బ్రహ్మముడి సూపర్ హిట్… కార్తీకదీపం జస్ట్ పాస్… త్రినయని బాగా డౌన్…

త్రినయని కావచ్చు, ప్రేమ ఎంత మధురం కావచ్చు, పడమటి సంధ్యారాగం కావచ్చు… జీ తెలుగు టీవీలో అన్నీ రీమేక్ సీరియల్సే కదా… కాకపోతే ఎంత బాగా ప్రేక్షకులకు కనెక్టయ్యేలా రీమేక్ చేశామనేది ప్రధానం… అవునవును, స్టార్‌మాటీవీలో కూడా రీమేకులే పాపులర్…

గతంలో కార్తీకదీపం ఏదో మలయాళ సీరియల్‌కు రీమేక్… కానీ దాన్ని ఇష్టారాజ్యంగా తిప్పీ, తిప్పీ, వంకర బాటలు పట్టి, ఫస్ట్ పార్ట్‌ను ఘోరంగా ముగించిన సదరు దర్శక ఘనుడు… ఇప్పుడు సీక్వెల్ అంటున్నాడు… తీరా చూస్తే ఆ పాత కార్తీకదీపానికీ దీనికీ లింకే లేదు… ఇది మరీ వెలుగు తక్కువ నాసిరకం దీపం… అందుకే పాత కార్తీకదీపం రేటింగులను అందుకోలేక చతికిలపడుతోంది…

చూశారు కదా… కార్తీకదీపం ఓరోజు మరీ 8.19 రేటింగుల దగ్గర కొట్టుకుంటోంది… కానీ తెలుగు సీరియల్స్‌లో ఇప్పడు అదే స్టార్ మాటీవీలో వచ్చే బ్రహ్మముడి… అదెందుకు అంత ఆదరణ పొందుతోంది..? స్టార్ మాటీవీ వాడే ఏదైనా పుష్ చేస్తున్నాడో తెలియదు గానీ… గతంలో కార్తీకదీపం అనుభవించిన స్టార్ సీరియల్ స్టేటస్ ఇప్పుడది అనుభవిస్తోంది… ఫాఫం, ప్రేమీ విశ్వనాథ్, నిరుపమ్ పరిటాల…

జీతెలుగు గురించీ చెప్పుకోవాలి… గతంలో త్రినయని, ప్రేమ ఎంత మధురం టాప్… క్రమేపీ ప్రేమ ఎంత మధురం కథనలోపాలు, దిక్కుమాలిన ట్విస్టులతో తీసేవాడికి చూసేవాడు లోకువ అన్నట్టుగా మార్చేశారు… లాజిక్కురాహిత్యాలే అడుగడుగునా… దాంతో అది అసలు టాప్ 30 జాబితాలోనే లేకుండా ఎగిరిపోయింది… ఇక లేవదు, మరీ విసుగెత్తిస్తోంది… పైగా ఈనడుమ దాన్ని నాన్-ప్రైమ్ టైమ్‌లోకి తోసేశారు…

కాస్తోకూస్తో ఆషిక పడుకోన్ త్రినయనిగా నటించిన ఆ సీరియల్ కాస్త బెటర్ ఉండేది… ఇప్పుడదీ డ్రామాకన్నా మూఢనమ్మకాలకే పెద్దపీట వేస్తూ, ఎమోషన్స్‌ను పాతరేయడంతో అదీ దెబ్బతినిపోయింది… ఆమధ్య ప్రమాదంలో మరణించిన పవిత్ర ప్లేసులో మరో అందగత్తె వచ్చినా, ఆమె కూడా బాగానే చేస్తున్నా… అయిపోయింది, సీరియల్ జోష్‌ రాను రాను క్షీణదశే ఇక… స్టార్ మాటీవీలో వచ్చే గుండె నిండా గుడిగంటలు, ఇంటింటి రామాయణం కూడా పాపులరవుతున్నాయి…

పడమటి సంధ్యారాగం బాగా క్లిక్కవుతోంది… అది ఏకంగా స్టార్ మాటీవీ సీరియళ్లతో పోటీపడుతోంది… తెలియందేముంది..? అదీ ఏదో ఇతర భాష సీరియల్‌కు రీమేకే… కాకపోతే ఎందుకో తెలుగు ప్రేక్షకులకు కూడా కనెక్టవుతోంది… అందుకే టాప్ రేటింగు జాబితాలో చోటు సంపాదించింది… ఎప్పటిలాగే ఈటీవీ సీరియళ్లు దిగదుడుపు… రియాలిటీ షోలు మరీ దిగదుడుపు… జెమిని టీవీ సీరియళ్ల గురించి వేరే చెప్పనక్కరలేదుగా…!! సరే, ఢీ ఎప్పుడో దెబ్బతినిపోయింది, చివరకు సుడిగాలి సుధీర్ హోస్ట్ చేసే ఫ్యామిలీ స్టార్స్ చతికిలపడిపోయింది ఫాఫం..!!