A pucca commercial entertainer . బంగారు తల్లి సినిమాతో రెబల్ హీరోగా చేసిన ప్రయత్నం ఈ సినిమాతో పక్కా అయిపోయింది కృష్ణంరాజుకి . 1978 లో వచ్చిన ఈ కటకటాల రుద్రయ్య సినిమాలో కూడా బంగారు తల్లిలోలాగా జమున , కృష్ణంరాజులు తల్లీకొడుకులే . అయితే కృష్ణంరాజు ఈ సినిమాలో కుప్ప తొట్టి కుంతీపుత్రుడు . క్లైమాక్సులో NTR , హేమలతల కుంతీ కర్ణుల సంవాదాన్ని కూడా చూపుతారు దర్శకులు దాసరి నారాయణ రావు .
18 లక్షల బడ్జెటుతో తీస్తే 75 లక్షలు వసూలు అయిందట . కృష్ణ కాల్షీట్లు కూడా ఇచ్చాక , ఆయనకు వేరే సినిమా రావటంతో కృష్ణంరాజుని తీసుకున్నారు . కృష్ణంరాజుకు మంచి అవకాశం వచ్చింది . 26 సెంటర్లలో 50 రోజులు , ఎనిమిది సెంటర్లలో వంద రోజులు ఆడింది . తర్వాత కాలంలో ఈ సినిమాను దాసరే జ్యోతి బనే జ్వాలా అనే టైటిలుతో హిందీలో రీమేక్ చేసారు .
1979 లో వి బి రాజేంద్రప్రసాద్ స్వీయ దర్శకత్వంలో తమిళంలో పట్టక్కతి భైరవన్ అనే టైటిలుతో తీసారు . శివాజీ , జయసుధ , శ్రీదేవి నటించారు . అంత హిట్టయిన కధ , సినిమా . కధ , స్క్రీన్ ప్లే , మాటలు , దర్శకత్వం దాసరి నారాయణ రావు వహించారు . ప్రముఖ నిర్మాతలు విజయ మాధవి పిక్చర్స్ వడ్డె రమేష్ , శోభనాద్రిలు తమ విజయ మాధవి పిక్చర్స్ బేనరుపై నిర్మించారు .
Ads
ఈ సినిమాలో కృష్ణంరాజు గాంగులో ఓ పులి ఉండటం విశేషం . బాస్ కృష్ణంరాజు ఏం చెబితే అది అమలు పరుస్తుంది ఆ పులి . ఓ సినిమాలో సర్కస్సులో పనిచేసే కమల్ హాసన్ పులి లాగా . కృష్ణంరాజు తండ్రీ కొడుకులుగా నటించారు . తండ్రి పాత్ర అయ్యాక కొడుకు పాత్ర వస్తుంది . కృష్ణంరాజు , జమున , జయసుధ , జయచిత్ర , రామకృష్ణ , రావు గోపాలరావు , సత్యనారాయణ , ప్రభాకరరెడ్డి , రమణమూర్తి , మిక్కిలినేని , త్యాగరాజు , కాంతారావు ప్రభృతులు నటించారు .
జె వి రాఘవులు సంగీత దర్శకత్వంలో వీణ నాది తీగె నీది అనే పాట బాగా హిట్టయింది . మిగిలిన పాటలు ఈదురు గాలికి మా దొర గారికి ఏదో గుబులు రేగింది , వింత ఇరుకు ఎంతో ఇరుకు , పాల కంకి మీదుంది పైరు అబ్బబ్ , తలలో చేతులు తగవులు పడితే థియేటర్లో శ్రావ్యంగా ఉంటాయి . జయసుధ జయచిత్రల పట్టాడే అబ్బ కొట్టాడే హుషారుగా ఉంటుంది . పాటలన్నింటినీ వేటూరే వ్రాసినా గొప్పగా పేలలేదు . థియేటర్లో వరకు బాగుంటాయి .
ఈ సినిమాలో కాలేజీ పూర్వ విద్యార్థుల ఫంక్షన్లో రామకృష్ణ , జయచిత్ర మధురానగరిలో చల్లనమ్మబోదు దారి విడువుము కృష్ణా అని శాస్త్రీయంగా ప్రారంభమవుతుంది . కాలేజీ కుర్రాళ్ళు వద్దని గోల చేస్తే రాక్ & రోల్లో లాగిస్తారు . 1978 కాబట్టి సనాతనవాదులు వదిలేసారు . ఇప్పుడయితే సనాతన ధర్మాన్ని కించపరిచారని బాయ్ కాట్ పిలుపు కూడా ఇచ్చే వారు .
ఇలాంటి సన్నివేశాలు అత్తారింటికి దారేది సినిమాలో కూడా ఉంటాయి . అహల్య , గౌతమ మహాముని , ఇంద్రుడు నదికి స్నానానికి వెళ్ళే సీన్లో పవన్ కల్యాణ్ , సమంత , బ్రహ్మానందం నటించారు . అదే సీన్ ఇప్పుడయితే గోలగోల అయ్యేది . త్రివిక్రమ్ శ్రీనివాస్ జనానికి సంజాయిషీ ఇచ్చుకోవలసి వచ్చేది .
మొత్తం మీద నిర్మాతలకు లక్ష్మీ ప్రసన్నం ఉంది . కుంతీ కర్ణుల కధ వంటి కధతో ఈ సినిమాలో దాసరి మార్కు డ్రామా , డైలాగులు , ఎమోషన్ పుష్కలంగా ఉన్నాయి . సినిమా యూట్యూబులో ఉంది . పాటల వీడియోలు కూడా ఉన్నాయి . కృష్ణంరాజు , ప్రభాస్ అభిమానులు చూడవచ్చు .
#తెలుగుసినిమాలసింహావలోకనం #తెలుగుసినిమాలు ………… ( దోగిపర్తి సుబ్రహ్మణ్యం )
Share this Article