.
. ( దోగిపర్తి సుబ్రహ్మణ్యం ) .. ….. పాపం శ్రీదేవి ! రాఘవేంద్రరావు ఈ సినిమాలో శ్రీదేవి చేత సిగరెట్ కూడా తాగించాడు . 1980 లో వచ్చిన ఈ మోసగాడు సినిమాలో శ్రీదేవి డబుల్ ఫోజు కూడా . ఒక శ్రీదేవి శోభన్ బాబుకి జోడీ , ఇంకో శ్రీదేవి చిరంజీవికి జోడీ .
కవలపిల్లలు . ఒక శ్రీదేవి అల్లరిచిల్లరిగా తిరిగే యువతి , మరో శ్రీదేవి మట్టసంగా ఉండే యువతి . చిరంజీవి ఫుల్ విలన్ పాత్రలో నటించాడు . క్రాంతికుమార్ నిర్మాత . 1976 లో హిందీలో హిట్టయిన ఖాన్ దోస్త్ సినిమాకు రీమేక్ .
Ads
చిరంజీవి ఊళ్ళో బేవార్సుగా తిరిగే రౌడీషీటర్ . అల్లరిచిల్లరగా తిరిగే అక్క శ్రీదేవికి ప్రియుడు . సహజీవనం చేస్తుంటారు . శోభన్ బాబు , చెల్లెలు శ్రీదేవి ప్రేమించుకుంటారు . చిరంజీవికి చెల్లెలు శ్రీదేవి మీద కన్ను ఉంటుంది .
పెళ్ళిచేసుకోవటానికి గుడికి చేరిన చెల్లెలు శ్రీదేవిని చిరంజీవి మానభంగం చేస్తాడు . చెల్లెలు శ్రీదేవి ఆత్మహత్య చేసుకుంటుంది . చిరంజీవిని శోభన్ బాబు చంపేసి ఉరి తీయబడతాడు . టూకీగా ఇదీ కధ .
ఈ సినిమాలో హృద్యమైన పాత్ర సత్యనారాయణది . రామ భక్తుడు . జైల్లో హెడ్ కానిస్టేబుల్ . జైలుకొచ్చిన శోభన్ బాబుకు దేవుడిచ్చిన అన్న అవుతాడు . కళ్ళు పోగొట్టుకుంటాడు . శోభన్ బాబు తన కళ్ళను దానం చేస్తాడు . తర్వాత ఉరి తీయబడతాడు .
అక్క శ్రీదేవి పాత్ర బాగుంటుంది . శ్రీదేవి చక్కగా నటించింది . శోభన్ బాబుకి ఇలాంటి పాత్రలు కొట్టిన పిండే . చిరంజీవికి కూడా ఇలాంటి నెగటివ్ పాత్రలు అలవాటే . ఈ సినిమాలో కూడా గుబురు మీసాలే ఉంటాయి .
1980 లో విడుదలయిన ఈ సినిమాను ఎప్పుడు ప్రారంభించారో ! ఇతర పాత్రల్లో నిర్మలమ్మ , గుమ్మడి , సారధి , అనిత , కె వి చలం ప్రభృతులు నటించారు .
చక్రవర్తి సంగీత దర్శకత్వంలో పాటలన్నీ శ్రావ్యంగా ఉంటాయి . ఓ కురిసే నవ్వుల కుంకుమ పువ్వుల పాటలో అతిలోకసుందరి నృత్యం బాగుంటుంది . రాఘవేంద్రరావు మార్క్ డాన్స్ పాట . ఏ వసంతమిది ఎవరి సొంతమిది , ఆ చూపుకు అర్థమేంది పాటలు చాలా శ్రావ్యంగా ఉంటాయి .
జైల్లో ఖైదీలు స్వాతంత్ర్య దినోత్సవం నాడు పాడే ఎగరాలి జాతీయపతాకం చాలా బాగుంటుంది . సత్యనారాయణ , శోభన్ బాబుల నటన బాగుంటుంది . ఎర్ర నారాయణమూర్తి ఈ పాటలో ఒక ఖైదీగా కనిపిస్తాడు .
చిరంజీవి , జయమాలినిల మీద ఆకుంది ఒక చోట పోకుంది ఒక చోట హుషారుగా ఉంటుంది . హిందీలో సినిమాలో సత్యనారాయణ పాత్రను రాజ్ కపూర్ నటించారు . శతృఘ్న సిన్హా , యోగితా బాలి , మితు ముఖర్జీ తదితరులు నటించారు .
మన తెలుగు సినిమా , పాటల వీడియోలు యూట్యూబులో ఉన్నాయి . శ్రీదేవి , చిరంజీవి , శోభన్ బాబు , సత్యనారాయణ అభిమానులు చూడవచ్చు . చూడబులే .
నలుగురిలో ముగ్గురు చనిపోతారు . గుండె దిటవు చేసుకొని చూడటం మొదలుపెట్టండి . ముఖ్యంగా చిరంజీవి చంపబడటం , శ్రీదేవి మానభంగం చేయబడటం , సిగరెట్ ముట్టించటం !! #తెలుగుసినిమాలసింహావలోకనం #తెలుగుసినిమాలు
Share this Article