ , గుమ్మడి , సత్యనారాయణ , ఛాయాదేవి , రామదాసు , అల్లు రామలింగయ్య , కె వి చలం , గిరిజ ప్రభృతులు నటించారు . ఈ సినిమాలో విలన్ చంద్రమోహనే .
Ads
సత్యం సంగీత దర్శకత్వంలో పాటలు థియేటర్లో బాగానే ఉంటాయి . సముద్రాల వ్రాసిన నాడు లక్ష్మణరేఖ దాటిన ఫలితమే నేడు నేను అనుభవించే నరకము పాట హైలైట్ . కొసరాజు వ్రాసిన నీదాననురా నీ నీడనురా అనే ఖవాలీ పాటలో జయసుధ డాన్స్ బాగుంటుంది .
ఆత్రేయ వ్రాసిన అందరి రాతలు రాసేది ఆ దేవుడు ఆడదాని రాత రాసేది మగవాడు , సి నారాయణరెడ్డి వ్రాసిన ఒక మాట ఒకే మాట వలచే రెండు హృదయాలు , ఆరుద్ర వ్రాసిన నీ సంగతి నాకు తెలుసు నీకివ్వనురా నా మనసు పాటలు బాగుంటాయి .
ఏదయినా వేరే భాషలో వచ్చిన సినిమాకు రీమేకేమో నాకు ఐడియా లేదు . యన్ గోపాలకృష్ణ దర్శకుడు . అప్పట్లో ఈ సినిమాకు , జయసుధకు మంచి పేరే వచ్చింది . ఈ సినిమా తర్వాతే సోగ్గాడు , జ్యోతి సినిమాలు వచ్చాయి . ఈ సినిమా అవకాశాలు తర్వాత జయసుధ మరలా వెనక్కు తిరిగి చూసుకోవలసిన అవసరం రాలేదు .
యూట్యూబులో ఉంది . సందేశాత్మక చిత్రం . జయసుధ అభిమానులు తప్పక చూడవలసిన సినిమా . చూడబులే . #తెలుగుసినిమాలసింహావలోకనం #తెలుగుసినిమాలు……. [ దోగిపర్తి సుబ్రహ్మణ్యం ]
Share this Article