.
Subramanyam Dogiparthi ………. విజయవంతమైన మరో కౌబాయ్ కం ట్రెజర్ హంట్ సినిమా 1984 లో వచ్చిన ఈ మెరుపుదాడి . మన తెలుగులో దేవతలారా దీవించండి , మోసగాళ్ళకు మోసగాడు వంటి ట్రెజర్ హంట్ సినిమాలు ఈ సినిమాకు ముందే ఉన్నాయి . ఇంక మెకన్నాస్ గోల్డ్ గురించి చెప్పేదేముంది ! ట్రెజర్ హంట్ సినిమాలకు చిరునామా .
దేవతలారా దీవించండి సినిమాను నిర్మించిన గిరిబాబే ఈ సినిమాకూ ఆద్యుడు , కధా రచయిత , స్క్రీన్ ప్లే రైటర్ కూడా . మొదట చిరంజీవి , మోహన్ బాబులతో తీద్దామని కధను చిరంజీవికి వినిపిస్తే ఆయన కొన్ని మార్పులు చెప్పారట . మార్పులను చేయటానికి ఇష్టపడని గిరిబాబు భానుచందర్ , సుమన్లతో తీసారట .
యన్ రామచంద్రరావు దర్శకత్వంలో వచ్చిన ఈ సినిమా వ్యాపారపరంగా కూడా విజయమయింది . నిధి నిక్షేపాల మీద రీసెర్చ్ చేసే ఒక ప్రొఫెసర్ రత్నగిరి సామ్రాజ్యాధిపతి దాచిపెట్టిన నిధి వివరాలను శోధించి ఆ నిధి కోసం బయలుదేరుతాడు .
Ads
సాహసవంతుల కోసం వెతుకుతూ వెళుతుంటాడు . చిల్లర దొంగతనాలను చేస్తూ మిత్రులయిన సుమన్ , భానుచందర్ , హంటర్ జయమాలిని , నక్కజిత్తుల గొల్లపూడి మారుతీరావు , కళ్ళకు గంతలు కట్టుకుని కత్తులు విసిరే గిరిబాబు , అతని చెల్లెలు సుమలతతో టీంను ఏర్పాటు చేసుకుని సంసిధ్ధమవుతాడు ప్రొఫెసర్ పాత్రలో రంగనాథ్ .
అడవులు , అడవి జాతి వాళ్ళు , వాళ్ళు ఈ బృందాన్ని బంధించటం , దొర కూతురు భానుచందర్ మీద మోజు పడటం , వాళ్ళ బారి నుండి బయటపడటం , పులి ఎలుగుబంటు పోరాటం , పాము ముంగిస పోట్లాట , అడవిలో డాన్సులు , ఫైనల్గా నిధిని కనుక్కోవటం , క్లైమాక్సులో విలన్లు రావటం , విలన్లను మట్టుబెట్టటం , నిధిని తీసుకుని వెనుతిరగటం . ఇదీ కధ టూకీగా .
కధ ట్రెజర్ హంట్ సినిమాల ఫార్ములాలో ఉన్నా గిరిబాబు స్క్రీన్ ప్లేని బిర్రుగా వ్రాసుకోవటం వలన ప్రేక్షకులకు బోర్ లేకుండా సాగుతుంది . ఇద్దరు హీరోల హీరోచిత ఫైట్లు బాగుంటాయి . స్టంట్ మాస్టర్ రాజును అభినందించాలి .
మోసగాళ్ళకు మోసగాడు సినిమాలో నాగభూషణం పాత్ర వంటి పాత్ర ఈ సినిమాలో కూడా ఉంటుంది . గొల్లపూడి మారుతీరావు నటించాడు . గ్లామర్ స్పేసుని సుమలత , జయమాలిని ఫిల్ చేసారు . వీళ్ళిద్దరి డాన్సులతో పాటు సిల్క్ స్మిత సిల్కీ డాన్స్ పాట కూడా ఒకటుంది .
ఇళయరాజా సంగీత దర్శకత్వం వహించిన ఈ సినిమాలో డ్యూయెట్లు , గ్రూప్ పాట , అన్నీ బాగుంటాయి . థియేటర్లో బాగున్నా బయట హిట్ అయినట్లుగా లేవు . చంద్రమ్మా గంధమందుకో , వెండి మబ్బు చీరె కట్టుకో , ఇటు ప్రళయం అటు విలయం పాటలు బాగుంటాయి . కోడి కాదురా ఈ లేడినందుకో అంటూ సాగుతుంది సిల్క్ స్మిత డాన్స్ పాట . పాటలనన్నీ వేటూరే వ్రాసారు . బాలసుబ్రమణ్యం , యస్ జానకి , యస్ పి శైలజ పాడారు .
డైలాగులను అప్పలాచార్య బాగానే వ్రాసారు . ఏక్షన్ , ఎడ్వంచర్ సినిమా కదా ! అవి ఉంటే చాలు . ఇతర ప్రధాన పాత్రలలో ప్రభాకరరెడ్డి , త్యాగరాజు , సారధి , కె విజయ , సుత్తి వీరభద్రరావు , నర్రా , చలపతిరావు , దేవి , ప్రభృతులు నటించారు .
ఇప్పటి సినిమాల్లాగానే స్పీడుగా సాగుతుంది . యూట్యూబులో ఉంది . కోబాయ్ , ట్రెజర్ హంట్ , ఏక్షన్ సినిమాల మీద ఆసక్తి ఉన్నవారు చూడవచ్చు . జయమాలినిది ఫుల్ లెంగ్త్ పాత్ర . ఆమె అభిమానులు కూడా చూడవచ్చు . చూడబులే . తలకోన అడవుల అందాలను బాగానే చూపారు . It’s an adventure , action , romantic , treasure hunt movie . #తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article