.
దక్షిణాఫ్రికాలో పుట్టింది… ప్రపంచ వేదికపై మానవ హక్కుల కోసం పోరాడింది… అంతర్జాతీయ న్యాయరంగంలో తనదైన ముద్ర వేసింది… చివరకు ప్రపంచంలోనే అత్యంత ప్రతిష్ఠాత్మకమైన నోబెల్ శాంతి బహుమతిని అందుకుంది…
ఇంతటి ఉన్నత స్థాయికి చేరుకున్నా… ఆమె మనసులో మాత్రం ఓ చిన్న ఊరు, అక్కడెక్కడో మిగిలిపోయిన తనవాళ్లు, తన తండ్రి చివరి కోరిక చెరిగిపోలేదు… అందుకే వేల కిలోమీటర్ల దూరం నుంచి తన మూలాలను వెతుక్కుంటూ వచ్చింది… దాదాపు శతాబ్దం క్రితం తెగిపోయిన బంధాలను కలుపుకుంది… తండ్రి కోరికను నెరవేర్చింది…
Ads
ఆమె నవానెథమ్‌ ‘నవీ’ పిళ్లై! 2026 నోబెల్ శాంతి బహుమతి గ్రహీత… ఇప్పుడు ఆమె పేరు ప్రపంచమంతా మారుమోగుతోంది… కానీ తమిళనాడులోని దిండుక్కల్‌ జిల్లా వత్తలగుండు గ్రామానికి మాత్రం ఆమె పేరు కొత్తేమీ కాదు… అక్కడి ప్రజలకు ఆమె ఓ అంతర్జాతీయ ప్రముఖురాలు మాత్రమే కాదు… తమ ఇంటి ఆడపడుచు కూడా!
ప్రపంచాన్ని గెలిచినా… మూలాలను మర్చిపోలేదు! నవీ పిళ్లై పుట్టింది దక్షిణాఫ్రికాలో… పెరిగింది అక్కడే… వర్ణవివక్ష రాజ్యమేలిన రోజుల్లో వివక్షను ఎదుర్కొంటూనే న్యాయవాదిగా ఎదిగింది… రాజకీయ ఖైదీల హక్కుల కోసం పోరాడింది… అంతర్జాతీయ న్యాయస్థానాల్లో కీలక బాధ్యతలు నిర్వహించింది… ఐక్యరాజ్యసమితి మానవ హక్కుల హైకమిషనర్‌గా పనిచేసింది… యుద్ధ నేరాలు, మానవత్వానికి వ్యతిరేకమైన నేరాలు, మారణహోమాలపై అంతర్జాతీయ చట్టాల అమలుకు చేసిన కృషికి గుర్తింపుగా 2026లో నోబెల్ శాంతి బహుమతి అందుకుంది…
- అయితే ఈ ప్రపంచస్థాయి ప్రయాణం వెనుక మరో కథ ఉంది… అది ఆమె పూర్వీకులది… దక్షిణ భారతదేశంలోని ఓ చిన్న గ్రామం నుంచి సముద్రాలు దాటి దక్షిణాఫ్రికాకు వెళ్లిపోయిన కుటుంబం కథ…
నవీ పిళ్లై తాత అళగర్‌సామి నాయుడు 1890 ప్రాంతంలో తన భార్యతో కలిసి దక్షిణాఫ్రికా వెళ్లిపోయాడు.. అప్పటికి ఆయన వయసు కేవలం 21 ఏళ్లు… ఆ తర్వాత ఆ కుటుంబానికి, తమిళనాడులో మిగిలిపోయిన బంధువులకు మధ్య సంబంధాలు తెగిపోయాయి… తరాలు మారిపోయాయి… బంధువులు ఎక్కడున్నారో తెలియని పరిస్థితి… రెండు దేశాల్లో రెండు కుటుంబాలుగా జీవితం సాగిపోయింది…
తండ్రి చివరి కోరిక… కూతురి అన్వేషణ! నవీ పిళ్లై తండ్రి నారాయణసామి నాయుడు 2006లో మరణించాడు… ఆయనకు తన పూర్వీకుల ఊరితో అనుబంధం ఉండేది… 1970లో దక్షిణాఫ్రికా నుంచి వత్తలగుండుకు వచ్చినప్పుడు అక్కడి బంధువులను కలుసుకున్నాడు… తనకు చెందిన భూమిని స్థానిక ఆలయ నిర్మాణానికి విరాళంగా ఇచ్చాడు… తిరిగి వస్తానని చెప్పి వెళ్లినా, ఆ తర్వాత రాలేకపోయాడు…
- అయితే ఆయన మనసులో ఓ కోరిక మిగిలిపోయింది… తన అస్థికలను రామేశ్వరం సముద్రంలో కలపాలన్నది ఆ కోరిక… అందుకోసం తన కుటుంబ మూలాలున్న ఊరిని, అక్కడి బంధువులను గుర్తించడం అవసరమైంది…
తండ్రి మరణానంతరం ఆ బాధ్యతను నవీ పిళ్లై తీసుకుంది… అంతర్జాతీయ న్యాయరంగంలో కీలక బాధ్యతలు నిర్వహిస్తున్న ఆమెకు ఇది కేవలం ఓ కుటుంబ వివరాల సేకరణ కాదు… తన తండ్రి జ్ఞాపకానికి, తమ పూర్వీకుల వారసత్వానికి సంబంధించిన విషయం…
2007లో ఆమె తన సోదరులతో కలిసి తమిళనాడుకు వచ్చింది… కానీ చేతిలో బంధువుల పూర్తి వివరాలు లేవు… చిరునామాలు లేవు… దాదాపు శతాబ్దం క్రితం వలస వెళ్లిపోయిన కుటుంబాన్ని ఎలా వెతకాలి? చివరకు అప్పటి జిల్లా కలెక్టర్‌ సహాయంతో ప్రభుత్వ అతిథిగృహంలో ఉంటూ అన్వేషణ మొదలుపెట్టింది… తన తండ్రి 1970లో వత్తలగుండు గ్రామస్థులతో దిగిన ఓ పాత ఫొటోను వెంట తెచ్చుకుంది… అదే ఆమె అన్వేషణలో కీలకమైన ఆధారమైంది.
ఓ టీ దుకాణం దగ్గర ఆ ఫొటోను చూపించినప్పుడు అక్కడి వ్యక్తి అందులో ఉన్న నారాయణసామి నాయుడును గుర్తుపట్టాడు… అలా ఒక్కో ఆధారం కలుస్తూ పోయింది… చివరకు బంధువుల ఆచూకీ లభించింది… వత్తలగుండు చేరుకున్న నవీ పిళ్లై అక్కడి కుటుంబ సభ్యులతో గడిపింది… గ్రామ దేవత ఆలయానికి వెళ్లింది… బంధువుల ఇళ్లకు వెళ్లి మాట్లాడింది… సుమారు వారం రోజుల పాటు ఆ ప్రాంతంలోనే ఉన్నది…
ఒక్కసారి ఆ దృశ్యాన్ని ఊహించండి! ప్రపంచవ్యాప్తంగా మానవ హక్కుల గురించి మాట్లాడే ఓ ప్రముఖ న్యాయవాది… తనకెంతో ముఖ్యమైన వ్యక్తిగత అనుబంధం కోసం ఓ చిన్న ఊరిలో ఆధారాలు వెతుక్కుంటోంది… ఓ పాత ఫొటోను పట్టుకుని తనవాళ్లను గుర్తించేందుకు ప్రయత్నిస్తోంది… ఆమెకు అప్పటికి నోబెల్ బహుమతి రాలేదు… కానీ ఆ క్షణంలో ఆమెకు కావాల్సింది ప్రపంచ గుర్తింపు కాదు… తనవాళ్ల గుర్తింపు!
కరవు… వలస… సముద్రాలు దాటిన జీవితాలు!
నవీ పిళ్లై కుటుంబ కథను అర్థం చేసుకోవాలంటే దాదాపు 130 ఏళ్ల వెనక్కి వెళ్లాలి… బ్రిటిష్‌ పాలనలో దక్షిణ భారతదేశంలోని అనేక ప్రాంతాలు కరవు, పేదరికంతో అల్లాడేవి… మరోవైపు దక్షిణాఫ్రికా, మారిషస్‌, ఫిజీ, మలేషియా, శ్రీలంక వంటి ప్రాంతాల్లో తేయాకు, చెరకు తోటలకు కూలీలు అవసరమయ్యేవారు…
ఈ పరిస్థితుల్లో బ్రిటిష్‌ పాలకులు ఒప్పంద కార్మికులుగా భారతీయులను పెద్ద సంఖ్యలో విదేశాలకు తరలించారు… ఉపాధి ఆశతోనో, కరవు నుంచి బయటపడాలన్న తపనతోనో, మెరుగైన జీవితంపై ఆశతోనో వెళ్లినవారిలో చాలామందికి తిరిగి స్వదేశానికి వచ్చే అవకాశం రాలేదు… కొందరి కుటుంబాలు అక్కడే స్థిరపడిపోయాయి… మరికొందరి బంధాలు రెండు దేశాల మధ్య కాలగర్భంలో కలిసిపోయాయి…
నవీ పిళ్లై పూర్వీకుల వలస కూడా ఈ చారిత్రక నేపథ్యంతో ముడిపడి ఉంది… వారి కుటుంబం దక్షిణాఫ్రికాలో స్థిరపడిపోయింది… అక్కడి సామాజిక వివక్షను ఎదుర్కొంటూ తర్వాతి తరాలు జీవితాలను నిర్మించుకున్నాయి…
నోబెల్ బహుమతి రాగానే పండుగ చేసుకుంటున్న ఊరు! ఇప్పుడు వత్తలగుండులో ఆనందం వెల్లివిరుస్తోంది… తమ ఊరితో మూలాల అనుబంధం ఉన్న మహిళకు నోబెల్ శాంతి బహుమతి రావడం గ్రామస్థులకు గర్వకారణమైంది… ఆమె తమ బంధువని చెప్పుకోవడమే కాదు… ప్రపంచస్థాయిలో గుర్తింపు పొందిన ఆమె జీవిత ప్రయాణంలో తమ ఊరికి కూడా ఓ స్థానం ఉందని సంబరపడుతున్నారు…
విదేశాల్లో ఉన్నా… మనసు మాత్రం పుట్టిన నేలపైనే! నవీ పిళ్లై కథ ఒక్క కుటుంబానికి సంబంధించినది మాత్రమే కాదు. ప్రపంచవ్యాప్తంగా విస్తరించిన భారతీయ ప్రవాసుల జీవితాల్లో కనిపించే ఓ భావోద్వేగ సత్యం కూడా…
దక్షిణాఫ్రికా నుంచి అమెరికా వరకు, బ్రిటన్‌ నుంచి కెనడా, ఆస్ట్రేలియా వరకు భారతీయ మూలాలున్న లక్షలాది మంది విదేశాల్లో స్థిరపడ్డారు… కొందరు అక్కడే పుట్టారు… మరికొందరు చిన్నతనంలోనే దత్తత వెళ్లిపోయారు… ఇంకొందరి పూర్వీకులు ఎప్పుడో వందేళ్ల క్రితమే దేశం దాటారు… కొత్త భాషలు నేర్చుకున్నారు… కొత్త సంస్కృతుల్లో కలిసిపోయారు… ఉన్నత విద్య, ఉద్యోగాలు, వ్యాపారాలతో జీవితాలను నిర్మించుకున్నారు…
అయినా చాలామందికి తమ మూలాలపై ఆసక్తి తగ్గడం లేదు. తాతముత్తాతలు ఏ ఊరివారు? తమ ఇంటిపేరు వెనుక చరిత్ర ఏమిటి? పూర్వీకులు ఎప్పుడు, ఎందుకు విదేశాలకు వెళ్లారు? స్వగ్రామంలో తమ బంధువులు ఇంకా ఉన్నారా? అనే ప్రశ్నలకు సమాధానాలు వెతుకుతున్నారు…
ఇందులో కొందరు కుటుంబ పెద్దలు చెప్పిన కథల ఆధారంగా పూర్వీకుల ఊళ్లకు వెళ్తున్నారు… మరికొందరు పాత ఫొటోలు, ఉత్తరాలు, కుటుంబ రికార్డులు, వంశవృక్షాల ఆధారంగా అన్వేషిస్తున్నారు… ఆధునిక సాంకేతికత, ఆన్‌లైన్‌ వంశవృక్ష సేవలు, డిజిటల్‌ రికార్డులు ఈ అన్వేషణకు కొత్త మార్గాలు చూపిస్తున్నాయి… డీఎన్‌ఏ పరీక్షల ద్వారా దూరపు బంధుత్వాలపై ఆధారాలు తెలుసుకునే ప్రయత్నాలు కూడా జరుగుతున్నాయి…
అమెరికాలో స్థిరపడిన భారతీయులు తమ తల్లిదండ్రుల ఊళ్లకు వచ్చి పాత ఇళ్లను వెతుక్కోవడం, పూర్వీకుల ఇళ్లను చూడడం, బంధువులను కలుసుకోవడం మనకు కనిపిస్తూనే ఉంటుంది… కొందరు తమ పూర్వీకుల పేర్లతో గ్రామాల్లో సేవా కార్యక్రమాలు చేస్తున్నారు… ఇంకొందరు కుటుంబ చరిత్రను పుస్తకాలుగా రాస్తున్నారు… తమ పిల్లలకు భారతీయ మూలాలను పరిచయం చేస్తున్నారు…
విదేశాల్లో పుట్టిన తర్వాతి తరాలకు ఈ అనుబంధం మరింత ఆసక్తికరంగా మారుతోంది… వారు పూర్వీకుల దేశాన్ని పర్యాటక ప్రదేశంగా మాత్రమే కాకుండా, తమ కుటుంబ కథ మొదలైన నేలగా చూడాలనుకుంటున్నారు…
మనిషి ఎంత ఎత్తుకు ఎదిగినా, ఎంత దూరం వెళ్లినా… తన కథ ఎక్కడ మొదలైందో తెలుసుకోవాలన్న ఆసక్తి ఎప్పుడో ఒకప్పుడు కలగవచ్చు… పుట్టిన నేలతో బంధం లేకపోయినా, పూర్వీకుల నేలతో అనుబంధం ఏర్పడవచ్చు… తరాలు మారినా, దేశాలు మారినా, భాషలు మారినా… కుటుంబ జ్ఞాపకాలు మాత్రం మనిషిని వెనక్కి పిలుస్తూనే ఉంటాయి…!!
Share this Article