పారిపోవడం కూడా యుద్ధవ్యూహంలో ఓ భాగమే అంటారు పెద్దలు...

Subramanyam Dogiparthi….. పారిపోవటం కూడా యుధ్ధ వ్యూహంలో ఒక భాగమే అని ఈమధ్య వచ్చిన మహాభారతం సీరియల్లో శ్రీకృష్ణుడు చెపుతాడు . సీరియల్ అని ఎందుకు అన్నానంటే వ్యాస భారతంలో అన్నాడో, భాగవతంలో అన్నాడో నాకు తెలియదు . ప్రవచనకర్తలు జరాసంధుని గోల పడలేక కృష్ణుడు మధుర నుండి ద్వారకకు షిఫ్ట్ అయ్యాడని చెపుతుంటారు . సరే . ఇప్పుడు కలియుగ భారతానికి వద్దాం …

పాపం రాహుల్ ! 2004 , 2009 , 2014 ఎన్నికల్లో అమేధీ నుండి లోకసభకు గెలిచారు . 2019 లో అమేధీలో ఓడిపోయి , వాయినాడ్లో గెలిచారు . ఇప్పుడు 2024 ఎన్నికలకు వాయినాడ్ , రాయబెరెల్లీ నుండి పోటీ చేస్తున్నారు .BJP వారు రాహుల్ పారిపోయాడని ఎత్తిపొడుస్తున్నారు . రాజకీయాల్లో సూటిపోటి మాటలు మామూలే . కానీ…

నరేంద్ర మోడీ గుజరాత్ వారు . 2014 ఎన్నికల్లో వదోధర , వారణాసి రెండు నియోజకవర్గాల నుండి పోటీ చేసారు . 2019 ఎన్నికల్లో వారణాసి నుండి పోటీ చేసి గెలిచారు . పొలిటికల్ కెరీర్ అంతా గుజరాతే అయినా వారణాసి నుండి కూడా ఎందుకు పోటీ చేసారో తెలియదు …

BJP వ్యవస్థాపకులలో ఒకరయిన వాజపేయి ఉత్తర ప్రదేశ్ వారు . ఆయన బలరాంపూర్ , మధుర , లక్నో , గ్వాలియర్ , ఢిల్లీ , గాంధీనగర్ నియోజక వర్గాల నుండి పోటీ చేసారు . కొన్ని సార్లు ఓడిపోయారు . ఇవన్నీ ఉత్తర ప్రదేశ్ లో లేవు …

మరొక వ్యవస్థాపకులు అధ్వాణీ . ఆయన కరాచీలో విభజనకు ముందు జన్మించి , తర్వాత బొంబాయికి వచ్చారు . ఆయన ఢిల్లీ , గాంధీ నగర్ లోకసభ సీట్ల నుండి పోటీ చేసారు …

భాజపా మిత్రులు అమితంగా అభిమానించే కాంగ్రెస్ నాయకుడు పివి . ఆయన తెలంగాణా వారు . హనుమకొండ నుంచే కాదు , రాంటెక్ , నంద్యాల , బెర్హంపూర్ ల నుండి కూడా పోటీ చేసారు .

రాజకీయ నాయకులు ఏ ప్రాంతం వారయినా ఎక్కడెక్కడ నుండో పోటీ చేస్తుంటారు , పారిపోతుంటారు . అవన్నీ యుధ్ధ వ్యూహాలే మనకు నచ్చితే . అదండీ ఈ పారిపోయే స్టోరీ …

Share this Article