.
రామానాయుడు మార్క్ సినిమా మండే గుండెలు . ఆయన సినిమాల్లో కధ , స్క్రీన్ ప్లే బిర్రుగా ఉంటాయి . రిచ్ గా సెట్టింగులు , పడవ కార్లు , మధ్య తరగతి ప్రేక్షకులు వాటన్నింటిలో తమను ఊహించుకుని ఓలలాడుతూ విహారం మస్తుగా ఉంటాయి . ఇవన్నీ ఉన్నాయి ఈ సినిమాలో . కోవెలమూడి వారి వారసుడు బాపయ్య దర్శకత్వం . భారీ తారాగణం . ఇంతమంది ఏక్టర్లను ఎకామడేట్ చేస్తూ కధను వ్రాసిన గుహనాధన్ని మెచ్చుకోవాలి .
ఇద్దరు స్టార్లతో సినిమా ఎలా తీయాలో అలాగే తీసారు . ఇలాంటి ఇద్దరు హీరోల సినిమాల్లో తిప్పలు విలన్లకే . ఇద్దరి చేత సమానంగా తన్నులు తినాలి . 1979 లో వచ్చిన ఈ మండే గుండెలు సినిమా కృష్ణ , శోభన్ బాబులు కలిసి నటించిన ఏడవ సినిమా .
Ads
కధలో కొత్తదనం ఉంది . సెంటిమెంట్ , ఏక్షన్ , కామెడీ , ఫైటింగులు అన్నీ పుష్కలంగా ఉన్నాయి . కానీ , కె వి మహదేవన్ అంతటివాడు సంగీత దర్శకత్వం వహించిన రామానాయుడు సినిమాలో పాటలు వారి లెవెల్లో హిట్ కాలేదు . బాగానే ఉంటాయి . థియేటర్లో వింటానికి శ్రావ్యంగానే ఉంటాయి .
పాటలన్నీ ఆత్రేయే వ్రాసారు . బాలసుబ్రమణ్యం , సుశీలమ్మలు పాడిన చల్లాచల్లని సత్యభామ పాట చాలా బాగుంటుంది . ఈ పాట తర్వాత బాగుండేది ఇది ప్రేమ సామ్రాజ్యం పాట . జిల్లు జిల్లుమంటున్నాయ్ నీళ్ళు , వీడే ధీర వీర శూర భీమసేనుడు , బంగారానికి సింగారానికి కుదిరింది బేరం పాటలు శ్రావ్యంగా ఉంటాయి . సత్యనారాయణ , అల్లు రామలింగయ్యల పాట ఒరే కారయ్యా ఏరా సారా సాంబయ్య పాట ఎలా ఉన్నా వాళ్ళిద్దరి గోల బాగుంటుంది .
ప్రి-శంకరాభరణం మంజు భార్గవి ఖవాలీ డాన్సుతోనే సినిమా మొదలవుతుంది . శోభన్ బాబు , కృష్ణ , గుమ్మడి , ప్రభాకరరెడ్డి , కాంతారావు , సత్యనారాయణ , అల్లు రామలింగయ్య , కాకరాల , పి యల్ నారాయణ , మిక్కిలినేని , నూతన్ ప్రసాద్ , కె వి చలం , సారధి , జయప్రద , జయసుధ , మాధవి , అంజలీదేవి , సూర్యకాంతం , రాధాకుమారి ప్రభృతులు నటించారు . చూడండి . ఎంతమంది ఉన్నారో !
ముగ్గురు హీరోలు , ముగ్గురు హీరోయిన్లు , తన్నులు తింటానికి కావలసినంత మంది విలన్లు & వారి గేంగ్ . ఫుల్ గరం మసాలా , వినోదాత్మక సినిమా . 18 సెంటర్లలో యాభై రోజులు ఆడింది . మీ ఊరు ఉందేమో చూసుకొండి . విజయవాడ , రాజమండ్రి , విశాఖపట్నాలలో వంద రోజులు ఆడింది .
కృష్ణ , శోభన్ బాబు అభిమానులు కావాలంటే మళ్ళా చూడొచ్చు . యూట్యూబులో ఉంది . మళ్ళా కూడా చూడబులే . జయప్రద , శోభన్ బాబు , కృష్ణ ముగ్గురూ చాలా అందంగా ఉంటారు . కాబట్టి చూడబులే . #తెలుగుసినిమాలసింహావలోకనం #తెలుగుసినిమాలు #telugumovie, #telugucinema …… (దోగిపర్తి సుబ్రహ్మణ్యం)
Share this Article