Just డేటా సెంటర్ కాదు… తెలంగాణ భవిష్యత్తుకు ‘కంప్యూట్ పవర్’!

.

డేటా సెంటర్ కాదు… తెలంగాణ భవిష్యత్తుకు ‘కంప్యూట్ పవర్’! టీసీఎస్ ₹70 వేల కోట్ల పెట్టుబడి ఎందుకు అంత పెద్ద విషయం? హైదరాబాద్‌లో మరో ఐటీ కంపెనీ ఆఫీసు వస్తోంది అనుకుంటే… ఈ వార్త విలువ అర్థం కాదు.

ఇది ఆఫీసు కాదు. వేలమంది ఉద్యోగులు రోజూ ల్యాప్‌టాప్‌లు పట్టుకుని వచ్చి పనిచేసే సాఫ్ట్‌వేర్ క్యాంపస్ కూడా కాదు. 264 ఎకరాల్లో… గరిష్ఠంగా ఇఒక గిగావాట్ సామర్థ్యంతో… ₹70 వేల కోట్ల వరకు పెట్టుబడితో నిర్మించబోయే AI డేటా సెంటర్ క్యాంపస్.

డేటా సెంటర్ అనగానే నీరు, పవర్ కోణాల్లో … జనం ఆందోళనల కోణంలో కొంత వ్యతిరేకత కనిపిస్తుంది… ఆమధ్య ఏపీలో డేటా సెంటర్ మీద ఇవే విమర్శలు… కానీ టీసీఎస్ో హైదరాబాదులో ఏర్పాటు చేయబోయే డేటా సెంటర్ హైదరాబాద్‌కు, రేవంత్ కలల ప్రాజెక్టు ఫ్యూచర్ సిటీకి, అంతిమంగా తెలంగాణకు ఎలా బహుళ ప్రయోజనకరం..? అదీ వివరంగా చూడాలి… ఇలా…

• టీసీఎస్ అనుబంధ సంస్థ HyperVault ఈ ప్రాజెక్టును హైదరాబాద్‌లో ఏర్పాటు చేయబోతోంది. పూర్తిస్థాయిలో అభివృద్ధి చేస్తే ఇది భారతదేశంలోనే అతిపెద్ద, అత్యాధునిక AI ఇన్‌ఫ్రాస్ట్రక్చర్ క్యాంపస్‌లలో ఒకటిగా నిలవనుంది.

ఇక్కడ అసలు ప్రశ్న… ఒక డేటా సెంటర్ వల్ల హైదరాబాద్‌కు, ఫ్యూచర్ సిటీకి, తెలంగాణకు వచ్చే లాభం ఏమిటి? చాలా పెద్దది. డేటా కొత్త చమురు అయితే… AIకి కంప్యూట్ పవర్ కొత్త మౌలిక వసతి. AI గురించి మనం మాట్లాడుతున్నప్పుడు ChatGPT, Gemini, Copilot, ఇతర AI అప్లికేషన్లు కనిపిస్తాయి. కానీ వాటి వెనుక కనిపించని ఒక మహా ప్రపంచం ఉంటుంది.

వేలాది GPUలు, భారీ సర్వర్లు, అపారమైన విద్యుత్, అత్యంత వేగవంతమైన ఫైబర్ నెట్‌వర్క్, శీతలీకరణ వ్యవస్థలు, డేటా స్టోరేజ్, సైబర్ సెక్యూరిటీ… అంటే AIకి కూడా రోడ్లు, పోర్టులు, విమానాశ్రయాలు లాంటి మౌలిక వసతి కావాలి. ఆ మౌలిక వసతినే AI Data Centre అంటారు.

టీసీఎస్ ఏర్పాటు చేయబోయేది సాధారణ డేటా సెంటర్ కాదు. AI training, AI inference, high-density GPU workloads కోసం ప్రత్యేకంగా రూపొందించే మౌలిక వసతి. HyperVault స్వయంగా direct-to-chip liquid cooling, అధిక rack density, భారీ power blocks, high-speed fibre వంటి సాంకేతికతలపై దృష్టి పెడుతున్నట్లు చెబుతోంది.

మరి తెలంగాణకు ఏం వస్తుంది? మొదటి లాభం కనిపించేదే… ₹70,000 కోట్ల వరకు పెట్టుబడి. కానీ పెట్టుబడి మొత్తమే అసలు లాభం కాదు. ఇంత పెద్ద డేటా సెంటర్ కట్టాలంటే విద్యుత్ కావాలి. భారీ ట్రాన్స్‌మిషన్ వ్యవస్థ కావాలి. ఫైబర్ నెట్‌వర్క్ కావాలి. కూలింగ్ సిస్టమ్స్ కావాలి. ఇంజినీరింగ్, నిర్మాణం, సెక్యూరిటీ, మానిటరింగ్, మెయింటెనెన్స్ కావాలి. హార్డ్‌వేర్ సరఫరా చేసే కంపెనీలు కావాలి. ఎనర్జీ కంపెనీలు కావాలి. నీటి నిర్వహణ, వ్యర్థాల రీసైక్లింగ్ వ్యవస్థలు కావాలి.

అంటే ఒక డేటా సెంటర్ వెనుక చిన్న చిన్న పరిశ్రమలతో కూడిన పెద్ద ఎకోసిస్టమ్ తయారవుతుంది. అందుకే ఈ ప్రాజెక్టు సుమారు 7,000 ప్రత్యక్ష, పరోక్ష ఉద్యోగాలను సృష్టించగలదని అంచనా వేస్తున్నారు. ఇంకా పెద్ద లాభం, ఇతర కంపెనీలను కూడా లాగుతుంది. ఇదే అసలు పాయింట్.

ఒక భారీ AI డేటా సెంటర్ వస్తే దాని చుట్టూ మరో పది రకాల వ్యాపారాలు రావడానికి అవకాశం ఉంటుంది. GPU infrastructure… Cloud services… Cyber security… AI startups… High-speed networking… Power management… Cooling technology… Data storage… Semiconductor ecosystem… AI research… ఇలా ఒక AI క్లస్టర్ తయారవుతుంది.

తెలంగాణ ప్రభుత్వం కూడా తన దీర్ఘకాలిక ప్రణాళికలో రాష్ట్రాన్ని భారతదేశంలోని ప్రముఖ AI డేటా సెంటర్ హబ్‌గా తీర్చిదిద్దాలని లక్ష్యంగా పెట్టుకుంది. అధిక సామర్థ్యం గల GPUలు, liquid cooling, GPU farms, supercomputing clusters, ప్రత్యేక విద్యుత్ మౌలిక వసతులు, multi-route fibre వంటి అంశాలను అందులో పేర్కొంది. అంటే టీసీఎస్ ప్రాజెక్టు ఒక ఒంటరి భవనం కాకుండా… ప్రభుత్వం ఊహిస్తున్న AI ecosystemకు ఒక anchor investment అవుతుంది.

ఫ్యూచర్ సిటీకి దీని ప్రాధాన్యం మరింత ఎక్కువ … ఫ్యూచర్ సిటీని కేవలం హైదరాబాద్‌కు మరో కొత్త టౌన్‌షిప్‌గా చూస్తే పొరపాటు. దాన్ని ప్రభుత్వం AI, డేటా సెంటర్లు, గ్రీన్ ఫార్మా, స్పోర్ట్స్, ఎడ్యుకేషన్, హెల్త్, GCCలు, Fortune 500 కంపెనీలను ఒకచోట చేర్చే కొత్త ఆర్థిక కేంద్రంగా అభివృద్ధి చేయాలని చూస్తోంది. అందులో డేటా సెంటర్లు ఒక కీలకమైన మౌలిక వసతి.

ఎందుకంటే రేపటి AI కంపెనీకి కేవలం ఆఫీస్ స్పేస్ సరిపోదు. Compute కావాలి. ఆ compute దగ్గరలోనే ఉంటే AI కంపెనీ ఇక్కడ కార్యకలాపాలు ఏర్పాటు చేసుకోవడం సులభం. అంటే…

ముందు డేటా సెంటర్ వస్తుంది.
దాని వెంట AI కంపెనీలు వస్తాయి.
వాటి వెంట స్టార్టప్‌లు వస్తాయి.
వాటి వెంట పెట్టుబడులు వస్తాయి.
ఆ తర్వాత ఉద్యోగాలు, సేవలు, రియల్ ఎస్టేట్, విద్యా సంస్థలు, పరిశోధనా కేంద్రాలు వస్తాయి. ఇదే ఒక టెక్నాలజీ క్లస్టర్ పుట్టే విధానం.

హైదరాబాద్‌కు మరో ప్రయోజనం—బెంగళూరుతో పోటీకి కొత్త ఆయుధం… హైదరాబాద్ ఇప్పటికే IT, ఫార్మా, లైఫ్ సైన్సెస్, GCCలలో బలమైన స్థానం సంపాదించింది. ఇప్పుడు AI మౌలిక వసతిలోనూ పెద్ద స్థాయిలో అడుగు పెడితే నగర ఆర్థిక వ్యవస్థకు మరో స్తంభం తయారవుతుంది.

ఇప్పటికే Microsoft, Amazon వంటి ప్రపంచ స్థాయి టెక్ కంపెనీలు భారత్‌లో భారీ డేటా సెంటర్ సామర్థ్యాన్ని పెంచుతున్నాయి. AI, cloud computingకు దేశంలో పెరుగుతున్న డిమాండ్ దీనికి ప్రధాన కారణం. టీసీఎస్-హైపర్‌వాల్ట్ ప్రాజెక్టు ఆ పోటీలో హైదరాబాద్‌ను మరింత బలమైన స్థానంలో నిలబెట్టే అవకాశం ఉంది.

అయితే ఆ ₹70 వేల కోట్ల చుట్టూ ₹ లక్ష కోట్ల ఎకోసిస్టమ్ ఏర్పడితేనే అసలు విజయం. డేటా సెంటర్‌లోనే ఉద్యోగాలు రావడం కాదు… దాని చుట్టూ తెలంగాణ కంపెనీలు ఎదగాలి. స్థానిక స్టార్టప్‌లు AI infrastructureలోకి రావాలి.

విశ్వవిద్యాలయాల్లో AI, semiconductor, data engineering పరిశోధనలు పెరగాలి. స్థానిక యువతకు high-end technology jobs రావాలి. Renewable energy, cooling, cybersecurity, networking, hardware sectorsలో కొత్త కంపెనీలు రావాలి. అప్పుడు మాత్రమే ఇది ఒక కంపెనీ పెట్టుబడి నుంచి తెలంగాణ టెక్నాలజీ ఎకానమీకి బూస్టర్ అవుతుంది.

చివరగా… ఒకప్పుడు హైదరాబాద్‌ను IT నగరం అన్నారు. తర్వాత Pharma capital అన్నారు. ఆ తర్వాత GCC hub అన్నారు. ఇప్పుడు మరో పేరు జోడించాల్సిన సమయం వచ్చింది. AI Compute Hub.

టీసీఎస్ HyperVault ప్రాజెక్టు 264 ఎకరాల్లో నిర్మించే ఒక భారీ భవనం మాత్రమే కాదు. రేపటి ఆర్థిక వ్యవస్థకు అవసరమైన ‘కంప్యూట్ పవర్’ను తెలంగాణలోనే ఉత్పత్తి చేసే మౌలిక వసతి. అమెజాన్ డేటా సెంటర్…  వోల్ట్-UPC ప్రాజెక్టు… ఇప్పుడు టీసీఎస్ HyperVault… ఇవన్నీ కలిస్తే ఫ్యూచర్ సిటీకి ఒక విషయం స్పష్టమవుతోంది.

అదే జరిగితే ‘ఫ్యూచర్ సిటీ’ అనే పేరు కేవలం ప్రచార నినాదం కాకుండా... తెలంగాణ ఆర్థిక వ్యవస్థకు కొత్త ఇంజిన్‌గా మారుతుంది.